السلام عليكم اخواني واخواتي
حابه استشيركم واتمنى اسمع رايكم لاني جدآآ محتاره
من عمري 20 وانا انخطب ويجون اهل الخاطب ويشوفوني وبعدها لاحس ولاخبر
وهالشيء تكرر اكثر من مره .. صح كنت اتضايق واتأثر بس كنت اقول الحمدلله
انا موناقصني شيئ بس نصيبي للحين ماجا
بعدها اهلي قالو المرات الجايه نخلي الخاطب يشوف افضل الرجل نظرته غير
دخلت على 3 ونفس الشيئ هنا فقدت ثقتني بنفسي قلت معقوله انا بس اللي شايفه
نفسي ماينقصني شيئ تحطمت مررره وحلفت ماادخل لا على اهل خاطب ولا
هو بنفسه لأن هالشيئ صار يتعب نفسيتي جدآ وماابي اكرره
قبل اشهر تعرفت على شخص ارتحت له وتعلقت فيه حيل ومن البدايه قالي هدفي مو لعب
هدفي الزواج وقال بقولك شغله انا متزوج وعندي طفلين وزوجتي ماتقدر
تنجب مره ثانيه تعبنا ونحنا نعالج لكن الله ماكتب وقال لا تحسبين هدفي منك
عيال وبس انا حبيتك وارتحت لك وابيك بالحلال مااقولكم مااهتميت بالعكس
انا مثلي مثل اي بنت وودي بشاب اعزب اكون اول فرحته بس الله ماكتب لي
هالشاب اللي تمنيته المهم تقدم لي قبل 5 شهور واهلي رفضو قالو الرجال مايعيبه شيئ بس متزوج اولآ
وثانيآ بمنطقه بعيده عنا انا صراحه تضايقت لرفضهم له لأني اشوفه فرصه
يمكن ماتتكرر هو للحين يبي يخطبني مره ثانيه بس كيف اقنع اهلي به
انا مستعده اتحمل كل شيئ بس اكون معه وبغض النظر
انا خايفه ارفض هالزواج واندم
وخايفه لو قبلت اتحسف

ماذا تشيرون علي ؟

(تم التعديل ليتناسب مع المضمون)

يا حبيبتي تاكدي من كلامه اول وان زوجته صدق ماتنجب
بعدين الزواج من متزوووج مغامره
تاكدي من موافقة زوجته بعد عشان لا تشتتي الاسره
سبحان الله فيه رجال صبرو سنين علي زوجاتهم الي ماينجبو
وهو عنده اثنين ولاحمد ولا شكر
والطب الحين ماعجز فيه انابيب وفيه زرع وتلقيح
الله يعين زوجته يارب اكيد واثقه فيه المسكينه وهو يخطط ويتكتك من تحت لتحت
وانتي قبل لا تتصادمي مع اهلك عشانه تاكدي منه زين لا تندمي
بالتوفيق

هلابك
زوجته تدري انه خطبني وهي متقبله الموضوع
حسب ماقال لي بس طالبه العدل

عدي كم في راسك من شعره ومتأكده راح يجي يوم وتندمين قد شعر راسك
مشكلتك ماتعرفين تدركين الامور ومتزوج عادي
واكيد راح يرتاح لك بنت وصغيره يتزوجها يوسع صدره واهي الثانيه لين مل طلق ومو خسران زوجه عنده وعيال عنده

اهلك الله يكثر امثالهم مايبون يرمونك

والحين كم عمرك ؟

مع هذا الرد ، بيفرح فيك
فترة من الزمن ثم تنصدمين بالنتائج هذا الغالب
الله يسخر لك ويرزقك منهو افضل منه ان شاء الله بكل شيء

مكانه الانسب .....

__________________



احيانا يجب ان نفقد ذواتنا كاملة لكي نستعيدها كاملة ...

شوفي اختي انا مابقول قصتج مشابهه لقصتي بقول ان هي نفس قصتي والله وكاني جالسه احكيها واسردها
انا ملكت وعمري 19 وفسخت وياكثر اللي يجون ويروحون من هالخطاطيب يا العيب منهم يا اني اطلع العيب بالغصب يا يجون ويروحون ولاحس ولاخبر..
وعرفت شخص وبعد 3 سنين قالي انه بيخطبني لكن هو مرتبط قالي مملك ثاني يوم قالي عندي 4 اطفال
واول كلمه قالها مرتي بصوب وانا بصوب ومالي شغل فيها خير شر كأي بنيه حبت واحد وتعلقت فيه عادي ماهمها لا زوجته ولاعياله همي اخذ اللي ابيه وبس اكبر عني ب 11 سنه وقلت ممتاز هذا الزين يفهمني وافهمه انا ماشفت منه عيبه وحده غلطه ماشفت منه ( اعصب واتعارك واصارخ وهو يقولي اسف انا غلطان حقج علي )
مع العلم عمره ما اخطأ بحقي بالعكس شايلني على كفوف الراحه لكن انا اللي اغار وانا اللي اضوج واعصب من يروح مني مع العلم ان احنا ساكنين بنفس البيت ولو شفته يدلع بناته اضوج وانقهر واتعارك معاه بدون سبب..وقبل الخطبه من تقدم رفضوا اهلي بسبب ان متزوج وعنده عيال لكن انا عندت راسي الا اخذه الا الا واللي زاادني كلام الناس كبرت وماتزوجت وبنهايه العشرين واللي اصغر منها عندهم عيال .. والاكثر يوم امج واهلج وقرايبج يقولون لج ياعانس عالرايحه والجايه هنا لزمت واخذته غصبا عن الكل لكن بين فتره وفتره اقوله ياريتني ماخذه عزابي ولا ماخذتك وياليتك ما خشيت عني كان ما تزوجتك

انا يمكن اقول انتي كبرتي وتبين تتزوجين وتنسعدين لكن بالبدايه بتنسعدين لكن يوم بيكون مو عندج وله مع عياله حتندمين الف مره..
نصيحه تاكدي ان مرته ماتنجب لان كلهم يقولون شي وبعد الزواج تطلع الحقيقه
ربي يوفقج ويسعدج يارب