هل ما اعاني منه دليل قسوة !؟
السلام عليكم
مدري هل هالموضوع في مكانه الصحيح او لا واحترت وش اختار عنوان له
ودي افضفض واستفسر لو احد عنده فكرة او اجابة لسؤالي بالاخير
يمكن كثير مثلي بس انا اثر فيني كلام امي لما ولدت بمولوتي الاولى ونشف الحليب نوعا ما مني وطلعت غير بنات العايلة فقالت امي ترا قلبك قاسي
انا مش دفاعا عن نفسي لكن جد كنت تعبانة ولا اشتهيت الاكل كنت بقيصرية ما اقدر وكنت اقوم بشؤون بنتي والكل كان مهتم بالضيوف وانا صرت حتى الماي ودي فيه وممنوعه من الطلعة جاتني حالة اكتئاب وودي اولد ببيتي هالمرة بس امي راح تزعل وتتضايق مني وتقول انت مستغنية عنا
بس انا فعلا ارتاح ببيتي وفيني طبيعة ما ابين ألمي حتى في اعراض الولادة لو الجدار يتكلم والله ماتكلمت ولا اصرخ ولا ابكي
وهذي علتي !!!
من لما كنت صغيرة عانيت بحياتي كثير لدرجة ما اذكر ان ابوي وامي لهم وجود إلى وصل عمري 11 سنة الا كنت اذكره ان كنت انضرب بقوة من اخواني ولا ابكي
كنت اطلع من البيت بحكم ان عايشين في البادية كنت اطلع اتسلى مع الغنم ما ارجع عشان ماكنت ارتاح ببيتنا
المهم اذكر لما امي كانت تضربني تقول انا اضرب ......... (تشبيه بأحد الحيوانات )
انا ماكنت ابكي وتكسر علي الخيزران ما ابكي بس ساكته
لما تحلف تبي تضربنا على طول من تحلف اوقف لها عشان ماتحنث بحلفتها وتقوم تضربني ولا ابكي
لما اخوي من ابوي يضرب وما ادري ليش يضربني الا لان اختي شحنته علي بسبب اني رحت المزوعة واعطيت خضار من مزرعتنا لبيت خالتي ظنا مني ان شي حسن وراح اشكر عليه لان من باب الاحسان والصدقة وابوي حاطه صدقة يقوم يضربني اول ما ادخل البيت بخيزران ويكسرها علي وانا جامدة اموت من الالم ولا اتكلم ولا ادافع ولا ابكي .. وش اسميها
استمر بي الحال لين كبرت ودخلت الجامعة وانا بنفس الجمود تمر مواقف صعبة ما ابكي
القصد هنا ما ابكي عند الناس عشان مايشوفوا ضعفي
رابطة البكاء بالضعف وهالشي معطي عني فكرة اني قاسية
مر بي موقف بحياتي من اصعب المواقف وكنت بالسكن الداخلي وضليت متماسكة شهر وابين ان كل شي تمام ومن داخلي اتلاشى وانهار
اذكر مرة اخوي الكبير جاء يبدي علي تعليمات وكنت ساكته ولا اتكلم ولا ابرر موقفي شاف نفسه منتصر علي بالكلام مارديت ولا اهتميت حسيتني عشت تبلد عجيب في فترة من الفترات
مطلعة واقرأ كثير واعشق القراءة
صرت اكتب في الجرايد المحلية خواطر وقصص كلها حزن وتعب وخاتمة حزينة لدرجة ان احدى صديقاتي لما قرأت الاسم انصعقت قالت ليش كل كتاباتاتك حزينة ليش تقفليها بحزن قلت لها فترة وبنقطع عن الكتابة وفعلا انقطعت ما صرت اكتب شي
أحب الشعر واحب الشعر الحزين بعد
بيني وبين نفسي هشة ومافيني قوة
اذكر كم الكتمان اللي عشت فيه وتصارعت معه لكن ما طلعت بنتيجة
أكثر وحده من بين اخواني مطيعة لوالديني ماعمري تلفظت عليهم بشي بعكس اخواني
أمي تدري اني من داخلي لينه هينه واني احن وحده عليها ولو تطلب عيوني فدوة لها ما اذكر قالت لي معك وقلت لها والله لو ما معي تسلفت عشانها ما احب المشاكل ابدا لانها تعيدني لدوامة التعب وتبرير المواقف
رم هالشي امي دايم تكرر علي انتي قاسية ماتبكي
صرت لما اشوف احد يضرب احد ينخفض عندي الضغط واتعب
صار موقف انحطينا فيه انا واخواتي عن واحد من اخواني وزوجته وصار يسب ويلعن فينا
كل اخواتي يردوا ويبكوا الا انا ما احرك شي
والله لو يضربني ما بكيت
بعد ما تزوجت حسيتني داخله بصراع يا تصيب يا تخيب يله اجرب وش وضعي
صرت ألين بس يمكن هذا اخر حدود الالم لما اكون اعاني من شي بكايه ما يطلع بالشكل المريح ألقى فقط دموع تنساب بدون شهيق احس كتمة بقلبي وغصة واختناق ولا اعرف اعبر عن تعبي بالشكل الواضح
إلى اليوم نادمة اني انهرت في الفترة الاخيرة بسبب تسلط لسان اخوي علي وانا حامل وتعبانة جدا وكاتمة بقلبي وانهرت وصارت عندي حالة تشنج ماصرت احس بنفسي صرت الوم نفسي ليش انا بكيت وضعفت ووصلت حالتي للمشتشفى ودي هالموقف يتنسى تماما
وجود اخوي سبب لي ازمة نفسية وخاصة لما جيت ابسلم عليه مارد علي السلام قلت ماعليه وماصرت ابالي بس ماصرت ودي اشوفه ولا عمره احترمنا ولا بحياته قال لنا شي طيب ارهقنا بحياتنا ويبي يتسلط حتى بعد زواجنا يقول ودي لو ازواجهن يذلوهن بالله احد يتمنى لاخته العذاب !!
يالله
أدري كلامي ملخبط بس كان ودي اتكلم دام محد يعرفني
سؤالي هل هو دليل قسوة القلب ؟ هل يجب علي ان ابكي واعبر عن كل موقف عشان أكون انثى مثل ماهو معروف عن رقة النساء ؟
هل التراكمات لها سبب في وصولي لهالمرحلة
انتظر ارائكم
__________________
يا رب خاتمة حســنة ، وزلفى ، وحسن مآب ..
التعديل الأخير تم بواسطة بياض الديم ; 19-12-2016 الساعة 08:03 AM
19-12-2016, 07:53 AM
ضوابط المشاركة
العرض الشجري