السلام عليكم ورحمة الله

انا ياجماعة الخير لسى ماكملت شهر من طلاقي وقبل طلاقي تركني عند اهلي أربعة شهور شهرين كنت انا عند اهلي عشان ولادتي والشهر الثالث دخلت بخلاف معاه والرابع كان الطلاق اللي هو هذا الشهر
قبل طلاقي كان مقصر بالمصروف الشهري مع انا متفقين ع مبلغ معين لكن ماعمره ارسله كامل ولا يرسله الا بعد الحاح مني
امس مع الرواتب حولي المبلغ كامل الصباح بدري على غير العادة انا اعتبره الان نفقه لطفلي هذا اول نفقه بعد الطلاق فما ادري اذا راح يستمر على هالشي ولا لا
انا ناويه ارفع عليه قضية نفقه وراضيه باللي يحكم فيه القاضي لو كان 200 الريال ابي نفقة الولد تنزل دايركت
لكن الى الآن لم احصل على صك الطلاق افكر اكلم اخوي يطلب منه يخلص الصك واحيانا اقول لسى بدري ماادري يا جماعة الخير هل اطلبه الان ولا لا ؟


علما اني الحمدلله وضعي المادي ممتاز واخواني مو مقصرين معي بشي نهائيا ولا امي لكن استحيت والله منهم صح ماصار لي شهر لكن كل واحد يعطيني ويحول لي مبلغ وقدره حتى لما تعب ولدي والله حسّيت انه ولدهم كل واحد يبي ياخذه لمستشفى احسن وكل واحد ينصحني بدكتور ويعرض علي خدماته واتصالاتهم ما انقطعت من لما عرفو وبما اني لسى طالبة جامعية وجامعتي في منطقة طليقي وفرو لي سواق وسيارة وكل شي الله يخليهم لي ولا يحرمهم الأجر

اذا تفكرين بالصلح وترك خط رجعه لكِ

لاتطلبينه

__________________
اللهم ألهمني الرشد

عزيزي لا تسبقي الأحداث ، اذا في بالك رجعه اصبري واذا خلاص م عاد تبين ترجعين
قولي حق اخوك يتصل ويسالو عن الصك اذا فعلا اثبت الطلاق او لا

اهلين حبيبتي ممكن تحويله لك المبلغ مؤشر انه يفكر يرجعك فعلشان كذا اصبري
وثاني شي لاتدخلين معه ع طول بشر وقضايا لانه راح يعاندك
اصبري شوي شوفي وش وراه
الله ييسرلك ياحبيبتي وكلنا بعد الطلاق كذا اهلنا يقولون فينا هه👐🏻
فتره وبعدين ينسونا🌚
مااحطمك بس هذا واقع

ليش ماتنقلين لجامعه قريبه من اهلك
اذا باقي كثير لك بالجامعه
والصك اصبري عليه لمن تخلصين العدة
باقي لك شهرين

لا تستعجلين الصك ..
خلي خط رجعه بينك وبين طليقك ..

-اطلبي الصك بعد انتهاء العدة الشرعية بمدة زمنية.
-أنتِ في فترة العدة يعني ما زلتِ زوجته شرعاً لم تخرجي من ذمته ما دام الطلاق بينونة صغرى.
-لو طلبته الآن فأنتِ تغلقين الباب بينكما.
-لعل الله يحدث بعد ذلك أمراً.

يارب كلامك مايصير واقع لي
بالنسبة لي ف اهلي كانو بعد زواجي مايقصرون ولو على مصروف طليقي ماقدرت اوفر احتياجاتي
انا اخر العنقود ومن صغري كنت المدللاه بالبيت لي اخوة من ولدي كبار عايشين بمناطق مختلفة وماقصرو معي لا ماديا ولا معنويا
واخواني من امي من صغري وانا مدللاه ويمكن سبب مشاكلي مع زوجي الدلال الزائد واخواني من امي مستكثرني عليه وكأنو سبب بالبداية انهم يخلوني اتركه
عموما كل هذا ماضي
الحمدلله ورثت من ابي ورث لا بأس به واهم شي اني املك شقة خاصة فيني احس البيت آمان بالنسبة لي ولولدي اذا كبر
وبالنسبة لرجعه مااظن فيه امكانيه لرجعه لان شروطي مااظن بيقدر يوفرها ف سكرت على الموضوع نهائيا

هذا اخر مستوى لي بالجامعه واتخرج إن شاء الله
عرضو علي اهلي النقل لكن رفضت بسبب اني مرتاحة بجامعتي وأساتذتي وزميلاتي وكلها أربعة أشهر و اتخرج بأذن الله

اذا عرف السبب بطل العجب الله يعوض علية بزوجة
الصالحة .. ورقة الطلاق ما تاخذ اكثر من 24 ساعة
ومن حقك طلبها ومن حقة استخراج صك زيارة لابنة

__________________
سبحان الله وبحمده سبحان الله العظيم