السلام عليكم

شخباركم اخواني وخواتي

انا جالسه اكتب ودموعي على خد من القهر

انا اليوم رجعت من السفر بس والله ياليتني مارجعت اليوم انا عايشة اسود يوم في حياتي كلها حته اني اتمنه الموت بدل المرة الف


انا البنت الكبيرة في العايله وعمري 20 سنه وعندي اخوان واخوات كثير ماشاء الله واحنا بيتنا مترابطين مع بعض واموي وابوي متفاهمين مع بعض لاقصى درجه حته ان الكل يحسدني على اموي وابوي واموي تقرب حق ابوي تكون بنت عمته

انا ابوي انسان ملتزم هو واموي يعني بيتنا ومربينا كلنا على الالتزام بس الفترة الاخيرة بديت الاحظ اشياء على الوالد وكنت احذر اموي منها انها تنتبهت ب لانها واثق من ابوي كانت مخليته على راحته

المشكله انه ابوي اليوم صدمنا انه راح يتزوج على اموي مع انه اموي بنت عمته وصبرت عليه في الحلوة والمرة وغير جذيه يقول انه مغصوب انه يتزوج

ماتخليون الوضع الي احنا فيه اموي انهارت واحنا كلنا وقفنا مع اموي ضد ابوي احس انه هاي الانسان مش ابوي الي اعرفه يقول انه بيتزوجها وبعدين على طول بيطلقها المشكله انه تونا راجعين من السفر صار لنا ساعات

ماحد راضي عن هاي الزواج وانا احس اني اكرة ابوي كرة محد يتخليه انا في يوم من الايام حبيت شخص وكنا راح نتزوج بس انا تركته عشان مافضح العايله لانه مش من مستواها انا دست على قلبي عشانه بس الحين والله العظيم ندمانه لانه صج مايستاهل باعنا برخيص عشان وحدة ماتستاهل

ام ابوي وعماتي وعمامي جلسوا يصيحون عنده عشان لايتزوج بس ماكو فايده

يوم شفت اموي يوم تنهار حسيت بنار في قلبي الحين ماعاد يهمني شي في الدنيا حته اكتشفت انه مافي حد يستاهل انه احنا نضحي عشانه احس الحين وانا في البيت هاي مو بيتنا اخوي قاعد يتراجه انه مايسوي ويصيح بس اهو مصصمم بالي في راسه احس خلاص الايام الحلوة الي عشناها عمرها ماراح ترجع

الحين خلاص ماعاد حد يهمني حته انه هددته انه راح افضحهم واشرد بس هم خذوا كلامي انه في لحظة غضب هو خلنا كلنا نسافر عشان يضبط امورة هنا

حاسه اني قاعده اختنق عورني قلبي على اموي شلون كانت حارقه قلبها تبي ترجع له انه جالسه لحاله هنا وقعدت تشتري له اغراض بالهبل حته انه مانتظر ترتاح من السفر صعقها مع انه كان يرفض هاي الفكرة وحته انه زعل يوم واحد من اهلنا عملها وتزوج على مرته وقال انه الزواج الثاني يهدم البيت الاول ويفرقهم بس اهو كان اخر واحد في الدنيا اتخيله يسويها

خلاص كرهت الزواج والرجال كلهم والحين ماعاد يهمني حد ولا شي اول كنت احسب حساب لكل شي بس الحين خلاص صار كل شي عندي عادي وخله يتحمل كل ال راح يجيه منا

ماقدر اكتب اكثر مع انه الموضوع كبير وايد بس حاولت قد ماقدر اختصر انا اذا ماكلمت حد راح اجن مالقيت الا انتوا بس لاتقولون هاي مهما سوا بيكون ابوج وحرام عليج انا الحين ماعاد يهمني شي خلااااااااااااااااااااص

طفح الكيل ماتتخيلون الالفاظ الي قلتها لها حاسه روحي راح انجن لاتقولون ابوج مش اول ولااخر واحد مهما تخليتوا ماراح تخيلون حياتنا شلون كانت وقلبي يذبحني لين اقول كانت

