السلام عليكم
أنا بنت فوق العشرين بسنوات قليلة ربنا أنعم عليا بنعم كثيرة من فضله طول حياتى من أسرة كويسة لمستوى مادى محمود لتفوق فى دراستى دايماً
أنا الآن خلصت كليتى و هى كلية قمة زي ما بيقولوا و الحمد لله و بتفوق و بدأت فى استكمال الدراسات العليا
أحسب أنى على خلق حميد و لى أصدقاء كثير.. أساعد غيرى دايما ً و الكل بيلجأ لى لو محتاج مساعدة و ده فضل من ربنا ..
لبسى مش حقدر أقول انه الصح 100% لكن أنا بلبس جيبات فقط و دايما حاجات واسعة و حجابى سليم
الصلاة بحافظ عليها و بدأت من اكتر من سنة بدافعى منى مش إجباراً أذهب لحلقات تحفيظ قرآن و مازلت مستمرة الحمد لله
الكل يشهد لى بالأخلاق و بالأدب و بالدين لكن أنا فى نظر نفسى منافقة إن مكنتش كده فعلا
و السبب فى كده
زمااان من حوالى 10 سنين قبل حتى ما أبلغ و أفهم أى حاجة كنت بمارس العادة السرية و أدخلت جسم صلب أكتر من مرة
من بعد ما بلغت و فهمت بعدها.. من حوالى 9 سنين و إلى يومنا هذا و أنا الحمد لله تبت عن كل ده
لكن من جوايا أنا أبداً مش ببقى مرتاحة نفسياً خاصة الآن و أنا فى سن زواج .. أكيد الدنيا بمشاغلها سواء دراستى أو شغلى أو عائلتى أو أى مشوار بنزله بينسينى الموضوع ده لكن مجرد ما أقعد لوحدى أفكر أو كل يوم قبل ما أنام لازم اقعد افكر ف الموضوع ده و حعمل ايه لو اتقدم لى حد

مش حقدر أقول لوالدى أو والدتى لإن اه طبعاً حقع من نظرهم زي ما أنا وقعت من نظر نفسى من زمان لكن الأدهى إنهم حيلوموا نفسهم حيعتقدوا إنهم هم السبب و إنهم ما أحسنوش تربيتى و حشيلهم هم أكتر فوق هموم الدنيا خاصة إن أخواتى كلهم تزوجوا و أنا المتبقية فى حين إن الخطأ كان منى أنا وحدى خطأ طفلة مش فاهمة حاجة و عندها فضول

أنا مش عارفة الصراحة أنا ليه فكرت اكتب هنا الكلام ده رغم إنى عمر ما قلته لحد غير لنفسى مرات و مرات يمكن أعتقدت إن لما أقول اللى جوايا حيخف من نفسيتى شوية ...

أنا بدعى ربنا فى كل صلة " اللهم أسترنى فوق الأرض و تحت الأرض و يوم العرض عليك"
بدعى ربنا انه يكفينى و يكفى أهلى شر فضيحة ابقى أنا السبب فيها و هم اللى الناس كلها بتحبهم و تشهد لهم بالخير و الأخلاق و الدين
بدعى إن ربنا يغفر لى و يسامحنى
بدعى أن ربِ اشرح لى صدرى و يسر لى أمرى
بدعى و انا بسترجع حديث ( أنا عند حسن ظنى عبدى بى)
بس دايما قلقانة و خايفة

فالأهم من تعليقاتكم أنا طالبة دعواتكم .. افتكرونى بدعوة بظهر الغيب و ادعولى بالمغفرة و بالستر
و جزاكم الله خيراً