زعلان لكن عارف شلون اراضيك
ماحد غيري يعرف بطبع خلي


اعرفك لي منك تضايقت واشفيك؟
ماعاش من زعل حبيبي وكلي


من نظرتك من هيئتك وتغليك
اقرأ ملامح ضيقتك لا تقلي


ادري علي زعلان لكن اوريك
شلون ترضى يا بعد كل من لي


ملح الحياة اني اضمك واخليك
وش هي الحياة بدون جد وتسلي؟


ساعات لي خاطر اجيبك ووديك
وارفع حرارة حبنا بالتغلي


اقول ماحبك وما ابيك ..مابيك
عشان اغيضك بس وافشي غلي


لا الحقيقه اني اهواك واغليك
ومحبتي لك ماب عدها تخلي


ودي احطك وسط عيني واغطيك
عشان ماتبعد عن العين ملي


لي غاب حسك نبض قلبي يناديك
بشتاق لك بالحيل يابعد كلي


اقعد انا والشوق دايم بطاريك
افكارنا مابين ربط وحلي


زعلان مني كل كلي يراضيك
ماحد غيري عارف بطبع خلي


يالله تبسم يالله ذبحني تغليك
يكفي حبيبي (مد بوز ) وتغلي