السلام عليكم .....................شحالكم جميع ............عساكم بخير
اكتب وانا احس انه راسي يدور فسامحوني على الخربطة ....افكاري مو مرتبة ....اتمنى تفهمون مابين السطور قبل ما اكتبه من سطور...
في الماضي كنت اعارض وبشدة من يتقدم لي طالبا الزواج لاسباب عدة ...ابا اخلص دراستي ...ابا اشتغل ...ما ابغي من قرايبي.. ما ابغي اعرس لاني ما اعرف طبع الريال الى باخذه هل زين او مب زين ....تعقدت من اختي الي اكبر مني يوم خذت واحد قريب لنا وعيشها في ذل ومهانه طلعها من الجامعة ...وماخلاها تزورنا الا في الاعياد والمناسبات حتى عيالها ما يعرفونا عدل . كان سي السيد وانجلبت شخصيتها 360 درجة
على العموم الي بيحلل بيقول انا متعقدة من الزواج لاني اشوف اختي والى صارت له ..وانا يمكن عقلي الباطن يفكر جذيه بس في اشياء ثانية انا كنت افكر فيها اني مب مجبره اني اتزوج ريال وعقب يطلع مب كفو ومايستاهلني .....
انا من ناحية الجمال جميلة واجمل خواتي ومن ناحية الدراسة عندي احسن الشهادات ..... على العموم كنت اعارض الزواج لين صار عمري 27 سنة
طبعا وحدة فظيعه وقاتلة وشرا ما يقولون ظل راجل ولا ظل حيطه ... اهلي ما كانوا يضغطون علي بالزواج بس كانوا يحتشرون لما ارفض بس ما يغصبوني اني اتزوج
على العموم مرت الايام وصديقاتي الى كانن وياي اتزوجن ويابن عيال
عقب قلت لنفسي انا ليش افكر جيه ... اكيد في شباب وايد عدلين وكفو ... يعني مب كل الرياييل من قوم سي السيد والا مب زينين اكيد في شباب طيبين .
في ناس كانوا يخطبوني عن طريق توصية وانا كنت ارفض ...وفي ها الفترة وانا افكر رجعوا مرة ثانية وخطبوني ...وانا وافقت
وبديت افكر في الزواج وتجهيزات الزواج وكنت افكر انه تجهيزات الزواج مهمة بس بعدين اكتشفت انها ولا شي....... وريلي كان يكلمني في التلفون وانا الغبية ما كنت افهم شخصيته عدل لانه هو اكبر مني وذكي ...
وماكنت اتطلب وايد لا في اثاث ولا في غرفة ولا في عرس ولا في شي ... يعني كنت ابا المعقول
انصدمت من اول ليلة
كيف كان يعاملني مع انه كان يتكلم في الملكة كأنسان مثقف وانه الريال لازم يراعي البنت في ليلة الدخلة وانه مب بس يفكر في شهوته وبس وينسى الحرمة .............بس كل هذا الكلام كان جذب
ولا في شهر عسل ........ يطلع عني بالساعات من اول الايام ولا كأني عروس جديدة حسسني اني مب متزوجة ... والله انصدمت فيه .... حتى نظافته الشخصية ما يهتم فيها والله ......بالايام ما يستحم واذا استحم بيكون دش على السريع
كرهته وانا الى الى كنت ضد كل البنات الى يطلبون الطلاق ........افكر في الطلاق يوميا
انسان احسه عجوز مع انه اكبر مني بعامين................. انسان مايصلي الفجر اما باقي الصلوات قلت قبل يمكن يصليهن خارج المنزل بس بعدين تأكدت انه ما يصلي حتى التراويح ما يصلي ... لما يأذن يكون عند اخوانه الشباب وابوه ولما الجميع يروحون المسجد هو يدخل غرفته
بس يوم الجمعة يصلي ولما تروح عليه نومه ماشي صلاة .................حتى قضاء الصلوات ما يقضي
غير شخصية سي السيد الى يباني اسوي الى يباه بس ويمحى شخصيتي بالكامل ...وكل شي ممنوع ومنقود...............اهلي ممنوع ازورهم الا ساعة ما يبا وممنوع انام عندهم
وممنوع اسواق وممنوع دلع ممنوع طلعات
والله الحين صارلي ثلاث شهور .............وحضرته كل يوم يكلمني عن الحمل
الحين انا تصدقون اني متزوجة بس لا ارغب بالحمل ... ما ادري ليش افكر جذيه
ما اريد احمل منه
انا وياكم انه ريلي احسن عن غيره من الرياييل الى يضربون حريمهم او يزنون او يكلمون او يشربون .... بس شسوي مب طايقتنه ...... وانا ما استاهل هذا منه .... والله حسسني اني عجوز وانه عمري ستين سنه
هذا غير ريحة الدخان ... تصدقون انه بالاسابيع ما يتستحم ولو صارت وهي مرة ي الاسبوع يستحم بماي فقط من دون صابون بالله عليكم كيف استحمل علاقة جنسية مع هكذا رجل لا يهتم بنظافته الشخصية .......... بس والله اني ولا مرةحاولت احرجه ودوم انظف ثيابه وابخرهم وشريتله بوكس كامل عطور ولوشن وروايح بس ما استخدمه وعرضت عليه انه احممه بس مارضى ...احس بالقهر لما يستحمى ويرجع يلبس نفس الملابس الى كان عليه يقولي نظيفه مافيها شي ... انزين اذا ما يبغي يتكشخ حقي يتكشخ حق ربعه على الاقل والله ما تصورته جذيه
هذا الانسان مايعرف بوس او دلع بس يعرف الايلاج وانا اتألم كثير بس شسوي فيه .... فالح بس يقولي بتلعنج الملائكه
قضية الصلاة جد خطيرة............ انا اعرف انه كسول كثير ............. ولا يقضي اموري تصدقون من اول ما تزوجنا ما طلعنا غير مرة وحده خلال الثلاث شهور ......... المشكله انه مب مشغول والله لو انه يقضي امور اهله انا بفرح كثير او لو انه يشيل المسؤولية عن ابوه ....... لكن هذا انسان كسول ولا مرة شفته سوى خير ....... للعلم انا ساكنه مع اهله ...... تصدقون انا اصرف على عمري من راتبي ولا بعد يقولي عطيني من راتبج عشان نوفر انا وياج........ الدوام اهلي يودوني وهو ما يوديني لانه دوامه قريب وانا دوامي بعيد................ وما يخليني اروح بيت اهلي الا ساعة ما هو يبغي ... ودوم اطب على اهلي من دون سابق انذار وحالتي تكون زفته لاني ما اكون مستعده .....
هذا غيض من فيض وانا ما ذكرت عيوبه الا لاني ابا حد يرشدني وينصحني شسوي
هل انا متزوجه؟
انتظر ردودكم
حياكم الله
12-10-2006, 03:32 PM
ضوابط المشاركة
العرض العادي
