انا كنت احب ولد عمتي من ايام الطفوله حب بريء على حب حقيقي غم طفولتي وكنت اكبر ويكبر معي هالحب
وكنت استحي منه حيا مو طبيعي .. غير عن اخوانه وباقي اقاربنا
وكبرت وكل اقاربنا صاروا يعرفون وهو عرف بعد فتره
المهم بعد فتره كبرت وتغطيت عنه وصرت أسمع تعليقات من بعيد لبعيد
انه يمدح فيني يقول مالك يانايف الا ساره
قدام امه وخواته وصارت تقول خلاص بنخطبها لك وهو يضحك ومبسوط
وكان من شباب هاليومين بس للامانه ماكان راعي بنات ولاسفريات نهائيا
وفجأْه ألتزم بشكل حقيقي قدم لي وكنت بأْولى ثانوي وقبل لايتقدم سأْل امه قال شوفوا اذا هي موافقه علي لاني التزمت واخاف انها غيرت فيني رايه وقلت ابيه ولاغيرت رايي ولاشي
وشبكوني له سنه وتملكت وباقي على اختبارات ثاني ثانوي النهائيه 3 ايام
وزواجي في اول الاجازه
واهداني ورقم باسمه في يوم ملكتنا وكلمني بعدها بيوم
وكان واضح انه اول مره يكلم بنت بس كان محترم وهادي ومؤدب الله يذكره بالخير
وكل صباح يكلمني يتطمن ويشوف انا ذاكرت زين والا لا وكان يقولي عن الادعيه ويعلمني اياها
وفي الليله نفسها يتطمن انا جاوبت او لا
واستمرينا على هالحال الين جا يوم زواجي ومر سريع لاانزفيت ولاشي جتني الكوفيره وزينتني
وجلست ودخلوا يسلمون اقاربنا ومو كلهم بعد وبعض صديقاتي ماشفتهم حتى لانه شوي وقالوا نايف بيدخل
ودخل وحط يده على راسي وقال اللهم اعطني من خيرها واكفني شرها (يطبق السنه)
ومرت ايامنا الأولى حلوه حلوه حلوه ماشاء الله تبارك الله كنت مرتاحه وحتى هو كنت احسه مرتاح سافرنا لمدن المملكه وانبسطنا وقتها كثيير وكان يقولي ودي نروح برا بس أخاف ماأرتاح قلت المهم أني معاك هذا يكفيني
ورجعنا بعد شهر من زواجنا للرياض ولبيتنا
بس كنت مااعرف كثير في المسؤوليه > جاهله كثير
يعني اجمع المواعين واغسلها ثالث يوم .. مااطبخ كثير .. وزي كذا يعني
مهمله في البيت بس البس واكشخ واجلس احتريه لاني اشتاق له لين طلع لدوامه وافقده كثير في الشقه
لاني للاسف مافهمت المعنى الحقيقي للزواج في البدايه
وخلصت الاجازه الصيفيه وبدت الدراسه وطبعا كنت ادرس اخر سنه ثالث ثانوي
وسجلت في مدرسة اخته وصديقة عمري
ودرست اسبوعين وبدت علي علامات الوحام وبغيت اموت في البدايه وتركت الدراسه وحولت منازل ومن هنا دت المشاكل الحقيقيه
كنت بس ابي انام شي مو طبيعي وربي احس اني دايخه وابي انام وبس
يمر اليوم بأكمله وأنا نايمه أصحى أصلي وأجمع فرضين وثلاثه وأشرب مويه وأشيل باقي أكياس المطاعم اللي بعده وأرميها وأرجع أنام وكنت أرفض الجماع بين فتره وفتره لإن تجيني أيام ماأطيقه يلمسني وأكون دايخه وأبي أناااام وبس
هذا حالي في الثلاث الشهور الاولى ويعلم الله كان شي غصب عني
وللأمانه ماكان يقول لي شي بس كنت أحس أنه متضايق ويذب علي كلام بين فتره وفتره مثل أحس أني لازلت عزوبي)) (ملييت من أكل المطاعم )( لو أني داري ماخليتك تحملين)ومن هالكلام وأنا مطنشه كني ماسمعت شي
وبديت اتحسن وتغيرت شوي في الشهور الوسطى من الحمل وبديت ارتب بيتي واكنس وأبخر البيت واطبخ بين فتره
وفتره وتحسنت الأوضاع بيني وبينه
