لا اقدر أن احب زوجي .....!!! - منتدى عالم الأسرة والمجتمع

22-04-2007, 04:23 PM

الجازي**

عضو جديد

تاريخ التسجيل: Feb 2007

المشاركات: 41

لا اقدر أن احب زوجي .....!!!

السلام عليكم ورحمه الله وبركاته

اشلونكم اخواني واخواتي

لي صديقه مقربه مني كثيرا ...وانسانه طيبه احسبها كذلك ....وجميله وانيقه حتى وهي حامل تهتم بعمرها ومحافظه على رشاقتها حيل .. وربه بيت ممتازة ...ماشاء الله عليها ..

المهم رفيجتي هذي ..عندها مشكله متعبتها واجد ...حبيت استشيركم فيها ..عل وعسى اجد لديكم الحل لاني ماقدرت اعطيها الحل ..

السالفه انها تزوجت زواج عقل يعني الشخص اللي تزوجته تزوجته زواج العادي بدون حب وخرابيط ...تزوجته

باختيار دون مراعاة لعواطفها ومشاعرها باعتبار ان الحب قد ياتي كما تسمع بعد الزواج ..:14: طبعا استخارت كذا مرة وتوكلت على الله ..وعلى فكرة الشخص اللي تزوجته يقول انه كان يحبها من يومهم اصغار ...لانه يصير لها ولد عمها ...بالنسبه لها تقول ماكنت ابادله اي مشاعر نهائيا ...( تقول لي وهي تضحك شاسوي عندي قلب مايحب بسهوله ...

)بالعكس تقول كنت احس بنفور منه شديد ..
شوي قبل مايخطبني بفترة بسيطه ...هدت نفسيتي من ناحيته ...( النفور ) وصار انسان عادي بالنسبه لي ...وبعدين تقدم لي ..وكنت مترددة واجد ..وعزمت وتوكلت ..وخصوصا تقول انه يحبني ...

..المهم

تزوجته ..تقول الحمد لله ماقصرت فيه وكنت له خير الزوجه بشهادته واعترافه وانه مستانس اني كنت من نصيبه خصوصا ان كذا واحد كان يبيني ...تقول ماكاد شهر العسل ينتهي اللى انصدمت ذيك الصدمه اللي هزت كياني كله ...( السالفه فيها تحرش ) تقول طبعا واجهته وانكر بالرغم ان الطرف الثاني ( مراة ) اصرت وهي تبكي ان اللي صار حصل صحيح ...طبعا انه صدقتها لانها ثقه ثقه ثقه وقريبه مني واجد وعلى فكرة اهي كانت صغيرة يومها ...تقول تدرين شاللي خلاني اصدقها ...احساسي عمرة ماخاب ....جاني احساس ان فيه شي صار من وراي ...رحت اشوف وينه لقيته بالمجلس ...قاعد بروحه ..بس شكله غريب وصمته اغرب واغرب ومجرد ماشافني ماقدر يحط عينه ابعيني ...وتحلف تقول لين الحين انا ماعرفت لكن قلبي نغزني ...( واحساس المراة مايخيب في زوجها ) المهم تقول تركته ...ورحت اشوف وين راحت قريبتي

لاني بذاك الوقت كنت اطبخ وضننتها راحت عند مرة حماي بنفس البيت ..دورت دورت مالقيتها ...وكان جايني شعور غريب عجيب المهم تقول دورت في الحوش الا اسمع صوت نحيب من ورى البيت اللا طلعت قريبتي الصغيرة اتصيح من قلب ..وويها متغير تقول قلت اشفيج حبيبتي ...ماردت وتمت تبكي تقول قسم بالله قبل ماتنطق وتعترف بضغط مني والحاح كنت عارفه ان السالفه فيها زوجي ليش مادري( على فكرة رفيجتي هذي حاستها السادسه قويه حيل ) ماشاء الله عليها ..
المهم اعترفت البنت وهي خايفه تقول انه تحرش فيها تقول انا حاولت اقنعها انه مايقصد وانها يمكن فهمت غلط لكن البنت مصرة ان الحركه البايخه اللي سواها كان قاصد قصد ماسخ ...المهم تقول انا هديتها ومسحت ويها وطرشتها على بيت قرايبينا وخبرتها لاتخبر حد واني ماراح امرر السالفه على خير ...

