الإخوة الأعزاء
السلام عليكم

قبل أسبوع من الآن صار خلاف بيني وبين زوجتي ، الخلاف صار بسبب نرفزتي على حاجة تعتبر أنه مو من حقي أزعل منها وأنا أعتقد أنه من اكبر حقوقي ألا أكون مكينة صراف أدفع وبس .

الوقت الساعة التاسعة مساءً .
اليوم : الأثنين الماضي قبل أسبوع .
الحدث : هي نفساء وبيزورونها أهلي يوم الثلاثاء اللي هو بعد الحدث ، فطلبت مني أنه نشتري بعض التقديمات والحركات اللي توضع للضيوف ( فطائر ، ورق عنب ، أشياء أخرى ) ، قلت ماهناك مشكلة بس أنا الآن بالطريق راجع من الرياض ولا أدري هل بأقدر أوصل وقت مبكر عشان أشتري أو لا لكن خليه بكرا الصباح ، قالت أخلي أحد يجيبها قلت ميخالف ، اتصلت بها بعد ساعة قلت أنا جاي بعد نص ساعة قالت أنا وصيت أختي ( فلانة ) وهي الحين رايحة ، طبعا فلانة هذي زوجها عنده دوامين ومن يقوم يودي أولاده المدارس ماينام إلا بالليل ، قلت اتصلي بها وقولي أنه أناجيت ومشكورة ، وأنا رايح أتولى الموضوع ، اتصلت بها بعدين اتصلت بي وقالت أنها تقول خلاص قضينا أنا بخلص حاجتك .
قلت لها وأنا متنرفز : طبيعي أنه بتقول لك قضينا لأنك مالزمتي عليها ، وأنا سبق قلت لها أكثر من مرة أنه زوج الحرمة هذي أكرمنا بزيادة بفزعاته ، ولا أحب أحرجه خصوصا أنه يداوم دوامين ، وبعدين ليش العجلة هذي وليش وليش . .
وشديت شوي عليها بالكلام قالت هي راحت وانتهت وش بتسوي ؟
تستفهم أنه أنت يعني بتعاقبني ؟
سكرت السماعة وأنا يعلم الله العظيم إني بحالة من الغضب لا يعلم بها إلا هو عز وجل ، ووقع في نفسي أنه هي تخاف أمنعها من شراء بعض الأشياء لغلائها ، والدليل أنه رايحه لمحل عندنا بالديرة سلة الفطاير عنده بألف ريال .
تعوذت من الشيطان ومن بكرا العصر رحت أجيب الطلب وأتفاجأ بأن الطلب عبارة عن سلتين مشكلة من ورق العنب ومحاشي وفطائر أقدرها جميعا بأربع أو خمس كيلوات جميعا بـ ( 780ريال ) فوالله العظيم أنه لم أتمالك نفسي حتى هممت أن أتكلم على الأخ المحاسب فتعوذت من الشيطان وكلمتها وقلت لها على أي أساس تشترين بالمبلغ هذا واللي جايكم من طرف أهلي أربع نسوان ؟
زعلت وماكلمتها ذاك اليوم وجوها الوالده واللي معها كلهم أربع نسوان .
قعد أربع أيام ماكلمتها ولا اتصلت تعتذر أو تقول أي كلمة حلوة وأنا بالاتصال الأول بينت لها
انه أخطأت علي لما راحت لم المحل اللي الفطائر عنده بألف ريال وهذا العمل يستفزني وأنا أمر اليومين
ذولي بظروف صعبة ، قلت لها أنه أنا موراضي عن الطلب اللي بثمانمائة ريال .
قلت لها أنه أنا خليتك تولدي بأكثر من عشرة آلاف ريال ، والأغراض اللي اشتريتها لبيت أهلك
لأنه بتنفسي عندهم بـ(3500ريال) وغيري يدفع ألف ريال
وقلت لها عن أغراض اللي للمولود ولها اللي كلفت ( 5000 ) ريال
وكل هذي المبالغ بظرف شهرين بس وأنا من وين لي وأنا أدفع أقساط
قريب من أربعة آلاف ريال .
يعني فهمتها ليش زعلان
ارسلت رسالة أنه : هل أنا أسمح لها بالذهاب للسوق تشتري خرقة عشان طلعتها من النفاس ؟
رديت : سوي اللي تبين ..
ردت : يعني أنتا مب زوجي
رديت : قلنا سوي اللي تبين ، طبعا كله عبر الرسائل .
ردت : سبحان الله لما ترضى توديني جنة الدنيا ، ولما تزعل ودك توديني جهنم .
مارديت عليها . .
بعد يوم أرسلت أبغى من فلوسي اللي عندك . .
- عندي أمانة لها ثمانية آلاف ريال .
- رديت : برسل لك ألف خمسمائة وفلوسك كم يوم وأدبرها .
- ردت : الألف وخمسمائة من وين . .
- رديت : من عندي . .
- ردت |أنا أبغى من فلوسي أنا مو ناقصة مشاكل معاك . .
- أنا لم أرد على الرسالة . .
قلت في نفسي الله أكبر لما سويتي اللي تبين وولدتي بالمستشفى اللي أنتي بغيتيه ودفعت أنا كل الفاتورة ولم أعترض مع أنه من حقي أعترض لأنه الحكومة تولد نسوان العالم ببلاش .
لم أخذتي اللي تبينه ووديتك السوق وشريتي لك و للمولودة اللي تبينه من غير اعتراض مني ..
والآن من الثلاثاء الماضي إلى الآن لم أسمع صوتها ، لم تعتذر ، لم تبين وجهة نظرها . .
ورسالتها الأخيرة أنه هي مب ناقصة مشاكل معاي صراحة أزعلتني جدا ً . .
مواقفي معها من هالنوعية كثيرة ، وهي تعرفني جيداً وتعرف وش الي يرضيني واللي يزعلني . .
أحبها و تدعي أنها تحبني ، لكن من بعض المواقف التي أراها تتعمد أن تعمل ما يغضبني أشك
بهذا الحب . .