بس للاسف دخلنا في مشاكل ثانيه وهي من ناحية التزامه وعدم التزامي
يبيني البس قفازات وضيق ممنوع ويبيني اقوم الليل معه ويبيني مااتكلم في المحلات
ولااقول بكم هذا ولاافتح فمي بكلمه .. ولايبي رجليني تطلع
مع اني كنت البس عباية راس ولاالبس بناطيل الااذا كانت البلوزه طويله تحت الركبه
عقدني في البدايه واتعبني معه
مره اوافق
ومره ارفض لاني احس لبسي مافيه اي شي
ويتهمني اني عاصيه ولااسمع الكلام
ومرت الايام على هالحال يوم نصفى ونصير عسل ويوم انواع الطقاق والهواش
وولدت بالسلامه وجبت بنوتي الاولى والاخيره منه
وطلعت من النفاس ورجعنا وصارت بينا مشكله كبيره ورفعت صوتي وانا اصيح واصارخ وهو مطنش مايرد (( ليته كان يرد ليته كان يقول شي )) لانه باسلوبه هذا كان يستفزني أكثر للأسف
جتني ايام صرت فيها اشبه بالمجنونه مسؤولية بيت وزوج وطفله رضيعه وحبوب منع حمل
جابت لي الجنون اهلكتني اتعبت نفسيتي في البدايه
صرت مااتحمل شي وهو ماقدر هالشي او يجهل الله واعلم
ورسبت في الثانويه العامه وانا رايحه اختبر الاختبارت النهائيه حقت الفصل الثاني وانا نفاس
بجروحي وخيوطي يعني كنت امر بضغوط مايعلمها الا الله
المهم بعد هالمشكله رحت لاهلي وجا وعلمهم كل شي عني واني ماكنت اغسل ومايلقا كاس نظيف ومايلقى
ملابس نظيفه وانه وانه وانه وخلوها عندكم تتعلم شهرين ثلاثه
ورجعت له بعد شهرين وكنت في هالفتره اتصل مايرد وارسل مايرد
ورجعت حياتنا تتحسن شوي شوي بس المشاكل مستمره للاسف بسبب التزااامه
وعدم التزامي ومع هذا كنت احاول ارضيه عبايتي هو اللي ينزل يفصلها لي
لبسي في اغلب الاحيان اشاوره
بس برضو ماكفاه كان يبيني داعيه في يوم وليله
وكان دوامه مزعج جدا لانه كان يقعد بالساعات يقول لازم احلل راتبي !!
وكنت اقوله معليش بس حط لي شي يسليني مثل النت وخلني اتعرف على الجيران
اي شي .. وركب لي اسبوعين وبغيت أطير من الفرحه وشاله بعد ماشاف فيه اغنيتين محفوظه في الجهاز انحفظت تلقائيا بعد ماسمعتهافصل السلك حق المودم وطلعه برا البيت ولاعاد جابه ابد
وبعدها رفض يرجعه يقول مااحب ادخل النت في بيتي سبحان الله مستحيل ارتاح وفي بيتي نت
ولااحبك تختلطين كثير بالجيران ماله داااعي !!
وجا ذاك اليوم وصارت مشكله كبيره ورفعت صوتي وعصبت لإني كنت ابكي بحرقه وهو يضحك بنته ويلعبها وانا بطبعي حنونه وطيبه ومرحه ووسيعة صدر بس من النوع اللي يتنرفز بسرعه
المهم كنت اصارخ وجلست بنتي تصيح وهو شايلها وقلت ودني اهلي وانا اصارخ واصيح
قال خلاص روحي لاهلك خلي احد يجي ياخذك وطلع هو من البيت وخلاني لحالي ودقيت على اخوي
وضفيت اغراضي وطلعت
وسمعت بعدها بكم يوم ان نايف يستخير الله في الطلاق
وان احنا مانصلح لبعض وانه هو ماارتاح ابد وانه انا طويلة لسان وماأحترمه >> للأسف أظهر الجانب السيء والسلبي وأخفى القصه والحقيقه الكامله
وبعدها بشهر صارت الطامه الكبرى اللي كنت خايفه منها
نايف سلم الشقه واتصل في امي وقال روحو خذو اغراااااضكم ولعل الله يحدث بعد ذلك امرا
وسلام عليكم
اااه شعور لايوصف الكل عتب علي انا الكل لامني انا
