اهلا بالجميع.. عساكم طيبين ان شاء الله

بادخل في الموضوع

في عيد الفطر الي فات اهديت زوجي Ipod مزخرف بكلماات خاصه و الحمدلله اعجبته الهديه جددددا
قال انه كان نفسه فيها من فتره و انه كان ناوي يشتري بس مشاغله نسته


هو يستخدمه وقت النوم.. بحكم انه يشتغل و يدرس و ما عنده مجال يستخدمه غير قبل ما ينام
ينزل محاضرات اسلاميه و كتب دينيه و كتب تفسير القرآن و شرح الأحاديث و كمان برامج تذكر بأذكار الصباح و المساء و الخ
استخدامه مره كويس ما شاء الله, لدرجة انه دايما يشكرني على الجهاز و يقول ان لي اجره عشانه استفاد

المشكله يا ساده و يا سيدات
قبل الجهاز هذا كان يحضني و يتكلمممم الين ينام و انا الطريقه هذه كانت احب ما عندي
لأنه لحظات نكون هاديين و الذهن صافي و كلمات بسيطه الا انها احب ما عندي اسمعها اخر شي قبل ما انام

الحين يحظن الآي بود حقه و يتفرج عليه و يقراااا و يقلب و و وو خلاص ولا كأني نايمه جنبه
هو طبعا يقول تصبحي على خير و يحضني و يبوس و خلاص يدير للجهه الثانيه
و أحيانا يكون كريم و ينام و هو حاضنني بس حاطط السماعات في اذنه و يستمع للمحاضره و باله بعيد

بصراحه انا خلاص بدأت اغار من الآي بود هذا

و لمحت له ان المفروض نمنع كمان الجهاز هذا من غرفة النوم حاله من حال الموبايل
قالي بلاش حساسيه زايده و قال انه هذه هي الفتره الوحيده الي يقدر يستخدمها,
و قالي لا تمنعيني من الخير و اتعلم و استفيد

قولولي ايش اسوي..الموضوع هذا مؤثر فيني
زوجي بالعاده ما اشوفه كثير يومه ما بين الجامعه و الشغل و لما يجي البيت نكون مشغولين بالعيال و كده
و وقت النوم هي الفتره الوحيده الخاصه اللي نكون فيها لوحدنا بدون اي ازعاج و دوشه

قاعده امنع نفسي من اني امسك الآي بود و اسوي كده