السلام عليكم ورحمة الله وبركاته


مساء الخيرات

على الجمييييع


هي ماهي مشكله


بس مادري وين احط موضوعي


ابي نصايحكم وارائكم في الي بسويه

واقتراحاتكم لانه الموضوع شويه صعب علي


السالفة ومافيها عاد اتحملوني بعلمكم القصة كله

السالفة هي :
بعطيكم اول لمحات عن ابوي:

ابوي شخص امي في القراءة والكتابة

وعمره 55 سنة

يوم كان صغير يودونه المدرسة ويشرد مايرضى يروح

ولما كبر راح محو الامية اسبوع وطلع >>> كان مع صديقه في صف طلع صديقه يفهم شوي ورفعوه صف قال يبي يروح معاه يوم مارضوا يودونه قال اخذوه قراطيسكم بس بروح بيتنا

باختصار شخص ملول في الدراسة والتعليم

لكن المخ ماشاء الله اللهم صلي على النبي الامي

فلتة

في الحساب يعطي نواتج سريعة بدون الة حاسبة

لدرجة يحسب فوائد مركبة وفوائد بسيطة حقت بنك
مو اي ارقام عادية بس بمخه خلال 4 او 5 دقايق

والجغرافيا يقولك خريطة العالم بدون مايشوف بكل اتجاهاتها والسبب انه يحب يتقلى المعلومات كمعلومة عامة

ومثل الشي معلوماته في الحيوانات

وطبعا مانسى علمه في وخبرته في الحياة بحكم احتكاكه في الحياة بشكل صارم

لغته الانجليزيه ممتازة تحدثا بس كتابة وقراءة لاء مايعرف

بسبب الاستعمار الانجليزي وعاصر هالشي واشتغل في شركات اغلبها اشخاص امريكين واكتسب اللغة بسرعة ويتكلم بطلاقة بعد

وعنده معلومات طيبة ثقافية وعلمية حلوة وهم دينية

من فترة بعد ماتقاعد حسيت فيه يميل انه يتعرف على المحاضرات والفتاوى والاشياء الدينية من كل ناحية ويرافق امام مسجد فريجنا ويتعلم منه المسائل الشرعية الدينية استغربت تولعه الشديد بالامر هذا مع انه ملول

الله كتب لنا روحة العمرة بايام العيد والحمدلله على ذلك انا وزوجي وابوي

وبحكم كونه امي فكنا نقرى له الادعية والقرآن انا و زوجي وكان زوجي يلازمه ويقرى له بس زوجي كان رايح معانا من البحرين لمكة وبعدين رجع عالرياض لانه عنده شغل

وتميت انا اقرأ له الادعية والقرآن بعد ماراح زوجي وكان ماشاء الله عليه يحفظ بسرعه

وصرت كم يوم الي في مكة اجلس اقريه القرآن اخليه يتهجا الحروف شوية شوية واية او ايتين وبعدين يمل ويقول خلاص اقري لي وانا بتابع

المهم حسيت فيه شقد مشتاق يقرأ القرآن لوحده وصارحني انه وده من الاعماق وعنده اراده بس يخاف يمل

انا عزمت واصريت عليه انه يتعلم وقلت له بس نوصل البحرين ابعلمك الحروف والقراءة وبس تتقن القراءة بعلمك جزء عم من القرآن

وهم بصراحة كان وده يتعلم من زمان ويالله شنو كان عنده شوق ولهفة انه يقرأ القرآن بشهر رمضان


وفي جمعية تعليم القرآن للكبار بفريجنا بس يستحي يروح لها حاولت فيها مارضى يخجل كونه مايعرف الحروف صحيحة كامله

المهم الحين صار مافي الا انا اعلمه

وجينا البحرين وبديت معاه اليوم

وعلمته الحروف واساسا هو يعرف فيهم شوي وبس من طريقة كتابتي للحروف عرف حتى كتابتهم

وعطيته مهلة 4 ايام يحفظهم زين كتابة وقراءة وكل يوم ابكرر عليه


الحين السالفة بعد مايعرف الحروف شنو تقترحون علي اعلمه

ابي برنامج صحيح امشيه عليه وبحيث مايتملل منه وخلاص يقول مابي اتعلم

خصوص انا فاضية وماعندي شي اسويه هالفترة

غير انتظار فرج وزارة التربية في التعيين وزوجي مو جنبي بكل وقت
فرصة اسوي لي شي مفيد

انا حطيت في بالي هالخطوات بس مادري توافقوني او لا

1- تعليمه الحروف كتابة وقراءة.

2- تعليمه الحروف بالحركات.

3- تعليمه الحروف في بداية الكلمة وفي وسط الكلمة وفي نهاية الكلمة.

4- اعطيه كل يوم حرف يستخرجه من الكلمات بحيث يميز الحروف في الكلمات.

5- اعطيه حروف معينة يكون منها كلمات بسيطة.

6- اعلمه المد القصير والمد الطويل.

7- اعطيه كلمات عامة واحاول اهجيه معاه وبعدين كلمات قرآنية.

8- ابتدي اقريه سورة من السور القصيرة في القرآن واعطيه مهله عليها يتعلمها زين وطبعا اكتبها له لانه جفته يستصعب قرآة السور من القرآن.

9- ابتدي اعلمه زي الكتاب قراءة القرآن.

10- افتح له قناة القرآن من التلفزيون يتابع معاها ولو شويه او عن طريق كاسيتات

احس برنامجي وخطواتي صعبه عليه او راح يمل منها

بلييييز الي عنده خطوات ثانية يعلمني

لانه يوم كنت في مكة كان يجنني ويتحجج وهذي بعض حجايجه

يقرأ ايتين ويقول لي ماجوف نظري ضعيف

اووانا اهجيه واعلمه يقعد يسولف عن التوسعات وعن الكعبة وعن الناس وشكثر استخدموا تبريد لارضية الحرم شي مايخطر على البال

او يقول قومي نطوف يابنيتي صار حول الكعبة فاضي

او يقول لي جوعان

او عطشان بروح اشرب ماي زم زم وانتظره بعدين يتصل يقول جفت صديقي بس ماراح اجي شوي وبدق عليج بنروح الفندق

اشكال التهرب

ابي شي مايضغط عليه

مع انه عنده اراداه ادا قعد على هالمنوال يمكن ماياخد اكثر من 4 اشهر

بس سؤالي هل طريقتي مناسبة لشخص كبير ؟؟

هل اواصل معاه؟؟ او ادا حسيته ملان خلاص اتركه؟؟ مع علمي حبه وتعلقه الكبير بالقرآن ووده يقرأ

على فكرة زوجي رحب بالفكرة وفرحاااان ويقول لا تستلمي لملله خلي ارادتك اكبر من ارادته

ها شرايكم؟؟

سامحوني هدرت وايد على راسكم بس ابي النصيحة والمشورة

__________________

من اصعب الاشياء بنظري تعليم الكبير يبغى له نفس طويل وصبر وطريقتك حسب علمي هي المتبعة في محو الامية لكن حبيت اقولك عن شي مااعرف كيف يصير كان ولدي رحمة الله لايقرأ ولايكتب ولا يعرف حتى الحروف لو بكتبها له لكن يقرا من القران لا اعرف هل يحفظ مكان الاية ام ماذا

اهلين حبيبتي اللؤلؤة المجهولة

انا بعد اقول صعب بس انا حابه احقق هالانجاز خصوصا اني عندي وقت فراغ كبير

وزي ماقلتي تعليم الكبار يبغى له نفس طويل

بس ابوي يفهم وبسرررعه يتعلم الاشياء الجديدة اد بغى طبعا

بس حججه وملله اخاف شكل عائق لي وله في المواصلة

اتوقع اختي صح انه يحفظهم الله يرحمه ويحسن ويغفر له

لانه ابوي حافظ ايات وسور عن ظهر قلب يسمعهم في اذاعة القرآن الله يحفظه لي

شرفتيني بحضورك وتعقيبك
لاهنتي حبيبتي

__________________

السلام عليكم ورحمة الله وبركاته,
اختي دمعات الروح احسن الله اليك ها المجهود...من كلامش فهمت ان ابوش ما يحب يتعلم الا عا الطريقة البدائية وهي سماع الاخبار فهذا بساعده في عملية الحفظ واذا هو ما شاء الله عليه يحفظ اشتروله نسخة كامله للقرآن الكريم وخلوه يبدأ من جزء عم.
الشي الثاني انه يتمنى يختم القرآن في رمضان فهنا تذكريه بها النية وتقنعيه انه لازم يتعلم الحروف الهجائية علشان يختم القرآن وحاولي لا تثقلين عليه اذا حسيتي انه بمل واختاري الوقت الي هو يحبه ونصيحتي لا تدخلين معاه في التجويد الا لما يحفظ الحروف ويقرأ بدون اغلاط.
الله يوفقكم كلكم لعمل الخير وابشري الاجر العظيم لتعليمش ابوش القرآن الكريم...قال الرسول صلى الله عليه وسلم "خيركم من تعلم القرآن وعلمه"

__________________
لا إله إلا الله عليها نحيا وعليها نموت وبها نلقى الله

تحياتي...
أحمد أبوسند

رفعت معنويات اخوي احمد
بالضبط مثل ماقلت يحب يتلقى المعلومة مثل الاخبار

بس لما يروح المسجد اسمعه يتكلم عن العيال الصغار لما يقرأون وعن الشباب لما يختمون متلهف يجوف الصغار والكبار يقرأون قرآن ويبي يقرا مثلهم

يالله لو جفته في العمرة شلون لما نجلس واقرأ له قرآن وينتظرني اخلص قراءة احيانا ونجلس جنب رفوف الي في بيت الله وياخد القرائين من الناس يقول انا برتبهم عطوني يالله ادمعت عيني عليه حسيت بشوقه ويبي يخدم القرآن باي طريقة

بس مادري ليش في هالصفة الكريها يتملل بسرعه من التعليم

لا التجويد باقي عليه شوط طوويل ومومهم الحين يعرف التجويد اهم شي يعرف يقرأ لوحده

الحمدلله الحين علمته الحروف صار يميزهم عن بعض ويعرف يكتبهم بس خليته شوي يرتاح علشا ماشد عليه بس محتارة في الخطوة التالية اعلمه الحركات ولا اعلمه مواضع الحرف في البداية والوسط والنهاية شلون ينقرأ

ان شاء الله احاول اختار الاوقات الي يحبها

علشان اصدقك القول امي تلح علي علميه واشغليه عني

بس علشان يفكها لانه من تقاعد صاير لامي مثل ضرتها يتحجج على كل شي
بس انا ابي اعلمه علشان احقق له امنيه في حياته وهي قرآة القرآن وختمه

__________________

والله ماعندي شي انصحك فيه بس وش رايك تجربين معاة تجيبين له مسجل وتشترين الجزء الاخير من القران يعني كبدايه ويصير اربعه وعشرين ساعه مشغل عندة الين يحفظ وهكذا ان شاء اله الفكرة تعجبك



والله يعينك ويقويك لان تعليم الكبار يبغاله صبر وتحمل

__________________
ياكثر ماعندك من خير يارحيم
بس يبغى لنا شويه صبر
الحمدلله كما ينبغي لجلال وجهك وعظيم سلطانك

يسلم لي حضورك وتعقيبك ودعائك يالغالية

حاليا اهو جذيه بالسيارة او بالبيت يشغل التلفزيون على قناة القرآن ويتسمع لكن يالغلام ماتحسين انه راح يحفظ بدون فهم اول شي وبعدين معرفة بس حفظ عن ظهرقلب
مادري خيوتو انا احسه ادا تعلم القرآن حتى بيعرف يقرأ اشياء ثانيةبعد ويتعلم الكتابة بشكل اصح

بس هو وده يمسك القرآن يتصفحه ويقرأه بنفسه

تسلمين خيوتو على المشاركة

ربي يرزقج كل الي تتمنيه يارب

__________________

هلا وغلا اختي ام سيما تسلمين على حضورك شرفتي ياغالية


الطريقة الي قلتيها حلوة لو كان هو راضي

اختي عندنا جمعية تحفيظ القرآن للكبار

وهو الي قال لي عنها ومتحمس لها

يوم بدأ التسجيل يلا بابا مابتروح
كل يوم قال باجر

لين اعترف وقال لي انا استحي اروح هناك كلهم يعرفون القرآة بس مايعرفون يقرأون القرآن صح وانا ماعرف حتى الحروف مابروح وتعرفين رجال اذاقال لاء يعني لاء

ومارضى يروح

سالفة واحد يجيه البيت حلوة وااايد وممتازة بس مش مع الوالد مايحب احد يعرف بعيوبه او نواقصه

عرضت عليه فكرتج قال لو ابي كان رحت جمعية تحفيظ القرآن

يمكن يطفش ويصارخ علي بعد ايه اختي بس مع كل هذا امون عليه من باقي اخواني يسمع لي كلمة

انا عاطته اربع ايام بس يحفظ الحروف لانه يعرف معظمهم قبل ليلتين كنت اذاكر له وجلس يومين وبعدين رضى البارحة ارجع اذاكر معاه

والحين يقول بس خلينا شهر كذا نحفظ الحروف وانا ماخذته على سعته ماضغط عليه
وادا بعلمه رسم الحرف الصحيح يمسك الاقلام عنده
ولا يرضى يعطيني يقول اعرف خليني باكتبهم واذا عجز قال طيب قولي لي كيف علشان اسويهم

فكرتج حلوة لطفل بس مو لرجال كبير والله يهدي ولدكم يااارب ويحفظ القرآن بسرعة ويجلعه بار فيكم يااارب وينبته نبات حسن

ادعي لي ان الله يصبرني وياه واني انال شرف تحفيظه القرآن واخذ ثوابه واجره

__________________

ليش ماتشتري له

جهاز تعليم القران الكريم من سلسلة بابا سلام

القرأن الكريم مع تفسير الجلالين


ومن مميزاته



بصوت إمامى الحرم المكي الشريف

الشيخ / سعود الشريم وعبد الرحمن السديس

الاستماع حسب الصفحة
الاستماع حسب السورة
الاستماع إلى أية واحدة
استخدام خاصية التكرار
تسجيل ذاتي
مناسب لـكل الأعمار

سعره تقريبا 450 ريال


وكمان جهاز



عالم الحروف


تعلم الحروف العربية

طريقة جديدة وممتعة لإتقان الحروف العربية


انت روحي المكتبات الكبيره وبتشوفي منها اشكال كثيره وكمان سيديهات تعليميه

اتمنى اكون افدتك

باي

__________________