السلام عليكم

بتكلم عن نفسي عشان تفهمون شوي من تضارب الافكار عندي ، واعتذر اذا المواضيع داخله ببعض

المهم انا انسانة متواضعة جدا ولله الحمد ، زي ما يقولون ما اشوف نفسي

وبحياتي لاحظت كثير ناس معجبين بي بين اهلي واقرابنا والاصدقاء وغيره

مع ان عندي اخوات بس الاحظ كثير من الحريم اللي قد امي لما اقبل على احدهم

تفز قلوبهم ويسلمون بحرارة ، ويضمون وهلا بسارة هلا بالغالية هلا بال.... الخ من بين اخواتي انا

لكن للاسف انا انسانة من برا كل الثقة فيني لكن مشاعري الداخليه تجاه نفسي ثقتي

كانت معدومة والحين لي فترة احاول ابنيها والحمد لله فرق احسن

المهم كنت استغرب لما اسمح مدح بزيادة ! واقول ماما يجاملون صح !

مثلا حظ اللي بياخذك او مدح من اي شيء ثاني

وكانت امي تقول طبعا لا ما يجاملوا هذا الصدق

وكنت اخذ وقت على بال ما اصدق

هذا اللي قاهرني ما ابي اصير شايفة نفسي ، بس الثقة زيييينه على الاقل اصير سعيدة
بالنعم اللي ربي رزقها لي مو العكس ومكسورة ،

المهم تقدم لخطبتي من بعد زواج اختي الكبيرة .. قبل اربع سنين خطاب كثير ومع هذا ما شفت
بنفسي شوفه ابد وكنت اتساءل وما زلت اتساءل حتى امس اسأل امي ليه انخطب كثير !

لكن انا ما كنت اخذ موضوع الزواج بشكل جدي وكنت ادور اي عذروب عشان ارفض لكن السنة
هذي احس اني مستعدة وبديت اخذه بشكل جدي

(قبل بقولكم قبل سنتين تغيرت حالتي النفسية وصارت سيئة وانا مو سارة اللي اعرفها متغيره
واصيح كثير وثقتي زي ما قلت لكم معدومة ، وسبحان الله ، حلمت حلمت وفسره
لي 2 من مفسرين الاحلام طبعا واكيد اؤمن بالعين لكن كنت اظنها بعيده او قليل ما تصير ،
وسبحان اللي ارادها لي سالني المفسر فيك هالفترة اكتئاب وضيقة ! وصداع ! تفاجأت وقلت له
ايه احيانا فسر لي انها عين بسيطة ان شاء الله واقري على نفسك وان شاء الله تكوني بخير قلت
له طيب احس اني احسن من قبل يمكن العين راحت والله يا هزئني هههههههه وقالي العين تروح
بالقراءة او الاثر)

بعدها وحدة الله يجزاها خير مسكتني وقالت ان وضعك غريب !!
احد مثلك وما تزوجت للحين ! قلت لها انه باختياري انا لكن كان لها نظرة ثانيه
انه له دخل بالعين واستمرت تتواصل معي عشان اقرا على نفسي
والله اعلم اذا نظرتها صح ممكن بس ما احس انا كنت مابي الزواج المبكر ! الله اعلم !

الاسبوع اللي فات تقدم لخطبتي 2 ، الاول ما حصل نصيب

لكن نجي للثاني هننننا الموضوع

هو واحد من قرايبنا واعرف اهله ناس مره اجاويد وطيبين وهذا اللي جاذبني للموضوع لاني اهاب
من موضوع الزواج لكن بما اني اعرف اهله طاح نص الهم !
وهو انسان ما عليه ماديا ويشتغل من زمان ، لكن المشكلة انه تخرج من الثنوي وما درس !
وهو كبري عمرة 25


المشكلة مابي ارضى فيه عشان اهله اجاويد وبس !
احس كاني توني ابدا اشوف الخطاب بنظره صح وكاني اول مرة انخطب
مدري شلون اوضح احساسي
هو انسان عادي الجمال وكان سمين ونحف يعني حتى جسمه عادي
ومن زود قلة الثقة اللي فيني بيني وبين نفسي اقول ايه من صالحي !!
يعني لو فيني عيوب اكيد ما تهمه !
( لاني كنت سمينه ونحفت )

فهمتوا وش اللي غاثني من نفسي ! ما ابي ارضى فيه عشان ثقتي مو عاليه
اعرف بنات اقل مني من نواحي مختلفة . ويقولوا وبكل ثقه ، يا حظ اللي بياخذني !
وانا اقول زين اللي فيه عيوب عشان عيوبي !!! والله قهر !
ابي افكر صح ومن حقي لو رفضته !
وان شاء الله يجي واحد زي ما انا اتمنى
لان الدراسة عندي مهمة بغض النظر عن حالته المادية
التكافئ عندي مهم !!



