السلام عليكم ورحمة الله وبركاته.

احب ان اقول ان هذا الموضوع كان احد الردود على موضوع في قسم المطلقات والارامل وحبيت انسقه وافرده بموضوع مستقل وانقله الى عالم المقبلين على الزواج لتعم الفائده>>>>>>>>>>>>>>>>>كاتب مخضرم

قبل ماحط شروطي احب اقول و انصح النساء ان الوحده تدرس خطيبها زين قبل لاتتهور وتتزوجه على طول ويصير ماهوب مضبوط فعندنا بالسعودية وخاصة في نجد اول مايسالون عن الصلاه اذا كان يصلي على طول يزوجونه وهذ خطأ كبير
فالوحده الي تبي تسال عن خطيبها لا تكتفي بالصلاه والصوم لان الصلاة والصوم اكثر الناس يادونها ولله الحمد ولكن لابد انها تسال عن التزامه بالدين من جميع النواحي بالاخلاق والمعاملة والعبادة وغيره لانه اذا كان ملتزم حقيقي راح يخاف الله بزوجته ويطبق السنه النبوية في معاملات الزوجات وتأمنه الزوجة من ملاحق البنات والغزل وغيره وتفتك من السهر والاستراحات وغيرها ودائما الملتزم تكون قعداته بالبيت واجد وفيه مثل عامي عندنا بنجد يقول (لاتاخذ الحرمه عقب مطوع ) كناية على انك ماراح تسعدها وتعاملها مثل المطوع
وطبعا هاذ الكلام ينطبق على الشاب الملتزم لله وليس على شاب ملتزم لمصلحة والا داخلن الدين عرض والا بس شكله شكل ملتزم وهو نجس فيجب ان تسالي عن خطيبك ومعاملته مع اهله .
واحرصي ايضا على الزوج الغيور على محارمه لان الغيور هو الي يحب اهله وبكره راح يجيك بنات فاذا ماكان ابوهم غيور على محارمه راح يخرب بناته.

نرجع لموضوعنا الرئيسي :.

فانا شاب ماتزوجت عمري 27 ملتزم ولله الحمد ماسمع اغاني والا اناظر تلفزيون باستثناءالاخبار وقناة المجد ومثقف وكل يوم امي تقولي شف بنت فلان وبنت فلان ولكن انا حاطن براسي شروط لفارسة الغفلة قصدي احلامي


شروطي:
1- تكون جميلة طبعا انا لازم اشوفها النظرة الشرعية.

2- تقدر الحياة الزوجية ونفسية زوجها ماهوب راعية طلبات وعلة يعني اذا شافتني داخلن البيت مهموم ماهوب تبلشني جب ود تضحي باشياء كثير لين الله يفرجها وتبشر بالي يسرها.

4-طبعا ابسال عنها اذا كان معها جوال خاص فيها وكاميره بعد.
ابشيلها من راسي من اول شي مع احترامي للاخوات الي معهن جوالات كاميره لكن انا نفسيتي ماتقبل وحده معها جوال فمابالك ابوكميره( لان هاذا دليل على ان البنت راعية موضة وتقلد البنات شافتهن معهن جوالات وابلشت اهلها وشرت جوال وايضا دليل على ان امها ماهي حازمة مع بناتها) هاذي وجهت نظري مالزم احد فيها.


5- اسال عن امها اذ هي حازمة مع بناتها وشديده فمعناه ان البنت راح تكون سنعة وماراح تتغير عليك كل ماوديتها لاهلها وايضا لان الام عديمة الهيبة يكونن بناتها اخلاقهن زفت غالبا وليس اكيد.

6-ان تكون مرحة وودودة وتهتم بنظافتها ونظافة البيت وعيالها بالمستقبل ماهوب تجلس بجنبي ريحتها ريحة بصل والا كشنة يعني تهتملي شوي وتلبس عندي ازين ثيابها وتخليني كل يوم احس انها ازين من اليوم الي قبله ( الله يطول بعمرك ياامي لها اثنعش سنه ماغيرت ثوبها ولا تفتش وجهها قدام ابوي الاقليل دايما تلبس برقع )

7-وابيها ماتستحي مني ابد يعني تعتبرني زوجها وابوها وامها واخوها وكل الناس يعني بالعربي ابي احس ان زوجتي تشعر وهي بجانبي بكل صفات الانوثة والحاجة للرجل وتحسسني برجولتي وقوامتي على النساء ...مابي حرمة خشنة علة وعوووبة لسانها يلوط اذانها تناظر فيك تقل تبي تذبحك .

8-صحيح ان كل امراة فيها عناد وكيد وعوابة لكن اسال الله ان يرزقني بوحده يكون عنادها وكيدها قليل .

9 -ابيها تعرف تطبخ وقد المسئولية اذا جوني ضيوف ماتفشلني وابيها تنوعلي بالطبخ ابشريلها كتب طبخ وكل يوم طبخة .

10- تكون ماهي راعية موضة واسواق كل شوي رايحة للسوق .مافيه روحه للسوق الا كل شهرين واي شي تبيه بين الشهرين تكتبه بورقة وانا اجيبة.