بس الي انكسر عمره ماراح يتصلح والحين صج صرت ماحس بقيمه الزواج انا اشوف انه البنت تم بدون زواج وايد احسن لها خلاص كرهتهم كلهممممممممممممممممممممم

غاليتي أسيرة قطر
اولا تعوذي من الشيطان فباين من طريقة كتابتك انك منهارة جدا وافكارك مشوشة ,, حتى اني والله خفت عليك
ثانيا: بعد ان تدحري الشيطان عنك اذكري الله كثيرا وصلي على رسول الله وكرري ذلك الى ان تحسي بشي من الراحة
ثالثا: اكذب عليك لو قلت لك ان المشكلة الي تمرين فيها امر عادي ويصير لكل الناس وطولي بالك ومن هالمسكنات الطويلة,, بس يا حبيبتي تركدي شوي الموضوع ما ينحل بالشكل الي انتي تفكرين فيه الان ولا الومك لانك بعدك مصدومة من الموقف
رابعا: وش ذنب امك تشوفك بهالحالة كفاية الي هي فيه ,, تشوفك بهالشكل راح تتعبينها اكثر,, اهدي شوي وحاولي تهدي الموضوع في البيت
يعني مو وقت بكاء او صياح لانه يبدو وزي ما قلتي ان الوالد كان مخطط لكل شي من اول وحتى صدمته لكم وللوالدة بالتحديد كان مخطط لها فالموضوع محتاج منك انك تبدين تفكرين بالخطوة الي عليك
خامسا: نصيحة بجد لاتفكرين ان الموضوع بينحل بالعناد او بالتهديد وذلك لان الرجال بصفة عامة ماينتعاند ولا يتهدد وكذلك الرجال هذا ابوك يعني مستحيل يسمح لك لا انتي ولا اي احد في عيلتكم يعانده لانك وبكل بساطة تظلين بنته الي رباك
سادسا: انا من راي الشخصي انك تركزي على امك اكثر شي,, اذا ابوك حاب يتزوج خله يتزوج,,, امك الله يحفظها تظل معززة مكرمة في بيتها وانتم كلكم حولها,, انتي دورك تقوي من عزيمتها ما تحطميها,,, ابوك الي قضى عمر طويل مع الوالدة فهمته وفهمت طباعه تعرف وش يحب وش يكره قرر يفتح بيت جديد مع انسانة جديدة لسه بيعودها على طباعه وعلى عاداته من اول وجديد ,, وش رايك تتوقعين راح يكون هالشي سهل عليه؟؟؟ الله اعلم
خليه يجرب يا اسيرة قطر هو اولا واخيرا يوم حب يجرب فكر في الحلال وليس بالحرام ( ولا تزعلين مني هذة نقطة تحسب له وليست عليه),,,
( وعسى ان تكرهو شيئا ويجعل الله فيه خيرا كثيرا)
لعل ما حصل او بيحصل خيرة لكم من حيث لا تعلمون ,,
اتمنى اكون قدرت اريحك لو شوي,, اعرف بان الموقف صعب بس لا ارى سوى انكم تصبرون عليه وتشوفون وش اخرتها معه
الله يسخرلكم من فضله,,
صحيح نسيت اقولك على دعاء رائع علمه الرسول الكريم صلى الله عليه وسلم لام سلمة حين حلول المصائب
اللهم اجبرني في مصيبتي واخلف علي خيرا منها

