مشكلتي أمي



بصراحه ضاقت بي الدنيا لما شفت أمي كذا...



أنا أكبر بناتها تزوجت وانا بال17 وبعد سنه و6 شهور من زواجي الآن حملت وطبعا أبوي لما عرف فرح


الى أبعد درجه وخصوصا اني بنته الكبيره ومهتم فيني وكل ساعه يقولي انتبهي لاتشيلين شي ثقيل


تغذي زين يعني مرة مهتم..


زوجي طار من الفرحه وانبسط وطاير عقله بخبر حملي...


خواتي اللي أصغر مني فرحووا وباركووا لي :14: :14: :14: :14: وقالوا اخيرا بنصير خالات بيجي عندنا بيبي بالبيت..




المشكله أمي ............


لما عرفت بالخبر ما قالت مبروك والا قالت الله يتمم لك على خير ...................... لا ماقالت ولاشي من هالكلام



وش قالت ونار الغضب مولعه بعيونها هذا اللي تبينه صار لك سنه انتي تحنين تبين اطفال


ولا حتى أبتسمت .. مكشره ومعصبه وجلست عندهم يومين شفت القهر مطنشتني كاني حامل من دون زواج


او كأني غلطت بحقها والا كاني سابتها زعلانه ولاتكلمني ومعصبه ..


ورحت للمستشفى حتى أتأكد من الحمل ولما رجعت ما سالتني وش صار والا في أي شهر والا وش قالت لك الدكتورة



بالعكس أبوي اللي يسألني وش قالت لك الطبيبه وش عطتك فيتامينات وعملت لك اشعه والا لا

يعني ابوي مهتم كثير من ناحيتي


اما أمي



ومرة قلت لها احس بطني شاد شوي واحس فيه شويه ألم قالت لي:


ايـــــــــــــــــــــــــــــــــــــه تووووك بيجيك تعب ويا مالك من التعب!!!


وش أسوي فيها انا احس اني تعبانه نفسيا منها


مسببه لي قلق مو فرحانه ابدا كأنها عدوه مو أم


وهذا راح يكون أول حفيد لها بس متضايقه وجن جنونها لما عرفت اني حامل والى هاللحظه ما باركت لي ولا دعت لي



فهموووني كيف أرضيها والا كيف اتعامل معها

__________________

الله يعينك يا أختي

عامليها باللي هو أحسن ولا تبينين لها إنك نتضايقة أبدا

و إذا بغيتي تتشرين لوازم الطفل خذيها معاك وقوليها أبغي آخذ ذوقك

قوليلها أتمنى ولدي يطلع شبهك

قوليلها يمه لما حملت صرت أحبك أكثر وأكثر أتخيلت نفسي في بطنك

من هذا الكلام حلولي تتقربين منها

خليها تحبه وحسسيها بإنك ما تستغنين عن نصايحها وحنانها

ولا تنسين الدعاء

ربي يوفقك لما يحب ويرضى ويسهل عليك الولادة

__________________


سبحان الله وبحمده عدد خلقه
ورضا نفسه وزنة عرشه ومداد كلماته

مشكورة اختي الذئبه


بس أمي مشكلتها انها بنظر أبوي راح تصير جده يعني كبرت

مع انها لسى عمرها 37 سنه


بس بنظرها خلاص ابوي راح يتريق عليها وراح يقولها كبرتي صرتي جده ويروح يتزوج عليها


مع ان ابوي مايفكر بالتفكير هذا بس هي خيالها واااسع



وحطت حرتها فيني وصارت ما تكلمني الا وهي زعلانه وبعصبيه شديده


مع انها تحب الاطفال حب جنوني بس زعلانه من هالخبر وضايقه فيها الدنيا


ماعرفت اتعامل معها

__________________

أختي الكريمه
أصبري على امك شوي وإذا أستمرت على طبعها
قولي لها (( أنا حاسه انك متضايقه شوي إن شاء انك لست متضايقه مني ، عشى ما في خاطرك شئ مني ، والله يا يمه احب ارضيك ))
يمكن تقولك .


تحياتي

__________________
جاء في الأثر أيضا خير الناس أنفعهم للناس .


ما أروع الانجاز والعمل المخلص اذا كان خالصا لوجه الله تعالى,, وكم من مؤمن وقاه الله شر صروف الدهر وأتراح الحياة فبارك الله له في عمره وماله وأولاده ووفقه الى كل خير وحبب عباده فيه، بسبب ما يقدمه في حياته[/SIZE][/B]

