مساءالخيرجميعا.

عندي ولدعمره سنتين وثمانيه اشهر.وصاريتضايق من الحفاظات ويشيلهاوقلت بعلمه على الحمام ودخلته معي وتبولت امامه قلت عشان يفهم وقلت اذافيه كخ روح الحمام ومالبسته الحفاظه وشوي يجيني يقولي ماماكخ وانافرحانه قلت انه استجاب وفهم بسرعه واطالع وملابسه مبلله.سواهاقبل لايروح الحمام .

علموني الله يسعدكم .كيف علمتواطفالكم على الحمام.

الله يجزاكم خير عطوني حل للمشكله هذه

سلام عليكم ....

هذه طريقة مبسطة وان شاء الله تنجح معاك ........

اولا يجب عليك التحلي بالصبر والهدوء فاذا شاهدك وانت غاضبة او تصرخي عليه فستكون النتيجة سلبية بالطبع فالطفل يتأثر بامه اولا واخيرا .

2/ اشتري له قيصرية جميلة وقولي له هذا حمام خاص بك لأنك كبرت مثل ابوك او اخوك حتى يفرح ويتشجع.

3/ علميه بالحفاظة : نعم البسي ولدك الحفاظة وكل ساعة ونصف ازيليها واحمليه الى الحمام ودعيه يجلس على القيصرية اذا عملها صفقي له وشجعيه بالكلمات الحلوة والهدايا الصغيرة من ابو ريالين .
اذا كانت الحفاظة مبللة البسيه اخرى جديدة واذا كانت نظيفة البسيه نفسها.
طبعا الهدف من التعليم بالحفاظة هو ان اذا عملها وانتين ماتدري مابتنقهري وتقولي نجس المكان .
استخدمت في البداية كلوت بلاستيتكي للأطفال بس يتسرب منه البول فالحفاظة احسن .

4/ لتفادي الملل في الانتظار في الحمام احملي معاك بضع مكعبات ودعيه يلعب وانتي بين ثانية واخرى رشيه بالماء .

5/ وهكذا كل ساعة ونصف احمليه الى الحمام اهم شئ لاتنسي الوقت ولا تتعاجزي انتي وتهملي الموضوع فالتجربة يبغى ليها طولة بال وتفرغ كامل واني في هذا الوقت قللت طلعاتي لخارج البيت حتى لا اهمل الموضوع ويظل منظم وشهر بس اخذ معي وانتهى الموضوع .

5/ خليه يشرب سوائل واجد حتى يكون مستعد للتبول دائما ولا تتعبي معاه ، وطبعا اول مايجلس من النوم على طول على الحمام . وامدحيه امام ابوه وامش ويدته وكل الناس حتى يستانس .

6/ اما بالنسبة للتبرز : كل طفل تقريبا له وقت يعملها محدد مثلا في الصبح اول مايقعد من النوم او بعد وجبة الغذاء وانتين انتبهي لولدش متى يعملها ؟ في البداية ستكون صعبة عليه عملها في الحمام وبيخاف ويمكن ايصيح بس مرة مرتين بيتعود ان شا ءالله .

اتمنى تستفيدي وعلميني شيصير معاك ِ .في امان الله

مشكوره حبيتي جنات الخلودواسأل الله ان يجعل من لقبك نصيب.فعلاالطريقه يبغى لهاطوله بال الله يقوي صبري مع اني بسرعه اعصب واصرخ في وجهه.

لكن مدري عن الأخوات ماعندهم طريقه اسهل.

و الله أنا ما مريت بهالتجربة بعد ، لأني لسه ما تزوجت

بس فعلا و الله شي مهم ، لازم الوحدة تكون عندها خلفية على موضوع زي كذا

ياريت بقية الاخوات يشاركن و يفيدنج