السلام عليكم ورحمة الله وبركاته:
اولا: احب اشكر كل شخص وقف معايا وافادني ونصحني وطلعني من حالة التيهان اللي كنت فيها,,,
ثانيا: احب اسرد بعض النقاط اللي اتعلمتها في فتره بسيطه لاي شاب و شابه مقبلين على الزواج خصوصا شباب الجيل الحالي:
1- لازم نعرف ان كل شي تغير من ناحية طريقة التفكير لكل من الشاب والشابه والبيئه المحيطه بالاثنين والمجتمع بشكل عام.
2- لازم نعرف ان الحب عباره عن احترام وانه مهما بلغ الحب راح يموت بدون احترام
3- من اكبر المشاكل اللي واجهتها فهم الطرف الاخر بس بالصراحه قدرت اوصل لنقطه افهم فيها الطرف الاخر ويفهمني
4- اسوء مافي العلاقه ( العزه- الكرامه- راي الناس-الانانيه) لو قعد كل شخص يفكر بالامور ذي وخصوصا في العلاقه الزوجيه فصدقوني راح تخسرون بعض.

للشباب:
1- اصبر وراح تتعب كثيييير بس راح تفهم مع الوقت وراح تعرف ان البنات يختلفوا في طريقة تفكيرهم عننا كليا.
2- خليك على طبعك ولا تتصنع بس اتذكر بانها زوجتك مو خويك >>>>عااااادي جبت العيد قبلكم هههههه
3- البنت تبغى الكلمه الحلوه والاحترام والماده بكذا تكسبها بس لا تتغير عليها بعد الزواج,,, لازم تغير من نفسك وتفهم زوجتك
4- البنات يختلفوا وتذكر العناد عمره ماكان حل ولا راح يفيد فخليك عاقل وصدقني راح تسمع كلام يزعلك بس بالنسبه للبنت ما تقصد الكلام ذا
5- البنت ما تحب احد يقول اكره فيك..... خليك ذكي واذكر محاسنها بالاول وباسلوب غير جارح تقدر توصلها ان فيه شي تتمناه يكون في زوجتك المستقبليه
6- تذكر بانها مسالة حقوق زي ماتحب تشوف منها هيا تحب تشوف منك (ولهن مثل اللذي عليهن)

للبنات:
1- لازم تعرفوا ان الشاب غالبا يوصل مشاعره عن طريق الافعال اكثر من الكلام (لازم تكوني صريحه معاه وتفهميه المساله ذي)
2- اغلب الشباب يعانوا من مسالة انه خطيبته ثقيله عليه وما ترد عليه>>> بالنسبه للشاب جدا منرفزه الحركه ذي وتخلينا ننسحب تدريجيا ومن هنا تبدا المشاكل,,,خليك معتدله مرات تدلعي عليه ومرات بتهتمي ومرات بتخليه يغير بس لا تزوديها معاه عشان ما يتغير عليك
3- اغلب البنات في الفتره ذي بيسمعوا للي حلوهم(نصيحه هذي حياتك) وانتبهي ممكن تخسري حب انسان بسبب لقافة ناس حولنا ينصحونا نصايح هما نفسهم ما يتبعوها.
4- افهمي زوجك واعرفي شخصيته وراح تعرفي كيف تكسبيه
5- اهم نصيحه الرجل طفل,,,اهتمي فيه واسالي عنه وخليك جنبه وقت ما يحتاجك وراح يسعدك ويسوي المستحيل عشانك.

الله يسعدكم جميعا ويوفقكم وبجمعكم على خير يارب,,,,حبيت اشارككم شغلات تعلمتها في 4 شهور ^_^ ولساعنا بنتعلم وراح نتعلم