السلام عليكم ورحمة الله وبركاته

الموضوع لا يعنيني بل يعني أختي

أختي تملكت ولله الحمد
و لكن ما شافها ولا شافته
ولا اخذ رقمها ولا اخذت رقمه
هو ما قال واحنا ما قلنا
مع أن اختي ودها تشوفه بس تستحي
تقول تعال اشوفك < صعبه


لما كانت تجهز اغراضها وتروح للسوق وتجي والحوسه تقول احس ان الامر جد وصار يخصني

احنا خلصنا بدري من الاغراض والتسوق والحين جالسه بالبيت
دايم تقولي احس ان الموضوع ما يخصني
احس ان بنت الجيران بتتزوج

زوجها عمره 32: سألنا عنه وفيه كل المواصفات الحسنه كامل والكامل الله سبحانه - علما بان ابي دقيق جدا جدا جدا جدا في السؤال عن الزوج فتره الخطبه

اختي (الزوجه): طيبه حبيبه متدينه وتميل دائما للعقل اكثر من عاطفتها في تحكيم الامور بس متردده درجه اولى بكالريوس عمرها 24

أبغى شعورها عادي ولالا علما بانها استخارت وتقول ارتحت حمدلله
ومره تقول يجي شي ودي ارفض وفجاه تجي راحه مو طبيعيه وصلّت كم مرره والحين مرتاحه ولله الحمد

فيه أحد قد صار له او صار لقريب منه هالشعور ؟؟

والمشكله اني مو متزوجه عشان اقعد اتفلسف عليها
اخاف اقولها شي تقول وش عرفك يقالك مجربه يعني < دايم تقولها عشان كذا سألتكم

وبخليها تقرأ الموضوع وردوا على أساس أنكم تكلمونها

وكلت الامر لها

افيدووني تكفوون

اهم شي انها استخارت وارتاحت

يمكن لانو ماعاشت جوو الاحداث بجد يعني ماشافته فماتحس انها بتتزوج الشخص الفلاني

صديقتي حاليا مخطووبه واستغرب منها احس ماكانها مخطووبه اتوقع السبب لانها نفس حالة اختك

<<<ملاحضه

ترى انا مثلك <<فالحه ادري وعمري اصغر من اختك بس قلت كلامي بناء على حالة صديقيتي
واهم شي الاستخاره ومادام هي مرتاحه لاتفكر امور ثانيه
احسه شعور عايتي بالنسبه لهالفتره

__________________
وعند الله لاتموت الامنيات

فعلا مثل ما حكت اختي انفاس العطور مدام هى استخارت و رتاحت لاخص ما تخاف وهذا شعور عادي كل الي بده يتزوج ويتدخل الدنيا راح تتوتر طبيعي هذا اختي المهم انه استخارت ورتاحت الحمد الله
بالتوفيق لاختك ولك انشاء الله ربنا بيعطيكي ابن الحلال انشاء الله

أبشرك وقولي لها لما يقرب الزواج بيجيها خوف وضيق وبكاء وبتصير مترددة

وطمنيها انه كله عاااااااادي جداااااااا ويصير لأغلب البنات

فتحاول تفهم هذه النقطة علشان ماتنكد على نفسها في أحلى أيامها

وهذا معناه بإذن الله أنها بتتوفق في حياتها

وألف مبروك لها مقدماً:14:

ربي يسعدها وعقبالك انت وكل البنات

__________________

والله اختى الكريمة أسمحوا لى ان أشارك معكم بالرغم من أننى شاب لكى أقول لك ...
الخوف والتردد وأحيانا الشعور بالحزن شيىء طبيعى جدا للشاب والبنت المقبلين على الزواج ... فالإنسان دائما بطبعه يقلق من المجهول ... مابالك ( وكان الله فى عونكم فى مجتمعاتكم...) أن الفتاة قد تم عقد قرانها على شاب لم تجلس معه ..!! ومن الممكن أن تكون لم تراه ولم يراها ...!!
مع أننا نعلم جميعا كمسلمين أنه واجب شرعا أن يرى المتقدم للزواج للبنت وتراه فى وجود محرم لها... ومع ذلك مازالت بعض المجتمعات تنكر هذا الحق....!!!!
على كل أضعف الإيمان أن تطلبى من أمك أن يقدم زوجك صوره له لأبيك حتى تستطيعى على الأقل بناء صورة ذهنيه له فى مخيلتك ... ومن الممكن أن يطلب أبيك أن يأتى للبيت ... ومن أحد الأماكن بالمنزل تستطيعين أن تشاهديه وتسمعى صوته بدون أن يراكى... ومبرووووك مقدما..
تحياتى,,

انفاس العطور ريحتيني الله يريحك

اليوم سالتها جس نبض قالت وهي تضحك اصلا مافي مشاعر خير شرر

الله يجزاك خير على الدعوه :$

قلب صبيه

اشكرك حبيبتي والله يجزاك خيير ما قصرتي وان شاء الله ماتشوفي شرر :$

أم جمانه
ان شاء الله بقولها وبخليها تقرا كلامكم بس اللي ضايقني انها اليوم تقول اصلا مافي مشاعر نهائيا

لما نجيب طاري زواج تتذكر انها هي المقصوده

وربي شي غريب :|

الله يكون في العون ومشكوره حبيبتي على دعواتك :$

m.s
تفضل حياك اخوي
استوقفتني جملة ( وكان الله فى عونكم فى مجتمعاتكم...)
احنا مجتمعنا ما يرفض النظره الشرعيه او انها تجلس مع زوجها
اختي اللي قبل لما تملكت طلعت مع زوجها واثثت البيت
وشايفها قبل الملكه بعد مع وجود المحرم
احنا ماننكر ولا نرفض هذا المبدأ لكن اختي هذي الزوج ما طلب يشوفها ويقول الاهم عندي اخلاقها وما يهم الجمال واختي استحت تطلب
وهي لسى ما كملت اسبوع متملكه يعني في أمكانيه انها تشوفه قبل الزواج
لا انا لو بطلب من امي ما طلبت صوره
كأني صمت وصمت و أفطرت على بصل
لو بكلم امي اقولها يجي يشرب عصير او قهوه معاها ويجلسون مع بعض ويتبادلون السوالف
وفكره اني اخليها تشوفه من غير ما يدري مستحيل
لانها خلاص الان تعتبر زوجته بيجي يوم وتكون معاه لحالها لا محاله ليه اخليها تشوف من وراه
المفروض تشوفه وجها لوجه

الله يكون في العوون

بداية الف مبروك و الله يوفقها و يديم عليها الفرح و السرور

دامها استخارت و ارتاحت اتوقع خوفها طبيعي

خصوصا انها بتبدأ مرحلة جديدة من حياتها

و من كلامك مافي شي يخوف او غير مطمئن

الله يهنيها و يتمم امورها على خير