السلام عليكم ورحمه الله وبركاته

بقولكم قصتي ، من خلال قصتي ابا منكم اشياء ، اولا الدعاء لي وله الله يرضى عليكم 💔😭، هل هو يستحقني ؟ هل قصرت معاه ؟ وتسرعت في قراري ؟ هل غلطت باخبار اهلي ؟ هل كان صادق بحبه لي ؟ نصايحكم؟ هل ممكن انساه؟ هل ممكن يتوب توبه نصوحه وارجعله ؟ هل ممكن ابوي يوافق ان يرجعني معنى معارض؟ هل لي فرصه للزواج ؟ وربي ابكي بكاء واخاف من الضياع وابغي ابقى نفس ما كنت واحسن ! والله مشتته ابغاه مرات اكرها ومرات ابكي على حالي مطلقه .

والحمدلله متوفقه فالدراسه ومن الناجحين اللهم لك الحمد، ملتزمه دينيا و اخلاقيا الحمدلله ، مشهود لي بالحياء والخجل، وكذلك الحمدلله بشهاده الجميع وبشهاده نفسي جميله الحمدلله من ناحيه الشكل والجسم والطول وما ينقصني اي شي ، مده ملكتي اربع شهور ، وزواجي المده الي كنت عند زوجي هيه تقريبا خمس شهور ،توني داخله 22 سنه

