السلام عليكم
اخواني واخواتي ...............
ماعرف من وين ابداء بمشكلتي المزمنة مع زوجي ....
اعطيكم نبدة
نحن متزوجين من عشر سنوات لدينا ثلاث اطفال.....
زوجي موظف وظيفة مرموقة وراتبه جيد
انا حاليا غير موظفة

من الملكة زوجي اشعرني انه يحب الزوجة الموظفة عشان تصرف على نفسها !!!!!!
قلت له انا ماحب الوظيفة لانه امي كانت موظفة واهملتنا كثيرا وقررت اني ماكون مثل امي بيتي واطفالي اهم
زعل ةتضايق وصار سوء فهم بسيط ....
انا كان عندي فوبيا من الطلاق ولا المفروض اني فكيت الملكة من داك اليوم وفهمت شخصيته لكن مشيت وقلت الفلوس مو مشكلة .....

طبعا على نياتي وصغيرة ماكنت ادري انه الفلوس كل شي
تزوجنا ورحنا شهر العسل الوالد عطاني مصروفي كني مسافرة معاهم
زوجي سوا شهم اخد فلوسي وخباهم
وهو صرف علي طول شهر العسل ماقصر معاي بحاجة

انبسطت مرة واعجبني وحبيته
بعد مارجعنا
جلس سنة كاملة مايعطيني ولا ريال لانه يتدكر الفلوس اللي الوالد عطاني
انا طبعي ماطلب فلوس الوالد يعطينا مصروفنا
والاشياء الكبيرة يروح معانا يشريها او الوالدة
كدا تعودت عند اهلي


طبعا انا ولله الحمد ماكنت محتاجة وكان باقي من مهري ومعاي من اول

بس كلن قالي لازم تعودينه يعطيك
بيجي يوم وتحتاجين
ورحت قلت عطني مصروف
وتصير سالفة ومشاكل وانتي تبين تجمعين من وراي

وصارت اصلا بينا مشاكل ثانية مشاكل بداية الزواج
اهلي ناس على نياتهم يقيسون الناس على حالهم
وش الحل من وجهة نظرهم لاعاد تطلبن منه فلوس
لدرجة انا اطفالي الاثنين الولين الوالد يعطيني مصارف التجهيز للبيبي وللولادة !!!!!!!!!
وانتم عارفين تحتاج مصاريف
بعدها توظفت في مدرسة خاصة
وصرت اصرف على نفسي وعلى طفلي الاول
زوجي يسدد فواتير ويجيب طلبات البيت يعني الاساسيات
لكن ملابس عشاء برا ترفيه لا ....

ولو ضغت عليه يشتري ملابس لاولاده يشتري سنة ايه وسنة لا
يقول العام شريت لهم !!!!!
بعد ولادة طفلي الثاني تركت العمل لانه الراتب قليل وجلست في البيت
نسيت اقولكم الوالد كان يسدد فاتورة جوالي
بعد ماجلست كنت اجلس بالاسبوعين محفظتي مافيها ولا ريال

مرة علي ايام بي الحمدلله والشكر على كل حال

وبالنهاية استسلمت ورحت للوالد وشرحت له وضعي وظروفي واني صرت استحي اقابل الناس ابغى ملابس لي ولاطفالي
عطاني مبلغ وفتح لي حساب وصار ينزل مصروف شهري تخيلو اخد مصروفي من الوالد وانا متزوجة

طبعا ماقلت لزوجي لانه بيفرح
بس اصريت عليه يبدا يسدد جوالي وبعد محاولات وافق
وغير موضوع الفلوس
مايوصلنا ولا نركب سيارته معتمدين على سائق اهلي
وهو زي الديكور في البيت
يعني تقريبا شايلين عنه اغلب مسؤلياته
طبعا انا اعترف انه غلطتي من البداية المفروض ماتنازلت عن حقي وحق عيالي

اللحين بديت احاول انه اخليه يصرف بس ماقدرت لانه تعود
ابغاه يوصلنا او يجيب لنا سواق يقولي وسواق اهلك

انا ماعندي مشكلة ماراح اطلب شي لو شايفه انه مقدرني
لابالعكس عادي يحس انه اللي اسويه مو مميز
ادا شفت صحباتي وجاراتي واللي حولي
اهلهم مالهم دخل فيهم ويلبسون ويكشخون وازوجاهم اقل راتب من زوجي
وزيادة على دا دايما طلعات مع ازواجهم ومطاعم وانا ولاشي يصير عندي احباط


