السلام عليكم ورحمة الله
بصراحه حبيت ابدي اعجابي ببعض الافكار التجديديه اللي تكسر الروتين واللي طرحتها بعض الاخوات
مثل الاقتراح اللي يقول..استاجري فندق وجيبي كيكه وشموع...........الخ
او بلاش فندق ممكن حركات التجديد يكون بالبيت مثل ان الزوجه تضع بطاقات وورود مجففه وشرايط حمراء وغيرها من الافكار..انا أأيد هالافكار الجذابه اللي فعلا تكسر الروتين وتجدد المحبه بين الزوجين
لكن السؤال اللي يطرح نفسه..متى نلقى وقت لهذا كله؟؟
انا شخصيا ولدي مجنني بالسهر مع انه ما بعد كمل سنه وصياح وغثيث الله يصلحه والله اني احيانا يمر علي 24 ساعة ما غمضت فيها عيني بسبب هالولد..نومه متلخبط مع اني مابقى وسيله ما استخدمتها ابي اعدل نومه بدون فايده
اضافه الى ان نومه قلق جدا والولد الله يهديه شيطاني.. يعني هد حيلي كله.ويكون نومه عادة في وقت ما اقدر انام فيه
لاني لازم اخلص شغل البيت واجهز غداء ابوه......................الخ.
وفلنفرض هالامور كلها انحلت..لما افكر اني اسوي هالافكار الحلوه وين اودي ولدي؟
من جد وين اوديه؟
لاتقولين خليه معكم لانه بيحوس الدنيا وبيخرب كل شي,وما عندي اخوات اتركه عندهم واخوي اللي متزوج يدرس بالخارج وماخذ زوجته,وامي تقول والله لو ايش يا بنيتي لاتحطينه عندي..ولدك شيطاني وانا ما فيني حيل عليه.
واهل زوجي في مدينه ثانيه.و.لا اقدر احطه عند وحده من صديقاتي او الاقارب لان زوجي يرفض رفضا قاطعا هالامر.وش الحل طيب؟
طبعا هذا كله كوم وان فيه بعض الازواج الله يسامحهم ما يهتمون لهالافكار التجديديه نهائيا
ولا يعطونك وجه..ويخلون الزوجه تتحسف على تعبها..وممكن ان البعض منهم يقول..منتيب صاحيه وش هالخرابيط؟
انا شخصيا اعرف وحدده من صديقاتي متضايقه جدا من زوجها..تقول كله واحد عنده اكشخ,اتعدل,اتعطر..والاالبس خلاقين وكشتي طايره..ماتفرق عنده.
الزين والشين عنده واحد..ماعنده اي ردة فعل وانسان سلبي على قولتها..
والكلام الحلو الغزل ما تسمعه من زوجها الا وقت المعاشره واللي طبعا ممكن تكون مرتين او ثلاث بالشهر
ويتعذر بقولته بنتنا ماعطتنا فرصه(عمرها سنه ونص) او يقول..الجو حار ما يساعد او يقول مالي خلق اليوم مداوم
طيب ياخي كل الناس عندها اطفال وكل الناس تداوم ما سووا سواتك؟
غير كذا يعاملها كانها واحد من اصدقائه..مع انها والشهاده لله انسانه تهتم ببيتها ونفسها كثيرا لكن لا حياة لمن تنادي..فمثل هذه المسكينه كيف تسوي هالافكار الحلوه وزوجها جدا سلبي؟؟
اكيد راح تتحطم.


اتمنى اني اسمع ارائكم بهالموضوع..ولا تبخلوا علي بردودكم العطره............................................ ..

شوفي حبيبتي حاول ما تخلينه ينام طول اليوم يعني كل مانام تصحينه
وتعبينه بعد تخلينه يلا حقك من غرفه لغرفه وقبل لا يجي أبوه حاولي تنيمينه وقتها
بكون مدوخ
وأنت بسرعه حضري الاشياء الي انت مجهزتها
وأنبسطي قبل ما يصحى
حاولي تقدري الوقت الي بتسوين فيه حركات
ما يكون الولد تعبان ويصحى كل شوي
هذا كل اي عندي
تحياتي

بالنسبة لكي يا عزيزتي فألاحظ أن أنسب وقت هو المساء حاولي أن تعودي طفلك على النوم باكراً وبهذا يكون لكي متسع من الوقت للتفرغ وعمل ما يلزم من الليالي الوردية

بالنسبة لصديقتك قولي لها أن تستمر على ماهي عليه من التجمل والتودد للزوج لأن أغلب الأزواج يجد صعوبة في التعبير عن مشاعره وإظهارها ولكنه من الداخل يكون في قمة السعادة أعلم أن هذا الأمر يضايق لكن هذا هو حالهم وإن استمرت فترة من الزمن دون تزين له سوف تجده يعلق عليها بعدم الاهتمام أنا متأكده من ذلك أمام بالنسبة لممارسة العلاقة الزوجية فربما هناك موضوع يشغل فكر الزوج أو أن الوضع بينهما متوتر نوعاً ما فالتحاول التقرب لزوجها ومعرفة ما يعكر مزاجه

أسأل الله لكي ولها دوام الاستقرار والمحبه فيما بينكم وبين أزواجكم

غاليتي دلع..اشكرك على تفاعلك
بس نسيت اقول لك اني ان زوجي دوامه غير ثابت(شفتات)
مره ليل ومره عصر ومره صبح..يعني مو منتظم..واعتقد هذا احد اسباب اللخبطه اللي انا فيها..
و انا عارفه ومقدره ان هالشي خارج عن ارادته..وان هذا مصدر رزقه ولازم يحافظ عليه.