- بدايه كان عمري 20 سنه وعلى اعتاب التخرج من الجامعه باقيلي سنه على التخرج وكانو يتقدمولي خطاب لكن الرفض ياتي من اهلي لانهم يبونه ملتزم وغيره ، و يوم وصلت 20 تقدم لي شخص من طرف احد معارفي يبحث عن فتاه تساعده على الدين وتكون ملتزمه لانه توا بادي الالتزام وقع الاختيار على عايلتنا وقبل لا يتقدمون امي قالتلي صلي استخاره و صليت ، وجو يخطبوني ، وفي وقت الخطبه والله لو تشوفون اهله كيف فرحانيين حتى امي تقول كان ودها عمته الكبيره تحطك فكيس وتشلك معاها ، لكن بنت هالحرمه كانت معارضه وبسميها مثلا نوره اتقول لامي لا تستعجلين واطلبي مبلغ كبير ، لان والحمدلله سمعت عائلتي طيبه والفضل من الله وكذلك ما ينقصنا جمال واخلاق وقالوها فوقت الخطبه شو يبغى اكثر من كذا جمال واخلاق وحياء ودين ، وشوي عرفنا ان اهو توا تايب ويبغي احد يساعده ابوي ما سال عن قبل توبته قال ربي رحيم و تواب ليش اروح وانبش ماضيه وكان بعتقادنا مغازل وطيش شباب واذا تطور الامر دخان ، وانا فهالفتره قلت خلني ادور اكاونته فانستغرام وانا ادور حصلته وشفت الي محطنه بالعكس اشياء حلوه ودينيه لكن يوم شفت الفلورز ضاق صدري ناس ما تخاف الله بنات متفصخات وغيره قلت معليش اهو تايب وممكن نسى يسويلهم انفولو ورح استر عليه وانسى ولا اذكره وفعلا نسيتهم والله كنت ادع ربي له بالثبات واني انسى كل شي ، وكنت فالسجود اقول يارب تحببني فيه وتحببه فيني، و سال يعني بس الجميع بدون استثناء مدحوا اخلاقه و حتى ما شا الله فالنظره كان صايم ، يعني بالمختصر انسان يصوم و يصلي و ملتزم و متبع الرسول عليه الصلاه والسلام في شكله ولبسه ، وامي اصرت تعرف هل يتواصل مع اهل امه رحمه الله عليها لان اهلها سمعتهم سيئه و قالو لنا لا ما يحبونهم ، وفالشوفه الشرعيه حسيت براحه مب طبيعيه وانا انسانه يعني ما ارتاح لاي احد ، اما اهو سبحان الله مثل ماي بارد انصب علي معني كنت خايفه واصيح فالنظره من الحياء ، ومشت اموري وتيسرت بشكل عجيب وملكنا ، و حتى ما طلبت شي حتى مهري خمس الالف لان ابوي قال لي ولهم بنتي ما تكفيها فلوس الدنيا والفلوس لا تقدم ولا تاخر وانا اشتري الرجال مب هو الي يشتري بنتي، والحمدلله ما ينقصنا شي حالتنا الماديه عاليه، وكان يبغي ييسر و ما طلب اي فلس الي يقدرون عليه يعطوني للشبكه و لتجهيز و بصراحه ما قصروا عطوني مبلغ وقدره وما تشرطت فالقاعه وغيره وكذلك سولي فمكان محترم وحلو وكاشخ ، كنت استحي منه بشكل مب طبيعي ، وكان يزورني فالويكند فقط و يكلمني يوميا في ساعه معينه بسبب شغله لان ممنوع ، اما الويكند يتواصل معاي بشكل مستمر لو عنده شباب يكلمني بصيغه مذكر ، لان نظام شغله ينزل الويكند و محجوز طول الاسبوع ، المهم استمرينا حلوين ثلاثه شهور ما قصر فالهدايا وراعي ذوق يعني فالعيد في رمضان لازم يدخل البيت بهديه للعائله وانسان لبق بشكل يخليك تنحرج منه ، لكن كنت خجوله بمعنى الكلمه ما شفت وجهه طول الملكه من الحياء و من يدخل البيت عندنا ارجف من فوق لين تحت، ومستحيل اتصل عليه مع اني احبه لكن حيائي يمنعني انتظر اتصاله و ارد على طول لكن اكون مبادره مستحيل كنت اتمنى بس حيائي يمنعني ، طبعا كان واضح اعرف جياته وروحاته وهو كان يترجاني ان ابادر بالاتصال، و الله كان شكلي غير والكل يحسدنا ويتكلم عنا ، وبعد الثلاث تغير بدايتها يوم تجرات واتصلت عليه ، قالي سكري بعدين اتصل عليكي ، طبعا انحرجت وحتى اهو يتذكر الموقف ويقولي ان اهو حرجني ، المهم بعدها صار غامض ما اعرف عن جياته و انا اهملت هال شي وما جا فبالي لان كان جدا واضح يمشي مع انسان ما شاء الله عاقل و الكل يمدحه ، فكنت اظن خلاص معاه ، وكنت يوم يكلمني اساله وينك او شي يصرفني وانا ما انتبه امشيله، وبعدها يوعدني ان بيجي بيتنا بس يسحب علي وحتى اهلي شكو ان ما عاد يبغاني ، ابوي اتصل عليه قاله تباني اساعدك في شي مضايقك ، هل كنسلت ما تبغاها ، قال لا انا فلانه فعيني واحبها وما يتاجل العرس، لان حتى الي اسمها نوره جت بيتنا وسالتني انتي مستانسه فالملكه ، ليش ما تاجلين الزواج؟ و سكت ما رديت عليها وقبل العرس باسبوع اتصلت على امي قالت لها اجلي العرس ابوك ميت من فتره وغيره لكن امي رفضت وكانت تلح بشكل عجيب ان ناجل العرس ، لكن امي تقول قضاء وقدر والحداد ثلاثه ايام ومن البدعه ناجل العرس ، وفهالشهر وايد تغير فزياراته زارني تقريبا مره و حتى فالاتصال تغير مب زي اول و صار فاشل ينحجز فالدوام ، وكنت احسب ظلم مثل ما يقول ، لكن ضليت احبه واهو يعني احسه يحبني. لكن كنت من حياءي استحي ابارك له يوم مثلا اتخرج من العسكريه او مثلا استحي اقوله حياك البيت ، وفاخر اسبوع لا رد في اتصالته وزياده وكان متحمس لزواج ويباني اخطط معاه لسفر ، وتزوجنا والحمدلله و كنت سعيده في هذاك اليوم لكن الي اسمها نوره زعلانه حتى جت بعبايتها فقط وزعلانه وعمرها ما دعت لي


