بسم الله الرحمن الرحيم
الله يسعد كل شخص ويبعد عنكم الهموم
عمري 21 سنة ادرس ومتزوجة من سنتين وتطلقت من شهرين تقريبا ومامعنا عيال
انا تطلقت من شهرين ولسه بالعده احبه والله احبه اعترف اني كنت اغلط باشياء كثيرة وماكان عندي حس
بالمسؤوليةة اعترف اني ماكنت الزوجة اللي تمناها زوجي لكن مدري ليه كنت كذا ؟؟ انا الحين اسال نفسي مليون مرة ليه كنت كذا وليه سويت كذا انا نادممة والله*
انا صغيرة ومو فاهمة الحياة زين ومالي خبرة وكلنا نغلط ومحد كامل وانا تعلممت كثير
طليقي يعشششقني وهالشي هو اللي خلاه يتحملني سنتين*
لكن صارت مشكله اني بغيت اطلع من البيت ( شقة مسروقة بالدور اللي العلوي لبيت اهله ) لاني مو مرتاحة نفسيا فيها اعترف طلعتي وطلبي كان غلط وقتها لانو صارت هوشة بينا وانا طلعت لاهلي وقعدت شهر بعدها قلت له ابي شقة جديدة وقال تتركين دراستك ورفضت وقال لك اسبوع ارجعي لها الشقة او نطلع لشقة جديدة لكن تتركين دراستك وانا رفضت ومر الاسبوع وطلققني وابداا بحياتي ماتوقعت يسسويهاا : (

بعد شهرين كنت اكتب بالواتس اب وكنت اقصده وكنا نتعاتب من بعيد لبعيد وبعدين ماتحملت وكلمته قلت له ليه بعتني قال انتي تركتيني ومن المشاكل اللي بينا قبل اثرت بهالقرار بكينا وبكينا وبكينا ع الجوال والحمدالله سامحني وانا سامحته من قلبي والله*
بها المكالمة ارتححت كثير لانه سامحني لانو ضضميري كان مأنبني بششكل كبير والحمدالله قالي انا مستعد ارجعك لكن بتكونين الثانية !!!!*
من حقه والله من حقه انه تزوج قالي انه ملكه فقط بعد شهر من طلاقنا والخميس هذا زواجه تخيلو *
يقول ماشافها ولايعرف الا اسمها حتى مابينهم جوال قلت له ليش قال مو مهتمم مرة
انا احبه احبه موت لكن مااقدر اعيش وبقلبه انسانه ثانيه مقدر اعيش وبحياته انسانه ثانية الغيررة بتذبحني
انا حتى لو رضيت اهلي مستحيل يرضضون *
انا والله للحين مو مستوعبة انه بيتزوج ابد مادخلت الفكرة براسي هو يحبني ولو مايحبني ماكلمني بعد الطلاق*

الحين احنا نسولف عادي كاننا متزوجين بالجوال وانا مدري وش نهايتها لكن اللي اعرفه اني ابي اسمع صوته وابي اسمع سوالفه*
حتى اختباراتي مااهتميت فيها*
كل يوم اكلمه ونضحك سوا وابكي لما اتذكر انه بيتزوج ويقولي انا حاس فيك وادري لكن صعبه اطلقها وانا ملكت عليها وش ذنبها هي ؟ وبصراحة انا معه هي وش ذنبها ؟*
هي عمرها 30 ماتدرس ولاتشتغل عايشة بقرية وتقرب لنسيبه من بعيد وهو قالي ان ابوها اللي عرض علي اتزوجها .*
احيانا افككر اقول هو يحبني اكيد مارح يقدر يعيش بدوني وبيتركها عشاني وبيجيني !
انا والله بهالشهرين بديت اطيب وبديت انسى حتى كنت متوقعة يتزوج لكن مو بهالسرعه ويمكن لو اني سمعت من احد ثاني اهون علي والحين احس اني بين نارين*
قالي اذا بترجعين لازم قبل العدة لانو بعد العدة خلاااص*
قالي بيحطني بشقة وبيعاملني مثل اول وبيحبني مثل اول واكثر لكن ادري ماراح يصير كل شي مثل اول*
صديقتي تقول بكرة تنسينه وانتي صغيرة وحلوة وربي بيعوضك لكن احبه*
اااه بس انا بفككر زين وودي اسمع ارائكمم عشان افكر بكل شي ومن كل جوانب*