آراؤكم ، فكري مشوش ، مللت من الصراخ ، مللت من الزعل ، مللت من المراوغة وادعاء الحب وعمل ما يخالف ذلك
اتظركم

مشكلتك ياصالح انك تدفع فلوس واجد وعوّدتها ع الشي ذا
مستشفى ولادة خاص وفطائر ع الف ريال وهي ماسوّت هالاشياء الا انها متعوّده على مثل كذا صرفيّات وانت اللي معوّدها
واسمح لي اقول لك انك تتحمل جزء كبير من المشكلة
امي اللي هي امي قالت لي زوجتك لاتعرف كم معك بالصرّافه لكن بنفس الوقت لاتحرمها من أي حاجه معقوله
اما فطائر ب800 ريال هذي كارثة
إن شاء الله يفيدونك الاخوان والاخوات

اولا
زعلك انها ارسلت اختها مالك حق فيه
لانك قلت لها ميخالف
فالظاهر اختها دبرت الموضوع بسرعة

بالنسبة لسعر السلال
فعلا مبالغ فيه
بس تذكر ان اختها اللي مصرفة الموضوع
فاعتقد اجتهادا منها راحت لهالمحل
وليتك عطيت زوجتك سقف ماتتجاوزه
بس الدنيا دروس
قلها المرة الجاية اسأليني قبل لاتحسمين الموضوع
واعتقد كلكم هنا غلطتو انت ماحددت مبلغ معين ولا هي فاختها حبت تبيض وجيهكم بما ترعه مناسب من وجهة نظرها هي

كرمك مع زوجتك لاتعتقد انها ماقدرته بس الموقف مو منها

سالفة انها ماتبي منك فلوس
طنش هالكلمة
هي على بالها انك استكثرت المبلغ عليها
وانت مستكثره على الضيافة
ومعك حق وسوء الفهم وارد


اخيرا
انت شكلك مثل زوجي بسرعة تزعل
هي محتاجة انك توضح لها انك استكثرت المبلغ على خرابيط وشكليات
وانها المفروض تفهم هالشيء خصوصا انك ولدتها بخاص ودفعت بكل كرم نفس لها وللمولودة لانك تحب تحط الريال بمكانه
ولو انك بخيل والا حريص كان ولدتها بحكومي

استغل اول اتصال بينكم ولو بشؤون المولودة علشان تعاتبها وتبين لها انها فهمتك خطأ
وبرضو اعتذر عن غضبك الغيرر مبرر بالبداية
مشكلتكم زي مشكلتنا انت عجول انفعالي وهي حساسة

الصراحه انت عودتها عالدلع الزايد والا تبي الصراحه ليش تولدها بمستشفى خاص وليش هالمصاريف والبهرجه اللي مالها داعي اتركها ع راحتها متى مارضت وفلوسها اللي عندك ارسلها لها ع طول الحرمه اذا عندك لها قرش تتذلك واسالني انا حرمه واعرف الحريم بعدين صارت موضه الوحده تولد بخاص يعني الوحده بدل ماتصدق بهالفلوس بنية ان الله يقومه بالسلامه تحطها بمضاهر كذابه

لا الاهلي مو مظاهر كذابه

والفايده من ولادتها بالاهلي في الاخير لزوجها ..؟؟

ولا الولاده وحده بالنسبه للحرمه

__________________

ممكن اعرف كيف الزوج يستفيد من ولادة زوجته بالأهلي؟!!!

