على وشك الطلاق بسبب أهله... ساعدوني في اتخاذ القرار
انا متزوجة وعندي طفلة والثاني بالطريق...أسكن مع اهل زوجي بنفس الشقة أم وأب كبار في السن وأخ شاب.
اول ماتزوجنا رفضت موضوع السكن وبالفعل سكنت وحدي بشقة صغيرة فخمة وبعده سنة (بعد ماتخرجت) أجبرني ان ننقل عندهم بحجة اخته سافرت ومافي من يرعاهم وأخوانه الكبار والصغار غير بارين بهم.. وانا اصلا اروح عند اهلي كثير فما احتاج بيت ووووو... وطبعا رفضت وطلعت زعلانة وقلت اوافق لو شقتين امام بعض ... قالت حماتي اما مع بعض او ماننقل معاكم....
من البيت وردني وطيب خاطري وووو وقال انسي الموضوع وهو كان بالسر يدور شقة كبيرة يحاول يفصلها عشان يرضي الطرفين. عرفت بالصدفة من احد جيراني ومن صديقه....ان لقى شقة وان طول الفترة اللي كنت عنده فيها هو كان يصلح الشقة الثانية...طبعا ولعت ورحت عند اهلي وجا ووعدني ان يكون مخرجها ومطبخها منفصل...وماعمل شي..وانا بأول شهر حمل وقعدت عند اهلي قريب 6 شهور...الى ان فصل المطبخ والمخرج بناءاً على نصيحة احد المشايخ اللي اتصلنا بهم (مع انه عمل هذا الا انه فتح باب بيننا وبينهم من غير مفتاح!!! على باله نص العمى ولا كله) وطول الايام اسمع تعليقات واني انا اكرههم وانهم يشوفوا الموت ولا يشوفوني ... وطبعا انسوا الخصوصية لدرجة ان كم مرة ينفتح علينا باب غرفة النوم واحنا نايمين سواء أمه أو أبوه!!.. المهم تميت عند اهلي ورديت لما عدل الحال وركب مفتاح للباب.
مع العلم ان كنت مدللة جدا عند اهلي وغرفة نومي عندهم بكبر بيتي الحالي!! وصرت اكره الجلوس في البيت هذا وهذا اللي مضايق اهله ومخليهم يعبون راسه..ان انا ما استحق بيت اصلا لأن ما اقعد فيه.
بعد سنة ونص تقريبا من النكد هذا (والحق ان انا قرفت عيشتي وكنت انتهز كل فرصة عشان اطلع اروح فيها بيت اهلي) قالو اخته المسافرة قالت بتجي وبتقعد كم شهر مع زوجها!! مع انهم مقتدرين يقعدوا بفندق ..وفيه بيت اخوه الكبير واسع جدا... فقررت حماتي ان يتوحد البيت واللي عجبه عجبه...(ودايما يقولون زوجتك مشتنا على كيفها... عمره مافي احد يسكن مع اهله ويقسم البيت شوف فلان / وهذا الموشح اسمعه كل ما اتشاكلنا) مع العلم ان الشغالة حقهم تشتغل بس لهم حتى ثوب ماتكوي لزوجي..ولو بفلوس زيادة!!
المهم: كنا راجعين من عملي فقال لي ان راح يوحد البيت قلت له مو معقول عشان شهرين نغير كل ترتيب البيت وكفاية صبرت..قال هذا هو المفروض والتغيير بيكون للأبد لأن هذا هو الأصل وأهلي استحملوا الضيقة وكل هذا عشانك شوفي فلانة كيف ساكنة مع امة لا اله الا الله ..بس هي نفسها طيبة وأهلها طيبين ..أما انت ياحسافة... .!!!! وكنا معصبين فراح نزلني بيت اهلي عشان لا احتك بأمه وماعاد سأل وعرفت انه عمل اللي براسه فقعدت عند اهلي الفترة اللي قعدتها اخته وأخوه تقريبا 3 اشهر ... مازرتهم ..بس قبل لا تسافر اخته بكم يوم جا واعتذر واترجاني اروح اسلم عليها (انا عارفة انه يهمه كلام الناس وسؤالهم عني)... الوالدة نصحتني وقالت لي اروح وعيب ووووالخ..رحت لها مرتين وكمان رحت معها المطار!!
وبعد فترة اتصلت حماتي وقالت ان الحياة ماتسوى واذا تبغين نطلع نطلع..وان باقي لهم كم يوم ويرحلوا عن الدنيا.. ومن هذا الكلام.. اتأثرت وحسيت اني شريرة فقلت لها لو طلعتوا ماراح ارجع وبالفعل رجعت وحاولت اكسب رضاهم وهم بعد غيرا الشغالة لواحدة أفضل..عشاني وصرت اطبخ طبعا للجميع بعد ما ارجع من عملي وأراضي أمه مع اني حامل وقرفانة بس بحاول اكون ببيت اهلي اكبر فترة ممكنة..