المهم تقول في قرارة نفسي انا متكدة انها صادقه لانه يومها مب قادر يحط عينه ابعيني وكانه مسوي شي ..

المهم في الليل تقول واجهته وانكر كل شي وحلف ..لكن كل شي كان يدل على صدق كلامها لانه في النهايه انهار بدون مايعترف بس انهار امامي .

تقول زعلت وبعد فترة تصالحنى وبالعافيه رضيت ...المهم ان السالفه هذي بالاضافه لاشياء ثانيه مالقيت لها دليل اثرت السكوت فيها وقلت الله يكشفها لي .. تقول اثرت بنفسي وايد ..خصوصا انا كنا باول شهر ...وين اللي يقول انه يحبني ويموت فيني هذي اول طعنه خلف الله ...اشلون الجايات ...

.
المهم مشت الحياة ...وكان تعاملي معاه برغم اللي صار نعم الزوجه المهتمه بنفسها وببيتها والكل يشهد لي ...لكن بعد 3سنوات انصدمت الصدمه الثانيه واللي اقوى من الاولى وطبعا انكر واصر اني مريضه نفسيا وشكاكه ومن هالكلام اللي مايمر على ...طبعا انا كان عندي دليل قوي رحت لين عند التلفون وقلت يعني انت شايف كذا اني مريضه ومعقدة وشكاكه ...اوكيه بتصل بالطرف الثاني بالموضوع ...وبتشوف بنفسك اذا كنت شكاكه ...تقول برغم اللي صار كنت احس بقوة داخلي قوة عجيبه بالانتصار ...خصوصا مع توافر الادله

ورفعت التلفون ...على طول شال التلفون من يدي وانكسر امامي والله انها قمه الذل ان يحط انسان نفسه كذا مرة بنفس هالمواقف البايخه ..المهم اعترف بكل شي

وقال اسفه قلت ماتنفعني وين اصرفها ...المشكله ان اللي يتحرش بهم اقل منها بكل شي ..ومب ستايله يعني بالعكس هالنوعيه يحب يطنز عليهم ....المهم تموا متزاعلين فترة ...وتصالحوا بعد ان تعهد لها بعدم الرجوع لمثل هذي الامور ...

قالت له غلطه واحدة والله مارجع لك بعدها ..وبتشوف قول لي انا مقصرة فيك قال شهادة لله لا عجل ليه تسوى كذا قال الشيطان ..واوعدج معاد يصير شي من هذا انا احبج وانا ماستغنى كانت زله وقلبج كبير ومن هالكلام اللي مايجي معاي..

على فكرة نسيت اخبركم عن زوجها اهي تقول زوجي قلبه طيب ..واب ممتاز وكريم بعض الشي ..ولا له في الدوارة بالاسواق ..وماهوا راعي مغازل وتلفونات وسفرات بس من عيوبه هالشي وغموضه اللي مايريح ونكرانه رغم اني مساعدته ماديا بكل شي ..مرات ينكر ومرات يعترف ويقول مافيه مثلج ..والله احبج ..

المهم تقول رفيجتي مامر على هالموضوع فترة بسيطه اللي بالشغاله تشتكي منه ( تقول قسم بالله صار قبل ماحد يجيني يشتكي اكون حسيت ان فيه شي بالطريق جاي من هالمشاكل ..والغريب اسوي له كل شي كل شي يانـــــــــــــــــــــــــــــــــاس بالعكس اهوا اللي مقصر فيني من نواحي كثير ...وماني مهمله لدرجه مرات يقول واجد تهتمين بعمرج ...بالله حق منوا اهتم ...) ارجع حق سالفه الشغاله مرات تقول لين احرص اني ماترك له فرصه يكون معاها بالبيت بروحهم احرص من دون مايشعر ...لكن مرة فاجئني بانه ماخذ اجازة شهر من الدوام انصدمت وقلت بس مايصير عندي دوام ..قال عادي روحي دوامج محد مانعج قلت اوكيه بس باخذ العيال والشغاله واحطهم بيت هلي قال وشو ...ليه ..وعصب ..
قلت بعد مايصير تتم انت واحدة غريبه بالبيت قال :: ليه باكلها ...اقول لج انتي مريضه وشكاكه تقولين لا ..

