السلام عليكم ورحمة الله وبركاته
احببت روح الاسرة وطريقة تفاعلكم مع بعضكم البعض في هذا المنتدى الله يديم المحبة والاخاء

باحكيكم سالفتي وقبل كل شيء انا حامدة ربي وشاكرته مليوووون مرة وعارفه انه النعمة اللي انا فيها غيري كثيييير مفتقدها واعيد واكرر يارب لك الحمد دائما وابدا بس النفس تسعى للافضل دائما وهذا السبب اللي خلاني اكتب لكم اليوم

انا متزوجه من 6 سنوات وام لطفل طوال سنين زواجي كنت ادرس ولله الحمد السنة هادي اخيرا تخرجت وبدات الامتياز ((انا ممرضة)) زجي ولله الحمد انسان رائع وطيب واب جدا جدا حنون لكن عنده مشكلتين
الاولى:
عدم القدرة على التحكم بنفسه وقت الغضب يصير يشتم ويقول كلام جاااارح وممكن يضرب ويكسر مو بس معايه حتى مع الناس يعني لو مثلا واحد غلط عليه في الشارع وهو يسوق مايعرف يتفاهم على طول جاهز للمصارعه وانا معايه مؤخرا انفجر علي غاضب وبدا يدعي ويلعن بدون ان اعرف السبب طبعا انا بالبدايات كنت ابكي واتهاوش معاه وكل واحد يعلي صوته وسبق طلقني مرتين بسبب تهوره ورجعني ويقولي اصلا ماوقع الطلاق ورافض يستفتي شيخ بعدين عرفت انه هالطريقه مابتجيب نتيجه فصرت اذكى وامن تجيه هالحالة الهستيرية انسحب بهدؤؤؤؤؤء واسيبه مع نفسه يومين ثلاثه عشرة ماتفرق وطبعا يجي يعتذر ويتاسف بس اش الفايده الجرح ماينمحى باسف بذات انه يكرر هالحركات فاسفه مايعني لي شيء وتظل بقلبي مرة قالي انتي حقودة وماتسامحي.....(لاتعليق)
بتقولوا ممكن تعودت على هالطبع بس اللحين مع ضغط الشغل احس صعب عليا اتحمل تكرار هالشيء ومتاكده انه ممكن نخسر بعض بسبب عدم سيطرته على غضبه وامن اناقشه يقول مااقدر اسيطر على نفسي

الثانية: وهي الاصعب بالنسبة لي
هو مدمن مدمن مدمن بلاي ستيشن ماتتخيلوا والله العظيم يهرب من دوامه الظهر ويبغى يتغدا قدام السوني وهو يلعب وامن ارفض يستحي ويجي يتغدا معايا بعجله يادوب ياكل يغسل يده ويرجع للسوني تاني والييييين الساعه 12 او 1 وكمان ينام عالكنبة وهو يلعب في البداية كنت اطنش واحيان ازعل واحيان اعتب بس مافيه فاااايده كنت اقومه ينام معايا عالسرير بعدين صرت اطنشه
والله العظيم مايدري عني انا موجوده او مداومه احيان يكون عندي دوام في الويكند يدق علي يقولي اووه انتي مداومه حتى امن يكون عندي شفت ليل مايدق يطمن عليا ابدا ابدا مافيه تواصل بيننا احسه مبسوط اني بدات الامتياز اكون مشغوله اغلب الوقت ويلعب براحته مستحيل يجي يجلس معايا من غير ما اطلب مستحيل يبدا سالفه لو ما بدات مستحيل نخرج نتمشى لو ماطلبت وزنيت حتى ولده مسكين مابيجلس معاه

والطامة الكبرى دكرى زواجنا كانت الاسبوع اللي فات كل السنين اللي راحت انا اللي ابادر وهو غالبا يكون ناسي او يتذكر بالوقت الضايع ويصرف عمره انا مو ناسي بس احب تكوني معايا وانا اشتري لك هدية عشان تكون على ذوقك يعني ومهالكلام وانا اعديها المرة هادي غبت عن دوامي عشان نقضي هالوقت سوا كان يلعب سوني من الظهر كالعاده جاء عندي غرفتي لقيني كااااااشخه قلي وين رايحه ؟؟ قولت له حبيبي بيعزمني عالعشاء اليوم قال شو المناسبة قلت له ذكرى زواجنا كانه احد صب عليه مويه باااارده قلي بس انا متفق مع اصحابي بنتجمع اليوم وما اقدر اعتذر حسيت كانه سكين بصدري يعني هما اهم مني يالله قلت له اكيد تمزح قال بليز قدري موقفي واوعدك اعوضك بالويكند قلت انت حر وخذ القرار اللي يريحك بس تاكد انك بتتحمل نتيجه اي قرار بتاخده ولبس وطلع وانا للان مو مصدقه ورجع من السهرة ولا كانه سوا شيء المهم انا ماكلمته ابدا ويسالني ارد على قد السوال وجاء الويكند وبيروح وهو بس يلعب سوني يالله حاسه بغصة ما توقعت الاهمال والامبالاة توصل فيه لكذا

احس اني مو فاهمة هالادمي اش يبغى من حياته انا ما اقدر اعيش كذا كاننا متزوجين من 80 سنه احس شااااايب
وامن احكي امي تقولي احمدي ربك احسن من غيره اوكي احمد واشكرك يااااارب بس انتم شايفين الوضع طبيعي ؟ اذا فيه غلط وينه؟ كيف اتدارك الوضع صرت ما اتحمل؟ وياليت اسمع وجهات نظر رجاليه عشان يمكن يفهموا كيف يفكر