وفعلا مو قادرة احس برجولة زوجي طالما انه مايصرف علي
والان صار مصروف الوالد لايكفيني الحياة صارت غالية وصاروا ثلاث اطفال وكل طلباتهم على راسي


وفعلا انا حاليا محتاجة مبلغ وماعرف كيف اوفره
والوالد لايمكن اطلب منه
لاني احلم باليوم اللي اقوله خلاص وقف مصروفي
يعني خلاص راحت علي مايمديني اغير زوجي

رايي المتواضع : تستعينين بالله وتعالى وتدعينه بالسر ان يسخر لك زوجك
ويغنيك من واسع فضله .. و ..

تطلبين منه مبلغ صغنون .. المبلغ الي انتي متاكدة بيعطيك اياه
ااذا عطاك .. رديها له اسبوع دلع مثلا .. اسبوع تسوين له احسن فطور
او غدا .. او تسوين له شي مميز هو يحبه

بعد فترة خلص مبلغك ارجعي اطلبي مبلغ اكثر من الي قبل شوي
واذا وافقك ادعي له قدامه وكافئيه بشي مميز غير عن الي قبل

اي كذا خليها كر وفر ليييييين مع الوقت يتعود يعطيك كل فترة وفترة
ولين توصلين المبلغ الي يناسبك .. ولا تنسين ابدا تتصدقين بجزء من المبلغ
عشان ربي يبارك لك بزوجك وحياتك ..

الله ييسر امورك يارب ..

__________________



احيانا يجب ان نفقد ذواتنا كاملة لكي نستعيدها كاملة ...

يعطيك العافية على الرد السريع ....

مشكلة زوجي لانه مو متعود مايعرف قيمة الاشياء

يعتقد مبلغ بسيط يكفيني وممكن يزيد
الاسبوع اللي راح قلت له انا محتاجة فلوس وبالليل بروح للوالد يعطيني

رجع من الدوام وعطاني مبلغ وقالي مشي حالك فيه لنهاية الشهر
انا ودي هو يعرف متطلبات الحياة ويعرف انه الحياة غالية


معقولة كل الرجال كدا

طبعا هده ليست مشكلتي الوحيدة مع زوجي
ولكن هده اللي تخليني ادقق في باقي تصرفاته
لانه ادا عاملني معاملة حسنة سبحان الله نسيت موضوع الفلوس

ممتاز يعني يقدر يعطيك بالطلب المجرد
الهدف : تخلينه يتعود .. التعويد والتعويد والتعويد + التشجيع

ترى بعض الامور في الحياة ما نقدر ناخذها بطرق مباشرة
لازم ناخذها بطرق غير مباشرة عشان ماتصير مشاكل فهمتي؟

كلمة : بقول لابوي يعطيني امحيها تماما من قاموسك لانها
ممكن تخليه يتهاون بموضوع الصرف .. لافتحتو السالفة بيني
له بعدين ان ابوك صارت عنده ظروف ومايقدر وماودك تثقلين عليه
واختمي الكلام بكلمة : دامك موجود ما احتاج لاحد ان شالله ..
كذا تشجعينه ..

امشي على خطتي شوي شوي .. ادعي ربك كثير
ودامها عطاك مبلغ كافئيه بشي يحبه .. خليها سياسة

الله ييسر امورك يا رب

__________________



احيانا يجب ان نفقد ذواتنا كاملة لكي نستعيدها كاملة ...

اها يعني معاملة زوجك مو بالشكل الي تحبين ..
فصلي المشكلة .. عشان نقدر نخلي تعامله معك احسن

__________________



احيانا يجب ان نفقد ذواتنا كاملة لكي نستعيدها كاملة ...

