السلام عليكم ورحمة الله وبركاته,,

اخباركم جميعا!!

قبل فتره قصيره ذهبت لأحد الأسواق وكـعادتي أُحب أن أنصح الأطفال بالأخطار المحيطه بهم,,
بعطيكم مثال بسيط طفل كان يطلب من احد العماله الوافده سيجاره ذهبت لأحذره وذهبت لآمه وقلت لها عن الموضوع وشكرتني,,

هذا موقف بسيط يوضح لكم كيفية نُصحي لهم والأطفال دااااائما يتقبلون والله أني اخاف عليهم واخاف ربي يحاسبني اذا ماوجهتهم خصوصا كثير من الأهالي ربي يتوب عليهم يخلفون وينسون

بحكم عندي اطلاّع في مسائل الغذاء والتغذيه أحب احذر الأطفال من اضرار السكريات والوجبات السريعه بطريقة المزح المقترن بالتحذير المحبب يعني ولله الحمد ولا طفل ابدى امتعاضه ولا أم ايضا كانو يشكروني ويقولون لي بصريح العباره فهميهم عجزنا ننصحهم وتقول لهم شفتو الدكتوره ايش تقول لازم تسمعون كلامها


لكن الوضع اختلف في أحدى المرات كنت انتظر في أحد الكراسي جلست بجانبي أمرأه يبدو لي انها في عمر ال50 ومعها 4 أولاد ,,

جلسو الأولاد جنبي والأم بالطرف الاخر والولد اللي جنبي كان بيده جيلاتين(هاريبو) وانتو اكيد قريتو اضرارها وايضا دخول دهون الخنزير بها وهذا عن دراسه موثّقه..

قلت للطفل ياحبيبي مضر عليك وعلى اسنانك لاتصير مثلي اسناني شوي وتطيح لأني كنت احبه الطفل ابتسم وسكر الكيسه وقال صح

بعدين قلت له تحب الجيلاتين؟
قال ايوا كثير
قلت انا مثلك بس لاتاخذ من هالنوع (هاريبو) مره ثانيه فيه انواع مرره احلى وقعدت أعدد له الانواع قلت لأن هاريبو اكثر شي مضر,,

قال ان شاءالله وابتسم لي

شوي التفتت الأم على الطفل قالت وش تقولك ذي؟

قال لا بس تقول لي مو زين هالنوع

قالت لي هيه مانبي نصايح!!
انا وقتها انصدمتتتتتتتتتتتتتت مع اني ملسونه يعني اعرف ارد بس سكتت
بعدين قلت ليه؟
قالت ترى القهوه اللي بيدك خنزير؟
قلت جد؟
قالت ايه ايه
ونقابك دخل بتصنيعه خنزير؟
قلت ؟؟؟

قالت صح والكرسي اللي جالسين عليه فيه خنزير يلا قومي

قلت ياعزيزتي انا قلت للولد هالشي من مبدأ اني خايفه عليه ومن مبدـأ اني متأكده من هالمعلومه وبغض النظر عن دهون الخنزير ومشتقاته هو مضر والمسلم لابد أن يبتعد عن الشبه في كل حال

قالت اقول اسكتي وانطمي مانبي نصايح من احد واي كلمه بتقولينها الحين بوريك الشغل؟؟؟؟

قلت جزاك الله خير قالت اقول انطمي

قلت بس بقولك شغله انا اعرف ارد بس والله اني مصدومه جدا جدا لان اول مره يصير لي هالموقف

قالت مو ناقصتك يالملقوفه؟؟؟

قومت عيالها وراحت وهي تصرخ ياخنزيره!!


هل فعلا انا غلطانه؟؟
اللي ينصح ويخاف على غيره غلطان!!

يعني اكيد في اشخاص نفس عقلية هالأنسانه بالمجتمع هل هالنوعيه يرون النصيحه عيب؟

والله مو قادره ارتب افكاري لان جد انصدمت ولا زالت الصدمه ولا وصلت لكم ربع اسلوبها حتى في سياق موضوعي


ابي تحليلكم

__________________
لايقدر على رفع بلواك إلا الله متى تحرر في قلبك أنه لايرفع البلوى إلا الله
فاعتبر أن البلوى رفعت
(صالح المغامسي)