أقول لجميع النساء
قد ترون هذه ليست بمشكلة ولكن بالنسبة لنا نحن الرجال فهي مصيبة
المصاريف الزائدة عن الحد رغم الظروف المادية الصعبة فهذه تؤثر على نفسياتنا ونصبح دائمي التفكير ومشغولي البال بالمصاريف الأخرى
حتى انه من الممكن تصل للكره للطرف الآخر بسبب هذا التبذير
فلا تلوموا الرجل
أعد المياه لمجاريها ثم ضع حداً لمصاريفها منذ الآن

قصدها ( الخياطة) الاهلي غالبا يخيطون جيدا لانك دافع فلووووووس
فاذا كنت تريد ان تستمتع اكثر فولدها في اهلي

أخي صاحب الموضوع
معك كل الحق أن تغضب وتثور لقيمة تلك الفطائر التي لايقبلها عاقل وزوجتك مخطئة جداً ولكن يا أخي
أنت من عودتها على البذخ الزائد أو هي خرجت من بيت لايحسب قيمة الريال ويحب كل ماهو غالي فلاترى تثريب في أن تكلفك فوق طاقتك معتقدة أنها مازالت في بيت أهلها

لذلك كان من الواجب عليك أن تجلس معها جلسة مصارحة وشفافية وتوضح لها ظروفك المادية وتطلب منها مرآعاة وضعك المادي وصدقني قد تكون غافلة عن مسألة أنك تمر بضائقة مالية أو أنك لم تخبرها نهائي
عن هذا الأمر بشكل جاد
كأن تقول يافلانه أنا لايبقى من راتبي كل شهر إلا مبلغ كذا وكذا وتضع لها سقفاً لمصروفاتها لاتتجاوزه مرآعاة لوضعكم وتحدث لها بتحبب ولين وشاركها همك لتقف بجوآرك فالمرأة منا حين تشعر أن زوجها
صريح معها ويشركها في همومه تدعمه وتساعده وتقلل من المصروفات وتهون عليه وزوجتك أحسبها كذلك
وواثقة أنها تحبك وإلا ماكانت غضبت عليك كل هذا الغضب وأنقطعت تأثراً لموقفك لأنها معتقدة أنك تمن عليها بما صرفته من مال أو أنها شعرت من حديثك أنها لاتستحق بنظرك كل هذا ودائماً جرح من نحب يكون وقعه قوي وصادم بعكس من لانعير لهم إهتماماً فجروحهم لا أثر لها ولاتشغل بالنا أبداً

أرسل لزوجتك رسالة جميلة تبين فيها مكانتها في قلبك وتشرح فيها أسباب غضبك وردة فعلك تلك وقل لها
أنت زوجتي التي أنتظر تراعيني وتقدر ظروفي وتقف معي وغيرها مما يعترك في قلبك المهم اسعى كرب أسرة لإصلاح ذآت البين بينك وبين زوجتك فكل البيوت مليئة بالمشاكل

ولاتنسى أن تتفاهم مع زوجتك حول ميزانيتكم وتعلمها فيما بعد فن الإقتصاد وإلا تكون ضحية للتجار والمخادعين فلن يضرك أن بينت لها أن سلة فطائر تكلفتها 800 ريال بالإمكان إيجاد مثلها تماماً بمبلغ لايتجاوز 70 ريال وبنفس الجودة وعلمها فن إدارة المال كأن تعطيها مصروف شهري تتصرف به حتى
تتعلم المحافظة عليه فالإنسان غالباً حين لايكون المال له أو تعب فيه لايحافظ عليه لكن عندما يصبح المال
لها صدقني ستتعلم كيف تقتصد وتتصرف فيه وخذها معك أحياناً إن سنحت الفرصة لبعض المحلات ودعها
ترى بأم عينها التلاعب الحاصل وكيف أن الإنسان ممكن أن يكون ضحية المسوقين والمحلات ذات السمعة
الفارهة في الوقت الذي يكون فيه البديل المقنع متوفراً وبأسعار معقولة ومقبولة

زوجتك فقط جاهله في إدارة حياتكما من الناحية المادية لأنها لم تتعود بعد وبفضلك وتعاونك سوف تتعلم
وتصبح زوجة معينة لك على أمور دينك ودنياك

؟؟؟وش سالفة هاللي طلقها زوجها ...

اني عارفه ياذا الرجااااال ..

من يبدأ الحنين للحب القديم ..تنبشون الارض تدورون عيوب ..

__________________

عذراً ..!

مو صحيح إنه اللي تولد بخاص دلع ومظاهر كذابة

من حق أي إمرأة تختار مكان مناسب لها ومريح ورعاية صحية متميزة

ماتحبين تدللين نفسك ؟

وبنفس الوقت الحمد لله تتصدقين وتعملين الخير مايتعارض هذا الشي أبداً

لذلك ماتعرفين عن ظروف زوجته ومو من الخير إنك تضيقين الرجل على زوجته أكثر .