السلام عليكم و رحمة الله و بركاته ..

أخباركم ..

طبعا في البداية ، أبشركم و الحمد لله من بعد موضوعي الأخير عن تحمل المسؤولية و المعاناة ..
و زوجي بعد ما كان متحسن بنسبة معقولة نوعاً ما في الغربة ، فدحين ممكن أقول إنه الحمد لله
صار مية بالمية متحمل مسؤوليتي أنا و ولدي .. صح إني ما أحاول أثقل عليه ، و إني شايلة
بعض الأمور .. بس مرتاحة كذا و الحمد لله ..
و خاصة يوم تكلمت معكم ، حسيت برواسب كثيرة نفضتها و بديت أنظر فقط ..
( للحاضر و المستقبل ) ..



بس اللي مضايقني إنه صاير طول الوقت مشغول عننا .. بارد .. روتيني ..
( زوجي فيه طبع من زمان ، إنه ما يقدر يفكر بشيئين بوقت واحد .. )
صرت أشك في إنه ما صار يحبني مثل زمان ..
بس هو شايف حاله طبيعي و إنه ما تغير و لاشئ ..

و يمكن لإني أمر بفترة وحام و أغلب أوقاتي عند أهلي ، و الشقة دحين اللي الحمد لله بدأت تخلص ..
فالبعد مثل ما دايم أقول له ( يسبب الجفاء ) ؟؟؟ و بديت من الأسبوع هذا أجلس فيه ..

.
.

سؤالي أو أسألتي و اللي بحاجة فيها لنصايحكم و خبراتكم :

1 - زوجي من يوم تزوجته و هو يكره الفطور و مستحيل يفطر .. يكره إنه أول ما يصحى يفطر ..
و يجلس لحد وقت الغداء و معدته فاضية ( مع إنه وزنه زاد ماشاء الله ) ..
يصحى بسرعة و على طول عالدوام ..

قريت نصيحة لوحدة في النت، إنه الوحدة لازم تحسس زوجها بالفرق بين ( حياته سابقا في بيت أهله
و بين حياته الحالية مع زوجته ) .. حتى يشعر بوجودها و غيابها .. و ما أحس إني صنعت له أي فرق ..

إيش ممكن أعمل له قبل لا يروح للعمل ؟؟؟
تعبت معاه ..

.
.

2 - زوجي يكره المساج ، لإنه يقرف من الزيوت على جسمه و الكريمات ..
و يقرف إذا جاء على ظهره الزيت و يتألم إذا عملت له مساج ، لإنه الشعر في ظهره بيوجعه

الصراحة ( بيني و بينكم ) ..
أنا عودته إني أحب المساج ، و أحب إنه يدلعني أكثر .. خاصة في الخارج كنت أرجع تعبانة من الجامعة

بس مرات أحزن عليه و أشتهي أعمل له شغلات تريح جسمه .. بس ما أعرف إيش ممكن أعمل له ؟؟
و كم مرة أقول له أسوي لك مساج و يرفض و حتى الزيوت اللي أشتريها ، بطلت أشتريها

.
.

3 - زوجي إذا صحي في الصبح ، يلبس ثوبه و شماغه و يروح للعمل ..
و لإنه ما يحب يفطر ، فما يصحيني .. و لإني حاليا حامل كمان و تعبانة مع الوحم ..
و طبيعتي بالأصل ( إنه نومي قليل بالمررررة و صعب أرجع أنام إذا قمت )
فما يصدق زوجي يشوفني نايمة .. و كمان لإنه ولدي متعبني في النوم و ما ينام غير عالساعة 2 الليل
و أنا إذاا قمت لصلاة الفجر ، ما أرجع أنام غير بعد نص ساعة ..

المهم ..
أقرى دايما إنه هناك زوجات يعطروا أزواجهم و يصحوا معهم و يجهزواا لهم أشيااء في الصبح ..
و ما أعرف إيش ممكن أعمل لزوجي ؟ ثوبه و كل شئ جاهز و هو ما يفطر ..

هل عندكم أفكار ليا ؟؟؟

.
.

4 - كيف ممكن أهتم بنفسي في فترة الحمل ؟؟؟
أحس إني ما صرت جذابة و أخاف أبدأ أفقد الثقة في حالي ..

كارهة المكياج و شعري من يوم رجعت من الخارج قصيته عشان أجدده .. و الكوافيرة عدمت القصة ..
و غيرت في لونه و بدأ لونه ينزل .. و أبغى شعري يطول عشان بعد الولادة أغير فيه ..

جبت لنفسي بجامات للبيت و حسيت نفسيتي تعدلت شوي ،،
أبغى أروح المشغل و أشقر حواجبي و أصبغها ، لإني كنت أشقرها بنفسي في الفترة الأخيرة ..
و احتمال أعمل نقش بسيط في وحدة من السيقان ..

ما أدري إيش ممكن أعمل ؟؟؟

.
.

5 - من الأفكار اللي ممكن تحسسه بإننا ( عيلة ) و في بيت واحد .. و لسى تويي بأجهزها ..
إني بأشتري لوحات و ديكورات و معطرات للجو و أجهز له حلى مرات ..
و قهوة و شاي وقت ما نجلس للتلفزيون و فصفص و مكسرات و كذا ..

لإني الصراحة ، حتى أنا صرت أمل و أطفش من جلوسي معاه في البيت ..
سكووووووووووووووت و يتفرج شوي تلفزيون و ياكل يا غداء أو عشاء .. ثم نوووووم ، ثم يروح العمل ..
و أتمنى وقتها بداخلي ( متى أروح بيت أهلي ) ،، هناك أحس بالحياة و الحركة ..

بس بيتي صاير ممل ، و زوجي بطبعه ( روتيني ) فما أدري إذا كان هو كذا مرتاح ؟؟؟
نفسي أعمل جو في البيت .. و مع العلم بإنه هذه هي الفترة الوحيدة يمكن في حياتي
اللي راح أكون فيها متفرغة .. لإني راح أنشغل مع وظيفتي عن قريب و بعدين ولادة ..
و بعدين سفر و دراسة ... إلخ

فحابة أصنع فرق ..

.
.

ملاحظة :

ولدي يوم يكون معانا في البيت ، زوجي كذا بيصير .. بارد ، ممل ، صامت ..
بس إذا يوم واحد تركت ولدي عند أهلي ، بيرجع زوجي مثل قبل ، كأننا عرسان من جديد ..


طيب إيش أعمل ؟
مع إنه هو مو حاسس أبدا إنه معاملته تتغير .. بس لاحظت ملايين المرات ..