في علم النفس هناك عاطفه يسمونها العاطفه السائده او عاطفة مركز الحياة

ويقولون ان الانسان يكون له عاطفه واحده تشغل كل حياته واهتمامه ويبلور عليها علاقاته

ويضربون المثال بعاطفه حب المال (ذكرها عبدالعزيز القوصي في كتابه الصحة النفسيه )

فتجد انه يحب من يعطيه المال ومن يدله على الكسب ومن يوفر

المال ويكره من يطلب منه المال او يبذر المال

فزوجك من خلال مشكلتك لديه عاطفه حب المال

ومن الصعب محو هذه العاطفه ولكن ينبغي التدرج في العلاج والتشجيع مع كل خطوة والتعايش

مع هذه العاطفه وقبولها والرضي بها


ولكي يطمئن قلبك اسوق لك بعض العواطف السلبيه في الازواج

( عاطفه حب الاهل وتقديمهم - عاطفه تقدير الذات ونفخها ونفشها - عاطفة الاتكاليه

بحيث يتكل على زوجته في كل شي ويكره العمل والمسؤليه - عاطفة الاهمال والانشغال

بالاصدقاء والطلعات عن الاهل - عاطفة التعدد وتجميع النساء - عاطفة التعلق بالنسوان والفتنه بهن
وبصورهن واشكالهن واصواتهن )

وكل امرأه عندها زوج لديه مثل هذه العواطف السلبيه ( عندنا وعندكم خير )

والمثل يقول (امسك امهبولك لا يجيك اهبل امنه ) وفي لفظ ( امسك مجنونك قبل يجيك اجن منه )

فزوجك فيه خير ولديه عاطفه سلبيه لايخلوا منها رجل فوق اديم الارض

والحياة فنها ان نعيشها ونتكيف معها اذا لم نستطع ان نعدلها

تحياتي

يعطيم العافية ويكثر خيرك مدن السلام

مشكلتي مع زوجي انه مزاجي ومتقلب يوم مبسوط وروقان وتنكيت ووناسة واسبوع وحش كاسر شخص غريب في بيتي
لدرجة اني اصير استحي منه !!!!!
مايتكلم ولا يرد وحزين ومايقدر يعطي اي شي يعني يصير عديم الفائدة
او يصير عصبي لو يمر من عنده احد صرخ

هو شخص غامض غير مفهوم
مايمنعني من الطلعة لكن ممكن بعد كم يوم يقول انتي ماتجلسين بالبيت
حياتي معاه دايما تمثيل في تمثيل لااتصرف براحتي او على طبيعتي
يتضايق لو يشوفني جالسة يبغاني اشتغل طول الوقت في البيت
لدرجة اني اتخبا في المخزن معاي اللاب توب اسوي نفسي انظف
يحاول يحسسني اني ام فاشلة ادا جلست اتناقش مع اطفالي قام يستهزي باسلوبي وطريقة تعاملي معاهم

ممكن بالراحة يتلفظ علي ياحيوانة يابقرة قدام الاطفال والخادمة ياغبية
عمري ماطلعت معاه طلعة زي ماشوف من الناس كوفي او مطعم بس اسمع الناس واتحسر
مايتكلم معاي ولا يسولف
هو انسان مايصلح للزواج وكم مرة قالي انه متحسف انه تزوج على انه تزوج وعمره خمس وثلاثين

طبعا انا عندي حكمة مفضلة بالحياة
اعامل كل شخص مثل مايعاملني
اللطيف اكون لطيفة معاه والوقح اكون وقحة معاه
في بداية حياة الزوجية كنت لطيفة مع وقاحة زوجي
ولكن مع الوقت توسعت مداركي وتثقفت وتعلمت
اصبح هو وقح وانا وقحة
يطول لسانه انا اكول لساني
يكلمني من طرف انفه ارد عليه بالمثل
طبعا اتحسف لانه هدي مو اخلاقي ولا تربيت على كدا
انا انسانة راقية متعلمة
معروفة بدوقي وادبي ورقي تعاملي مع الناس
اصير شخص ثاني في بيتي

لاني تنازلت في بداية الزوج كثير احس زوجي هضم حقوقي

وحدة نصحتني وانا صغيرة وعلى نياتي
قالت الرجال يحب اللي ماتزعل ويغليها ويصير لها مكانة
قمت انا طبقت وصرت ما ازعل ولا على شي مع انه اشياء كبيرة
فصار مالي اي قيمة
اللحين هو يحس انه عادي يتلفظ علي مايزعل
عادي انه يحقرني مايزعل
لاني اول ماكنت ازعل