التكمله

، المهم استانسنا فالعرس والحمدلله انزفيت وكانت احلى لحظات عمري شعور حياء و بكاء وخوف وفرح والكل بدون مبالغه فرحان ويصفق لان ولله الحمد ما غلطت على احد و على نيتي ، انزف زوجي وتفاجات ان قاص لحيته وكذا معنى كان يطولها شوي قلت معليش يمكن حب يترتب للعرس ،وخلص العرس الحمدلله وركبت السياره وكانت امي تساعدني ، المهم نزلنا الفندق وكان ليله الجمعه صلينا وتعشينا واهو قام يوتر وغيره نمنا ،
ثاني يوم قمت الصبح صليت للاسف ما جاء فبالي احط لاذان الفجر متعوده ابوي وله امي يقوموني لصلاه قمت صليت وحاولت اقومه ما طاع رجعت تعدلت وجهزت وحاولت اقومه ابدا و بعدها صلاه الظهر جمعه وانا والله فيني بكاء مب متعوده الي حولي ياخرون الصلاه حاولت فيه بس ابدا تلفونه يرن بس اهو نايم امي اتصلت علي حبيبتي تبارك لي وقالت لي متى بتين عندنا عشان انزل الفستان ومسوين لنا عشا قتلها خلاص بشوف وبرد عليج حاولت فيه بعد وقام
وقلتله روح صل و صلى الفجر والظهر بعدين اذن العصر وصلى وبعديها قالي بنزل السياره اجيب غرض قلت اوكي وهو راجع شميت فيه ريحه دخان قلت لا يمكن كان واقف مع احد لان مستحيل اهو ملتزم كيف بيدخن ؟ المهم بعدين نزلنا عند امي اهو قالي بمر بيتنا اجيب غرض وبرجع قتله تمام والله عاطتنه الثقه لا اسال وينك او غيره ، امي حبيبتي عدلتني شوي عدلت استشواري وسوتلي فير وعدلت الميكب وكشختني ،
المهم وهي تعدلني تضحك معاي وتوصيني عقب جابتلي سوال بمزح قالتلي ما شميتي فزوجك ريحه دخان انا انقبض صدري قلت لا ليش يدخن قالت لا امزح معاج وكملت ضحك وانا تميت افكر وربطت سوال امي بريحته ، المهم ردينا الفندق وباجر كان السفر رجعت شنطه العرس و شلت شنطه السفر ، ورجعنا الفندق وهو بصراحه رحيم جدا معاي ، المهم صباح اليوم الثاني اهو نام وما قام الا متاخر ، و
ما بقى شي ع الطياره انا جالسه من زمان اتسبحت وتمكيجت واجهزت للسفر المهم قمنا ورحنا ، وهو مستعجل عند المطار سوينا حادث ، وابوه اخذ اوراقه وكملو التخطيط ، وسافرنا فالطياره طول الوقت نايم وانا جالسه بروحي وخايفه وصلنا الدوله وركبنا السياره ورحنا الفندق ونمنا ثاني يوم عادي نزلنا فطرنا رجعنا فوق قالي بروح اشوف الي تحت وراح وكان طول السفره يقولي مثلا انتي تجهزي او استشوري وانا بنزل برتب جدول الرحلات وغيره او اذا طلعنا يقولي بدخل الحمام وانا ادخل لان استحي اجلس برع ،
وهو بس ادخل الحمام يطلع من الحمام ويخليني وكنت استحي اساله ليش ! واكثر عن مره يخليني في مصلى المول وهو يروح والله اجلس ساعه بروحي وما معي جوال واحس اني بصيح بعدين يقولي ضيعت او شي ثاني المهم الين ما جاء هذاك اليوم تركني فالفندق الساعه 9 مارجع الا الساعه 12 وانا ابكي ما معي رقمه او تلفون ، فكلمت الرسبشن كيف اتصل على خط دولي وسالتها شفتي زوجي قالت لا بس شفته يوم طلع ولحد الان ما رجع ،