قلت الله يقول ماخلا رجل وامراة اللا كان الشيطان ثالثهم ..قال :عاد من زينها عاد ..قلت المشكله ان الشيطان يزين لكم ..وانتوا ماتقصرون ...قال المعقدة سكري السالفه وماهي والعيال رايحين ...وماراح يصير شي ولا باكلها ويوم افكر مافكر بشغاله اذا كان وصل فيج مرض الشك للخدم ...وراح وتركني ..وانا داخلي يقول الحق الكذاب لين باب البيت ...على فكرة رفيجتي من النوع اللي تلتمس اعذار للاخرين واولهم زوجها وماتواجه بشكوكها اللا لين تحصل على دليل قوي..ودايما احساسها يجي صح بالذات بزوجها ..

تقول بعد اسبوع بس من الاجازة صار تحرش وكالعادة اتهمته وانكر وسبني وانتي وانت وانت ...ماخلا سبه الا قالها .على فكرة اهويحسب انها مجرد احاسيس وكان ماسك يحلف بالقران ..توة بيحلف .قلت اقول يافالح بروح اجيب الشغاله وتكلم معاهالانها اهي مخبرتني..عنك وناديتها ....تعالي ويركض يصك الباب وانكسر كالعادة قدامي ...انا اسفه كنت اختبرها اشوفها محترمه ولا لا ..وانت اشخصك اختك ولا بنت عمك ولا من العايله تختبرها ..عموما حبيبي اهي نجحت بالاختبار وانت رسبت بدون اعادة وقضيت على كل شي بداخلي كل شي كل شي ..وتركت البيت له واخذت شغالتها وعيالها وعلى بيت اهلها ...واصلحوا بينهم الاهل ..بعد ان مات كل شي بداخلها كل شي حتى تقول والله كلما مابديت احبه قفل قلبي مرة ثانيه من هلامشاكل ويقضي على كل شي ..والحين تقول عايشه معاة بدون قلب بدون ثقه بدون مشاعر ...فقط عايشه على كلام عمر رضي الله عنه ( ليست كل البيوت مقامه على الحب ) تقول والله اني ماقدر اقول ياعمري اللا بالعافيه وبغصب مني لاني احس اني منافقه بس اقولها بالغصب ادعي الله ان اقدر احبه بس ماقدرت ...تقول احسد كل واحدة تقول زوجي فديت عمرة واللي تقول لو يصير له شي باموت ومنها الكلام ...تقول اكثر شي محزني اني فقدت الثقه فيه فقدت الامان ببيته معاد احس بالامان ولا عاد اثق بالرجال ولاعاد احس بالامان ..وحتى هالحب اللي تقولون بعد الزواج ماعمري حسيت به فقط عايشه معاة لوجه الله ومايرضي الله ورغم كل شي محسسته اني اموت فيه . اما الحب الحقيقي لايوجد ..ولين يقول احبج احسه تمثيل ...وخلاص تقول انا قررت لو صار شي من هلاشياء والله مارد وهو حر يسوي اللي يبيه ..وهو الخسران ..ميلاقي مثلي ...يكفيني انه يقول انا احبج وانا وانا وكل هذا وهوا يحبني اشلون لو ماكان يحبني اشبيسوي ..

اسفه طولت عليكم ..اخواني واخواتي اشلون اقدر اخليها تشيل هالنظرة اشلون اذا عندكم طريقه تخليها تحب زوجها قولولي يمكن اقدر اساعدها ..اشلون يقدر انسان انه ينسى الطعون والجروح ويصفح من دون ماتتم هالطعون حاضرة بباله ..وخصوصا انه صار يحس انها راح تتكرر

اشلون تقدر تحب زوجها ؟؟؟؟؟؟

اخييتي الجازي

ارجو تغيير الصوره الرمزيه عاجلا

الاداره

التعديل الأخير تم بواسطة فيافي نجد ; 22-04-2007 الساعة 05:00 PM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه