بسم الله الرحمن الرحيم
أنقذووني قبل ما اغرق في همومي ووحدتي
كنت مخطوبة >> للمعلومية فقط .. في منطقتي اللي اعيش فيها عندما يتم
عقد القران يسمح للرجل بزيارة خطيبته والجلوس معها والخروج معها << وهذه
الفترة تكون فترة تعارف فقط بعدها يتم الزواج الذي يتم تحديده من قبل الزوجان
والأهل ...... المشكلة اللي موب قادرة انساها واللي مسببة لي قلق نفسي وتعب وحزن وأفكار تروح واتجي واللي اهية سبب فصخ خطوبتنا
تصرف خطيبي البشع من ناحية الجنس ... طبعا انا ما اجلس جنبه أجلس بعيد عنه
واهوة مايعجبه تصرفي فيقوم ويجلس جنبي وبعد يومين من خطبتنا بدا يجلس
بجنبي أكثر وأكثر لدرجة أنه يتلصق جسمه بجسمي .. أنا ابعد عنه لكن يبدأ يتذمر من أبتعادي وما يعجبه تصرفي
ويزعل لكني ما اعطي اي أهمية لأني كرهته بتصرفه وخاصة أنه مايحاول يتكلم معي
ويتعرف علي ..أنا اللي أبادر في الكلام لكن بمجرد اسكت يبدأ ينظرني نظرات
كأنه يبي يهجم علي لكني أشغل نفسي بمشاهدة التلفاز .. لكن حدث
مالم أتوقعه تقرب بجاني وقبلني وبدأ يقبل أكثر وأكثر
ما أكذب عليكم انا في هذه الحالة ماعرفت كيف اتصرف وكيف أمنعه كنت خجلانة وفي نفس الوقت متفاجئة من التصرف هذا وظل دائما يجي البيت يجلس ساكت وبعد مايمل من السكوت يبدأ يتقرب ويقبلني
حتى تطور الامر إلى الممارسة
لاتلوموني وربي واللي خلقني حزتها ماعرفت كيف أمنعه وشنو أقول له وشنو المفروض أتصرف في هاللحظة
ظليت ساكتة وأنا داخلي ألم وحزن وضيقة كأنه شي ماسك على قلبي وخانقني من شدة الضيقة اللي فيني حتى مرت الايام ولاحظو أهلي بحزني وسكوتي الدائم .. ولاحظت والدتي اذا يطلع من البيت دائما ادخل الحمام واتروش واذا طلعت ادخل غرفتي واقفل الباب بدون ما اجلس مع اخواني أو أتكلم بكلمة وحدة
وجت والدتي وسألتني شنوو فييك ؟؟ ظليت ساكتة مارديت عليها وسألتني مره ثانية فيه شي خطيبك ؟؟
قلت لها ما ابيه موب عاجبني .. قالت لي ليش طيب ؟ قلت لها سبحان الله كذا قلبي ماحبه
بدون ما اقول لها السبب لاني خجلت وبمجرد انها تطلع من الغرفة اقفل الباب واقعد ابكي لين أنام
كنت حزتها أتمنى الموت وكانت الدنيا ظلمة بعيوني ماكنت اشوف شي حلو فيها بصراحة ما اقدر اوصف لكم كيف كان حزني والألم والضيقة اللي بداخلي لدرجة كنت افكر انتحر أو اسوي بحالي شي عشان اروح
المستشفى ويحسووو فيني اهلي كنت موب عارفة شنوو اقول لهم وكيف أبتدي وخاصة انا وحيدة
ماعندي الى أخت وحدة ومتزوجة .. لكن الحمدلله انه جا اليوم اللي اشوف فيه اختي وتسألني عن حالي
وقلت لها كل شي وانا ابكي من شدة بكائي صرت الخبط بالكلام وماكنت عارفة كيف اوصف لها اللي بداخلي
وكراهيتي الى هالشخص وكيف اذا طلع ادخل الحمام اتروش وانا ابكي وكيف يصير جسمي أحمر من كثرة التدعيك فيه والله كنت في حالة نفسية مايعلم فيها الى ربي وبعد ماكلمت اختي وعلمتها منعتني إني اكلمه أو انه يجي لي وعصبت وقالت لأهلي إني ابي انفصل خلااص طبعا انا بعد علم اختي اتشجعت وكلمته قلت له إني بسبب تصرفه الغبي هذا كرهته وماعدت أبيه بس الغبي غبي عمره مايفهم برأ نفسه وقال انه تصرفه طبيعي وانه ما عمل شي غلط وظل معاند ولا وافق يفصخ الخطوبة لدرجة انه ابوي يكلمه ينكر كل شي عمله معي
وعمل حاله المسكين والبريء وانه يحبني وابوي اللي على نياته صدقه تخيلوووا ....؟؟؟
وقالو إني ممسوسة أو مريضة نفسياً وفيني شي أو احد حاسدني عشان كذا كرهته ؟؟؟ جابو لي شيخ يقرا علي انا ماوفقت ادخل بس ابوي دخلني بالقوه وأجبرني على هالشي ... ياناس ياعالم أنا مافيني شي كل اللي فيني إني
.. مغتصبة من قبل هالشخص .. المأخوذ حياءً كالمأخوذ غصباً
وربي تعقدت وجنيت وامرضت نفسيا من هالشي بس ابوي مو مصدقني وخطيبي الكاذب ينكر اللي عمله معي
وأنتشر الخبر ان فلانة محسووده أو ممسوسه عشان كذا كارهه خطيبها
بقول لكم شي .. كان عمري 17 وكنت في عمر الزهور يعني ياناس هالمشكلة كانت حِمل ثقيل على ظهري ظليت 5 شهور وانا ابكي واتألم طبعا خطيبي منعته يجي لي أو يكلمني لأني كارهته كره مو طبيعي
بعدها لجأنا للمحكمة عشان يتم الانفصال بس بعد اللتي واللتي بعد ما انهرت لهم هناك في المحكمة وشافوا كيف حالتي كلموا خطيبي حتى يقنعوه إني ما ابيه وكارهته لدرجة ما ابي اسمع صوته أو اكلمه لو اسمع صوته أتذكر كيف كنت تعبانة معاه وشبه أنسانة ميته بس أجبرووني أكلمه واتفاهم معاه كنت اتمنى يجي لي ملك الموت ياخذني ... وتم الانفصال .. بس بعد مشوار طويل مليئ بالشوك لذلك بقت آثار من هالمشكلة فيني وموب قادرة انساها
اثناء ممارسته وياي ماحصل فض لغشاء البكارة لكنه اثناء عملية تحريك شهوتي من طريقة لمسه ومداعبته لي
حسيت بأصبعه دخل في فتحة غشاء البكارة وألمني لدرجة إني ابتعدت عنه وانا متألمه وصدقوني ما اتذكر انه نزل دم بس اللي اتذكره إني تألمت وكنت من كثرة الحزن والبكاء موب مستوعبة الى هالأمر ولا منتبهه
وهذا الشي مسبب لي قلق وما احد يدري غيري ومستحيل اقول لأي شخص والشي الثاني اللي متعبني ظليت امارس العادة السرية حاولت اتركها بس ماقدرت .. وحدتي وحزني والفراغ اللي اعيش فيه مايساعدني ابدا إني اتخلص منها علماً بإني اصبحت ما احب الجنس ابداً لكن اذا حسيت بشهوة اطفيها بممارسة العادة السرية وبدون متعة لإني لا اجد متعة أو أمر رائع في الجنس بعد اللي حصل لي وممارستي تكون بين فترات متفاوته يعني في الشهر مره وحدة وأحياناً ما امارسها لمدة شهرين وتكون ممارسة سطحية فقط بدون إدخال شيء .. تعبت كثيراً وبقت اثار من مشكلتي وغير آثار تأخري الدراسي بسبب هالمشكلة وظليت حزينة أكثر وأكثر لاني اشوف صديقاتي وبنات عمي في مرحلة الجامعة وانا بعدني في مرحلة الثنوي بسبب هالمشكلة اللي أخرتني في دراستي ما اقدر اداوم ابدا واذا داومت اطلع من الفصل واروح الحمام اجلس ابكي حتى المعلمات لاحظو علي
مازلت حزينة ودائما أفكر لدرجة إني اذا شفت رجال بالشارع اكرهه ويتقدموا لي وارفضهم بس تعبت مابي اظل على هالحال ارجوكم شوفو لي حل انا تعبانة وغرقانة في حزني وهمي وذكرياتي اللي من اتذكرها يتقطع قلبي ولازم اذا بنام الليل اتخيل اشياء حزينة تصير لي ولأهلي مثلا احد يتوفى من اهلي واجلس ابكي كانه الشي صار بجد
والله تعبت ورب البيت تعبت ابي استقر ابي اعيش حياة مثل الناس ابي احب شخص ويحبني
مابي الخوف والتفكير في المستقبل يدمرني سااعدووني وارشدووني الله يخليكم
عمري الآن 20 وأنا ارفض اللي يتقدمون لي وكارهه الرجال بشكل مو طبيعي بس ابي اعالج نفسي ابي اكون طبيعية ابي اقبل بالشخص اللي يتقدم لي بدون خوف وعدم ثقة في النفس وقلق ابي اكون طبيعية ساعدوني
25-12-2007, 04:18 AM
أنقذووني قبل ما اغرق في همومي ووحدتي
ضوابط المشاركة
العرض العادي