وانا قلت رح اتصل ع اهلي واقول لهم اتصلو ع رقم زوجي الدولي وشوفوه بخير او لا وبعد نص ساعه برجع اتصل عليكم عشان اطمنوني ، وجيت احاول بس ما نفع اتصلت عليها مره ثانيه وانا ابكي وهي تهديني وبهال اللحظه اسمع صوت الباب يدق سكرت فويهاا و شفته جدامي طحت فحظنه اصيح وقلتله ما تتركني ابدا وقالي وعد وانا احظنه شميت فيه ريحه دخان قوي قلت يمكن من التكسي ،
المهم بعدين اكتشفت انا لا يوم يتركني يرجع في ريحه دخان وانا كنت اتعمد يوم اشوف حد يدخن اقوله انا ما احب الدخان واكرها وهو احس ويهه يتغير ، المهم بعدين حصلت عنده الشيشه الالكترونيه هنا ستوب خلاص بنهار اتاكدت صح كنت استانس هناك بس من اذكر انه يدخن اضيق واتيلي صيحه كرهت السفره معنى حنون لكن خلاص ,
وفطياره انا نمت وهو شغل فلم والفلم كله مقاطع وصخه و هو يحسبني نايمه و اذا جا مقطع خايس يعيده و كرهت نفسي زياده فيني صيحه ما قدرت اكل شي ، المهم رديت البلاد وخاطري اروح اضم امي حضنتها بعدين دخلت عند اختي بكيت وقتلها ان زوجي يدخن حبيبتي هدتني ، انا قلت لازم اطلق ما ابيه يدخن كلمت ابوي و عصب علي قالي تتطلقين عشان دخان ادعيله وانصحيه بشكل غير مباشر
تميت ادعيله المهم كان باقي للعيد اسبوع بضبط وطول هالفتره يتركني بيت ابوي ويطلع ما يرد الا متاخر والله ولا كاني عروس معني جميله رشيقه اتعدل اتمكيج البس اطبخله اجهزله قهوه وحلى لكن ياكل بسرعه بسرعه ويطلع ،ومحد جبره ع العرس في شوفه وكل شي ، او نروح نتعشى بسرعه بسرعه ويردني البيت واهو يرد يطلع ، المهم في يوم اتاخر جدا يوم وصل كان يعري وقالي مسوي حادث ودخل الحمام يمكن ثلاث ساعات وانا نمت وقمت واهو بعده بعدين حلمت فيه ان بالحمام ويخبي حبوب فالشنطه،
المهم فزيت ودقيت عليه الباب ما يرد علي ، حاولت رد بس حسيت انه مب طبيعي سكران او غيره انا بكيت وقالي لا تخافين انا طبعي كذا انام فالحمام ، سكت وادعي الله وحسيت ان ما يصلي وصلنا ليوم عرفه كنت احس ان يمثل انه صيام وسكت جا العيد عيدنا حتى اخذتله هديه وهو ولا ع البال وحتى ما عبرني ما قالي كاشخه او شي ولا سوالي سالفه ، المهم فليل تركني فبيت ابوي وراح طلع ما رد اتصلت عليه قالي جاي قريب ان كثر خمس دقايق
بعدين بديت اتصل عليه واهو ولا على البال ما يرد خفت قلت اكيد سوا حادث وكان مستخدم سياره ابوي المهم انا خفت اذن الفجر واهو مايرد قومت ابوي لصلاه وقلتله السالفه قالي انا وانا رايح المسجد

