السلام عليكم ورحمة الله وبركاته
فيني عبرة كبر الدنيا وموضوعي كله ماكتبته إلا لأني أبي أفضفض
وألقى من يسمعني ويطمني ، يمكن بعضكم يعتبرني حساسه زيادة لكن هذا اللي أنا حاسه فيه ومضايقني
عمري ماتوقعت إن أشكي من أعز وأغلى الصديقات على قلبي وبنفس الوقت قريبتي
والمصيبة إني ماأقدر أوضح لهـا أو حتى أبين لها
إني متضايقة منها لأني أكره أشوف نفسي في موضع رحمه من أي أحدا ًكان
كنا في كل شي مشتركين حتى همومنا وحده الخاصة بالدراسة أيام دراستنا وبعدها
كانت أكثر من مره تنخطب ومايصير نصيب
وتتحطم ويضيق صدرها لأنهم يجون اهله ويشوفونها ويروحون وماكان عندها إلا أنا أجلس أواسيها وأطمنها
وبعد تعب والحمد لله تمت لها خطبة أخيرة وتزوجت وتوفقت ولله الحمد
إلا إنه اللي مضايقني صار لي بعد زواجها ، نفسي أفهم كيف قدرت تتغير كذا
كانت تقولي قبل تنخطب أدري لو تزوجتي ياغالية بتنسيني وأنا أنهبل عليها وأقول
خيير تستهبلين وش ينسيني والله لو إني بروح للمريخ
العكس صار وصارت وكأنها غريبة عني وعن همومي اللي كنا متشاركين فيها
علشان راحتي حاولت انسحب بهدوء منها وهي ماقصرت ابتعدت عني والحمد لله قلت بسلامتها والله يوفقها
لكن بعد فترة من زواجها صارت ماتكلمني الا اذا صارت عندها مشكلة او متضايقة تبيني اساعدها واهديها
أنا والله على قلبي مثل العسل وأنصح لها لكن لما تنتهي المكالمة يضيق صدري مره
ليش ماتجيني الا اذا تضايقت او طفشت تبيني اوسع صدرها وقبل ماتعبرني ولا كأننا صديقات وحبايب
تعلمت منها ماأوقف حياتي على أي احد اللي بيجلس معي ويسولف حياه الله
لكن اني اصادق صداقة قوية ماراح اسويها لاني ماابي انصدم واتحسر على نفسي
زمان كانت تشكيلي من صديقة لها متزوجة إنها ماتراعي شعورها ودايم تسولف لها عن زوجها
وطلعاتها وحركاتهم
والحين دارت الدنيا ونست كل شي وصارت تقولي مثل صديقتها زمان مع إني ماأحب أسألها أبدااا
ليش الانسان ينسى أو بالأحرى يتناسى حياته لما ربي يفرج همه ويوسع عليه بالرزق ؟؟
ليش الواحد مايحب لغيره مثل مايحب لنفسه إذا انت ماتحب احد يضايقك ويجرحك ليش تضايق غيرك ؟؟
المفروض لانك انت اكثر انسان عاش الهم وعرف شعوره وكيف كانت حالتك أيامه وخوفك من كلمة طايرة من هنا ولا هنا
تحاسب على كلامك لما ربي يعوضك خير وماتضايق غيرك
أنا ماهمني كثير وضعنا اللي صار لأنه اللي مايحسب لمشاعري وقلبي حساب يصير ولا شي بالنسبة لي
بس دايم أسأل نفسي هل ممكن أنا إذا ربي فرج علي همي بتغير ؟
وبصير ماأحس بمشاعر غيري ؟
ودائما ً أجاوب وأقول مستحيل لأني أكثر وحدة أحس بغيري وماأحب أجرح مشاعر أي أحد سواء ً يعرفني أو حتى لا
وكثير يقولون لي مثل كلامي لكن للأسف اللي كانت أقرب شي لقلبي ماحست فيني مثل ماتمنيتها
نصيحتي لكل الاعضاء هنا
ليس بمجرد حصولك على ماتتمنى تنسى من كان معك أيام همك وحزنك وتعيش بالحياة وكأنها ميسرة لك كل يوم
لأنه مافيه أي شي يدوم بالحياة ممكن الأيام الحلوة ماتطول معك وترجع لضيقك لكن هالمره ماراح تلقى احد يسمعك
وكله نتيجة تصرفاتك الأنانية
* موضوعي جدا ً ملخبط مثل مشاعري الآن ، حمسني لكتابته أخي الكبير الله يوفقه ، ربي يفرج هم كل مهموم
23-11-2006, 06:05 PM
ربي يفرج هم كل مهموم
) 
ضوابط المشاركة
العرض العادي
