السلام عليكم و رحمة الله و بركاته ..

أبغى أخد رأيكم في موضوع مضايقني و رافع لي ضغطي ،.
بأقول بالتفصيل عشان لا أرجع و أعيد الكلام من جديد ..
سامحوني الكلام طويل ، بس من جد متضايقة و ونفسي مسدودة عن الأكل ..
و ما أقدر أحكي لزوجي عن أسرار أقاربي و لا أقدر أفضفض لأحد ..

زوجي من 10 أيام ، قابل واحد يعرفه ، و الشخص هذا من خلال حديثه مع زوجي ، انفتح موضوع خاص
به .. و قال لزوجي ، إيش رايك بالزواج عن طريق الخطابات ..؟؟؟
لإنه جالس يدور عن عروسة و أهله كمان يبحثوا له .. زوجي أعطاه رأيه و سكت ..

طبعا الرجال هذا عمره 35 سنة و من عايلة محترمة و محافظة ، و كل صلواته في المسجد و ماا عنده
خرابيط الشباب ، من سفر و بنات و كذا .. و حالته المادية كويسة و حتى مظهره كويس ..
و من ناحية الأخلاق و الدين فمدحوا فيه و زوجي كمان مدح فيه كثير ..

بس مشكلته ، إنه مطلق زوجته و عنده بنت عمرها 4 سنوات ..
زوجته رمت البنت له و راحت لأهلها و تطلقت منه .. مثل ما عرفت من زوجي ..

و السبب مثل ما قال : إنه زوجته ما تسمع كلامه و تمشي دايما وراء كلام أبوها ..
و أبوها يتحكم في حياتها و هي تسمح له بالشئ هذا .. و هي اللي طلبت الطلاق ..

.
.

جاني زوجي و قال لي عن الرجال و سألني إذا بنت عمي ، تقبل فيه إذا تقدم لها و لا لأ .. ؟؟؟
عشان لو تقبل فيه هي و أهلها ، فيدل صاحبه على قريبته ..

و الصراحة ، زوجي ما كان حاب يدخل نفسه في المواضيع هذه و دايم يبعد نفسه ..
بس شاف إنه الرجال ما يعيبه شئ ، غير إنه مطلق و عنده بنت ..
( و أنا من خلال متابعتي لأغلب المشاكل في المنتدى ، شفت إنه هناك مرات مطلقين يكونوا
مظلومين .. أو العكس )

قلت له ، طيب خليني أخد رايهم و أشوف ..
و ما حبيت أعطي رأيي من راسي و حسيت مو من حقي أعطي رأيي ..

و مع إنه أم البنت الصراحة ،، تتمنى تزوجها اليوم قبل بكرة ..
بس ما بينت لزوجي إني مرة مهتمة ،. يعني إني ( ثقيلة ) ..

زوجي قال اخر شئ ..
ترى الرجال يقول نفسه يتزوج وحدة مو موظفة ، و إنه ما حيخليها تحتاج لوظيفتها و لا راتبها
زو عشان يرجع البيت و يلقى بيته نظيف و الأكل جاهز و زوجته مستنيته و زي كذا ..

فقال ، مادري إذا قريبتك ترضى تترك وظيفتها و لا لأ ؟؟؟
تأكدي منهم ..

.
.

البنت طبعا عمرها 28 و موظفة في عمل مختلط و كل اللي يتقدموا لها ( عزاب ) و هذا أول واحد يتقدم
لها ( مطلق ) بس كل اللي يتقدموا لها فيهم عيوب أو مرات هي تحط لهم عيوب و ترفض التنازل ..
اللي يكون محشش ، أو يكون معاق ، أو غير سعودي و ماعنده وظيفة و زي كذا أو من مدينة ثانية ..
و مرات هي ترفض لإنه راتبه ألفين و تقول ما أبغى واحد فقير ، أو واحد شهادته متوسطة و تقول ما
أبغى شخص مادري إيش ، و مرات لإنه من مدينة ثانية و تقول ما أبغى أخرج من مدينتي و عشان
أقدر أتجمع كل أسبوع مع أخواتي في بيت أهلي وووو إلخ

و هي ( اعتذر عن الصراحة .. بس عشان تكونوا في الصورة )
ما تهتم في مظهرها كثير أمام النساء و دايم تعاند أمها و مرات تحرج أمها و ترفض تقابل الحريم ..
و لا تلبس أي لبس مايناسبها و إذا أمها نصحتها ، تعاندها أكثر ..
يعني ممكن مرات تدخل تقابل جارة أمها ( و تكشيرتها واضحة في وجهها ) ..
و إذا أحد من أخواتها نصحها ، تقول ( ما أحب هذه الجارة ، و لا عناد في أمي ) ..