التكمله

بدوره فالفريج المهم حصله نايم بسياره عند البيت وعاه وقاله ادخل البيت نام ، وابوي رجع من البيت متضايق فيه بكاء قالي روحي نامي وارتاحي رحت نمت وكنا ع اساس نروح منطقه ثانيه نبات وكذا ،المهم جهزت شنطتي وكان يوم الجمعه تاخر ع الصلاه وقلتله روح صل بس ما في حسيت ان ما بيصلي اتاخر علي ورجع وطلعنا المهم وصلنا للمنطقه ما نزلني مسيد و صليت العصر والمغرب مع بعض وجتلي بكا اول مره اسويها وهو حسيت ان يمثل ان يصلي المهم وقالي تجهزي بنطلع انا رحت اتعدل وغيره واهو راح حسيت انه ياكل حبوب شي لان اسمع صوت علبه دواء بعدين اشوفه يشرب ماي هنا خفت طلعنا احسه مصطل وابوي كل شوي يتصل يطمن علينا بعدين فليل ابوه اتصل عليه وقاله ارجع البيت رجعنا وكنسلنا الحجز
طلع ابوي مكتشف ان معاه حبوب وحصل في سيارته ابره وامي يوم سالتني ان يدخن لانها شمت في سيارته ، جلسو معاه و قال ابغى اتعالج بالعكس ابوي ساعده و قام اهو وعمي يدورن له مركز للعلاج دخل مركز وتم يسال عنه و كذا ورجعوني له ، يوم رجعوني له بكيت حسيت ان شي ضاع ورجعلي قتله اوعدني ما تتركني مره ثانيه،قالي وعد ، وزجة ابوه تقول يوم فارقك ابوها حس ان ولده بيموت بس يصيح ويبغاني، اول شهر كان تعبان بسبه الاعراض الانسحابيه و الله كنت ارحمه وادعيله ويعور قلبي وما قصرت معاه طبخ وغيره واجهزه بعدين شفت ان يحط لايكات ع مقاطع وصخه هنا انهرت بكيت قلتله طلقني قالي انتي صاحيه ع اشياء زي كذا تطلبي طلاق لو واجهتي شي كبير شو بتسوين
طبعا انا كرهته ما صرت اتقرب منه وكل ما اذكر ان يسوي جي اكرها حاول يراضيني حجز فندق و رحنا نتمشى و نسيت الي صار وخفيت حياء قلت حرام اكيد يدور ع اشيا لان ناقصنه ، كنت اذا حلمت بشي اقوم واحصل بعد فتره نفس الشي جدامي سبحان الله كان ربي ينذرني ، بعدين صح كان يرحمني و ما يحب يشوفني ابكي بس كل يتركني وكله ع التلفون و بدينا مره ثانيه وقمت اشك فيه شل شعارات الواتساب وتلفونه عليه باسورد و ما اعرفه ،
المهم تغير رد يطلع وغيره وشفت عنده شي بودره وانهرت و قلتله شو ها انكر ان من الخرابيط ، كناديره محروقه ومخرمه ، جيوبه في لون بني مثل الكوفي وريحته نتنه ، وخلاص تعبت نفسيا قتله اثبتلي انك صاحي قال ان شا الله ، وانا لقطت باسورده فهذيك الفتره بس استحي امسك التلفون ، طبعا يخليني بيت اهله ويطلع و ولا يهتم فيني الصلاه يجمعها حلفتله اذا ما عتدل هالاسبوع انا بطلق منه وقالي ماله داعي و غيره،
ثاني يوم كان الجمعه قمت قبله مسكت تلفونه وحصلت بلاوي يطلب اشياء يكلم بنات فرحت صورت التلفون وبكيت وتركت التلفون مكانه وقومته لصلاه حسيت ان هذي اخر لحظه معاه ، فعلا راح عند ابوه وما عرف شو الي صار ابوه حس ان مب طبيعي بعدين الولد هرب قالولنا بس كيف هرب ؟ البيت كله مقفل بحديد ؟ حسيت ان احد هربه من اهله لان عمي كان يبغى ينادي مكافحه المخدرات ، و انا انهرت انهيار ابوي راح يدوره فالفريج بس مافي فليل زوجه ابوه اتصلت علي وقالت رد البيت وطبعا انا كرهته قلت لابوي بطلق قالي صلي استخاره ، المهم صليت و بعدين فليل قام يتصل علي تقريبا 40 مره وانا ابكي وخايفه منه ، المهم بدوا باجرات الطلاق ، وانا طول الفتره تعبانه،
بس سبحان الله كانت تتاخر ، اهله دخلوه يتعالج ، رحت العمره ورديت من العمره مرضت اسبوع كامل وابوي اهمل الطلاق عشاني تقريبا مره شهر ونص ع السالفه بعدين يوم شفيت زوجي اتصل على ابوي وقاله ابا اكلمك، ابوي قاله ان شا الله باجر ، حاول يكلمني بس ما رديت عليه ، ابوي حس ان تايب و كذا قالي الي شافه و قالي بيسون شروط اذا بترجعين وربي وكل شروط لصالحه ما طلبت حتى نص درهم شروطي كانت شقه مستقله و يترك التدخين واصحاب السوء تلفون واحد ومن حقي افتشه فلوسه تنزل في حساب ابوه نكمل الجامعه يحفظ قران وهذي بس والله وثقناها فالمحكمه و المصلح قاله ما طلبت لها شي واحد حافظ عليها ، انا وافقت لاني احبه ومتعلقه فيه ،
