السلام عليكم
انا اعاني من غيرة زوجي القاتلة اي بمعنى لازم تكون بيننا مشادات كلامية بخصوص هذا الموضوع
الغيرة اذا زادت عن حدودها اصبحت جهنم لاني وبصراحة لم اعد احتمل
انا وزوجي لنا سنتان الى الان والحمدلله ومن اول ماتزوجنا سافرنا للخارج عشان يكمل دراسته وقدر الله لي انا ايضا الدراسة المهم كعادة اي زوجين نطلع نغير جو ونتمشى لكن صرت اكره الطلعات والتمشيات بسبب المشاكل اللي تصير منها خللوني اعطيكم امثلة مثلا لما نكون بالمطعم او كوفي او او دائما يكون مركز علي بشكل مو طبيعي عشان مااطالع لايمين ولا شمال وهذا الشي يضايقني ويحسسني بالاحراج اللي يشوفه بيقول هذا مو صاحي !!
ومره بالمطعم اذكر اني سآلت عن شي عصب علي قال ليش تكلمين الرجال !! واحيانا بالمول !!
واحيانا لما نتمشى واحيانا يقول كنت طالعي ذاك وذاك عاجبك !! واحيانا يقولي كلام استحي اقولكم !!
حتى الكلام مايبيني اتكلم !! احيانا لما اتكلم معه بموضوع يقولي اششش صوتك لايطلع مع اني ماتكلمت بصوت عالي المشكلة انه محد حولنا نهائيا الكل يسولف ويضحك !!

المهم انا ناقشته اكثر من مره وقلت له انك تسرق جمال حياتنا وبتصرفاتك تظلم نفسك ومارح نحس بالسعاده واحنا طول الوقت مشاكل في مشاكل رد علي وقال مافينا الا الخير بس انت مكبرة الموضوع والمشاكل هذي عادية تحصل بين اي زوجين
ولما استرسل معاه في النقاش يعصب ويطلع ويتركني !!
طيب شسوي عشان اخفف من غيرته اللي مو طبيعية ؟ وهل اختار الانفصال عنه ؟ علما انه ماعندنا اطفال اتفقنا لما نخلص ونرجع نجيب اطفال باذن الله ولكن اصبحت الحياة معاه صعبة
وبصراحة احيانا كلامه يجرحني يضايقني بس مايحس وزوجي من النوع اللي مايعتذر نهائيا
وشكرا

(تم التعديل ليتناسب مع المضمون)