(زوجتي عنيدة ولاتحترمني)
السلام عليكم ورحمة الله وبركاتة..


بدون مقدمات..راح اكتب أن شاءالله بانصاف.



بصراحة تعبت مع زوجتي.. اللي هي بنت خالتي .. اللي احبها من يوم انا صغير..ولازلت.

مع العلم ..طيبة وماقد راحت ل اهلي الاتجيب معها شي..
مرة سرير للوالدة من حافز ومن عندي.
ومرة هدية عطر وعود وغيرها من الهدايا..


*

الى الان لنا 4 سنوات متزوجين ولله الحمد وبيننا طفلة.

خلال ال4 سنوات جلست اعاني من طلباتها المستمرة .. وكل مازعلت..
(( وديني عند اهلي)).. وأحيانا انا من يقول لها اوديك لأهلك أفضل.

كانت تصير بيننا مشاكل كبيرة على اسباب تافهه

*

اهتمامها بالكماليات في احلك الظروف هو ماجعلني افقد اعصابي اكثر من مرة عليها..

*

يعني ماهو معقول راتبي*5200*ورايح منه قرض*1960وتبغاني اجيب لها كنب في الشهر المحدد بالمبلغ المحدد..وتروح تشتكي لابوها وابوها يرد.. خذي 7000 روحي اشتري كنب ولاتنتظرين فلوس من أحد.

او تطلب طلبات مالها سنع..

*

طيب اصبري شهرين 3 الين نجمع لنا كم قرش ونشتري.

*

لا . نشتريه الان ماعندك فلوس من قلك تتزوج .. ليه ماشريت كنب قبل الزواج..ومن الكلام هذا.

تحسن وضعي الوظيفي وتحسنت حالتنا ولله الفضل والمنه وزوجتي هي نفسها ماتغيرت.

وكل ماجتني فكرة مشروع تجاري نطلع منه من الوضع الوظيفي. ونوفر منه لقمة العيش الهنية ومصاريف الأطفال.

تقابل الفكرة بالتحطيم وأنه ليش مافكرت في المشروع من قبل الزواج.. ليش الآن بالذات. خلي فلوس المشروع نتمشى فيها أفضل من أنها تضيع..

والان اعتقد الامور وصلت حدها ونهايتها..

صحيح احبها وبيننا طفلة لكن والله وياخوان واخوات انها تسبب مشاكل من لا شي..

*

و4 مشاكل بيننا هي اللي طلعتني من طوري

*
الأولى هي خروجها من البيت دون علمي..

...

كلمتني وقالت انها بتزور صاحبتها وبحكم انا ساكنين في سكن خاص. وبيت صاحبتها قريب من بيتنا أعطيتها الأذن انها تروح..
لكن ربع ساعة بالتمام كلمتني وقالت انها ماهي موجودة وبطلت تروح..

كذا اوكيه.

رجعت من الدوام الساعة 11 الليل.. وعلشان لاتستغربون رجعتي المتأخرة..شغلي ورديات. شفتات.. والله المستعان.
المهم رجعت الساعة 11 وألقى الزوجة الغالية دوبها جاية..

فين كنتي..؟
عند فلانه..
انتي ماقلتي أنها مي موجودة؟
رجعت دقيت بعد المغرب وقالت لي تعالي..

سين جيم طال النقاش زعلت وهمت تلبس عباتها تبغى تطلع.. ضربتها على وجهها ضربة خفيفة وانا اعترف اني غلطت في مدت يدي عليها..وندمان عليها..
أخذت أيام وأيام علشان ترضى مع ان الغلط منها.
وإلى الآن لازالت تذكرها..

.
*
والله العظيم اني ماني مقصر معها بشي واكرمها واحترمها واعطيها الحب والحنان وماخليت شي وفي المقابل .. لاجد التقدير منها .. وهي على اتفة الاسباب تقول انت عمرك ماجبت لي وعمرك ماوديتني وانا تعبت معك وحياتي كلها هم في هم ليتني ماتزوجتك ماشفت منك إلا المشاكل.. الى ان وصلت الى (( ادور الحنان عند واحد ثاني)) .. والله العظيم ان الكلمة هذي رنت في راسي اشهر..