المهم رجعت له قالي اوعدج وغيره و حسيت ان يحبني ما ادري هل مجرد ان متعلق فيني المهم عشت معاه اجمل شهرين بحياتي قسم بالله ، ما يتركني كل معاي تعلقت فيه حسيته ابوي اخوي حبيبي زوجي لكن قبل باسبوع بدا يتغير فجئه طلع وسوا حادث و طلع ان كان مب صاحي ، رجع البيت انا انقهرت صحت عشانه وربي كان مثل طفل ادخله الحمام اطلعه الحفه باللحاف ،
بعدين ثاني يوم احسيت اني منبوذه محتاجه حظن محتاجه حنان اتصلت لابوي وقلتله شلني ابغي اروح الجامعه وزوجي ما عنده سياره جا وشلني وخبرته، ابوي قالي مافي رجعه ترجيته سكت ، بعدين ابوي وافق وكلم زوجي وقاله بسوي الي تبونه قاله كون واضح اتصل ترد اسالك وينك عطول تجاوب المهم يوم الخميس كنت برجعله طول اليوم نتصل والحبيب ما يرد و رجع البيت متاخر وانا رحت اتحنى له وكنت فرحانه عشان برجع ،
لكن اهو رفض قال باجر بشلها ابوي عصب وقال هذا فيه شي مب طبيعي ، المهم ابوي قال لا ما بتاخذها الا يوم اتاكد طبعا اهو قام يماطل ولا يسوي فحوصات واحاول والله مره وحده في ابوي وابوي قاله خلاص بس ابغي واحد كبير يحكم فيما بينا ، وبعدين في يوم تاخر ع البيت وانا خفت عليه كلمت اخته شفتيه قالتلي لا المهم ثاني يوم كلمتني وقالتلي اهو قايل ان شارب و انهرت كلمته بكاء بحرقه وحلف وقالي بروح افحص و راح لمنطقه بعيده عشان يثبت لهم لان فالمستشفى هذا في فحص سريع لكن كان مسكر وبكرا بيفتح و قال خلاص بكرا اروح ورد البيت وثاني يوم ابوي وصله ان يشرب وقال بروحله واخليه يعطيني التلفون وانتي شوفي من مكالمته او رسايل اذا كان في شي غلط لكن اهو رفض يقول تحسبت ان عمي اهو الي بيشوفه لان اليوم الي قبله مصورلي صوره واستحى ، و صاح صياح لان ابوي قاله الي بينك وبينا انتهى ، وبعدها ما سوا شي ، ويرجع متاخر فزاد الطين بله وناس تقول لحد اهذاك الوقت يشرب فابوي رفض حاولت فيه بكيت انذبحت انضربت عشان اردله لكن امي وابوي رفضوا وهو بالمقابل يطلع ولا يسال فيني ويوم اقىله تبيني او لا يقولي والله ما تركج ما اقدر اعيش بدونج ، اقول سوا كذا بس يكتفي بان شاء الله ،
وبعدين خلاص قام حتى ما يسال عني وانا الحق وراه وطلقني فشهر اربعه لان ابوي قالي ياما اهلج او اهو واذا رحتي متبري منج انسيني ، فطلبت الطلاق وطلقني ع طول حاولت فيه قلتله سو كذا وكذا ما سوا شي باعني بعدين قالي تركت البلاوي وانا تايب لكن ما حاول يردني كسرني. في يوم ابوي عصب واتصل على ابوه وقال ولدك يطلق بنتي وما حاول ع طول اشلو الولد وامه بحكم شغلها مشت الامور وطلقتني سكاتي، عشان مكانتها الاجتماعيه ما تروح فالمحكمه ؟ وصل ورقتي في يوم كتب كتاب اختي ،
اختي توقع وانا ابكي، وحطوا فالملف انهم متصلين علي بس انا ما رديت و مغيرين سبب الطلاق كاتبين مشاكل اي مشاكل وقسم بالله ما بينا اي مشاكل لا تعارض ولا هم يحزنون حياتنا بدون الحبوب مثل الفل ، وبعدها واحد من اهلي قالي شفته مع مغربيه فعيد الحب وهو يقول حرام ويسوي عمره مطوع ، ومره شفت فيديو منزلينه بالغلط مع وحده وانا وربي مب مقصره بنظافه او بالملابس او بالجمال او بالرشاقه و يخوني ، ومن بعدها تركني معني فالعده حتى مسج شحالج مافي قبل ما يطرش ورقتي قالي انتبهي ع روحج وانا الي خسرتج ما استهلج قتله ليش اذا بتتركني اذا تحبني قالي والله عشان اهلج و يبون مصلحتج واهم اهم مني وكان يبكي بكاء يعورالقلب ،
بعدين انتشر خبر طلاقي جتلي هالنوره لحد البيت تباركلي بالطلاق واول مره اشوفها اتسلم علي كذا فهنا قلت اهم كانو يدرون بسالفه المخدرات بس خبوها علي وظلموني ؟ ليش يظلموني مب كان اولى يعطونه بنت عمه ؟ ليش يبلشوني ؟ ليش كذبو علي ان اهو ما يتواصل مع اهل امه رحمه الله عليها ؟ ومعنى امي سالت اذا يتواصل اول ؟ وكان الرد لا وانا اشوف اكثر من تواصل بينهم ؟