صح أمها كبيرة في العمر و كلامها يجرح مرات ..
بس هذه مو حجة في عدم الإهتمام بالمظهر و التعامل مع الجيران ..

و مرة أهلها اكتشفوا إنها تكلم شاب بالماسنجر و الجوال ..
بس خلاص هي وعدتهم إنه ما تعيدها .. و كانت حجتها ( إنه أمها قاسية عليها ) ..
مع إنه أمها قاسية مع كل أخواتها و مو بس معها ..

و من يومها ، أم البنت نفسها تزوج بنتها قبل

.
.

المهم ،،

بصراحة شديدة ..
إذا أي وحدة في مكاني ، إيش راح تعمل ؟؟؟
أكلمهم و لا اسكت و أقول مالي دخل و أفكر في نفسي ..؟؟؟

.
.

و بما إنه علاقتي معهم كويسة مرة ، فحكيت للأم كل شئ عن الشخص اللي كلمني زوجي عنه ..
و الأم كان رأيها ،، إنه ( إذا كان طلاقه بدون رجعة ، فما عندها مانع مبدئياً ) ..
و طلبت مني أكلم بنتها و أشوف إيش رأيها ؟؟؟

رحت جلست مع البنت و نتكلم عادي ..و قمت جبت الموضوع بمزحة ، لإنه موضوع محرج الصراحة ..
و قلت لها ، جبت لك عريس .. و حسيتها متحمسة ..

المهم ،،
قلت لها عالموضوع .. و قلت إذا ما تبغوه فخلاص نقفل عالموضوع ..
و إذا مبدئيا تحسوا إنه مناسب ، فخلينا نسأل عنه ؟؟؟

.
.

قمنا غيرنا الموضوع ،. و نفس الوقت كنت بأقيس نبضهم ..
و بعدين هي اللي رجعت و تسألني ( كم عمر بنته ؟؟؟ ) و تحكي لي عن قصة زميلتها اللي تزوجت
واحد مطلق ( زوجته خلعته ) و عنده طفل .. و قالت لي إنه زميلتها مبسوطة دحين مع زوجها و جابت
منه طفلين .. و صرت أشوفها مسرحة و تفكر و لاحظت إنها مهتمة و تستناني أتكلم ..

فحسيت بداخلي إنها مهتمة ..
و خلاص غيرنا الموضوع ..

.
.

ما سألت زوجي ، عشان لا أبين له إننا مهتمين مرة و نفس الوقت ما قفلت الطريق أمامه ..
و هو سألني يوم الربوع هذا ( هاه .. إيش صار ؟؟؟ خلاص أكلم الرجال يكلم أهله عشان يتقدموا ؟ )
قلت له ( أكيد يعني الموضوع .. و الرجال جاد من جد ؟؟؟ )
قال لي ايوة ، جالس بيسأل و يدور .. و أعطاني اسم الرجال بالكامل ..
و قالت تراه صاحب ولد خالتك مررررررررررررررة و خليهم يسألوه عشان يتأكدوا ..
قلت له ( طيب استنى اليوم ، أعطيك الخبر الأكيد ) ..

حتى إنه زوجي قال ..
طبعا أنا المفروض ما أدخل نفسي في المواضيع هذه و المثل يقول :
امشي في جنازة و لا تمشي في جوازة .. بس حسيت الرجال طيب و الواحد يتشرف به ..

.
.

و يوم زرت أقاربي و أنا جالسة ..
أم البنت و لإني في مكانة بناتها و مابيننا أي حواجز .. فسالتني ؟
إيش صار في موضوع الرجال هذاك ..؟؟؟ و كانت مرة متحمسة ..