انا اللي ماريحته انا اللي مافهمته انا وانا وانا وانا استاهل اللي يصير لي
تعبت وانا اتكلم واقولهم انه كيف كان ضاغط علي وكيف كنت متحمله وساكته
ويردون هو الرجال وأنتي الحرمه هو ملتزم كان تحملتي واحكي عن الدوام وكيف اعاني من الفراغ ويقولون هذا دوامه وش يسوي يعني ؟
خلوه ملاك وانا الجانيه الغلطانه الناس واهلي للأسف
ورحنا وجبنا اغراضي من الشقه ااه كنت امشي بدون احساس ومو مستوعبه شي
بس اللي عرفه اني لجأت الى الله ودعيت بشكل مو طبيعي وألحيت ان الله يرده ردا جميلا ولايحرمني منه
وكنت اتصل ومايرد وارسل مسجات كلها حب وشوق واذكره بكلامه ووعوده وحبه لي وللأسف ماكان يرد نهائيا لدرجة أتصل عليه من أرقام ثانيه وإذا سمع صوتي يقفل ؟
وكلموه خوالي وامي انه مايستعجل ويطلق اهم شي مااايستعجل
وكان جاي في ذاك اليوم وجايب لبنته حليب وأغرااض .. مثل كل مره وطلب انه يكلم الوالده على أنفراد
وكلمها وقال انا برجعها بس اوعدوني تتغير وتسمع كلامي !
وفرحت الوالده من كل قلبها لانها كانت تقدره وتحبه بشكل مو طبيعي ولاكانت تبينا نفترق
نهائيا وسمعت الوالده تتناديني وكنت ادعي في الظلام في اخر ساعه من يوم الجمعه ودخلت علي
وولعت النور وقالت نايف يبي يقابلك واشهق واقوم اضمها وانا ابكي
وراح يصلي وجا بعد الصلاة وقابلته وتكلمنا وتكلمنا واتفقنا وعلمني انه ناوي يطلق وراح المحكمه ووراني
ورقه موعد للطلاق !
وكان الموعد انه يطلقني يوم الاحد وهو جا يرجعني يوم الجمعه
وتواعدنا على أشياء كثيره ووعدني انه يبدا من بكره يدور شقه ونبدا حياة جديده فيها
وبدا فعلا يدور وكان بهالفتره يحلف انه مشتاق لي ويموووت فيني ولازم يشوفني ويجلس معي لحالنا
وصرت أطلع معاه .. الفجر .. الصباح .. آخر الليل ..بطلب منه.
وتحملت إحراجات كثيره مايعلمها ألا الله عشانه
وأخيرا لقا شقه وأْثثها ورجعت وانا احمد الله اني رجعت لزوجي وبيتي وراح يلتم شملنا
بديت حياة جديده معه معاملتي تحسنت اكثر من اول صرت مااقول الا سم ولبيه وقليل مااتنرفز واعصب
كل شي سويته ابي ارضيه ضغطت على نفسي كثيير عشان أرضيه
شريت ولبست أحلى الملابس سويت له أحلى الليالي الرومانسيه وتعبت عليها أتعمد أطبخ الأكلات اللي يحبها .. يوميا أجهز ملابسه وابخر الدولاب عشان إذا فتحه ياخذ ملابسه يشمها لانه كان يحب ريحة البخور .. حتى نعاله الله يكرمكم أجهزها وأمسحها وبوكه وجواله ومفاتيح سيارته كل شي اجهزه قبل لايصحى للدوام .. عشان مايتأخر ..ويوميا أضمه وهو طالع للدوام وأضمه وهو راجع
وبنتي ارتبها واجهزها وانظفها وأعطرها قبل لايجي من دوامه
عيوني صرت اغطيها من أطلع من باب الشقه لدرجه أني ماأشوف اللي قدامي زين ورب البيت
مااتكلم في المحلات نهائيا وإذا بغيت شي أقرب منه وأقول له في أذنه وهو يقول لراعي المحل
صرت أسوي لرجوله مساج بشكل شبه يومي لانه كانت تعوره
بسبب حادث تعرض له من زمان .. الحفه بنفسي انواع الروائح اللي تفتح النفس وفواحات
ماادري يانااااس بس احس اني تغيرت كثير وقتها جد تغيرت
حسيت بالمسؤوليه وبديت احب بيتي وزوجي اكثر واكثر

