/[السلام عليكم ورحمة الله وبركاته
أخواني وأخواتي الأعزاء
مادري ليش كل مايصير معاي أي شي يديد أشوف نفسي على طول أبي أكتب بالمنتدى أحس أرتاح وايد لأني دايما ألقى اللي يواسيني ويشجعني ويعطيني الحلول وجزاكم الله خير
حبيت أفضفض لكم وأقولكم اللي صار معاي والقرار الصعب اللي إتخذته وأتمنى كل من يقرأ موضوعي يدعيلي ويعطيني دافع للتفاؤل
خلاص تم كل شي قبل أمس ورحت المحكمه وسلمت طليقي ولدي وآنه حطيتلي محاميه عشان ماأدخل الجلسه ولا أشوفه بس صارت شغله بالغلط وسبحان الله كأن الله أراد إني أدخل الجلسه عشان يسألوني وأجاوب عليه بالجلسه سأل طليقي إن لو راح وعالج الولد ورجعه حقي عادي ورد سألني القاضي عن رايي رديت وقلتله إن أهو مورافع علي قضيه ضم حضانه يعني معناته مافيها مؤقته ولا غير مؤقته قلتله آنه على أساس اللي مكتوب بالدعوىوبعدها قاله القاضي خلاص إهي بتعطيك إياه على طول ماتبيه وبعد ماإنتهت الجلسه خلاص سلمته المحاميه الولد آنه في هذيك اللحظه سبحان الله مادري شلون تكلمت وقلت جذي أحس سبحان الله الله يسر أموري إن يصير كل هذا والله محد يتصور إشكثر ضغطت على نفسي عشان أقول جذي بس لأن خلاص تعبت من المشاكل معاه قام يأذيني وايد وايد أهو من الأول يبي يعالجه يمكن يبي يسفره بره وقاعد يوديه إهنيه جلسات علاج طبيعي وبنفس الوقت كاتب عني في القضيه إني غير أمينه على الولد وقايل مره حق خالتي إن اللي قاعدين يسوونه لا أهو منه ولا فضل وآنه قاعد أسوي حق الولد أشياء اكثر منهم الله ينتقم منه ليش جذي والله الدنيا غريبه آنه للحين ماني مصدقه إنه فيه بشر جذي حسبي الله ونعم الوكيل آنه عشان كل هالأمور ضغطت على نفسي وقلت يمكن أحاول أتحمل وأشغل نفسي بس عشان يعرف مادام خذا حضانته شنو الدور اللي كنت أقوم فيه حق ولدي لما كان عندي أبيه يشوف بعينه كل اللي كان يحتاجه الولد بالبيت وكنت أسويه خاصة إن الولد معاق والله العالم بس شلون لازم الرعايه تكون معاه بالبيت أهو مفكر إن لما يوديه علاج طبيعي ويدور فيه حق مستشفيات الديره حق أي شي ثاني غير العلاج الطبيعي إن هذا أهو التعب بس والدور العظيم اللي يقوم فيه وإن آنه اللي أسويه بالبيت ولا شي .
آنه بس أبيه يجرب ويشوف أهو وأهله شاللي راح يصير فيهم وذيك الساعه راح يقولون إيه والله إهي وايد تتعب
لا وتصدقون عقب اشقال لما خذاه وطلع من المحكمه تخيلو دق على وحده من خالاتي وقال لها شفتي الظلام اللي مايخافون ربهم الله ينتقم منهم إحذفوا علي الولد بالمره
بالله ماتقولون لي هالظالم شسوي فيه عقب مارفع علي قضيه ودخلني المحاكم وقايل بالقضيه إنه يبي الولد بحضانته ويبي يعالجه وعقب ماعطيته إياه قال عنا جذي إنتو شايفين هالإنسان طبيعي والله بستخف منه صبر جميل والله المستعان
وآنه بس بغيت من كتابتي هالموضوع إني أعرف هل اللي سويته صح وآنه صليت إستخاره قبل لا أسوي هالخطوه وبغيت أذكر شغله يمكن ماكانت واضحه في موضوعي اللي فات إن أهو من النوع اللي يعرف حق الولد مثلي بالضبط وحيل مهتم يبي يعالجه بأي طريقه بداخل وخارج الديره ويمكن هذا شوي أهون علي من لما يكون مايعرف له أو يحطه عند خدم أو مو مهتم حق علاجه
وأخيرا حبيت أعرف موقفي صح على الرغم من إني بموت لما خذوه مني وقلبي كل يوم يتقطع وكل ماأشوف أغراضه وهدومه بموت من القهر وكل ماأطلع أحس شي ضايع مني وأحس كل مكان بالبيت فاقده وفقدت حتى صراخه بالليل مع إن ألحين صارلي بس 3 أيام مو شايفته مع إن قال بالمحكمه أي وقت تبي تشوفه بس عقب مادق وقال اللي قاله عنا قلت خل أنطر جم يوم أتحمل وعقب أقول باخذه عشان أشوفه وإذا عاند بقول حق المحاميه تقول له
والله يخليكم أدعولي الله يشفيه ويعافيه وهو القادر أنه يبدل حاله من حال إلى حال و يرده لي ردا جميلا وإنه مايقدر يتحمله وايد ويرجعه حقي عاجلا غير آجل ويارب ترده لي كما رددت موسى إلي حضن أمه وأدعولي الله يربط على قلبي وأتحمل بعده على العلم إني أول مره أفارقه بحياتي والله إشتقت له وايد حسبي الله ونعم الوكيل
والسلام عليكم ورحمة الله وبركاته
أختكم أم عمر
07-06-2008, 04:59 AM
ضوابط المشاركة
العرض العادي