أختي العزيزة أسيرة قطر:
صدقيني أن بوسعك أن تعملي الكثير وأول ماستطيعين عمله وهو الوقوف بجانب والدتك المسكينة المقهورة وتتقربين منها في هذه الفترة وتتناقشين معها حول أمور علاقتها بوالدك بشيئ من الشفافية ومن دون حاجز ربما هناك أسباب دفعت والدتك للزواج بل بالتأكيد هناك أسباب . أنا لا أقصد والعياذ بالله أسباب من والدتك ولكن الجال هم أقدر الناس على خلق أسباب كثيرة تبيح لهم الزواج. صدقيني الإنهيار ليس الحل والتفكير السلبي ناحية الزواج وناحية الرجال طريق مسدود ولايؤدي بك إلى نتيجة فعلية ولن يشفي غليلك لكي تنالي من والدك.
الحل هو أن تتعاملي مع الموضوع بواقعية رغم صعوبته وتفكرين بطريقة تستطيعين خلالهاإزالة الألم الذي تشعر به والدتك وتجتمعين مع عائلتك من جديد كالسابق وتحاولين لم شملها .

وقبل أن تتخذي أي قرار أريدك ان تسألي نفسك الأسئلة التالية؟

ماذا يعني زواج والدك من إمرأة اخرى؟
هل يعني ذلك أن تهدم حياتك وحياة أسرتك ؟
هل يعني إنعزالك وهدم مستقبلك؟
هل يعني زيادة العبأ النفسي على والدتك وأخوتك؟
هل يعني أن والدك انتصر عليكم وهدم كرامة والدتك؟
هل يعني كرهك لوالدك وتحاملك عليه؟
طبعاً لا أختي الكريمة لاتسمحي لأياً كان أن يزعزع رباطكم الأسري حتى لو كان والدك وصدقيني سوف يرجع والدك لكم حتى لوتزوج كل نساء الأرض لأنكم أسرته وكيانه وذكرياته ورباطه الوثيق لن تبعده عنكم إمراة أخرى ولا أي قوة في الأرض طالما تحليتم بالإرادة والصبر.
وفي الختام نصيحة لك أختي العناد ليس حل والمعاداة أيضاً ليس حل لمشكلتكم الحل الوحيد هو الصبر والمعاملة الحسنة فهو يبقى والدك فالحل بيدكم دعيه يتمسك بكم دعيه يشعر بالندم بمعاملتك الحسنة وبرباطكم القوي الذي لم يهزه زواجه بإمرأة أخرى وما أدراك ربما تكون الأمرأة الأخرى مجرد نزوة فلاتدعيها تصبح واقع حقيقي بسلبيتك وعنادك.

__________________
[

الشرع اباح للرجل ان يتزوج بأربع نساء

ولا يجوز كره شرع من شرائع دين الاسلام

ومن يكره شي من شرائع الاسلام فإانه منافق منافق منافق


فالحذر فالحذر

واعلموا ان هذا من الامور الشرعية
فعلينا الاستسلام والانقياد لشرائع الله سبحانه

دمتم بخير

وهل تعتقدين ان الغلط يتعالج بالغلط


الرجل احل الله له اربع وانتي كانك مو راضيه بما احل الله عليه وتعترضين على هالشي

هالامر خطير

الشي الثاني يمكن يكون عند ابوك وجهة نظر .. وهذا اكيد بما انه قال انه اجبر على الزواج


الشي الثالث انفعالاتك وتهديداتك مو من صالحك ولا من صالح عائلتك والامور تنحل بعقلانيه ولا بالصراخ والاستعجال وهذا الي يبيه الشيطان منك ومن امك



تعوذي من ابليس وفكري في موضوعك بعقلانيه وشاوري الحكماء واصحاب الرأي السديد


والله يكتب ما فيه خير

من الواضح ان اباكى يمر بازمة منتصف العمر و لم تستطيع والدتك ان تحتويه حتى يمر منها بسلام ان لا اعفى والدك و لكن اقول لك ما هو السبب حتى تستطيعوا علاجه و المرور من هذه المشكلة بسلام

حبيبتي ...

مادام انه حط في راسه الزواج ... خلااااااااااااص بيتزوج ..مهما قلتوا ومهما صحتوا ...

خلووه يتزوج والله العظيم احسن من العشيقة والحراااام .... على الاقل بالحلال ...

انتبهوا لاتعاندوه زيادة بعديييين يقلب عليكم ... يعني اهم شئ انه لما يتزوج مايقصر عنكم في شئ ...