قلت لها ( و الله زوجي اليوم كان بيسألني ، عشان خلاص يعطيهم رقمكم و أهله يكلموكم ..
بس مادري ؟ ترضى بنتك تترك الوظيفة ؟ عشان لا يتصلوا و بعدين تقولوا اسفين )

قامت الأم سألت ولد أختها عن الرجال هذا و إذا سمع عنه ..
فولد أختها مدح فيه مررررررررررررررة و في صلاته و أخلاقه و عيلته ..
فالأم تطمنت و ارتاحت .. و طلبت مني إني أكلم بنتها لإنه بنتها دايم تعاندها ..

و الأم جلست تفضفض لي و تقول :
أخاف إنها تكبر و ماحد يتقدم لها بعدين غير المتزوج أو شخص كبير في العمر ..
و أنا ما حأجلس لها طول العمر و أخوانها كل واحد منهم متزوج و مشغول بحياته ..
و أخاف إنها ما تعرف مصلحتها و توصل لعمر ما تقدر تنجب فيه طفل واحد مثل فلانة .. إلخ
و مافي أي شئ في الدنيا ( كامل ) و مو كلنا تزوجنا على نفس المواصفات اللي نبغاها ..
و الوظيفة مو أهم من الزواج ، إذا كان الشاب طيب و أخلاق ... إلخ

.
.

طبعا تكلمت مع البنت و سألتها ؟ و قلت لها أمك سألت فلان و مدح فيه كمان ..
بس قالت لي أسألك و أخذ رايك ..

على طول ردت و قالت ( مستحيل أترك الوظيفة و ما أبغاه و مو على كيفه )

.
.

قلت بداخلي ،، خليني أتكلم معها و أنصحها نصيحةة أخت لأختها ..
بما إنه الفرصة متاحة و مو كل مرة أقدر اتكلم معها و خاصة إنها وحدة غامضة و كتومة مرة ..

جلست بشكل عام اتكلم معها عن الزواج .. و بغض النظر عن الشخص هذا ..
قلت لها ، بشكل عام .. مرات الوحدة إذا تقدم شخص طيب و أخلاق و دين و وظيفة ..
فأول شئ لازم نستخير ، ما نعرف فين الخير ؟
مرات نتنازل عن بعض الشروط اللي ماهي مهمة ، زي يوم فلان اتقدم من مدينة ثانية و رفضتوه
لإنه من مدينة ثانية .. و قلت لها و بكل هدوء و حب و نصيحة من قلب لقلب :
( الفرصة الطيبة ترى إذا جات ، ما تتكرر أبدا ) ..
و الوظيفة مو أهم من الرجال الطيب و اللي يحطك فوق راسه ..

قالت لي :
( ما أتعب حالي و أدرس و أأتوظف عشان أجلس في البيت ..
و إذا بيوم طلقني و لا مات ، أقوم اتبهدل )

قلت لها :
( الشهادة بيدك أهم شئ ، و بعدين الرجال ترى زي الأطفال .. سهل تقنعيهم بعدين ..
و الوظيفة تبعك مو رسمية .. و ممكن يجي شخص فقير و يكون طمعان في وظيفتك و راتبك و يبهدلك ؟
و لا ممكن شخص يتقدم و يرفض العمل المختلط و أغلب الرجال يرفضوا ترى العمل المختلط )

ردت علي :
( يدق راسه بالحجر و أتطلق منه وقتها و ارميه ) ..

قلت لها :
( ترى الكلام هذا سهل نقوله دحين ، بس بعدين بعد الزواج .. ترى صعب و نحن مجربين ..
و شوفينا كلنا تزوجنا و تحملنا العيوب الصغيرة و حياتنا مشيت ) ..

المهم ..
رفضت تسمع لكلامي و أصلا طول الوقت تكلمني و ترد علي ،، و عينها عالتلفزيون و في يدها الريموت.

.
.

أمها نادتني و سألتني ؟
إيش رايها ؟

قلت لها ..
( رافضة و ما تبغى ) ..
و ما قلت لأمها أي شئ من اللي دار بيننا ..

أمها عصبت و قالت دحين بأروح و أخاصمها و اشتمها ، لحد متى ترفض أي أحد يجيها ، و لا يكون في
بالها أحد .. ؟؟؟ و الرجال هذا الصراحة الكل مدح في أخلاقه و في أخلاق عيلته ..

قلت لأمها لو تكلميها بتعاندك ،،
خذي رأي أخواتها و هما يمكن يعرفوا يتكلموا معها و يفهموها ؟
و أنا ما حأرد على زوجي اليوم ..

.
.

