السلام عليكم ورحمة الله وبركاته

طبعا اغلبكم عارف قصتي
طليقي يصرف على عياله من تطلقت
بس بعد طلوع الروح
بعد ما يرسل له اخوي ويذكره اكثر من مره
الحين وقف مصروفهم وانا موظفه
اخر مره عطاهم برمضان
ودي ارفع عليه دعوى نفقه وأريح راسي من مطارده
بس أبوي الله يطول بعمره راااااافض
وما اقدر اطلع من شوره
يقول طنشيييييه واصرفي عليهم واحتسبي الأجر
أنتم يا أعضاء شوروا علي
مقهوريهم ومحتاره ،،،،،،

اسمعي كلام الوالد باين عاقل ماشاء الله
الشي ماجاء من خاطره علي اولاده بيجي بالمحاكم والغصب
بلاها المحاكم والفضايح
ادري حقك وحق عيالك بس احتسبي الاجر
لو منتي موظفه نقول لا تخليه بحاله وطالبي بحقك
بس الحمد لله موظفه وقادره تقومي فيهم
مو معناها انك موظفه مالك حق
لك حق ونص بس المعذره باين ابوهم نذل ومايستحي
وراح تتعبي وانتي تطالبي فيه مصروووف
بعدين انتبهي لاياخذ منك الاولاد بسبب هالمصرووف عشان يضغط عليكي ماتطالبي بشي
يابنت الحلال ارتاحي وريحي راسك وابعدي عنه ماتبي منه شي الله الغني عنه
الله يخليهم لك يارب

و عليكم السلام

اختي كان الله في عونك، بس المصروف اللي كان يجيك كان تفقه محكوم بها بحكم،او كان مصروف يحطه طليقك بخاطره

و كم عمر اولادك الله يحفظهم لك

باحتفظ بردي لين تجاوبيني

عزيزتي من حقك تطالبي بحقوق اطفالك من اموال ابيهم مهما كانت ثروتك

حقهم على والدهم ان ينفق عليهم

وفي مثل امور النفقه اتوقع تحسم الجلسه مبكرا

والدي اذكر انه اخبرنا بقصة بااحدى المطلقات رفعت دعوة نفقة

زوجها طلق وذهب الى منطقة اخرى وتزوج وعاش ونسي ابنائه تماما

رفعت دعوى نفقه الزوج طنش تتوقعا منه ان الموضوع سيغلق او يتبخر

وحكمت المحكمه غيابيا

ان لكل طفل مبلغ محدد وتسحب من حسابه باامر من المحكمه

كل شهر يجمد راتبه حتى حين سحب المبلغ

المحكمه اعطت اوامرها للجهات المختصه

للعلم والدتهم مشرفة تربويه الا انها ترى ان لابنائها حق مقهور

صراحه اعجبتني وماضاع حق خلفه من يطالب فيه

رائحة البخور
أكيد طاعة الوالدين مقدمة فوق كل شئ
بس كنت أتمنى يوقف معي الوالد وأخذ حق عيالي
انظلمنا كثير وحنا معه ابيه اقل شي يصرف
عياله ولازم يتحمل
شاكره ومقدره

شوق اللقاء
المصروف كان يجيبه بعد ما كلموه ناس كبار
ونصحوه ولا في البدايه كان مايصرف وناوي يسحب
أولادي 9 سنوات وسنتين
شكرًا لك

ملكة الإحساس
أعجبتني جداً وهي مثال للمرأة القوية
وأتمنى أكون مثلها بس تعرفين المحاكم وما يتعلق فيها لازم وقفة رجل
وأهلي للأسف ما يساعدون
عندهم عيب وبتسوين فضايح عشان الف ريال حنا نعطيك بس اسكتي

دعواتكم

والله ياحبيبتي انا أنصحك تطالبي بنفقه باولادك ومن حقهم ابوهم يصرف عليهم
انا مطلقه وأم لأربع أطفال وموظفه وطالبت بنفقه اولادي وبعد مماطلة من طليقي استمرت 4 سنوات حصلت على مبلغ 100 الف وبعدها بسنه ونصف لم يلتزم بالدفع الشهري قدمت بدعوه في دوائر التنفيذ للاستقطاع من راتبه وحصلت على مبلغ 46 الف
وأصبحت النفقه شهريا تستقطع من موسسه النقد وبالصراحه ساعدتني كثير المعيشه صارت غاليه وصرت ارفع جزء منها لاولادي وجالسه احوش لهم مبلغ طيب
وانا اايدك بالمطالبة بحقوق أبنائك. ومن حقهم على والدهم النفقه عليهم

__________________
ريم نواف سابقا

لا يختي
حق عيالك اخذيه
هذولي بذمتك وبكره بتحاسبين بالافريط بحقوقهم
ابوك على عيني وراسي لكن لاصار تقصير هل بيدفع لهم من جيبه ويعوضهم

ارفعيها عليه

هذا حق اولادك، ما هي حسنه و اللي يقول لك انا اعطيك، قولي له حاضر بس باخد من ابوهم الاول

معك حق في مشاكل المحاكم، بس ما باليد حيلة

كلمي الوالد و قولي له انه اولادك من حقهم يعيشوا بفلوس ابوهم

و اذا توقفت عن العمل يتشردوا اولادك لا سمح الله

ارفعي قضيتك و توكلي على الله