مليت من البرود العاطفي
ماعليش كلامي مو مترابط
لاني احاول اجمع افكاري

كلامك رائع ومقنع واعتقد انه زوجي من هدا النوع


لانه لايصنف انه بخيل ولكن حريص


وعنده اعتقاد دائم اني املك المال لكن احاول اخد منه دلع
لان اهلي وضعهم المادي جيد

الان بدات اطلب منه واصر عليه
لكن يعطيني مبلغ لي انا واطفالي الثلاثة والحياة غالية طبعا لايكفيني
مرة يعطيني خمسمية ومرة الف
تنصحني جارتي ان استغل فرصة خروجه معانا واشتري كل طلباتي واولادي
زي ماتسوي هي وهو بيحاسب يعني مايصير مبلغ معين تاخد راحتها

لكن زوجي مايطلع ولا مكان الا للدوام

فلمن يعطيني الف واروح وبالموت تكفيني واخلصها اجلس باقي الشهر بدون ولا ريال
معاناة
واكثر شي يقهرني لمن اروح جمعات والاقي الموجودات وعيالهم كاشخين وانا وعيالي بملابسنا القديمة
وادا تكلمو عن المطاعم والكوفيهات اللي يروحنها مع ازواجهم وكلهم مو موظفات
وزيادة على كدا كلهم مايطبخون ولايسون شي في البيت واطفالهم مع الشغالات
وكل مشاويرهم ازواجهم اللي يوصلونهم الا انا كل شي مع سواق اهلي ....


ورجع للبيت نفسيتي دمار شامل
ليش زوجي مايقدرني
ماني راعية صرف فلوس موفرة عليه
واستخدم سواق اهلي
جتى مواعيد اطفالي انا اوديهم مع سواق اهلي وعلى حسابي مايعطيني ولا ريال وادويتهم لانه ماعندي تامين
ولا اشوف منه الا المعاملة السيئة

بس من جد ادا اكرمت اللئيم تمردا...

غلاتي غلط انك ما تزعلين .. يمكن الي نصحتك ماعرفت
توصلها لك بالاسلوب الصحيح ..

لازم تعرفين اول وش الشي الي يستاهل الزعل وش الي مايستاهل
حنا الحريم مصيبة مانعرف نفرق بس لو نفكر شوي بنقدر نميز

ثاني شي اسلوب الزعل لازم يكون ذوق يخلي زوجك ينحرج من سواياه
يعني لو مد لسانه عليك اول مررة اعطيه نظرة عتب سريعة واسكتي
ثاني مرة .. ثالث مرة .. احسبيها ثلاث مرات تسكتين فيها .. اذا
جاك بعدها يراضيك (باساليب كثير ابسطها مزحة دعوة على عشا سوالف )
ردي عليه بشكل طبيعي كانه ما سوى شي .. لو استمر على الغلط
ردي وقولي شكرا وروحي .. غيري المكان عشان ماتعطينه فرصة يتمادى

لكن رد الصاع صاعين صدقيني يشجعه يحطمك زيادة ويتجرا عليك اكثر

بخصوص المزاجية .. لا تقربين منه لا تكلمينه لو معصب .. اسلم لك
واذا حزين وقافلة معه بعد لا تكلمينه بس الفرق : لا تاخذين راحتك بالكلام
وبيني له من بعيد لبعيد انك مهتمة له
يعني لو شفتيه متضايق قولي اساعدك بشي مضايقك بشي ؟ بس كلمتين
لا تطولين حكي . رد عليك وفضفض تمام .. لو رد كلمة وغطاها معناها = ما يبي
يحكي .. احترمي خصوصيته واتركيه لحاله شوي .. لين ترتاح نفسيته

عموما . ...

لسا ما فات الوقت ودايم في فرصة نصحح اغلاطنا
الان لو مد لسانه عليك سوي الخطوات الي قلت لك ..
اذا نفسيتك تعبانة هاليومين روحي عند اهلك كم يوم وغيري جو
لين تهدا نفسيتك .. وارجعي له معنوياتك مرتفعة وانتبهي لاسلوب التعامل ولا تقولين
ماعاد يمدي .. يمدي بس شوي شوي تتغيرين مو بسرعة

واضح ؟

__________________



احيانا يجب ان نفقد ذواتنا كاملة لكي نستعيدها كاملة ...