المهم ..
البنت و أمها تخاصموا ،.
عشان الأم جلست تكلمها ، و البنت طولت لسانها و زي كذا .. تخاصموا ..

و صرت في الأخير أنا الغلطانة قدام البنت، لإني جبت العريس ..
و مع إنه أمها قالت لها ( إنه أنا مالي دخل ، و حتى الرجال لسى ما اتقدم .. بس مجرد يسألوا ؟
و قالت الأم ، يمكن البنت ما تعجبهم و يمكن العكس .. )
و هذا اللي مريحني ، إنه الأم فاهمتني و في طرفي ..

و البنت راحت و قالت للكل ، إني جبت لها عريس ( مطلق و عنده بنت ) ..
مع إني يوم كنت أتكلم معها ، ما كانت هي رافضة فكرة إنه ( مطلق أو عنده بنت ) ..
كانت رافضة فكرة إنها ( تترك الوظيفة ) ..


فصارت تتهمني قدام الكل إني أنا الغلطانة ..
مع إني ما ضربتها على يدها عشان توافق .. مجرد أخدت رايهم ؟

و كلامي معها في الأخير ، كانت نصايح عادية و الكلام أخذ و عطى ..

.
.

قررت بعد كذا ، لو أحد بيدور على عروسة ..
ما حأدخل نفسي أبدا .. و أفكر في نفسي و بسسسسس ..

و أفكر إذا قابلت البنت ، أصارحها و أقول لها :
( مو جزاتي الشئ هذا ، أنا تكلمت معاك زي كأنك أختي و كنت بأخد رأيك ،، ليه كذا تتكلموا من وراي)


.
.

يعني افتكر أختها ، كان أخو زوجها و حماتها بيدوروا عن عروسة ..
و كان العريس مناسب مررررة ، وظيفة و شهادة و أخلاق و دين و شكل و عيلة و كل شئ ..
و أحسن واحد في أخوانه ..

و كانت أم البنت تقول ليه ما تدليهم على أختك و تلمحي لهم ؟
تقوم تسكت و تغير الموضوع ، و راحت بنفسها و خططبت لأخو زوجها عروسة من أخوات زميلاتها ..
و ماشاء الولد دحين مريح زوجته ..

حتى أمهم اشتكت لي اليوم ، و قالت الله يجزاك خير ..
أحسن من أختها اللي تبعد العرسان عنها و ماتفكر فيها و لا أحد يفكر فيها ..

بس الأخوات كلهم ينظروا لي نظرة حقد ، و هي ما قصرت ..
راحت تبكي و تقول إني جبت لها عريس مطلق و عنده بنت ؟؟؟

من جدددد ..
خيرا تعمل ، شرا تلقى ..


بس قلت لزوجي ..
( خلاص انسى الموضوع ، و البنت رافضة تترك وظيفتها ) ..
و ما قلت أي شئ ثاني ..

صدقتي خيرا تفعل شرا تلقى

عمري 26 لكن برد عليك
الحمد لله انك ما تورطتي معها في شي,, بكره لو صارت مشكله بينها وبين زوجها بتحطها برااسك,,
والشي الثااني وااضح انها عنيده ونكديه وتعمل من( الحبه قبة),,


وانتي الله يعطيك على قد نيتك سعيتي لها بالخير وربي يكتب لك الاجر مضااعف ان شاء الله,,

__________________
[SIGPIC][/SIGPIC

وانا كمان عمري 26 لكن مضطره أرد عليك

ماالومك لو أرتفع ضغطك لأن حتى أنا أرتفع ضغطي

بصراحه لو أنا مكانك بأستخسر البنت في رجال بهالمواصفات وراح أقول لزوجي البنت ماتناسبه بدون ماأحدد

ردوا على الرجال وقولوا الأسباب ((أنها رافضه تترك الوظيفه ))

لأني اعرف بنات هذا طبعهم ومره صعب التعامل معاهم ولو تزوجت تبهذل زوجها بعنادها وطولة لسانها

شوفي كيف أسلوبها معاك بدل ماتشكرك على أهتمامك فيها انتي وزوجك وأنكم جبتوا لها زوج صالح !!

