للجميع شباب و بنات .. ما هي أكبر العقبات أمام ايجاد شريك حياتك ؟؟
هذه تجربتي ........
من الذي سيتزوج .. أنا أم أبي و أمي و عائلتي ؟؟
من أكبر المشاكل و العوائق التي يواجهها الشباب المقبلين على الزواج هي محاولة كل من الأب و الأم و الأقارب فرض بنات معينات كل من طرفه ...
على سبيل المثال خذوني أنا اخوكم ليوناردو .. طبعاً ما تعرفوني 
بعد ما تخرجت من الجامعة و توظفت أصبحت الأعين جميعها مسلطة علي .. سواءً أقاربي من طرف الوالد أو الوالدة ..
و النتيجة ضغوط مستمرة من الطرفين علي ..
و اكتشفت فيما بعد ان كل واحد منهم شغال سكيتي و بدون ما يعلم الثاني ..!
الوالد كل فترة يحن و يون : اشرايك يا ولدي في فلانة بنت فلان ..؟ (يركز دائماً على نفس البنت)
كنت أرد عليه دائماً بأنه و النعم فيها بس ما أبغاها و ما أحبها ..
طبعاً ما ذكرت له السبب الحقيقي و هو ان البنت لعوب و ما هي حقت زواج .. و أنا بنفسي صايدها كم مرة في مجمع الراشد لوحدها !! و أظن الشباب يعرفون جيداً ايش معنى انه بنت في ال18 جالسة تلف في مجمع مليء بالتماسيح المشفوحة لوحدها و بدون أب أو أخ أو أم أو حتى أخت ..!
الطامة الكبرى اني اكتشفت فيما بعد ان ابوي معطي كلمة لأبوها بعد ما شافها في احدى المناسبات و أعجب بجمالها الباهر و قال له ترى أبي فلانة لليوناردو ... و المصيبة الأكبر أن أخوكم في الله (اللي هو أنا) مسفوط على جنب و لم يفكر الوالد ياخذ رأيي في الموضوع .. بل لم يخبرني بأنه خطب البنت و أنا من أكتشفت ذلك بنفسي !!
طبعاً ما يبي لها ذكاء ... علاقتي مع الوالد بردت و تبلدت بعد موقفه الغريب هذا ..
و هو الله حق أحس بخطئه .. و حاول يرقعها بس للأسف بدل ما يكحهلها عمااااااااااااااها بقوة ...
فبعد بحث و تروي ... جائني و قال لي : لقيتها 00 لقيتها 00 لقيتها ... و الله هذي ما راح تلقى زيها ... هذي ملكة جمال الكون .. شرايك بفلانة ؟؟
عاد أنا رديت لا شعورياً : منهييييييييييييييييييييييييييييييييييييي .. اييييييييييييييييييييييييييييش !
يبه هذي ابليس بنفسه يرفض يتزوجها ..
صحيح حلوة مررررة ... بس ترى من جوى فاااااااااااااضية ... و لا يغرك الشكل تراها شيطان من شياطين ابليس في الأرض ... و ثلاثة أرباع الشباب مرقمينها .. و ما تستحي مرة .. غاسلة وجهها بمرق .. كيف ترضى يبه تزوج ابنك لوحدة ( .... ) استغفر الله !!
طبعاً لاحظتوا اني طلعت عن طوري و لا أنا مو عادتي أتكلم عن البنت .. حتى لو هي كذا أمدحها و أقول و النعم فيها من باب الستر ... بس اختيارات الوالد العجيبة و الفضيعة و تركيزه الدائم على شكل البنت مع اهمال أخلاقها و فكرها خلتني أنفجر و أطلع عن طوري ..!
عاد قلت لأبوي : شف يبه .. أنا خلاص انسدت نفسي ما أبغى أتزوج ... ما أبغى أتزوج .. خلااااااااااص ..
طبعاً أنا في داخلي أبغى أتزوج بس حبيت أطلع أبوي من السالفة مرة ... بالله عليكم تلوموني ؟
خلصنا من الوالد ...
طبعاً مثل ما ذكرت لكم سابقاً ان الوالدة شغالة بحث في نفس الوقت .. و سكيتي ... بل حتى سكيتي معي أنا نفسي صاحب الشأن !!
و يمكن ما تصدقوني اذا قلت لكم انه في أحد الأيام دقت علي وحدة من قريبات الوالدة و قالت لي : هااااااااه متى تبي تشوف البنت ؟؟
رديت : أي بنت ؟ وش السالفة ؟ .. ((طلعت أمي خاطبة لي وحدة و أنا ما أدري !!))
قلت للمرة : و الله و النعم في هالبنت و أنا أعتبرها زي اختي مو أكثر و أنا أصلاً ما أفكر في الزواج الحين .. ((بالعربي انسحبت من هالورطة بكل مثالية و دبلوماسية)) ..
لكن البنت المسكينة أكيد انصدمت هي و أهلها .. مو سهلة ان يتقدم أحد ليدها ثم يتراجع ... أكيد بيشكل صدمة للبنت ..
عاد رحت للوالدة و تخاصمنا و قلت لها كيف تخطبين لي بدون ما أدري .. و تراكي أحرجتيني .. و البنت المسكينة الحين مكسور خاطرها .. وش ذنبها .... الخ
و قلت لها نفس الكلام اللي قلته لأبوي عشان أطلعها من السالفة ..
بس طبعاً كلكم تعرفون صعب أن الشاب يطلع أمه من هالسالفة هذي بالذات .. و لذلك رديت لأمي بعدين و قلت لها يا يمة أنا أحترم رايك و أقدرك بس ترى أنا اللي أختار مو أنتي .. و هذا زواج مو لعب .. لازم يكون بناء على اقتناع و قبول كل من الطرفين بالآخر اقتناع تام .. ما يصلح شغل السكيتي ...
لازم أعرف البنت ... اخلاقها .. فكرها ... جمالها ..
و بعد ذلك أشوفها بنفسي و تشوفني ...
و بعدين أقرر أخطبها و لا لا ..
قالت لي أنا كنت أبغى أحجز لك البنت لا تطير ..
قلت لها أولاً هذي نعامة ما تطير ... و اذا طارت .. ايش المشكلة .. البنات ما شاء الله وش كثرهم و وش حلاتهم على قفى من يشيل ... و أنتي تعرفين ان اللي أحبها و ببالي من زمان طارت فما عاد تفرق معي
الحمد لله الوالدة استوعبت كلامي و تقوم بالبحث الآن و بشفافية كبيرة و حسب رغبتي ... و ان كنت لا زلت أعاني صعوبة في توصيل المواصفاة كاملة ... تذكرون سالفة الجزم الطايرة 
أعذروني على الاطالة .. بس حبيت أشرككم في تجربتي و أوصل رسالة للآباء و الأمهات بعدم الضغط على أبنائهم و بناتهم خصوصاً في مسألة مثل مسألة الزواج يجب أن تتم وفق قناعة و قبول تام من الطرفين حتى تستمر علاقتهم في المستقبل و لا تكلل بالطلاق و الذي لن يتحمل مسئوليته الا الزوجين ... فلماذا اذاً لا نحملهم المسئولية منذ البداية في اختيار شركاء حياتهم ؟؟
أتمنى أننا نشوف تجارب الاخوان و الاخوات ليتطلع عليها الجميع و يستفيدوا منها .......
__________________
صقر العروبة ... حبيب الشعب ..
ابو متعب سكن القلب
التعديل الأخير تم بواسطة LittleLulu ; 12-08-2005 الساعة 03:44 PM
12-08-2005, 02:19 PM
ضوابط المشاركة
العرض الشجري