بعدين سمعت ان كان يبغي يحط محامي عشان يردني بس اخته رفضت قالت بنت ناس ما بترضاها ، و راح العمره وبعدها مره وحده جا للبيت بيعطي ابوي هديه عشان تخرج اخوي لكن ابوي رفض الهديه ورفض دخلته للبيت قاله عمي انا تبت ابوي قاله لنفسك وجزاك الله خير ، وبعدين كلمت ابوي ليش استعجلتو بطلاقي وانا اصيح ابوي قالي خلي الدذنب الي اقترفه اهو الي باعج وما حاول ولحد اليوم ما حاول يردج ، لكن رسايله كلها يبغاني و يصيح اذا كلمته ، وحلف ما ياخذ غيري ، لكن شو ينفعني الكلام ؟ انا شو اذنبت انا ضحيت عشانك رضيت بكل شي رضيت بغرفه صغيره رضيت اني مشتته عشانك ، انا وقفت دراستي عشان اعيشك مثل اي معرس ، قسم بالله ملابسه عادي اغسلهم بيدي اكويله كناديره وكل شي
اتحدى اذا في يوم دخل علي وكنت مب مرتبه و له ريحتي طبخ او غيره او شعري منكوش. والله اكون لابسه ثوب ويوم يرجع يشوفني بثوب ثاني ، اذا انا كنت جاده فموضوع اني اشوف وراه وافتشه بس من خوفي وله بالاول ما كنت اشوف تلفونه حتى ما اسال وين راح او دخل لان الموضوع كبير الموضوع حشيش وحبوب ، باعني بارخص شي وانا صبرت و وقفت معاه وهو ما حاول وربي لو كنت مكانه لو اتقطع بس ما اخسر زوجتي ، اهله ابوه شل ايده ويقولي انتي مثل بنتي ما وقف معاي حتى الحين ما يسالون فيني الا اخته تعايدني وبين فتره تسال عني ،
غيره زوجته تغلط عليه ويلحق وراها و يطلب السماح وانا الي ما ذنبت جي يسوي فيني ، قسم بالله النوم ما انامه ودموعي كل ع ويهي واحس بحرارتها و الكل يسال عن شكلي ليه كذا ،
ذبحني كسرني اخذني بنت الكل يتمناني ورماني جي حتى سامحيني ما طلب اسامحه معني وربي مسامحته فكل سجده ادعيلي وادعيله بالعوض ، اخ وربي ما توقعت يسويها فيني ، كان ودي رمضان معاه كان ودي العيد معاه بس باعني قالي ما بتركج لو شو ماصار وفي اقل شي تركني ورضخ للامر الواقع وانهى كل شي ما حاول فابوي مره مرتين ثلاث اربع ، والله يوم اخذ شي اقول المفروض كان جنبي ، ادعولي بان الله يربط على قلبي ويعوضني فالداريين وادعوله بالثبات والهدايه ، والله ما اقدر انساه لان كان رحيم معاي جدامي يحبني وما يقصر علي الي اباه يوصل عمره ما رفع صوته عليه حسسني اني اميره لكن من وراي ، علقني فيه 😭😭اخ اادعولي