عندي شعور أنه بيرجعك عشان يربيك لا أكثر
أنا من رأيي أنسيه وأبدائي حياتك من جديد
أهتمي بدراستك وإلي جابه يجيب غيرة ومدام
طلقك مرة بسهولة بيطلقك مرة ثانية

الرجل إلي يطلق بسهولة هذا يخووف
ماله أمان

ولما بيكون عنده زوجه غيرك بيتغير كثير
وبيحس بالاستغناء

لو أنتِ بذمته مانصحتك بتركه لكن مدام
تطلقتي لاتنظري للوراء

هذا طلقك وفوراً راح يخطب ويتزوج أي حب هذا بالله..؟


وبعدين لييش يبغاك تتركي دراستك...؟؟

الدراسة سلاحك بها الزمن الأغبر
لاتفرطي فيها أبداً

ولو قلبه عليك كان خلاك تكملين دراستك
مو يحرضك على تركها ويرغمك

ياقلبي في بنات مايتحملوووووووووووووووو الغيره فتتتركه يعيش حياته ولا تكون هى ثانيه

لاكن انتي الى خلتيه يروح يشوف وحده والله قهرررررررررر

وهو لو يحبك شلون يرضى يا خذوحده غيرك؟
يعني كنتي الاولى والحين سرتي الثانيه وهي الاولى من جد خربتيها عليك
انا اعرف لى يحب مايتزوج بسهوله لين ينسى
ع العموم اقولك دام انتي تحبيه ارجعي له

بس الثانيه بترضي ان يرجعك؟عندها علم؟

سلبياته :*
ماقد شفته يصلي الا 3 مرات يمكن واذا احد قاله*
احيانا يقضي يومين وهو ع جنابة عادي*
ايجابياته*
يحببني ومدلعني وكل الل ابيه مجاب* واخلاقه حلوة ومايدخن

الله يجزاكم خير شورو علي

انا سالته عن الثانية اذا راضيه ؟ قال ماعليك من احد انتي اذا وافقتي برجعك

دراستي قالي بتكملينها وانا قلت هالشي عشان تحسين بالمسؤوليه اذا رحتي الشقه الجديدة لكن هو والله يشجعني ع الدراسة ولو رجعت له مارح يرفض الدراسةة

انا مالي خبرة بالحياة مدري وش اسوي

فري بجلدك منه فرار المجذوم من الأسد
الله يعافيه ولايبلانا

أختي انتبهي ربي منحك فرصة خلاص منه
فلاترجعي له وأبحثي عن الزوج الصالح النظيف الطاهر

اخبريه ان اهلك مستحيل انهم يرضون بالرجوع اليه على ضرة ليش ما يضحي هو ويطلق الاخرى مادامهم على بر لم يدخل بها بعد وهي لها رب كريم يرزقها الي احسن منه ويعطيك فرصة ثانية ..ندمك واعترافك باخطاءك فال خير للبداية من جديد معه
ضعي الكرة في ملعبه هو ان قبل الله بارك وان رفض انسيه ..ان رجعتي اليه على ضرة ستعود المشاكل من جديد وقد يطلقك بكل بساطة من جديد
واستخيري الله و الله يعينك على اخذ القرار الصائب

أختي الكريمة
أعيدي حسابات السلبيات و الإيجابيات
و قومي فيها بسرد في ما تبحثينه فعلا في الرجل
و هل سيستطيع هذا الشخص تحقيق هذه الأمور
خصوصًا و أن الحياة مع ضرة لك ستكون مقسومة على أثنين
و أستخيري الله ، و أشركي العقلاء من عائلتك من المقربين لك

والله يوفقك إن شاء الله

انصحك ان تقطعي تواصلك معه
وتستخيري الله فقط
واميل الى ان تتركيه وتنسيه..
ما زلتي صغيره
حتى لومك لنفسك الآن وانك ما كنتي زوجه جيده
وتجدين الاعذار له .. سيزول كل ذلك
بمجرد أن يتركك ويذهب لزوجته
وتبدأين بلومه .. وتعود المشاكل

والله اعلم