السلام عليكم ورحمة الله وبركاته
اعزائي ببدأ بقول انه سبب كتابتي لموضوعي هو للفضفضة بحكم اني لااحب ان اتكلم
بشيء يخص مشاعري لاحد سواء الله سبحانه وتعالى ثم بالكتابه
لعل كلمة جميلة او نصيحة من احدكم تخفف عني
في البداية انا فتاة عمري 22 سنه ملكت من عمر 19 سنه وجلست
سنه كاملة مملكة وفي هذي الفترة زوجي ماكان كثير يكلمني الا نادراً جدا
عموماً مرت السنة وتزوجت وفي ليلة زواجي حصلت مشكلة تافهة وسبب المشكلة
اخت زوجي حسبي الله ونعم الوكيل فيها ، تنازلت عن حقي وقلت زوجي ماله ذنب في اخته وكبري عقلك وعديها علماً بأنه اخته عمرها 35 سنه يعني كبيره لكن الله يهديها اذتني بدون سبب بعدها دخلت الى الحياة الزوجية وفي بداية زواجي بدأ زوجي بالشك فيني او بالاصح يدور علي الزلة لدرجة يرسل علي رسايل من ارقام غريبة عشان يختبرني مع انه وقتها ماكنت فاهمه بس بعدين تأكدت انه هو تركت كل حساباتي في السوشل ميديا عشان ارضيه وعشان اثبت له انه ماعندي شي اخبيه عنه واترك له جوالي بدون باسوورد مع اني غير ملزمة بفعل هذا الشي بس سويته حفاظاً على بيتي ومع ذلك برضه جنني بشكه الزايد لدرجة لما اطلع معاه لمكان نرجع متخاصمين ويتهمني اني طالعت في رجل غيره ودائماً يلاحقني بنظراته عشان بيتأكد اني مااطالع بأحد في الشارع ، شايفين لاي درجة وصل شكه وحماقتة وظلمة ومع ذلك سكت بس اخر مشكلة هي اللي خلتني اتخذ قرار الطلاق نهائياً وهي انه كان بيمنعني عن دراستي ومايبغاني اكون انسانه ناجحه ومتفوقه واكون احسن منه في شي لذلك اهلي شجعوني على الطلاق والان انا عند اهلي من 9 شهور بعد زواج دام لمدة سنتين والان لازلت اتخذ اجراءات الطلاق في المحكة ,, فيه نقاط كثير ماذكرتها ومن ضمنها انه هوا انسان طيب لو اهله يتركوه في حاله لكنه انسان ضعيف شخصية ويسمع كلام اهله في كل شي لدرجة لما رحت عند اهلي لم يتصل ولم يسأل ولم يحاول الاصلاح بتاتاً وماحسسني بأهتمامة وانا مرره مجروحة على صغر سني بس واجهت مشاكل ماكنت اتوقع اني بواجهها في حياتي والان حتى بعد اتخاذي قرار الطلاق ألسنة اهله تلاحقني ويتكلمون عني عند الناس بأسوء الكلام وبأكذب الكلام لكن مااقول غير حسبي الله ونعم الوكيل ،، سؤال لو اعطيته فرصة وسامحتة تتوقعون يتعدل ولا ماراح يتغير علماً بأنه ماطلب مني السماح بس في المحكمة طلب الصلح ، اشيروني جزاكم الله خير واعطوني ارائكم ونقطة اخيرة ماعندي اطفال منه،،

وعليكم السلام ورحمه الله وبركاته ,
( وان يريدا اصلاحا يوفق الله بينهما )
( والصلح خير )
كل الامور الي ذكرتيها بزوجك اشوفها عادي وكل البيوت تعاني منها وقصت الغيرة قولي الحمدالله الانه ما دام فيه غيرة معنته فيه حب , بس عاد انتي حاولي انه ما يتمادى

نصيحه لا تسمعين كلام اهلك الانك انتي الي ح تعانين عشتي معه سنتين تري صعب انك تنسينه لا تقولين الي 9 شهور وانا بعيده عنه وضعي عادي لا بعد الطلاق الوضع مره صعب كنه مات بس جالسه تسمعين اخبارة , و تري حرام عمرك 19 وتاخذين لقب مطلقه ولا تقولين صغيرة والعمرقدامي طيب ليش ما تكونين صغيرة والحمدالله ناجحه في حياتك الزوجيه .
ادعي الله قولي يارب انا ابغي الصلح واسالك انك توفق بينا ,,,

انا كنت اتمنى اتزوج برجل يغير علي بس مو يشك فيني هذا اسمه شك مو غيره وانا في حيرة من امري صراحة وابوي يبغاني اتطلق لانه قل ادبه عليه وكان غير محترم معاه لا هو ولا اهله وماسعوا للصلح ابداً عشان كذا محتاره اخاف ارجع واندم واخاف اتطلق واندم ..