ومشيتها المرة الاولى وقلت يمكن من الزعل..

*

بعدها بكم شهر بدت مشكلة ثانية . ونفس الموال

*

وماتتحكم فيني وانا حرة في نفسي ..ومن الكلام هذا الى ان وصلت الى .. اقدر اكلم اللي ابغاه الان وادور عنده الحنان..

*

والله ان الشيطان دخل بيننا من الكلمة هذي وواجهتها اكثر من مرة وتحلف بالله انها تقولها من العصبية وماتدري عن نفسها..

*

واقسم بالله وصلت لمرحة اني اتحلم في الموضوع هذا .. انها أعوذ بالله تخونني مع شخص ثاني.

الشيطان ماخلى شي..
ادعي الله في كل صلاة أن يصلحها ويهديها ويبعد عنا الشياطين والوساوس.

*

ياجماعة الخير . والله ماني مقصر معها في شي..

والله كل شي اعطيها الكلمة الطيبة واي شي تطلبة . تمشيات امشيها مطاعم اوديها ..حب وحنان ماني مقصر معها.

*

واقسم بالله العظيم اني اكون أحيانا تعبان من العمل وضغط العمل ولا اتكلم في الامور هذي معها علشان لا اكدر خاطرها..

واقسم بالله العظيم اني وديتها السوق وانا في اشد حالات التعب من السخونة والارهاق وغيرها..علشان تشتريلها كم لبس عندها استطاعة أنها تأجلها في وقت اخر..

بالمناسبة اقرب مركز تجاري لنا*180*كيلو ..

*

لكن ماني شايف منها شي في المقابل الا المشاكل والمشاكل والمشاكل.

صلاة ربي ماتصليها إلا نادر وإذا نصحتها في الدين قامت تأفف وترادد وتقول ماهو انت اللي تنصحني اعرف ربي وديني .ومن قلك اني ما اصلي.. انا دايما اصلي..

همها ستار أكاديمي وعرب ايدول وغيرها.

وإذا واجهتها.. ترد علي اني اجلس قدام الكمبيوتر بالساعات.. ويعلم الله اني ما اجلس على الكمبيوتر إلا ساعتين تزيد أو تنقص.ومقطعة بعد
. بحكم الجامعه والواجبات.. ومشاريع التجارة الالكترونية.. وبرامج تعديل الصور..
.

احاول قد ماقدر ان وقت المشكلة نبعد عن البنت .. لكن لا هي مصرة تدخل البنت في كل حاجة.. وترفع صوتها وترد الكلمة بعشر...

*

والله انه اكثر من مرة في وقت المشاكل احاول اطلع من البيت علشان اغير جو واهداء شويتين..

لكن اشوفها قدامي بعباتها..وتهدد..انت تخرج ..حتى انا والله لاخرج ..

*
والله وصلت لمرحلة اني اتأخر في الخرجة من الدوام.. أو اتأخر في روحتي للبيت علشان ما اقابل مشاكلها..
*

واخر مشكلة بيننا.. كانت تطالبني بجوال*I PHONE 6 ***

واعتذرت لها بحكم الشهر هذا ابغى اسدد بعض ديون بناء البيت والديانة كلم يوم والثاني اتصال لدرجة اني تلقيت تهديد من أحد الديانه بالحكومة إذا ماسددت.

*.

وهذي تقولي ماهو ذنبي انك ورطت نفسك في البناء.
*

والله ماقصرت معها جبتلها الجوال.

وقدمته لها كهدية..

*

وفي الاخير الجوال جلس اسبوع كامل بدون مايشتغل .. استغربت بصراحة قلت يمكن انكسرت الشاشة وماتبغى تعلمني..

لكن المصيبة قالت انها ماتبغاه .. بحكم انه هدية+ مذلة (( بسبب اني اعطيتها كلمتين حلوة *علشان تفهم ضروفنا في الشهر الحالي)

*

تقلي اش فايدة الجوال من الكلام السم اللي سمعتني اياه.وانت ماقلت لي اطلبي اي شي اجيبه لك؟

والجوال له 3 أسابيع ماشتغل.. هههه لا حول ولا قوة إلا بالله.
*

وهذي اخر مشكلة بيني وبينها ولها اسبوع عند اهلها ولا شفت اتصال او رسالة منها

والله العظيم انها كل ماتروح عند اهلها تجلس بالاسبوع والاسبوعين ولا اشوف لها اتصال.