وهذي نهايه قصتي اهو اخترب بعد الملكه فالشهر الاخير تعرف على ناس ما تخاف الله وردوه للماضي ورجع لااخواله وما خلوه في حاله خلوه يرد لماضيه، وانا اكتشفت ان كان له ماضي من خلال الواتساب الي عنده مخزن رساله القديمه ، ابغي منكم حلول دعاء توني مخلصه العده ما ادري شو اسوي افكر فعقلي اقول احسن لكن احنله ودموعي ع خدي وربي

واشكركم على الموقع الاكثر من رائع والله يبارك لكم يارب ويسر امركم

ماكملت موضوعك للأمانة بس لو بترجعين تحملي كل يوم يجيك يطوطح ، تحملي خيانات ، تحملي مشاكل ، تحملي ضرب ، إنسي تعيشين حياة طبيعية زي الناس لعلمك أنا كنت زوجة مدمن ، أهلك صح ويبون مصلحتك لو تزوجتي إنسان عاقل بتحسين بالفرق بتحسين إنك آدمية وتستحقين حياة أفضل ، لاتأسفين عليه إذا يبيك يتغير ويترك المدينة اللي هو فيها ويغير مجتمعه والناس اللي حوله أما الكلام والدموع ماتقدم ولا تأخر الله يعوضك خير

__________________

وبدأت تحدي إنقاص الوزن الهدف إن شاء الله 55 كيلو

والله ماأدري شقول لك الحمدلله على ماقضاه ربي ،،،!
لعل الامر خيره لك ، وعسى ان تحبوا شيئا وهو شرا لكم ...
هو الي اخسرك انتي بالعكس ماخسرتيه انتي استفدتي من هالتجريه حتى لو كانت قاسيه لكن الخير قدامك بإذن الله ، وربي بيعوضك خير منه ، الاهم غيري من نفسك ولاتستسلمي ابداً وانتي ماشاء الله عليك يبين عليك بنت صالحه وملتزمه وتعرفين ربك ، وكل مايختاره ربي لك خير وراح تعرفين هذا بعدين ......!

__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي

مع رأي الأخت..

موضع مؤلم جدا كان الله في عونك.. كل الحق على أهله..

الحمد لله يا أختي أنك ما حملتي ..
ولا كيف بتربين عيالك وسط هالأجواء
أنت أعطيتيه بدل الفرصة فرصتين وثلاث .. ومع ذلك ماتعدل!!
الله يشفيه ويعافيه مما ابتلاه
بس لاااااازم تحكمين عقلك زين
وتطوين هالصفحة ولا تخلين عاطفتك تأثر عليك
وتسألين الله العوض
ورحي اقري في قصص زوجات المدمنين وحالاتهم مع عيالهم
شيء لايحتمل ..
الحمد لله اللي نجاك ، والقادم أجمل بإذن الله .

__________________
أستغفر الله وأتوب إليه✨

الله يعوضج خير حبيبتي
هذي خيرة لج .. وانتي ماشاء الله
عليك كلمن يتمناك صلي قيام الليل وطلبي من الله
أن يفتح لج أبواب الخير

مرة صادفت وحدة قصتها مثلج
وقفت مع زوجها للعلاج سنوات طويلة

وقالت لي كانت تحبسه وتحرمه
من الحبوب وكان يتعذب ولكن للاسف
تقول من بعد هالصبر والعلاج كلما كان يتحسن يرجع لحالته
ووصلت به المواصيل انه بدا يتحرش في بنات الناس
اعتذر عن هالكلمة ولكن للتنبيه