11-لازم تكون مثقفة وفاهمه كل شي بالزواج من الالف الى الياء ماتصير خبله وبعدين ابي وحده لسانها متعود على الكلام الطيب سواء بالرضا او الغضب وايضا اذا اخطأو اولادي تعاملهم بلباقه وكلام زين مثل الله يهديك والله يصلحك ...ماهوب تصير قشراء كل كلامها على عيالها تلعين ودعاوي .

12-اهم شي بحرمتي هو التدين الذاتي يعني متدينة ذاتيا ماهوب شافت زوجها ملتزم التزمت تقليد له بس لا ابي وحده تعيني على فعل الخير وتربي عيالي على الصلاح واذا نمت عن صلاة الفجر تقومني وتنهرني ماهوب اقوم الساعة 8 والقاها نايمة بجنبي شعرها داخلن بوسط فمي ابي وحده اتعاون انا واياها على حفظ القران تمسلكي وامسكلها وتحفظني اذا غبت واثق فيها .


ختاما اسال الله العظيم رب العرش الكريم انه يرزق كل واحد على قدر نيته وانه يحببني لزوجتي ويحبب زوجتي فيني وانه يرزقني بالصالحات من خلقه ويبعد عني بنات السوء الله لا يكثرهن وسلامتكم.



ارجو من الاخوة المشاركة واثراء هذا الموضوع.

__________________

تبي الصراحة...
شروطك وايد ولكن معقولة.. يعني غير تعجيزية..
وكل شخص يفكر بالزواج أكيد بتكون هذي شروطه...

بس عندي تعليق.. بما انك طلبت راينا ..(جوال بو كيمرا)...
إنت حر.. ولكن.. إذا كانت البنت فيها كل المواصفات اللي طلبتها بس جوالها بوكيمرا..
حرام تشيلها من بالك.. ممكن تكون ظالمها.. يمكن جوالها القديم أخترب واشترت غيره ..
يمكن جايها هدية.. (ولكن ما أجبرك تغير قناعاتك)

بالنسبة للسوق.. ممكن في الشهرين مرة.. بالنسبة لي أقدر ماروح السوق شهرين..
بس لازم تعوضها بالطلعات.. تراها انسانة وفي ذمتك.. لازم تفسحها وتطلعها عشان تفرفش وتغير جو...

اسمحلي اخي قزاز ، الله يعينها اللي بتأخذك!!!!!!!!!!!

تدري ليش..... انت تبغا وحدة تجيبها في البيت ليلة العرس وتصك الباب عليها ، وتبغاها تخليلك البيت جنة!!!! وانت حابسها في البيت.

اما موضوع الجوال!!!!!!!! ، فأحترم رأيك ، لكن اخلاق البنت ما تقاس على نوع جوالها!!!! ويأسفني انك ترى هذا الشئ

وهذا انتم يالسعوديين ، انتم تبغون تتطورون وتلبسون ترنق وتظبطون شعوركم و و و .......

والبنت تبغاها من عصر جدتي!!!!!!!!!!!!!!!

اجل السوق كل شهرين!!!!!!!!!!!!!!!! ياخوي روح مع زوجتك للسوق بس ما تحكرها في البيت


هذا رأيي

تحياتي ( وبدون زعل)

طلباتك كتيرة ابقى اتصلي بالخياط يفصلك
البنت وشغلة تانية اللي يكون عندها دين متأصل فيها
ما بينخاف منها ولا بينخاف عليها لانها أكيد حتكون بتخاف الله
بتصرفاتها وتاني شي شكلك بخيل جداااااااااا
ههههههههههههههههههه اسمحلي بس الظاهر اللي مخوفك من الجوال فقط
انها متطلبة وبدك ياها تكون غير متطلبه غريب جدا يا ترى انت عندك جوال ولا
كمان لاءوانظر لنفسك انتا تستاهل وحدة بالمواصفات اللي ذاكرها قبل شوي
؟؟؟؟؟؟؟؟؟؟
والله أمر الشباب في أيمانا هي غريب عجيب مثل يقال في بلدي
(عينهم فيه ويبصقون عليه)
تحياتي

ههههه والله في بعض تعليقاتك ضحكتني
والله يبعث لك الزوجه الصالحة والتي تتمناها

الرجاء اعتماد الرد الثاني

__________________

كيف تعرف إن هذه الصفات متوفرة في زوجتك؟؟

__________________

الاخ الكريم قزاز

من شروطك ان تكون البنت لا تملك هاتف نقال بالكامرا

فليكن في علمك ان هناك بنات ايضا يشترطون مثل شرطك

انا شخصيا سمعت عن بنت تقدم لها رجل وعنده هاتف نقال ففي المقابله طلبت من اخاها يأتي لها بهاتف هذا الرجل لتتاكد من هاتفه , فأحضرو لها الهاتف وفتحت البلوتوث فوجدت فيه كل انواع المقاطع القذره ( سلطه مشكله ) فرفضته في الحال وقالت لا اريد النقاش بخصوص هذا الرجل أنكشفت لي شخصيته من الان

الله يرزقك الزوجه الصالحه المؤمن التي تربت احسن تربية

أحسنت الفتاة بما فعلت...
ولكن قوية.. ماشاء الله عليها..

نعم اختي بحرينيه ولكن