ويكفي أسلوبها مع أمها

وخيره أن الرفض جاء منهم لأنه لو تم هالزواح والله العالم ماراح يرتاح الزوج مع واحده بهالمواصفات

وبالنسبه لي مستحيل اسعى بزواج ألا لو كنت واثقه أن الطرفين أناس طيبين خلوقين أما غير ذلك مستحيل

واحتسبي الأجر على فعلك حتى ماتتضايقي

والله يجزاك خير أنتي وزوجك ماقصرتم بصراحه

__________________
أشتقت لكم جداً 💔

اعمل خير تلقى شر..
لاتقولين كذا انت عملت خير وكانت نيتك صافيه وان شاء الله تلقين الاجر والثواب عند الله

ويكفي ان ام البنت واقفه معاك ويمكن دعت لك في ظهر الغيب

صدقيني البنت متردده ودها وماودها

عشان كذا تتصرف معاك كذا

والله يوفقها ويوفقك ويجازيك خير ويعطيك على قد نيتك

وعلى قولة المثل افعل خير وارميه في البحر

بأضيف شئ معليه ،، حسيت إني غلطانة و جلست ألوم نفسي و أأنب نفسي ..
يعني إيش كان المفروض أعمل ؟
إذا سألني زوجي ، أقول له مرة ثانية ..ماعندنا بنات للزواج ؟؟؟

و نفس الوقت مقهورة منها ، ليه ما صارحتني من أول مرة ..
ليه ما قالت ، الله يجزاك خير ..ما أبغى مطلق ؟
و قلت لكم ، أول مرة كلمتها .. حسيتها متحمسة و تسألني كم عمر البنت .. إلخ

مو مريحني غير إنه أم البنت انسانة عاقلة و حكيمة و ماهي شايفتني غلطانة ..
( مع إنها قاسية صح و ما تظهر حناانها ، بس من الظروف اللي عاشتها و كبر سنها و خوفها على
بنتها و ما كملت تعليمها .. يعني عمرها 70 سنة )

و حتى إنه الأم قالت لي ، زي ما أفكر في بنتي ..فأنا أفكر في ولد الناس ..
و إن شاء الله يلقى وحدة تناسبه ، و حتى أي واحد من أولادي لو كان مكانه ..
فنفسهم بزوجة تستقبله في البيت ..

و إنها ما تشجعت تزوجه لبنتها .. غير يوم سمعت عنه و عن أهله و الكل مدح فيه

.
.

و من جد اللي زعلني و ضايقني مرة، إنه كل أخوانها و أخواتها خلتهم ( يحقدوا علي و على الأم )
و إننا ما نبغى لها الخير لإني جبت واحد مطلق و عنده بنت ؟؟؟؟؟
مع إنه حجة الرفض تبعها ( إنها ما تبغى تترك الوظيفة ) ، مو إنه مطلق ..

و المشكلة إنه الأغلبية تعاطفوا معها ، لإنها جلست تبكي و تعمل حالها مظلومة و دخلت المستشفى
و عملت لهم حكاية و مقفلة جوالها و ما تبغى تكلم أحد ..

.
.

و الموضوع هذا حصل من يوم الربوع و كنا نتكلم أنا و هي عادي ..
و اليوم اللي عرفت بكل الأشياء اللي حصلت ، بإنها تتهمني و تتهم أمها و دخلت المستشفى وو إلخ ..
و مادري إيش كمان قالت لهم عني و عن أمها .. ؟؟؟؟؟


ما حسيت إنه الموضوع يستاهل الزعل ..

إذا كانت ما تبغاه ، فخلاص .. انتهيناا ..
و نصيحتي لها كانت ( بشكل عام ، و نصيحةة أخت لأختها .. و كنت وو الله أتكلم معها بكل ذوق ) ..

لإنها حتى ما تهتم في جسمها و لا شعرها و إذا أحد كلمها تقوم تزعل، و أمها يوم تنصحها و تكلمها ..
تعاندها أكثر و تستقبل الضيوف بأي لبس و أمها كانت مرات تقول لي كلميها و انصحيها ..

بس هي كذا ، تبغى تعاند أمها كل شوي ..
حتى أمها صارت تقول لها دايما ( إنت ما حتشوفي خير في حياتك ، من اللي تعمليه فيا ) ..

و مرات من غير ما تدري البنت و لا أي أحد ..
اجلس أتكلم مع الأم و انصحها ( لا تقسي عليها و تكلمي معها بشويش ووو إلخ )
فأمها تقول لي ( شوفيها كيف تعاملني ..كأني ضرّتها ما كأني أمها .. و تعامل كل الناس أحسن من
تعاملها معاي ) ..


و مرة بعد حكاية الجوال و الماسنجر ،، تكلمت مع البنت ..
و قلت لها ، أمك كبيرة في السن ، كل أخواتك شوفيهم كيف اتحملوا و ربي عوضهم و الحمدلله ..
و خلاص إذا خاصمتك بيوم ، لا تردي و احتسبي الأجر عند ربنا و ادعي ربنا و زي كذا ..


بس من جد ،،

قررت إني مالي دخل فيها من بعد اليوم ..

إذا أنا غلطانة ،،
دلوني ..

عشان كذا كل شئ كتبته بالتفصيل ..

الله يوفق هالرجال
ووفقها
ولكن اسمحي لي
احس من كلامك ان البنت مو طبيعيه
الله يصلها

__________________
ايارب تاجرني في مصيبتي وتخلف لي خيرا منها

الحمد لله على كل حال

ودي ما أرد علشان ما أقول عمري

أممممم تجاوز هالرقم ..... بشوي ..

المشكله كلها تتعلق في البنت وأفكارها أنتي ما غلطتي..

بس لو منك ما تدخلت أبداً ولا بشيء أعطي الرجال رقمهم عن طريق زوجك وبس..

عاد تقتنع ما تقتنع يوافقون أو لا

المهم ما اقطع بنصيبها ولا اتدخل ...

يعني العريس إذا كان مطلق وعنده بنت صار.. مايقدر يتزوج في نظرهم؟؟؟
مو كل المنفصلين .. يكون فيهم عيوب كبيرة.. نصيبهم كدا..
الله يهديها..

حبيبتي انتي عملتي خير ..
لا يأثر عليكي الموضوع.. لو أحد أتكلم ردي عليهم أنه الرجال ماينعاب..
وانك كنتي بتجسي نبضها .. و أدعيلها كم دعوة ..

خيرة انها مارضيت.. أنا صراحة ماحسيت انه حيكون بينهم توافق..
وحرام بنته الصغيرة.. الله يرزقه بالزوجة الطيبة الحنونة الي تحن على بنتو..

ويرزق بنت عمتك الزوج الصالح .. الي يسعدها..

__________________

>> لا إله إلا أنت سبحانك إني كنت من الظالمين <<

نحن ماعندنا في العيلة أي وحدة تزوجت مطلق و عنده طفل ..
غير وحدة تزوجت مطلق و هي كانت مطلقة و عندها طفل ..

فيشوفوا دحين إني أنا وحدة ( أنانية و ما أبغى لها الخير و إني أفكر في نفسي و بس ) ..؟؟؟
و إني لو ما جبت العريس هذا ، ما كانت أمها خاصمتها يوم الربوع و سمّعتها كلام ..

لإنها راحت تشتكي لهم كلهم ، إني جبت لها عريس مطلق و عنده بنت و أمها خاصمتها لإنها رفضته ..
و قامت دخلت المستشفى و الكل تعاطف معها ؟؟؟

و ما قالت لهم ،.
إنها رفضت عشان ما تبغى تترك الوظيفة زي ما قالت لي ؟؟؟؟


.
.

طيب هو العريس بيدي أنا اصنعه ...؟؟؟
و الأم بنفسها سألت عن الرجال و الكل مدح فيه ،.
يعني ما جبت لها واحد داشر و لا سمعته سيئة و لا و لا ؟؟؟


مرة متضايقة منها و من أخواتها و أخوانها و تفكيرهم عني ..

.
.

و هي اخر مرة تقدم لها واحد راتبه 2000 و رفضته ، و يوم نصحتها إنه أهم شئ الدين و الأخلاق ..
قالولي إنت تتحملي ؟ قلت لهم إيوة اتحمل و الدليل إني رفضت كم واحد غني و اللي عنده فيلا
و قبلت بزوجي و ما كانت عنده لا سيارة و لا بيت و لا وظيفة و لا شهادة ..
و قبلت فيه عشان أخلاقه و دينه ،،

حتى دينه طلع إنه يكذب علي و مو ملتزم و لاشئ ..

يعني أنا بأنصح و أحط نفسي مكان الشخص ..
مو إني أفكر في نفسي ..