انا ماراح اذكر تفاصيل القصة واللي صار وغيره لكن صاحبي عقد قرانة على فتاة من اسرة محترمة جدا الحقيقة وافعالهم اكبر دليل على ذلك لكن صاحبي كان اقل من انه يتحمل مسئولية بكثير وطلبوا منه الطلاق ورجعوا له حقه كامل من مهر وهدايا وشبكة وكل شي لا وبعد عطوه هدايا فوقها وخلعوا بنتهم منه.


اللي صاير بعد الخلع ان الرجال عايش متيم وعاشق ولهان والحياة بنظره انتهت حاولت ابسط له الامور واخرجه من المحنة لكن يرجع ويقول ليش طلبوا الطلاق والسبب والله واضح مثل الشمس يعني انا وبقية الزملاء عرفنا السبب وهو انه ضعيف شخصية والزوج الرسمي والدته وليس هو يعني امه تحرف وتصرف في كل الامور والبلا ان والد العروس متحمل نصف تكاليف العرس وبنته مالها اي رأي امه تفصل وهي تلبس وهو مالا يقبل من اي شخص في وضع ابوها.


المهم تعبت معه كلمته الاسبوع الماضي قال لي توي كنت عند ابوها ليش ؟؟؟؟؟؟ قال ابي اعرف السبب قلت له ياولد انت ماعندك عزة نفس الرجال خلع بنته بطريقة تقول لك لا اشوف وجهك معطيك هدايا بما لا يقل عن ثلاثة الاف ريال غير تعويضه في امور اخرى.

المهم زعل مني وكلمته بعدها باسلوب سهل ووضحت له الامر لكن لاحظت انه عايش قصة حب غير عادية. انا بصراحة ماتعجبني هالتفاهات الموضوع انتهى وهم على البر يعني ماصارت لا عشرة ولا حياة والفترة اللي عرفها فيها كلها شهرين يعني لا تذكر الحين انا محتار كيف اسوي معه لانه عزيز جدا على نفسي واعده مثل اخوي وكل الاصحاب ملوا من اسلوبه والتحطيم اللي هو عايشه.


هل اقعد جنبه ابكي واردد قصائد الغزل والوله والا اكون حازم معه فالنصيحة لاسيما انه عزيز جدا وبصراحة انا بديت انفر منه ومن النكد اللي عايشه.