بدخل بالموضوع على طول

طبعا انا ماابي اذكر قصة طلاقي

ولكن بوضح لكم بعض الامور

عشان ابيكم تنصحوني من قلب

اولا وبكل صراحه انا مرا احبه وولدي مرا متعلق فيه
ومااتخيل نفسي نهائيا اعيش مع غيره

وصح انه سبب طلاقنا منه هو غدر فيني

ولكن انا بلحظتها ماخليت له فرصه حتى يدافع عن نفسه
فوقتها الله يلوم اللي يلومني
لاني فعلا انصدمت وكان شي لايصدق
يعني اعترف انه ردة فعلي كانت قويه ولكن بطريقه جدا خطىء

وغير كذا طول فتره هجره لي
كنت اسوي اشياء فعلا لما افكر فيها الحين مااصدق اني سويتها
كنت ارسل له مسجات سب وادعي عليه
واهدده اني بحرمه من ولده واني بفضحك
واني برفع عليك قضايا وانا يعلم الله اني مستحيل اسويها
بس من قهري كيف قدر يغدر فيني

وعلى كل اللي ارسله له
مايرد نهائي علي

وكنت اجلس عند اهلي شهر
وارجع بيتي
وفعلا كان اذا رجعنا البيت يهجره وماادري ايش السبب
بس الله حق كان يجيب لنا كل المقاضي
ولكن مانشوفه واذا رجع يدخل المجلس ويسكر عليه
كان رافض يشوف وجهي ويتصدد عني
والى يومكم مو عارفه السبب

مرا اقول يمكن مستحي يناظر فيني
بعد مااكتشفت غدره وعلما باني كنت قايمه بكل
واجباتي اتجاهه

ومرا اقول يمكن صدق كرهني ومو طايقني

وصراحه كل ماارجع ذيك الايام لبيتي على اساس بصبر
واتحمل اجلس تقريبا 3اسابيع شهر بالكثير
وانقهر على انه هجرني بدون سبب مني
الغلطه منه
ارجع واسوي اشياء افضع من اللي قبل كردة فعل
يعني مثلا
مره جمعت كل اغراضه بشنطه
وحطيتها عند باب البيت
وارسلت له رساله دامك مو داري عننا
ولاحتى تنام فبيتك فهذي اغراضك خذها لانها مالها لزمه

ادري تصرفي غلط
ولكن كنت بوقتها اموووووت من القهر وربي
يعني يجلس باليومين ثلاث ماندري نهائي عنه
ولا يرد على مكالماتي
ويجي عند الباب عشان ياخذ ولده
ويكون لابس لبس جديد وانا بصراحه ماقدرت اتحمل

ونفس الشي اصبر واشوف هجره لي
وارجع واشيل اغراضي وارجع بيت اهلي
واجلس تقريبا شهر عندهم اريح نفسيتي
وارجع بيتي من نفسي للأسف

المهم اخر مرا جبت نقل وشلت كل اثاث البيت
لان تمادى صار بالاسبوع مانشوفه
ولاندري حتى وينه فيه
مع العلم الاثاث انا اللي شاريته بفلوسي
فااتوقع من ابسط حقوقي اشيله
من القهر اللي شفته

المهم بعد هالمره الاخيره
طلبت من اخوي يكلمه ويقول خلاص طلقها

ويقول ابشر مالك الا اللي يرضيكم
ويتهرب ننتظر اسبوع اسبوعين شهر شهرين
لاهو اللي طلق
ولاهو اللي جا مثل الرجال ويصالح
وجلس فتره طويله ماطلق
ألين اصرينه عليه راح له اخوي لين داومه ويقول
ان شاءالله ويسحب

وبعدها انا قلت لااخوي خلاص دامه ماطلق
معناته اكيد انه يبيني
لاعد تقوله شي ابصبر
وصرت هالايام كل ماانقهر واتذكر اللي سواه فيني
ارسل له رسايل طويله عريضه كل انواع الدعاوي
والسب فيها

وفجأه والله مادريت بعدها بفتره
الا انه طلقني وحتى ماعطانا خبر بالطلاق
عرفته بالصدفه
وارسلت له اول ماعرفت ليش

ارسل لي يعلم الله انه ماودي ولكن تجنبا للمشاكل
وتراها طلقه وحده بس

هنا صراحه انا انقهرت زياده
يعني كل اللي ابيه منه بس يبين لي انه ندمان
على اللي سواه فيني
ومستعده والله اعطيه روحي ان بغاها

المهم رضيت بقضاء الله واحمده على كل حال

وبعد ماخلصت عده
نهائي ماعد نتراسل الا عن ولده فقط
لان الان مايربطني فيه الا كأب لولدي

والله حق مايقصر نهائي كل ماطلبته شي
قال ابشري ماشاءالله الله يخليه لولده ان شاءالله

والمصروف اول باول يرسله
وكل ماارسلت له تعال خذ ولدك اليوم الفلاني جا

وبصراحه انا الان مرا ندمانه على اشياء
كنت اسويها معه مرا كانت غلط
اسلوبي كان زفت وتوني استوعب هالغلط للأسف
وماكان احد ينصحني
والله على الغدر اللي جاني منه
بس كان حبيب وطيب ومايقصر بشي قبل مااكتشف وساخته

تمنيتني ساكته ولا واجهته

عاد هالأيام مدري وش يطري علي
احس ودي ارسل له
ولاحد يقول لي مايجوز
لان ربي عالم انه نيتي من الرساله اننا نرجع لبعض
واتعدل واغير من نفسي