رايكم !!!

اعتذر على كثر الكلام لكن ابي تفهمون لو جزء مني عشان تفهموا وجهة نظري

وعليكم السلام ورحمة الله وبركاته ..

مرحباً بسارة الشجاعة ! بالفعل أنتِ شجاعة

حبيبتي أول شيء بالنسبة للثقة ضعي شيء في بالك إذا رأيتِ نفسكِ جميلة الكل سيراكِ من هذا المنظور والعكس !!

اكتبي إيجابيتكِ وكل شيء فيكِ جميل في ورقه ...ستقولي واو كما أنا رائعة !!

نظرتكِ لنفسكِ لن يُغيرها أحد سواكِ ..وأنتِ ماشاء الآن أجمل بالأكيد !

ثانياً / بالنسبة للخطبة وهذه الأمور هي أرزاق من الله فلا تبحثي والرزق بيدالله فلا تقلقي أبداً من تدابير البشر أقصى مايفعلونه هو تبدير أمر الله ..

ثالثاُ / بالنسة لأمر العين ..أرقي نفسكِ صباحاً مساءاً يومياً لاتتركي أذكار الصباح والمساء نهائياً وكوني على وضوء!

رابعاً /بالنسبة للمتقدم والمهم كما قلت التكافىء..والدكِ ماهي نظرته اتجاه الموضوع !

..خلقه تدينه !

ولما ممتنع عن التعليم وهل بإستطاعته الإكمال ؟!

همسة / فلا تجعلي فقدان الثقة في نفسكِ تذهب عنكِ فرص وأشياء جميلة في حياتكِ ...


الله يوفقك ويسعدكِ بمن يستحقكِ

..

سارة
إنت مثلي من نواحي كثيرة !
فيك نوع من المثالية ، تنظرين لنفسك إنك لازم تكونين كاملة
ولا انت ما تسوين شيء !

الانسان الافضل يا صديقتي مو الانسان الكامل هو الانسان اللي غلبت ايجابياته
سلبياته !
اجلسي مع نفسك وشوفي ايجابياتك من جميع النواحي ، لا تسلطين الضوء على عيوبك فقط
وتنسين الباقي هذا ظلم لنفسك !!
تواضعك لا يصير تضعضع حطي نفسك بالمكان اللائق فيك !
بناء على هذي المميزات شوفي االانسان المكافىء لك .

وبالنسبة للدراسة والشهادة \\
مجرد رأي شخصي أحياناً الشهادة مالها أي تأثير على الشخص ، ممكن تلقين شخص جامعي فاشل
وجاهل وطريقة تفكيره بدائية والعكس صحيح.
اذا تهمك الشهادة كشكل اجتماعي احرصي عليها ، واذا تهمك الثقافة والشخصية اسألي عنها .

الله يوفقك طمنينا عنك ..
.
.
.

سبحانك ربي ،، فعلا المفروض ان اذكر نفسي دائما عشان ارتاح
اللهم اني توكلت عليك يا ربي فاكفني

جزاك الله خير على ردك وثقتي افضل ولله الحمد وبستمر لحد ما اوصل للثقة المطلوبة باذن الله

شكرا لك

كشفتيني (:

فعلا المثالية عندي متعبتني لكن ابشرك كان هدف 2013 ان ارفع من ثقتي بنفسي

وعرفت ان الموضوع ماله اي دخل بانجازاتي او شكلي او شخصيتي .... الخ

كله من فكري لازم اهدى وارضى الرضى هو السر

(الانسان الافضل يا صديقتي مو الانسان الكامل هو الانسان اللي غلبت ايجابياته
سلبياته !)

بس شقد ردك اثر فيني (خنقتني العبرة على خفيف ههههه )
مع اني كنت على بالي فهمت لكن الانسان يحتاج للتذكير من وقت لآخر

جزاك الله الجنة

..
وأنا فرحت إن كلماتي لها وقع ولو من بعيد ..

آآآمين وياك والقارئين .
.
.
.

ساره مواصفات الخاطب قريبه من مواصفات خطيبي ..
ولكن خطيبي اكبر بالعمر كثير ..

خطيبي مامعه شهاده وهذا الموضوع مقلقني لدرجه صرت افكر بالانفصال ..

واللي خلاني اوافق هو ان اهله من ناس اجاويد وقريب لي .. اذا كان موضوع الشهاده مايهمك وافقي ..