الشك انه يتهمكي اتهام , وانا ما اشوف انه اتهمكي

ما سعوا للصلح انا اشوفه انتي لي وصلتيها محاكم وهو صبر ولا طلق وطلب الصلح عند القاضي وصراحه طلبك لطلاق مرره غير مقنع يعني كان يميدكي تقنعيه بسلوبك ليش مانعكي تكملين
شوفي اغلبت الشباب لي ما يبغو حريمهم تكمل او تتوظف هو اولا يشوف انه قادر يغطي مسوليات البيت , اجار , مواد غذاية , ... وهذا ينقال له رجل عصامي , او رجل اسرة , وشي الثاني يخاف ان مرته تتركه او تستغني عنه مع مر السنين يعني من زاوية ثانيه الرجال يبي تكونين له العمر كله , انا الي اشوف انه المفروض كان انك تجلسي معه وتقنعيه يعني ايش السبب الي يخلك تمنعني , من ايش خايف , انا لو ملكت الدنيا كلها ماراح استغني عنك , ..... , ما اقصت انه ما احترم ابوكي ليتك توضحين كيف ما احترمه .

احس من داخلك لا تريدين الطلاق

السلام عليكم

كيف يعني ؟ هل كل مشاكلكم الي منها الشك والغيرة إلخ .. بسبب اهله ؟

يعني لو مافي اهل عادي ترجعي وتصير حياتك 10/10؟

انا ماوصلتها للمحاكم في يوم وليلة انا جلست عند اهلي 6 اشهر بدون لايرسل ولايسأل ولايتصل وبالنسبة انه انسان شايف نفسه قد المسؤولية ومايبغى زوجته تدرس ليش يتزوج انسانه متعلمة ويوافق على شروطها ، هذا اسمه ظلم وتحكم وتسلط مااشوفه مسؤولية نهائياً ، وبالنسبة لموضوع الشك، اتهمني لانه بس جالي اتصال من رقم غريب على قولته وفوق هذا واجهته وقلتله طيب اتصل على الرقم طيب ليش مارديت ومااعطاني اجوبه بس يلف ويدور لانه كذاااب ، ومااحترم ابوي قله كلام كله قلة ادب ومافيه اي احترام هذا اللي اقدر اقوله..

ممكن مااكون اتمنى الطلاق بس كل مااتذكر حياتي معاه اؤيد الطلاق 100٪‏

نععم ومنها موضوع دراستي ماكان عنده مشكله بس فجأة انقلب ومتأكدة السبب اهله ولو ارتاح منهم بتكون حياتي طبيعية ،،

لن اخوض معك في موضوع الطلاق ..
لكنني اود تنويهك و تنبيهك الى نقطة مهمة ...
وهي ان لا تسمي نفسك " مطلقة " و كأنه استنقاص من نفسك !
الطلاق امر يحدث حين الشقاق
وهو واجب في هذه الاخيرة ...
فان قدر الله لك ان تكوني مطلقة ، فلتعلمي انه خير لك ...
وان الله اراد لك من هذا الابلاء ، ما لا يمكنك تحقيقه من دونه ...
انا مطلقة بخلع ...
و لله الحمد اشعر بسعادة غامرة
اشعر و كأنني اعود الى حياة العزوبية الجميلة ، حياة الفرج و السعادة ...
سعيدة بنفسي و بكل شي حولي ..
و لا ارى في نفسي استنقاصا قط
بل اني ارى ان الله فتح لي بابا و فرصا للعيش السعيد ..
و لولا هذا الطلاق لما قدمت لي فرص الحياة ...
لا ينظر الله الى حالنا و لا اشكالنا و لا الواننا حينما يرزقنا ....ابدا لا يفعل هذا ...
انما يرزق بتدبير من عنده ، لا لجمال و لا لشكل و لا لعلم و لا لعرق و لا لقبيلة و غيرها !
و بهذا فاني اعيش على آمال ، و اني على يقين بتحققها ...!
لذا ، لا تستنقصي نفسك ...
فانت هي انت ، لم ينقص منك شيء بالانفصال ...
هو فقط انفصال عن شريك ، لا غير
سيفرج الله علي و عليك يقينا ... لانه قانون الله في الحياة

__________________
أشهد أن لا إله إلا الله و أشهد أن محمدا رسول الله صلى الله عليه و سلم