والمشكلة ان كل مازعلت امه مني أو من طبخي او منه أو حتى من خيالها.... طلع حرته فيني ..طبعا كل هذا ترك فجوة كبيرة بيني وبينه لدرجة انه كل صرت اموت ولا اقعد بالبيت وأغلب الوقت أفضل أقعد عند أهلي انا وبنتي وطبعا كل يوم اسمع تلقيح ان انا مهملته..
والان اخر شي بنهاية الاسبوع انا عند اهلي..طلعوا الشغالة وردوا شغالتهم القديمة بحجة ان انا اصلا ما انتبه لهم!! والقديمة تونسهم...وزعلت واتراضينا بس ثاني يوم امه مرضت وزعلت والله انقلب 180 درجة..فجأة!!
و قال انا ما اريد احد يخدمني.. شرعا انت المسؤولة مو الشغالة..و انت مقصرة بحقي واذا ما انعدل حالك خليك عند اهلك.. لين تختاري وظيفتك أو بيتك..وانا طبعا ما صدقت رحت على طول عندهم لأن مو مستعدة اعيش بها الوضع.. ومازلت... وهو يذهب بي ويعودبي من العمل بس ولا كلمة.. وصدره مليان وحاقد.. لأن امه مرضت[/المشكلة الان: زوجي على وشك الحصول على بيت ملك (طبعا للجميع وبالسلفة وحرق الاعصاب) ..س كل يوم ياخذني أو يردني من عملي لبيت اهلي!! صرت اهرب لعملي وحققت فيه انجازات باهرة..ومازلت عند اهلي ومابيننا اي سلام في السيارة او التلفون واذا احتجت انا او بنته لشي طلبناه جابه ..
وكل مانتخاصم (في السيارة بحكم ان تاركة البيت بس انه يوصلني) يقول انا بعطيك بيت وحدك واجيب وحدة ثانية تسعدني تسكن مع هلي واحس ان متزوج... وانت اصلا ماتستحقي بيت فخم.. بجيب وحدة تسكن بالبيت الجديد (هذا قبل لا يصير بيده البيت!!! )انا من ويوم ماتزوجتك ماحسيت باستقرار اطلاقا..(نفس الموشح)( مع العلم ان زوجة اخوه الكبير تشتغل دوامين ورفضت السكن معهم ومع ذلك هي فوق الراس ولها الف حساب مع انها نادرا ماتجي زيارة بس كل كم شهر!!..
هو من صفاته انه طيب القلب..يصبر علي لا عصبت (انا حااارة ما أسكت) لدرجة ان احيانا استغرب ليه صبر!! حساس لكرامته... و(كان) يموت فيني ووده ينزع عيونه لأجلي...ويحس ان مقصر بحقي بس الان احس حاقد علي وعلى اهلي وشايف ان لا يمكن فيه احد بالدنيا مثل تقصيري وأخلاقي!! بالاضافة لاعتقاده الجازم ان اكره امه وابوه واخوانه. وان اسوأ حظ بالدنيا حظه. واعتقد انه صابر علي لأن يخاف من كلام الناس.. وانا نظرتي له انه لفاف ودوار وماله شخصية ولا أمان.. يعني ماله داع..
كلمت الوالدة وانتهوا لطريق مسدود فقررنا انه يطلقني وقال طيب.. أبشري..
انا
طبيعي انتظر الطلاق لأنه شيء طبيعي لحياتنا .. لأن مستحيل الحياة بهذا الوضع.. سواء لي أو له. حتى لو كنا نحب بعض.. الفجوة زادت ..والحياة صعبت والمعاناة طالت (3 سنوات ونص).. .. وانا كل مرة ازعل بالشهور ولا احد من اهله يحسب لي أو له..مليت من الطلعة والرجعة.... ابي حل نهائي.. و والبيت المستقل مستحيل جدا لأن ابوه وامه كبار بالسن وبالفعل محتاجين له ومن حقهم لأنه هو الوحيد البار بهم..وامه رافضة شقتين امام بعض.. تبي نفففس البيت.. ومستحيل تغير
لكن بنفس الوقت انا استحملت الكذب منه والدوران واتنازلت كثير...واتضح لي ان قدراتي لا تستطيع الجلوس بالغرفة والبيت المشترك والقيام بمهمة الزوجة المثالية اللي بنظره...
وأهم شيء إيماننا أنا وهو ان الطلاق حاصل حاصل..عاجلا أم آجلا...
فقط منتظرة دعمكم حتى أرسل له الوالد كما طلب... والحمد لله الوالد ممكن في لحظة واحدة يطيعني ويروح..وتنتهي المعاناة
بس قلت اشاور أول لأن ماعندي اخوات..ولأن اعصابي تعبت من التفكير ..حتى صرت أخذ إبر تهدي الاعصاب وأنا حامل..سامحوني عالاطالة بس تعبت كان لازم شرح مفصل عشن لا أندم اذا اتخذت قراري.
اختكم
20-02-2008, 04:08 PM
ضوابط المشاركة
العرض العادي