بس للاسف
حسيت الرجال وصاد ومايطالعني زين ومايحب يحط عينه بعيني
ياناس قسم بالله تغير
قسم بالله احط يدي على يده واقوله وش فيك ياقلبي
ويدف يدي ويقول تكفين لاتلمسيني
يطلع الفجر ويرجع العشاء واه ياقلبي
لانت ولاجيران وباب الشقه مقفل ولاثابت تخيلوا
ااه كثير كنت أحس أني في سجن أحس أني مخنوقه
موت بطيء ووقتها ماقلت شي بس كان يحس أني متضايقه !!
بديت احس باليأْس
تعبت جد
الرجال صاد ومايطالعني
يجي ياكل وينام ويصحى ويطلع لصلاة الفجر ويرجع
العشاء وياكل ويناااام اقسم بالله هذا نظامه لمدة شهر تقريبا
واذا بغا شي واحتاجني عادي يعاملني طبيعي بدون كره وبدون حب
وياخذ اللي يبي ويرجع زي اول مايطالعني زيين ولايبي يسولف معي ولاشي !
سأْلته وبكيت ومت من البكا وكان يصرفني ويسكتني الين جا ذاك اليوم
ودخل وصارحني وقال انتي ياساره ماناقصك الا واحد يحبك
قلت وانت ماتحبني؟
قال ماقدرت احبك ابد قلت وكلامك وحبك لي بداية زواجنا وينه قال مدري احس اني مااقدر اكمل معك !
قلت ليه تاخذ هالشقه وترجعني ليه تعشمني ليه ؟قال احاول عشان مااظلمك !
بس الظاهر اني ماقدرت احبك ابد وانو مافي بينا نصيب
رحت لغرفتي وانهرت على سجادتي وانا اصلي وادعي من قلبي بحرقه ان ربي يصبرني
وهو طلع!
واتصل بعدها بساعتين وقال يلا يابنت الناس خلينا نتوكل على الله وننفصل الحياة صعبه
واحنا مع بعض انا ماقدرت اسعدك ولاراح اقدر اسعدك الى متى وانتي محشوره في كاس
وانا محشور في بياله! خلينا نطلع ونشوف الدنيا وكل واحد يشوف حياته
قلت بس؟ قال ايه حرام يضيع عمرك وعمري عالفاضي قلت خلاص صار اللي تبيه ..
قال شلون يعني قلت انا موافقه اننا نتطلق ..
قال الله يعوضك انتي تستاهلين كل خير وسامحيني وحلليني
قلت مسامحتك ومحللتك ولافي قلبي عليك شي قال الله يجزاك خير ..
وقفلت منه وجلست ع الأرض ساعه وربع وأنا أطالع فوق << مو مستوعبه وش اللي قاعد يصير بالضبط
وقمت اضف اغراضي وشنطي وانا مستغربه كيف ربي نزل علي هالثبات قسم بالله
مانزلت مني دمعه وقتها حسيت اني قويه وصابره ياربي لك الحمد والشكر
رجع ووقف عند الباب يطالعني بحزن ونظرات غريبه وانا اضف اغراضي في شنطه كبيره
ومريت من عنده بطلع ومسكني وباس راسي وبست يده قال سامحيني
قلت مسامحتك ومشيت وهو يطالع فيني بحزن وقال اهنيك على ثباتك وايمانك بالقضاء والقدر وانا اقول الحمدلله وش بيدي
وراح يركب اغراضي ولبست عبايتي وباس راسي عند باب الشقه مره ثانيه
وقتها دمعت عيوني) :
حسيت اني في حلم حسيت اني مو مستوعبه شي
حسيت اني مسكينه بجد !! ورحمته بنفس الوقت ..
وطول الطريق يتكلم في بنتنا وانه راح يسوي ويسوي وماراح يخليها محتاجه لشي
وانا ساكته وقبل لاانزل قال في امان الله قلت في امان الله قال وش بتقولين لاهلك
قلت بقول اننا اتفقنا على الطلاق .. وان مافي بيننا نصيب .. قال الله يعوضك قلت امين ويعوضك
ونزل معي الاغراض وباس راسي للمره الثالثه عند باب الشارع ..لاحول ولاقوة الا بالله
وراح
دخلت وكنت معطيه امي خبر ولقيت الوضع هادي واهلي كلهم دارين وساكتين ولايبون يبينون لي شي