وتجيني مبسوطة ومتغيرة وكن ماصار شي ..

*

الشيطان دخل بيننا ياجماعة الخير ..والله اني بديت اوسوس انها تكلم شخص ثاني ..

*

مستحيل تجلس عند اهلها اسبوع وترجع وكأن مابيننا شي .وأهلها مايدرون عن مشاكلنا ومتأكد من الكلام هذا.
.
جوالها صارت تقفله.. برقم سري.
مع اني عمري وحياتي مافتشت في اغراضها ولا قلبت جوالها إلا مرتين بعد ماقالت الكلمتين اللي تسد النفس.

واقسم بالله اني كرهت نفسي وزهقت وطفشت وأكثر من مرة يجيني التفكير في الانفصال ..لكن اللي يمنعني سببين السبب الأول
البنت اللي بيننا اش ذنبها..؟
السبب الثاني
اني لازلت أحبها واحبها واحبها لحد الجنون..



انصحوني علموني يمكن انا موسوس زياده يمكن عندي غلط..

والله تعبت والله تعبت والله تعبت.

(تم التعديل ليتناسب مع المضمون)

سبحان الله الزوجه الي تخلي زوجها يقوم بحقوقها بالقوه وتاخذ زود عن حقها >>>>>زوج مخلص ومجنون بحبه لها

بينما الزوجه الي تقدر ضروف زوجها بل تعطيه وتسدد ديونه وتصرف ع البيت>>>>>زوج خائن ومتذمر ومكرهها في عيشتها....


ليه طيب والله أشوف الحالات هذي في مجتمعي وأستغرب طيب مافي وسط ؟؟؟؟


أخوي الله يفرج همك مشكلتك متشعبه( زوجه مسرفه، ماتفكر بمستقبكم المادي، خوفك من الخيانه، مكوثها الطويل عند اهلها بدون سبب)

في أمور ينسكت عليها وأمور ماينسكت ( لذلك لابد أن تفتش جوالها فجأه كل شئ الا الخيانه)

ينقل لقسم المتزوجين

__________________

‏
الوعي هو الملاذ ..

أستغفر الله العظيم ؛
( الفردوس غايتي )

من جد يا متفائله و انا كمان مستغربه

الظاهر الحب هو اللي يخليهم يتفرعنوا bgh

مو يسمعونا دحين الشباب و يجيك هو اللي يتفرعن >>>> غلط تفرد عضﻻتك على وحده طيبه و مسكينه و لكن مستحيل اﻻ ما يكون فيه حدود للحب و للصبر

اخوي انت غلطان

تحبها و تحبها و تحبها

و في المقابل هي ايش قدمت لك ؟

استقرار مافي

و المفروض هي تفرح انك تفكر في مستقبلهم

و الله كثير نساء ازواجهم مهملين هذا الجانب و جالسين يتعذبوا

انا برأيي

ﻵزم تبدأ تربيها bgh

يا اما تمشون صح

و ﻻ الحال المايل هذا مو طيب عشان بنتك و عشانك

اصحك تبين انك متشقق عليها و تحبها

لو عملت الطيب قابله بالطيب

و لو عملت شي غلط قابله بالهجران

و ربي يعينك

ايش رأي اهلها في هالمهزلة ؛ يعقلونها و ﻻ كيف ؟؟

والله صدقتي الله المستعان
بقولك شي سالفة اني بدور حنان عن شخص ثاني قسم بالله اذا قريت لزوجي محادثه مع بنت ودي اقوله هالرد بس عشان يفهم كما تدين تدان بس تربيتي تمنعني
اتوقع والله العالم زوجتك تقولها كذا بتقهرك لو جاده كان ماشككتك فيها
الله يفرج همك ويصلح مابينكم

