السلام عليكم
أحبائي أنا سجلت فهالمنتدى على أساس ما تبخلون علي بنصائحكم الي دايما كنت من المدوامين على قراءتها والاستفادة منها
أولا مشكلتي يمكن يشوفها البعض تافهه وماتستحق الرد عليها بس هي والله متعبه نفسيتي جداً
أنا يا اخوان وأخوات عايشه مع أهل زوجي وفنفس الوقت أخو زوجي الثاني يعني قبيلة ماشاءالله ساكنه فنفس البيت!
أول ما انضميت للعائلة لاحظت أن زوجة أخو زوجي (ك) تدقق على بحياتي وتقارن بيني وبينها وكنت اسمع عنها قبل انها عللاقتها سطحية معاهم و....الخ بس لما انضميت الهم تغيرت نهائي صارت ما تفارقهم كلش دايم معاهم وآخر كرم وتاخذ أخوات زوجي معاها تفسحهم بس عشان تكون هي الأقرب والأحس وفعلاً صارت المحببه والمفضله والكل فالكل!! صرت أغار وأحس بفرق المعامله اهتمامهم فيها صار غير طبيعي خصوصا من أم زوجي تحبها موووووووووووووووت وصايرين حبايب وأكثر وأنا زوجة ابن عادي معاملة عاديه أمرض اولد عادي السؤال التقليدي! بينما هي آخر مراعاة والدنيا كلها تقوم اذا مرضت وأم زوجي تجلس عندها أدعيه وابتهالات الله يشفيها!
ك عرفت هالشي صارت تتعمد تقهرني بزيادة صارت تستعرض على علاقتها الرائعه بعمتي من أحضان وقبلات وسوالف وأنا أتمنى اني أكون عبيطه مب فاهمه هالحركات بس مشكلتي اني فاهمتها لانه وااضح جداُ تملقها لام زوجي وهم فرحانين فيها لو زعلت على ام زوجي تجي على نفسها وتراضيها أما أنا جهنم تاكلني زعلت اصطفل برضا من نفسي فالنهايه صدقوووووووووني فعلاً أثر هالشي فنفسيتي انا شبه محطمة خصوصاً ان صارت اشكاليه بيني و بينها النتيجة زاد استفزازها لي صارت تتعمد انها تتعانق ويا أم زوجي جدامي! وزادت أحاديثها الجانبية مع أم زوجي تثبت انها حافظة الاسرار لأم زوجي وهي الي تفضفض الها وترتاح الها والله أحسس انها تخترع القصص بس نكايه في انا يعني والله لو ماكنت موجوده لا اسرار و لا أحضان بس مجرد ما أدخل بدت الحركات والسوالف
الله يخليكم لا تستخفون بمشكلتي نفسيتي تعباااااااااااااااااانه والله أحلف الكم ماأقدر أطنش لأنه ما في عدل ابدا في المعامله دايما اهي معمول الها وزعلها ألف حساب وأنا ولا شي جدامها والله قهر

سبحان الله
اختي حاولي بكل جهدك ان تكسبي مودة ام الزوج بالهدايا متلا
و الله الموفق

سبحان الله وبحمده
أختي للوهلة الاولى ظنيت أنك تتكلمي عن زوجك مو أم زوجك!!!!!!!!
طيب ما يتعانقوا أنت مالك؟؟؟؟
سبحان الله
فعلا اللي ما عنده هم يشتري له هم
أختي أنت لك بزوجك هو فقط من يجب أن يحبك أكثر مما يحبها أما الباقين فهم أحرار بمشاعرهم يحبونها ولا يكرهونها كيفهم
لكن أنك تغاري لأن أم زوجك قبلتها والا حضنتها غريبة شويتين
نصيحتي أن تحاولي أن تقللي من مشكلة الغيرة عندك وتركزي على حياتك مع زوجك لأن مشاعرك هذه بالتأكيد ستنعكس على علاقتك مع زوجك سلبا
بعدين فكري ليش يحبوها يمكن دافعة لهم فلوس علشان تشتري حبهم؟؟؟؟؟
أعانك الله ووفقك

__________________

ما حرّك داواك

تصرفى وفق قناعاتك ولا تغيرين اسلوبك مع الجميع بما انه لا قصور فيه ودعك من المقارنات

اختي وانت ليه حارقه اعصابك و تاعبه نفسك ..

اختي كل واحد يعمل بأصله ..

فانتي تعاملي معهم عادي جدا ولا كأنك تشوفي هالحركات الصبيانيه ..

اختي لا تخلي مثل هذه الامور تهز ثقتك بنفسك .. انتبهي ..

هم يحاولوا يزعزعوا ثقتك بنفسك ..

ام زوجك حاولي تكسبيها بكلمه طيبه و بهديه بسيطه اذا نزلتي السوق ..

لكن اوعي تحسسيها انك تتنافسي عليها مع زوجة اخو زوجك ..

بدل ما تحرقي دمك و تهزي بدنك و تبذلي طاقتك على مثل هذ الامور ..

اصرفي هذه الطاقه في شي يفيدك و يفيد زوجك واولادك ..

انصحك انك تشغلي نفسك بهوايه مفيده لك .. مثل قراءة الكتب

او التسجيل في دورة خياطه اذا كنت تحبي الخياطه

او في دورة حاسبآلي او دراسة لغه او رياضه لان مثل هذه الامور راح تشغل

وقتك وتلهيك عن التدقيق في مثل هذه الامور السخيفه ..

وربي يهدي الجميع ..

يا بوعزيز شفت يعني هذه حركات تنعمل لأم الزوج حضن ومساج وشغلات عبيطة كلش!! بس لقهري والله

باقي الأخوات مشكورين انكم تنازلتوا ورديتوا علي مع اني بنفسي شايفه بياختهم وبياخة مشكلتي فعلا مشكورين

عزيزتي أميرات عن جد شاكرة لج الرد كأنج حسيتي في! للأسف أم الزوج مستانسه انها تشوفنا بهالحال! اصلاً أنا حاسه بالهيافه الي هم فيها بس من كثر زيادة الجرعات في الفترة الأخيرة خلاص ما قدرت أطنش لأن شي واضح ومقصود من قبل الاثنين للعلم الحركات اطنشها لكن عدم المعامله بالمثل هو مايحز بخاطري يعني انا دائما مهمشه ومش محطوطه بالصورة بالمواقف الانسانيه الي تصير معاهم وهي العكس! التفرقه في المعاملة هي مشكلتي!! يعني ولله الحمد أنا كريمة معاهم واجتماعية ولله الحمد لكن مش عاملين لي قيمة تذكر في روحاتهم؛ فيزياراتهم ابد مب عاديني وحدة منهم وفيهم! بس هي لا هي الكل فالكل مب شي يقهر!!

محبة الناس مو بالغصب.. ياختي بكره الايام توضح لهم ان كانت محبة صادقة ام زائفة ..

اهم شيء كوني طيبة معهم وعامليهم باحسان واشغلي نفسك باشياء مفيدة بدل الامور التافهة هذه

صدقيني انتي عشانك فاضية الشيطان يشعلل الامور هذه في نفسك صحيح المثل لاقال مركب الطباين ماشي ومركب السلايف غرقان ..

شوفي اختي .. اسمك ما عجبني .. بدل ما يصير( حساسه حيل) و ينعكس على

نفسيتك كان المفورض يكون اسمك ( قويه حيل ) او (مطنشه حيل)

انت الحين عارفه لعبتهم .. طيب .. ليه ما يصير العكس ..

انت اللي همشيهم من حياتك ..

انا عارفه انه شي يقهر .. لكن كبري عقلك شوي ..

مع الوقت راح تتعودين على تهميشهم ..

لا تعطينهم حيّز كبير من الاهتمام والتفكير ..

ولا تحللي كل تصرف يتصرفونه .. كذا انت راح تتعبي كثير ..

وكل ما شوفوا التأثر باين على تصرفاتك هم زادوا عليك الكيل ... وانبسطوا ..

حسسيهم انك مو فاهمه السالفه او مو منتبهه لحركاتهم يعني طناااااش ..

اختي مو لازم تكوني بالصوره في المواقف الانسانيه ..

مع اني مدري وش تقصدي المواقف الانسانيه ..

الواجبات الاجتماعيه تقدري تعمليها مع احد من اهلك امك او احد اخواتك مو شرط

تكوني مع ام زوجك ..

خلي لك حياتك الخاصه لا تربطي نفسك فيهم كثير ..

واذا تقولي انك تنقهري في التفرقه في المعامله ..

اهم شي ان ما احد يدوس على كرامتك او يهينك او يذلك ..

كرامتك فوق كل اعتبار ...

وخلهم يفرقون مو مشكله .. طنشي..

اهم شي زوجك .. اوعي تبين له انه امه تصرفاتها مو مضبوطه معك .. لا تجيبين له

سيره ابد ..

ومثل ما قلت لك اشغلي وقتك بعيد عنهم و حاولي تشيلينهم من بالك ..

المسأله محتاجه لاراده قويه .. وثقه بالنفس .. ومحتاجه لوقت على ما تتأقلمي

مع الوضع الجديد ..

وربي ييسر امرك ..

فعلا اذا اسلوبك معهم زين لا تغيريه ومعروف لا بد ان ام الزوج تميل لوحده دون الثانيه
بس انتي احمدي ربك على كذا عض امهات الازواج تنكد عليك عيشتك من كثر تدخلهابحياتك