ولا ااقدر اقول لاهلي
لاني متأكده ميه بالميه بيقولون وش تبين فيه
ومن هالكلام

بس لو هو فعلا يبيني انا ابقدر اقنعهم وقتها

واحيانا اقول لا لا ارسل
احس كرامتي بتروح وكيف بستمر معه
وانا اللي راسله له وهو اللي غلطان بحقي

ومع العلم اهله في العدة
الله واعلم اذا هم سعو بالاصلاح وانا ماادري
ولكن لا مكالمه ولا رساله جتني منهم
وكانت علاقتي فيهم ممتازه
ففعلا استغربت ردة فعلهم

وانا من يوم تطلقت
وانا صايره اشوف وش يحط بتويتر
طبعا اتابعه من غير مايدري
وماادري ليه احسه يتابعني
مدري اتوهم والا صدق والا احلم
وينزل تغريدات انه ندم وانه مشتاق
حتى مدري والله ان كانه يقصدني فيها

بس هو بطبعه من اول كتوم ولا يتكلم
ولو يشوف الموت مايعتذر للأنسان اللي اسلوبه وسخ

وانا طبعا رسايلي اللي كنت ارسلها حدث ولاحرج

من الاخر انا ندمانه مرا
كان انسان خيالي معه احس انا اللي خليته يوصل
لغدره فيني
احس اني تماديت باسلوبي معه
وكنت واثقه لدرجه انه كان يمزح معه يقول تخيلي
اتزوج مسيار اقول اتحداك متخيلين !!!
لهالدرجه كنت واثقه فيه وانه مستحيل بيقدر يجرحني

والحين اقول ليتها جت ع المسيار
بس الحمدلله على كل حال والله يهدي الجميع

وش تنصحوني
انا مرا تغيرت واحس الطلاق فعلا كسرني
وغير فيني اشياء كثيره

ارسل له او لا؟

احس انا وولدي في حاجه له بعد الله
والله احس يكفيني يكون موجود بحياتي
حتى لو يبي يهجرني لاني فعلا احبه للأسف
يكفيني بس اشوفه بخير
حتى لو يبي ينام بالمجلس
ولا اتخيل نفسي نهائي مع رجل غيره¨

مستجدات الرد24

http://66n.com/forums/showpost.php?p...9&postcount=24



مستجدات الرد 32

http://66n.com/forums/showpost.php?p...6&postcount=32

__________________
أم لأجمل طفل 👦🏻
ماشاءالله لاحول ولاقوة إلا بالله
اللهم متعني ببره في حياتي

جلد للذات وبحث عن أعذار لخيانته

إذا بيترك الخيانة ارسلي له
إذا راضيه يخونك ويهجرك ويغيب بالايام وينام بالمجلس وقبلتي بالواقع مقابل حسناته اللي ذكرتيها ارسلي له

لكن شيلي من بالك تغيرينه ماراح تقدرين
مثل هذا مايتوب إلى مايكتشف أهل بيته يحصل لهم مافعل مع بنات الناس

والأمر لك

ياأختي انتِ مو كاتبه الموضوع لأرسال رساله لطليقك انتِ كاتبه الموضوع للفضفضه وواضح من سرد كلامك ...!

__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي

ليه انتي ضعيفه كذا ، يعني خاين عارفه وش يعني خاين وعادي عندك حتى لو رجعتي ماراح ترتاحي بتبعبي وبتطلقين منه
اتعبي الحين احسن لك والطلاق مصير الكسر ينجبر
ولا تتعللين ف ولدك ، يكفي انتي عنده ترا ياما اطفال عاشت من دون اب وصاروا ماشاءالله ب اعلى المراتب
يعتبرك انتي والولد مثل الكنبه عنده ف البيت
اذا انخطبتي وافقي احب انسان كسرني وخاني سلامات
ب العكس لما يكون بعيد تربين ولدك لحالك
الحين مو زي قبل اقدر اقولك عادي جدا الام الحين تقوم ف كلشيء واسم ان الزوج موجود ف كيف لو حصل طلاق
اتركي الرهان كلها من الشيطان ذي

ارسلي له ، كم لكم على طلاقكم ؟

__________________
وهل من مصير اخر ؟

مرحباً أختي

رجعت لمواضيعك ولازلت لا أعلم ماهو الغدر الذي حصل لكِ

ومن خلال كلامك في ردودك المختلفة واضح حبك له وتعلقك به ومسامحتك له

لذلك ... جربي أختي وأرسلي بإستعدادك للوجوع له من أجله ومن أجل إبنكم .. وأنتِ لست خسرانة فإما سيوافق وإما سيرفض .. والفائدة أنك بعدها على وضوح من أمرك بعدم إنتظار أمل رجوعه في حالة عدم موافقته .. وإن شاء الله أن إرسالك للرسالة لن يمس كرامتك بشئ


والله أعلم

كيف ننصح من قلب ونحن مانعرف قصة طلاقك ؟

استخيري قبل إرسال الرساله الله يفرج همك ويصلح زوجك

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

ليش ماتتواصلين مع ام زوجك وجدة ولدك وتسألين عن أحوالها وعن عماته يمكن أمه تخليه يرجعك
قال تعالى( " ولا تنسوا الفضل بينكم ")

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

لا يا أختي لاترسلين له ..
أذكر حاولتي الإصلاح وركبتي السيارة لما أخذ ابنك وقالك انزلي ..

ومافيه أي بادرة ندم أو محاولة رجوع صدرت منه..

معليش صبر شهور وتنسينه ولا صبر العمر كله بهالإهانة والهجران

والله يعوضك يارب بالقريب العاجل باللي يصونك وبهتم بك وبولدك

__________________
أستغفر الله وأتوب إليه✨