مرحباً أخي الكريم
يبدو تجرؤها عليك بشكل كبير... إضافة لشعورها بحبك الكبير وربما ثقتها الزائدة بعدم مقدرتك البعد عنها.
وأنصحك بالتالي والله أعلم:
1- حاول أن تجلس مع خالتك وزوج خالتك وإخبارهم بحال بنتهم... وهل يرضيهم مثل هذه التصرفات... وكيف ستمشي الحياة بهذه الطريقة
2- حاول أن تكون جاد في تصرفاتك معها وحسسها بقوتك... ووضح لها طريقة منهج حياتك
3- حاول أن توعيها بالحقوق الزوجية مع التوعية الدينية
4- حسسها أنك شاريها وراغب فيها... ولكن حذرها أن لا تتمادى فتخسرك
5- لاتجعل الشك يدخل في قلبك... وخليك على ثقتك فيها... ولاتتجسس عليها... إلا إذا وجد أمر غريب يستدعي ذلك
6- حاول أن تتحلى لأقصى مايمكنك من الصبر... فليس من الساهل أن تخسر حبك القديم أو تشتت طفلتك .

أعانك الله

عندي رأي ارسل كلام انك ناوي اطلق
لانها زوجة صعب ارضاءها

وقدراتك المادية ماتشبعها
وشوف النتيجة

................
واذا ادخلوا اهلها خبرهم انك يأست من تعديلها


بس قرصة للجميع عشان يراجعوا انفسهم



اصلح الله شأنكم

__________________
ربنا هب لنا من ازواجنا وذرياتنا قرة أعين

واجعلنا للمتقين إماما

واضم صوتي لمتفائله
سبحان الله الدنيا غريبه ً

اخي هي ماتخونك
شخصيتها طفوليه ودلوعه
روحتها لاهلها انتصار لها وتاخذ وقت راحه وترجع مفرفشه
هي بس تحب تستفزك
مدري كيف تعامل هالنوع
لانها تفكير طفل
كيف تادب الطفل وهو مايهمه الا يحصل على لعبته
الله يعينك
وانت ماقصرت معاها ابد.
الله يفرج همك
دامها واحت لاهلها دخل احد عاقل بالعايله

اخي الكريم
اولا زوجتك يبدو لي من حديثك عنها انها مازالت طائشة وربما أهلها كان عون لها في ذلك بحسن نية فعندما تطلب ويذهب أبيها ويعطيها كان الواجب من ابيها ان يجعله لا تثقل كاهل زوجها بمصاريف
هي مسرفة وغير مقدرة لكل ما تبذله اتجاهها
انني ارى ان تكلم ابيها او أمها من ترها يستطيع التأثير عليها ومخاطبتها ومتابعتها من قبل أهلها فيما اتفقت عليه فمن حديثك يظهر انك فقدت هيبتك لديها اما كلامها الذي اثار الشك في نفسك فلا تسكت عليه ولا تجعله يمر مرور الكرام فهذا مؤشر لا يبشر بخير تستطيع ان تجلس مع أمها التي هي خالتك وتكون حازم اما حكاية مكوثها عند أهلها أسبوعان ثم تعود هكذا من تلقاء نفسها وأهلها لا يعلمون بمشاكلها معك فهذا خطاك انت فلماذا لم تخبرهم بذلك
لو كنت حازم من بداية الامر لما وصلت المشاكل بينكم هكذا
ولست ملزم ان تغرق نفسك بالديون فالله لا يكلف نفسا إلا وسعها فلابد ان تتفهم ان الكماليات لست ملزم بها وان عليها ان تكون معون خير لك
كان متوقع منك ان تكون اكثر حزم عندما تفوهت بكلام لا يرضي الله خاصة وانت تعلم مدي تقصيرها في صلاتها وان تضيق الخناق عليها وتفهمها انها هي من تسببت بذلك لكي توزن حديثها معك لا ان تتطاول بكلام اكبر من ذلك
اسال الله العلي القدير لك بنور البصر والبصيرة

شوف أنا كل شيء يهون عندي الا الصلاة والله ماترجو من شخص خير وهو تارك صلاته يعني تتوقع كيف بتربي بنتك كيف بتعلمها الدين وهي اصلا مقصرة في صلاتها يااخي والله اهم شيء الصلاة إذا صلحت صلح الامر كله الله يهديها ويفتح على بصيرتها .

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين