طلبت الطلاق بعد العقد .. بتنصحوني أرجع او لا؟
بـــســم الله الـرحمـن الرحــيـم
السلام عليكم ورحمة الله وبركاته
كيف حال الجميع.. يارب تكونوا بخير
إلي اكتر من تلات شهور وانا بأجل الكتابة بالموقع ما بعرف ليه!
يمكن الموضوع يكون طويل يلي ما حبب يقرأ ع راحته بس كل الموضوع بيدور حول هالنقاط
إنو عقد علي شاب اصغر بسنتين, امه متسلطة ومتعلقة فيه عيرتني بعمري واكلت حقي بسبب عمري بعد ما ضحكوا علي واقنعوني بإنو الموضوع عادي, هوي ضعيف الشخصية, بخيل, بينقل كل يلي بيصير بيناتنا لامه, بيسمع كلام اخته وامه واهله بالامور يلي بتخص حياتنا,لكنه حنون وطيب ولين وانا شخصيا ارتحتله وهوي بيحبني, طلبت الطلاق كرمال هالاسباب واستخرت وهلأ بستشركن ارجع او لا؟
انا عندي مرض روحي من صغري وما كنت اعرف كان عندي وما زال تعطيل باغلب امور حياتي ..بلشت علاج بمنتصف العشرينات وببداية الثلاثينات تقدملي شاب من بلاد الشام بس مش من نفس بلدي كان ببداية الثلاثينات كمان بس اصغر بسنتين
رفضته كرمال العمر بس وكان الوحيد يلي ارتحتله من بين كل يلي تقدمولي.. ما بقدر احكي يلي تقدموا قبل مش مناح يعني التقييم صعب بما اني مريضة روحيا وكنت ارفض لاسباب تافهة او بس اوافق هني ما بيرجعوا
المهم رفضته وصار يقنعني انو العمر مش هداك الفرق وسيد البشر صلى الله عليه وسلم فعلها وانو عنا كتير قواسم مشتركه .. ما اقتنعت لان بعرف مجتمعنا وبعرف كيف تفكير الرجل العربي غالبا يعني اقل ما فيها تعيير وكأنه العمر عيب, او يتزوج علي بس كرمال شي نفسي بسبب كلام المجتمع انو تزوج وحدة اكبر منه بسنتين فأكيد رح يحس بنقص لحتى يجي يوم ويتزوج الاصغر بالرغم من انو هوي يلي اختار وكان يقنع بالطرف التاني
اصريت على موقفي وكان عندي صوره في الموبايل لما تقدملي اخدتهم كنت اشوفهم بعض الاحيان وانا بقلب بالجوال ولاني ارتحتله حسيت انها فتنه انو تضل صورته بجوالي فدعيت من كل قلبي انو يارب انا كتير ارتحتلو وصعب امحي صورته من عندي لكن رح امحيها لوجهك الكريم وطاعة الك فإذا فيه خير يرجع او عوضني بالاحسن
سبحان الله رجع تقدم بعد شي سبع شهور كنت كتير فرحانه لان فعلا نفسي بشخص ملتزم وملتحي وكنت اخاف من الشباب الغير ملتزمين لان ممكن غير الملتزم ما يخاف الله فيي ويعذبني بحياتي معه
رجعت قلتلو انا بس عندي مشكلة العمر.. وهوي ع فكرة مطلق من قبل وتعب وهوي يتقدم ويرفضوه البنات .. قلي اظن نهينا هاي المسألة وخلينا نتفق ع امور تانية اهم
قلي كمان إمي بتقول اقبلي فيي وما تخافي ما رح اغلبك كرمال عمري اصغر بسنتين وقال انو ارتحلي من اول مرة تقدملي بس انا رفضت وانو ضل يفكر فيي وانو بيحب يرتبط باكبر منه بشوي لان الاصغر ممكن تتعبه بحياتي ومش ناضجه ومن هالحكي
مبدئيا اقتنعت لكن من داخلي لا ..بس خفت ما يتقدملي شخص ارتحلو وهالنقطة مهمة بالنسبة إلي لان مستحيل اقبل بأي شخص بس كرمال الناس تقول ماشاءالله تزوجت!
بالنسبة لشكلي قال هوي وامه وحطوا الف خط تحت امه.. إني حلوة والحمدلله انا بعرف فضل ربي علي من هالناحية وما محتاجه تقيمهن.. بعدين بتعرفوا ليه ذكرت هالنقطة
اتفقوا اهلي واهله انو يجي يخطبني واذا الموضوع مناسب نقعد بنفس الوقت لانهن بيتهن بعيد عننا
قبل كان التواصل من بعيد وبالكتابة معه وبالتليفون مع امه وقليل كتير
اجوا لعنا وقعدنا وكنت مستحية اتفرج فيه وامه عجبها خجلي كتير وكانت تحضني ومبسوطة كتير فيي وبخجلي ..بعدين عرفت ليه!
تاني يوم قدرت اتفرج فيه شوي وعقدنا القران المسا.. نعم بسرعة! لكني ما كنت اعرف المخفي وغرتني المظاهر
للامانه اول يوم كانت الام لطيفة كتير وابنها ما كان إلو دور
تالت يوم بلشت شخصية الام تظهر بعد عقد القران وكمان شخصية ابنها بلشت توضح اكتر
كانت علاقتهن ببعض قوية لولا الحرام لظنيت انهن متزوجين
بتحكي معو بطريقة وكأنه بعدو ابن تسع سنوات
رأيها نافذ وهوي قدامها ولا كأنه عمره بالثلاثينات
بعد رابع يوم طلب مني قبلات وهيك وانا قلت التدرج حلو وانا مش متعودة على الاختلاط فصعب علي من رابع يوم اسمح بأي شي اكتر من مسكة إيد.. تفهم وقال طيب
لكن تفاجئت انو قال لامه .. وانا بعرف انو الشاب الملتزم بيخجل يحكي هيك امور لامه!
وطبعا امه قالت لامي وانا انصدمت وخجلت
انصدمت كيف ما عندو الحياء يحكي لامه وكيف امه المفروض كبيرة وحكيمه بدل ما تحكيلو اصبر ولسا البنت ما بتعرفك لكنها كانت للاسف وقحة مع احترامي للجميع الا هاي الست
راحت تشكي لإمي انو هيك الحال ما بينفع انو بنتك تضل خجولة .. والمصيبة اني ما كملت اسبوع لحتى تعلق على خجلي!
والطامة الاكبر بتهدد بتقول لاهلي اذا ما بيصير شي من تاني يوم من ليلة الدخلة انا رح اشكيها لعمها.. والله إني انصدمت من قلة حياها
والغريب انها بتحكي بالدين وصيام اثنين وخميس وكان بدها اتنقب!
طبعا ابنها غالبا ما بيعلق ع كلامها
بطلت اقعد معها بس تكون عنا بالبيت لاني حساسة وما بتحمل الاشخاص الفظين وخاصة لو كانت شخصية متسلطة وفظة
كنت بس اطلع مشاوير برا البيت مع خطيبي
مثلا اذا طعميتو بإيدي متل ما بيطعميني قال إنتي بتطعميني متل إمي!
مرة عصبت وقلت إن شاءالله اموت قال بتمنى تموتي ساجدة انتي وإمي!
طلبت اشيا خاصة وبديهية واساسية للعرس قال فكرتك زاهدة متل إمي!
كنت احكي معو بالليل لان بالنهار مشغولة دايما فالهيئة امه ما عجبها وفجأة صار يعطيني دروس عن اهمية النوم ساعات الليل مع انه هوي يلي اخترع قصة الحكي بالليل!
ما جبلي شي يوم كتب الكتاب ولا قبله ولا بعده ولا حتى حلويات ولا امه حتى! واهلي يلي جابوا الحلويات وقت العقد.. لكن بستحي احكي انو امه جابتلي اشيا ما بعرف اوصفها والله بالنسبة لهدايا عروس وبمناسبة عقد القران.. جابتلي تياب مستعملة حلق مستعمل وعليه بقع اخضر وابيض يعني خربان وساعه مستعملة واقلام مستعملة تجميعات حاطيتهن بمحفظة اقلام كمان مستعملة ولكن للامانه في بعض الاغراض باكياسها لكنها ايضا قديمه لانها ستوكات قديمة تباع بالاسواق الشعبية
والغريب كانت بكل وقاحة تحكي لوالدتي خلي الشاب يلبسها .. قصدها الحلق المستعمل والساعه.. الله المستعان.. حابة تحس انو ابنها بيلبسني طقم دهب زي باقي العرسان بس بهالقطعتين الخردة!
كل مرة بتطلب مني اقيس الملابس وانا مش متحملة ريحتهن ومستعملين كيف بدي البسهن!
وهالحكي كله قدام ابو الشباب وهوي مبسوط بأمه وتصرفاته وكأنها ملاك من السما ما عملت ولا موقف خارج حدود الذوق والعرف العام
كنت اتساءل هل عنجد هني مش منتبهين ع تصرفاتهن او بخلا او حابين يوفروا او شو؟؟!
طلعت معه اكتر من مرة بالسيارة و عطوووول بالسيارة .. ولا مرة نزلت من السيارة ولا مرة عزمني ع مطعم .. الا مكان واحد هوي بيحبه محل اشيا باردة وبيطلب من السيارة
للامانه كان يسأل اي حجم بطلب كنت اطلب الصغير وهوي يجيب اكبر حجم حتى يعطي الباقي لامه.. توفير؟؟! ما بعرف
فتحنا مرة موعد العرس واتفقت الحماه يلي ماخدة دور الكل رجال ونسوان
وقالت بدا العرس بتاريخ كذا وكان جدا قريب وانا مش جاهزة.. فقلت عن مزح بس ليه ما حدا سألني؟ قالت انتي ما دخلك!
لما اكتشفت ابنها بينقل الامور الخاصة وكل شي
رحت مزحت معه قدامها رسالة غير مباشرة إلها وقلتلو مش حرام يلي بيفسد وشديتو من دينيه .. قلي والله هيي يلي حلفتني! قلتو بس الرسول صلى الله وسلم نهى عن نقل الامور الخاصة وحرام عليك! وهيي كانت بس بتتبادل النظرات معه ولا حكت ولا كلمة وهيك اغلب الوقت بوجودهن مع بعض ومعي
كان بغيابها يعاملني منيح بس ما يعصب الا اذا ذكرت المادة وبوجودها يتمسخر ويعلق علي ومن هالحكي!
في البداية وقت العقد اهلي ما ذكروا اي شي عن المادة ولا طلبوا شي وقللوا المهر جداااا وانا قبلت بناء على انهن رح يكرموني
فما ذكرنا لا دهب ولا فستان ولا عرس ولا عشا ولا اي شي
و ذكرت من قبل انو حتى حلويات وقت العقد ما جاب هوي وإمو!
قرب موعد العرس ونحنا ساكتين
وإمو كل فترة تتصل وتسأل جهزت البنت واهلي يحكوا لا
وحماتي عاملة حالا انو مش فاهمة لان الكسوة عليهن وخاصة انو المهر قليل جدا ونحنا قللناه كمهر بس ع اساس الكسوة من العريس لان المهر ما بيشتري اصلا غير فستان زفاف عادي
والشيخ قال المهر للبنت تتصرف فيه كيف ما بدها مش مجبورة تشتري منه وخاصة اذا ما في اي اتفاق انها تجيب من المهر كذا وكذا
المهم طلب مني ابو الشباب اجهز قلتلو بس تيجي إن شاءالله
ووعدني بس يجي يشتريلي كسوة عروس عادية
بس اجا وبعد انتظار طويل بيقول إمي بتقول ما الك كسوة! اهم شي إمو وكأنه كلامها قرآن
طلبت نشتري فستان قال طيب اديه بعد بدك ما حددت شي قلت بس تيجي منشتري سوا
قال تاني يوم إمي بتقول رفيقتها عندا واحد! اولا نقل كلام وما بيعرف يتصرف بالامور يلي بتخصنا بيني وبينه يعني لما يفتح بيت رح يضل يقول إمي قالت وإمي بتقول!
قلتلو ما بدي مستعمل.. مش ملاحظين كل شي مستعمل؟!
سألت حماتي المتسلطة, بدي اعمل عرس او لا؟ سبحان الله انصدمت إني بدي اعمل عرس وكأني اول وحدة بطلب هيك, قالت اعملو حفلة صغيرة بالبيت! يعني لا حفلة وقت عقد القران ولا حفلة عرس! كنت احكي لأيمتى مسلسل التوفير رح يضل ماشي هيك؟!
اهلي اصروا اعمل حفلة, اجت حتى ما تطلع خسرانه قالت طيب بس منعملها إلها بالصالة وابني بالمسجد.. طبعا توفير مش اكتر! قال فرحة عمر قال!!!
اهلي وافقو وانا حزينه بعد كل هالصبر يصير فيي هيك!
نقلت حماتي لمحاولة التوفير التانية.. قالت متساءلة.. إن شاءالله بدكن عشا؟؟! بعاداتنا وعاداتهن في عشا.. يعني كلها ليلة بالعمر مش كل يوم او كل سنه!
اهلي قالوا ايه بدون تبذير قالت إيه لاااا ما في عشا
قالوا اهلي طيب كيك! ارتاحت حماتي تقريبا محاولة التوفير زبطت!
بعدين عرفت انها مش طالع من نفسا تعملي عرس وخاصة عشا لان محينة تصرف قرش وخاصة حسب كلامها مافي حدا من طرف العريس ياكل!
بخل؟!
بالنسبة للدهب كمان عند حماتي مافي وبس اهلي اصروا فكرتنا من النوع يلي طلبنا دهب كرمال كلام الناس او نتباهى فيه.. فقالت بعيرها دهبي بالعرس! الدهب يلي استعملتو اكتر من تلاتين سنه!!
ومرة قلي بالنسبة لتجهيز البيت ولا يهمك ما رح تفوتي عالبيت ويكون ناقص شي! انا من طيبتي صدقت!
بس زارنا بعد فترة بيقلي انتي مملكتك بس غرفة النوم! والباقي مش من حقك تختاري , وانا جبتلك غراض المطبخ. انا انصدمت وقلتلو شو عرفك انو مملكتي بس غرفة النوم..ممكن احب المطبخ اكتر.. الخ ورفضت غراض المبطخ ومن هون لهون عرفت انو كمان مستعملين وستوكات قديمة! في صدمة اكتر من هيك! قلتلو انا مستعدة اشتري غراض جدا بسيطة ورخيصة ولا اقبل بهالاغراض
المهم إمو الظالمة بعدين قالت وكأنها هيي زوجي بتقول ما في عندي غير غرفة نوم وإنو ما من حقي اختار شي تاني وحقي بس غرفة النوم!
ما حدا يجي يقلي انو منعرف يلي بيخاف الله من خلال لبسه الشرعي او صيام اثنين وخميس او نقاب او لحية.. هالكلام مش صحيح.. يلي بيخاف الله ما بيظلم ولا بيكذب ولا بيفتري ولا بيبخل او بياكل حق الناس!
المهم المفاوضات على امور العرس يلي ذكرتا اخر مرة كانت بجلسة وحدة
وخلال هالجلسة واخيرا حماتي ام قلب ابيض طلعت السم يلي بقلبها ونطقت
قالت إنو كل شي وإلو سعره وانا مش بنت 22 او 25 حتى اطلب! لو بتخاف الله بتحكي هالحكي! وكأنها بتعيب على زواج أم المؤمنين خديجة رضي الله عنها بس بطريقة غير مباشرة!
قالت كمان ابنها قادر ياخد وحدة صغيرة! وهالحكي مش صحيح وابنها بنفسه قلي فرصي قليلة وما وحدة عم تقبل فيي!
قالت جمالي متواضع! تتذكروا لما قلت قالت عني حلوة وابنها كان طاير فيي ومش مصدق .. بس سبحان الله بس قربت على المادة صرت امنا الغولة!
قالت مش كل شي قرآن ونحكي بدع وما بدع.. الكفار يلي بيطلبوا!
صرت كافرة لاني يا اخوات طلبت شي بسيط وبديهي فستان وعرس وكسوة عادية!
ابنها بسبب هالطلبات وعدم تنازلي عنها قلي ما كنت عارفك متعلقة بالدنيا!
سبحان الله مع اني نادرا ما اروح السوق الا لحاجة ولا بصرف على الامور التافهة وما همي المظاهر بس كل ما في الامر بدي حقي الطبيعي
حسسوني إني طلبت احجز شهر العسل بأوروبا واسكن بقصر واشتري تيابي من فرنسا واعمل عرسي بنص البحر!
ممكن حدا يفهمني وين الحق لان شككوني بحالي؟
هيي باختصار بتحاول تقول إنتي مش صغيرة ولا حلوة بنظري وابني ممكن ياخد احسن فلهيك تنازلي عن كل شي لان مش من حقك بهالعمر تفرحي متل باقي البنات.. طبعا نسفت كل شي اسمه حق وعدل واخلاق
طبعا ابنها بخيل وما بيصرف غير الضروري جدا فلهيك هوي ساكت بكل الوقت وهيي عم بتفاوض على المال لكنه طيب وحنون ومتفهم بس بشرط ابعد عن المصاري والمادة
انا محتارة هيي قلبت علي عشان الطلبات البديهية يلي ذكرتا فوق او لان كنت احكي لابنها(يلي طبعا بينقلها كل كلامي) انو ما بدي امك تعرف بخصوصياتنا وانو ما بقبل تتركني كل النهار وتقضيه مع امك بس لانها متعلقة فيك؟
لان هيي قالت لو كل ولادي موجودين وخطيبك موجود ما رح اطلب غير من خطيبك
كانت تغار مني حتى اذا مجرد حاولت امسك جواله!
كانت بدا نسكن بشقة مباشرة قدام شقتها
من خلال تعاملي وكلامي معها حسيت يقينا لولا ما بدا تشوف حفيدها من ابنها يلي متعلقة فيه ما كانت رح تزوجه ابدا! وهاد سبب تهديدها انو اذا ما صار شي تاني يوم من العرس رح تشكيني لعمي! وهاد سبب عجلتها بموعد العرس!
المهم بعد رفضهن يعطوني حقي يعني الاشيا الاساسية للعرس والكسوة ورفضه يطمني انو رح يعطيني حقي( لانه قال رح يسمحلي بس بقطعة تياب وحدة بالشهر ومرة وحدة اكل بمطعم) بعد الزواج لانه كان شايف انو امه واخته واهله اولى مني بالنفقة وبكل شي وانا بس للعلاقة الخاصة هالشي حسيتو وانتو عارفين انو الرجل قوام بالنفقة كمان!
فإذا قبلت وتنازلت عن امور العرس كيف رح اضمن حقوقي العادية بعد الزواج واهله بيستغلوا طيبته وهوي شايف انو هني اولى ومتعلق بامه وهيي متعلقه فيه
يعني حتى ما جمّع مصاري للزواج وكان كتير يعصب بس اسأله وين كنت تروح بمعاشك يعني الك فترة طويلة تدور على وحدة تقبل فيك! بس اهله كتير كانوا استغلالية امه تاخد مبالغ منه وابوه يرفض يرجعها
وكله اجا براسي يعني عشان اثبت اني فعلا ملتزمة وما بحب الدنيا لازم ارضى بالموجود وبالبخل واهله يكملو مسلسل الاستغلال
المستجدات شبه الاخيرة
اني اخر مرة شفت امه بكيت وصرخت بوجها وهوي كمان وقلت انا بنسحب وقلتلو انت ما بتستاهلني وخلي التوفير ينفعكن
بنفس الليلة بعتلي انو كل شي بينحل بالهدوء إن شاءالله بس وقت قعدتي معه ومع امه كان ع طول ساكت وهيي المتحدث الوحيد
فضلوا يحاولوا يصالحوني وهيي اعتذرت بس سمعت من ناس انها رجعت تحكي علي نفس الكلام واكتر يعني اعتذارها كان بس لارجع
وضليت رافضة كل ما اتذكر كيف جرحوني بالكلام وانا ابكي كلما اتذكر كيف صبرت كل عمري وعفيت حالي واخترت الملتزم حتى ربي يعوضني فيه لكن تسلط حماتي وتعلقها بابنها واعتبارها اني ضرتها مش كنتها وضعف شخصية خطيبي وبخله كان كله عائق
اصريت على الطلاق وتطلقت وبنفس يوم الطلاق طلب مني ارجع رفضت لاني مجروجه مش قادرة انسى كيف قعدوا سنة يقنعوني بانو العمر عادي والرسول صلى الله عليه وسلم تزوج اكبر منه بسنين .. ولما وصل الموضوع للمادة صاروا يقللوا من قيمتي بس عشان ارضى واتنازل
يعني عشان اوافق عليه كان عمري عادي.. بس طلبت حقي صار عمري عار علي ولازم اقبل بأي شي لان عمري ما بيسمحلي اطلب ذرة!
شفت اكتر من رؤيا إنو اجا يرجعني واني ركبت معو بالسيارة وانا ما عم بقبل حدا هلأ خايفة ما انساه وانا ما برضى حدا يرتبط فيي وهوي بيفكر بطليقته فما برضاه لغيري
انا ارتحتلو وهوي حنون وكان لين معي بس امه واخته كلمتهن ماشية
وعيوبه الابرز شي هيي البخل ونقل الكلام وبيسمع كلام امه واخته خاصة وعيلته عامة باللي بيخص حياتنا وامه متعلقة فيه كتير
حتى بسبب ظلمها والحزن يلي سببتلي هوي رجعت انتكست حالتي بعد ما ربنا اكرمني ووصلت لمرحلة متقدمة من الشفا والحمدلله على كل حال
هل بتنصحوني ابعت وسيط يحكيلو انو نرجع لبعض او لا؟ مش عارفة اقرر وكل يوم بستخير
سامحوني طولت كتير بالكتابة وبدون تنسيق بس مستعجلة ومضطرة
__________________
[CENTER]
سبحان الله و الحمدلله و لا إله إلا الله و الله أكبر
سبحان الله العظيم وبحمد..اللهم صل على محمد وعلى آله وصحبه وسلم[/CENTER]
13-04-2016, 10:42 PM
ضوابط المشاركة
العرض المتطور