وانا اسولف عادي وكل شوي اقول اللهم اجرني في مصيبتي واخلف لي خيرا منها
وبعد ثلاث ايام بالضبط
رحت لغرفتي ومسكت جوالي لقيت 3 مكالمات لم يرد عليها
منه .. تخيلو .. انهبلت قعدت اخبط راسي بيديني كأني في حلم ياناس واطالع مره ثانيه
ياربي وش يبي ذا وش ناوي فيني هالرجال وارجع اتصل ويرد ..وصوته هاادي وعادي
قلت السلام قال وعليكم السلام
وشلونكم قلت بخير الحمدلله قال فاضيه ؟؟ قلت إيه بغيت شي ؟
قال اسمعيني انا جبت سياره كبيره عشان افضي الشقه واجيب لك باقي اغراضك واسلمها
قلت طيب وبعدين قال وحسيت ان ودي ارجعك انتي وبنتي واني ابيك ولاودي اطلقك !
انا ولاكلمه ؟!وكمل كلامه ..
قال بعدها حسيت اني مو طبيعي واتصلت بشيخ وقرا علي بالجوال ايات وقالي انت معيوووون غمض عيونك
وبتشوف ناس هم اللي ناظلينك وشفت ناس من ضمنهم ناس مقربين لك << صبرا جميلا
قلت اسمع عاد ياولد الناس
انا مالي شغل والله
معيون والا لا رح كلم ناس كبار وتفاهم معهم لاني مااقدر اعطيك اي جواب ألحين أو حتى أرد عليك وعلى كلامك !!
قال بكيفك انتي حره ماراح اغصبك ترجعين تبين ترجعين ارجعي ماتبين بسلامتك بس انا
حبيت ابين لك وش حسيت فيه بس .. وبكيفك ترى !
وكلم اخته بالموضوع وكلمتني
وشرحت لي كل شي وقالت لاتتضايقين انه قال انه شاف مقربين لك
يمكن من حبهم لك حسدوك غصب عنهم
قلت انا شاكه في الموضوع وأخوك للأسف ماعاد أثق فيه !
قالت والله ياساره هو ملتزم ويخاف الله وماراح يكذب عليك بشي والا يتبلى على الناس لاقدر الله !
وانتي فكري زين بالموضوع
وعلمت امي بس ماقلت انه يقول شفت مقربين لك هم اللي حاسديني لانهم حرجوني هو واخته
يقولون لاتعلمين أهلك
وبعد فتره جا وكلم ابوي وقاله انا مااشوف غيرهاوالله لو يحطون الحريم كلهم قدامي مااشوف الا هي
شي غصب عني ياعمي أنااحبهااحبها والله احبها تخيلوا قال هالكلام لابوي
وكلمني مبسوط قال كلمت أبوك الله لايحرمني منك
بس حسيت بصدقه وقتها مدري ليش جا وجاب لي مبلغ وقدره .. يقول رد لكرامتك عند الناس ولو اعطيك روحي ماتكفي يمسك وجهي بيده ويقول انا احبك اقسم بالله أحبك
وهو خانقته العبره ..وكان معزوم نفس اليوم وقالي والله ماودي اروح ودي اقعد معك
قسم بالله ماودي اوخر عنك .. وكل شوي يمدح فيني كأنه أول مره يشوفني
وحسيت انه يحبني حب مب طبيعي وقتها كنت اشوف الصدق بعيونه خصوصا انه ماعمره كذب
ورجعنا ومن رجعت وهو يعاملني ويسوي كل شي بس بشكل رسمي
بعدها بشهر بدا يصد ولايطالع فيني وينام بالصاله ويقول ودي اموت وارتاح
ودي اروح في دبابه وتنفجر واخلص ودي ادفنك انتي وبنتك في حفره
وقتها بدت الامور تستاء وبديت اقوله طلقني خلااص وهو يقول اصبري اصبري
وجا ذاك اليوم وقال يلا بس روحي غيري جو وخليني استخير وانتي استخيري واطلبي الخيره المباركه من الله
وطلعت وهي الطلعه
جلست شهر لااتصلت ولاهو أتصل ! واتصل فيه ابوي وكان واصل حده ومعصب من تصرفاته
وتهاوش هو وياه وشرشحه على لعبه واستهتاره فيني اللي ماأظن فيه أحد بيرضاها لبنته أو
أخته !
وقال طليقي انا رايح المحكمه
ومطلق ومواعديني اخر الشهر بالورقه !
وارسل اغراضي في كراتين وارسل الورقه بعدها بشهر


وألاحين طليقي له شهر متزوج ولا فيه أي شي يدل على أنه كان يحبني في يوم من الأيام
والآن لي 9 شهور مطلقه والحمدلله على كل حال

ماني مستوعبه شئ بس اقول الله يعوضك باللي احسن منه ولي رجعه

لاحول ولاقوة الا بالله خنقتني العبرة وأنا أقرأ قصتك.........

في بداية زواجك قلت الحق معه !!!! بعدين قلت لا البنت صغيره!!!! بس اللي فرحني برجعتك الثانيه انك حشمتيه وأكرمتيه علشان ماتحسين بتأنيب الضمير أببببببد في حياتك بالعكس أنتي قدمتي تنازلات كبيره تحملتي ضغوطات فأنا أقولك أنتي ماشاءالله (امرأه عظيمه) تحملتي الكثير من أجله !!!!!!!
وحاولي انك ماتفكرين فيه ولاتفكرين بزواجه ممكن يكون معيون وممكن ربي ماكتب بينكم نصيب الحمدلله الدنيا ماتوقف عليه ولاتوقف على أحد وباذن الله ربي بيعوضك بالافضل والاكرم منه وصدقيييييييني يمكن انفصالك وطلاقك منه فيه خير لك وراحه لك أنتي بالذات
... من البدايه أنتم ماكتب ربي بينكم توافق .........الشي الوحيدانك كنتي تحبينه قبل ومرة ثانيه الله يوفقك ويعوضك بالقريب العااااااااااااااااااااااااااااااااجل

اللي مو فاهم المووضوع يقرأ رقم ( 1 ) قبل

-------------------------------------------------------

أختي

ما تعرفي فين الخير ؟

و رجعتك لطليقك المرة التانيةة خير بإذن الله ،، علشان لا تندمي طول عمرك على الطلاق

لإنك سعيتي لإصلاح كل شئ

و عمره الإلتزام ماكان بالأسلوب اللي كان يتبعه ؟؟؟؟
إيش اللي أقوم الليل أصلي و أجبر زوجي او زوجتي تقوم تصلي معاي نافلة ؟؟؟؟؟

عالعموم ..

لا تبكي على اللبن المراق ، و الله يعوضك إن شاء الله

الله يوفقك ياختي ويديم السعاده بينكم
ويخليلكم بنوتتكم

أم الوردتين أقري قصة طلاقي 2

وشكرا على ردك

الله يوفقك ويسعدك

عين العقل اللي سويتيه حبيبتي

ومادام يخاف الله اكيد بيسعدك

عوضك الله بخير منه ورزقك الزوج الصالح المحب والحياة المستقره

__________________
اللَّهُمَّ إِنِّي أَسْأَلُكَ الثَّبَاتَ فِي الأَمْرِ وَأَسْأَلُكَ شُكْرَ نِعْمَتِكَ، وَحُسْنَ عِبَادَتِكَ، وَأَسْأَلُكَ قَلْباً سَلِيماً وَلِسَاناً صَادِقاً

اخ يا قلبي دنيا تخوووف لاحول ولا قوة الا بالله ،، والله تعب هالحياه ,,يالله بالاجر والثوواب ،، دامج الحمدلله دعيتي وقريتي وخدمتي وحاولتي اتسووين الزين كله توكلي على الله ولاا تزعلين ،،، تعووويضج بيكون ع الله تعالى ..طبيه ولا تفتكرين فيه حتى ,, الله يسعدج ويرزقج رزقا ما حسبتي عليه حسسساب,,


حبي نفسسج ياا اختي ,, وانطلقي في مشااريع خيريه اخرويه ,,, ونسيه نسييييه وهذه قصة ابتلاءج مو همج ،، ابتلاءج اللي بعون الله تكفرت فيه وااايد من ذنووبج .. الله يسعدج ..

__________________