السلام عليكم ورحمة الله
حبيبتي ريم عادي هالشي دام عرف السبب بطل العجب..
بس إنتبهي أخية تقولين عن أمك ألفاظ تضايقها لو عرفتها مثل الغيبة يعني!!! تغتابينها
يعني الأم أم عمرها ما تكون عدوة حتى لو بتصرفاتها بانت لك كذا..
دامك عرفت السبب ..خلاص إبدئي راعيها ودلعيها وإمدحيها قدام أبوكي لما تتزين
ويحظك يا بوي بأمي ...من هالكلام..
ولا تجيبين كلمة جدة كثير أمهات يتضايقون من هالكلمة بالبداية
خصوصا لو كانوا صغار..
وإدعي اللله وبريها..ترا إنتي كلها كم شهر وتصيرين أم
وبتحسين بنفس إحساسها بعد فترة أحاسيس الأمومة..
عادي بريها بكل الأحوال..
وإكسبي رضاها دايم..
بكرة تتغير لما يجي الطفل
وبتطير فيه
الله يسعدك ويوفقك يارب

__________________

أختي أنتي عرفتي السبب وهو خوف أمك وهلعها أن تصبح جده وأن تكبر في نظر والدك وهذا عند المرأة عذاب
عليكي : 1ـ أولاً اطراء جمالها
2 ـ حاولي أن تتفقي مع أبوكي اذا كلن حاسس بالمشكلة أن يطري جمالها وأن يذكرها أن كونها جده وهي توها شباب هذا أفضل شي

وانا كمان اتوقع انه ممكن يكون هذا السبب الرئيسي
وحبيت انبهك لشئ هو صحيح قبل أوانه بس حطيه في الحسبان انه ان شاء الله اذا ربي تمملك بخير وسهلك ولادتك يارب وانجبتي عوديه يقولها امي وانتي يقولك ماما .
تدرين عندنا الوالد الله يحفظه ان شاء الله مو كبير لكن تعدى 55 ماشاء الله وعندنا اختى عندها اكبر عيالها 15 سنه يتضايق ولا يرد اذا نادوه ب( جدي ) ويقول قولولي ابوي والا يبه مع انه عاقل جدا بس يقول تحسسه انه شايب وانه اصلا لما ذكر في القران قوله تعالى " وابونا شيخ كبير " كان المقصود به جدهم واعتقد الجد الرابع كمان والله اعلم
عموما حبيت بس احذرك واتمنى اكون افدتك واسال الله العلي العظيم ان يتمملك حملك ويرزقك من واسع فضله الابن البار بك وبابوه يارب.

مشكورين على نصايحكم


وبحاول قد ما أقدر اني افرحها وأشيـــــــــل هالحساسيه من ناحيه موضوع حملي


وان شاء الله يارب تتغير نفسيتها من ناحيتي...

__________________

عاد تصدقين ياريم انا فرحت لك لما ذكرتي خبر حملك في موضوع ثاني لاني مثلك عانيت وقت بعدين الحمدلله رزقني الله بكتكوته الله يتمم لك حملك بقولك شي اذا انا وانا مااعرفك فرحت لك كيف امك لاتشكين لحظه وحده انها ماتفرح لك بتولدين وبتجربين وبتعرفين انها اول واخر قلب يحبك وصدقيني انا ضايقني كتابتك للموضوع صدقيني امك خايفه عليك من الولاده والتعب وراحمتك لانك مهما كبرتي بعيونها طفله وووووووو اهم شي اي شي بقلبك على والديك انسيه امسحيه غصب لاتناقشينه مع احد واحذرك خصوصا زوجك ترى بعدين تحسب هالنقطه ضدك وووووووووو قل رب ارحمهما كما ربياني صغيرا

__________________
لا اله الا انت سبحااااااااااااانك اني كنت من الظالمين

مشكورة اختي وحبيبتي ريميه نجد وتسلمين يالغاليه


انا مو قصدي اني أكره أمي لا انشاء الله بالعكس أموووت فيها وأبووس رجولها ويدينها وراسها كلما شفتها


حتى زوجي لما يشوفني أبوسها بهالطريقه ينبسط ويقول ماشاء الله عليك تحبين امك وتقدرينها


ويقول ما عمري شفت شخص سواء بنت والا ولد يبوس أمه بهالطريقه وماعمري زعلتها



بس أنا تضايقت وضاق صدري منها لما ما باركت لي ولا فرحت لي ولا ابتسمت حتى ولاشفت الفرحه بعيونها


لما انخطبت كانت نفس هذي الحاله ما حسيت أنها فرحانه بس كانت تبكي اذا جلست تناظرني بعيونها


ويوم الزواج نفس الشي تناظرني بعيونها وتبكي قلت يمكن دموع الفرح



بس لما عرفت بخبر حملي ما بكت ولاضحكت ولافرحت ولا ابتسمت ولاسمعت منها دعاء لي

حز بخاطري تاعملها معي ضاقت بي الدنيا لما شفتها تعاملني بالطريقه هذي صاير مزاجها عصبي من ناحيتي


وشايله هموم الدنيا


ولا عرفت كيف أرضيها قلت يمكن اذا نزل الطفل بتفرح وانا محتاره انا ماصدقت اني أحمل وفرحانه بالحمل

ونفسي أنزله يمكن اذا نزل أمي ترجع لطبيعتها معي


ولا أدري وش أسوي بنفسي

__________________