المشكلة مو في الزواج الخوووف انه ممكن يتغير للاسوأ بعد الزواج .. وممكن لاقدر تحصل اشياء تقهر ...

انتوا الان خليكم مع امكم وقضوا الوقت معاها وخلاص خلوا ابوكم يتزوج لانه واضح من كلامك انه مصر ومافي حل ...

بس زي ماقلت اهم شئ مايتغير عليكم ... ( بسبب اسلووبكم او اسلوووب زوجته الجديدة ) ...

انا صحبتي ابوها متزوج 3 اقراي كويس ثلااااااااثة .. ويبغى الرابعه وحالتها مبسووووووووووطة عارفة ليه ؟

لانه بعيد اكثر الوقت عن البيت ومافي مشاكل ولما يرجع كله مشاكل ... وتراه اتزوج على امها اعتقد بعد 3 سنين زواج

يعني مررررررررررررررة قهر ... لكن ربنا رايد كذه ...

حتى مسكينة تصرف على نفسها وخالها يساعدهم لانهم محتاجين والله العظييييييييم انها صحبتي في الجامعه وعارفة

حالها كله ...

صدقيني يمكن يكوون في زواج خييير ... ولاتقولوا ايش تسوا لو كنتوا مكاني ...

انا ادري انه قهر لكن ماعليكي من الناس خليكي بنفسك .. واهم شئ امك ....

بالتوفيييق حبيبتي

اتمنى انك تهدين وتهدين الوضع اللي في البيت موتكونين انتي شرارت اللي تولع هذا البيت
اللي اطلب منك الصبرولا تستعجلين في اتخاذ القرار والأحكام ومهما ابوج سوا تراه ابوج
اوقفي بجنب امج واسيها وكوني معها وهديها وحاولي انك تكلمين ابوج وتحنين قلبه عليكم
ما اعرف اسباب الزواج الثاني بس خلى الرجال يقنعونه ويلاقون حلول اخرى "فهمت من كلامك انه مجبر على الزواج"

فأرجو انك تتحلين بالصبر ثم الصبر فالصبر....
الله يوفقكم لما يحبه ويرضاه

اختي شلون يتزوجها وبعدين يطلقها ؟؟

اخواني وخواتي المشكله انهم مع بعض واحد وعشرين سنه انتوا مهما تتخيلون ماراح تتخيلون حياتنا في البيت ابوي واموي اصحابي وربعي اكثر من انهم ام واب المشكلة انه اصحاب ابوي هم الي قاعدين يوزونه على الزواج تزوج ليش ماتتزوج انت مو ناقصك شي وجالسين يلعبون بعقله مع انه الكل منصدم ومقهور حته اخوانه وخواته الي هم عمامي زعلوة عليه لانه صج ماتخليوها منه هو بالذات لانه ابوي شي كبير كبير في العايله انسان قمه الاخلاق والاتزان ومعروف بعقله الكبير واحنا ناس مرتاحين ماديا يعني يقدر يتزوج بدال الوحدة الف

انا مارفض فكرة الزواج الثاني الا لاسباب تقنع مو بس بدون سبب كذا الرجال مايفهمون شنو يعني الزواج الثاني والثالث انا عندي واحد من اهلي قريبي متزوج اربع ولا يدري عن عياله مايعرف اي شي عنهم بس المهم يصرف عليهم بس مايدري اهم اي صف يدرسون ولا يشتغلون مايدري كله في شغله وحريمه ومايدري عياله شقاعدين يهببون في الدنيا انا مابي اضييع من عقب الوالد لانه وجودة في البيت مهم ماتتخليون لاي درجه حته اموة الي هي جدتي انهارت لانه تحب اموي والوحيدة الي ترضييها دوم المشكله معورني قلبي على اموي شلون حالته لاتسر لاعدو ولاصديق مع انه حذرانها من ربعه لانهم كلهم تزوجوا على حريمهم وعايشين في مشاكل وهواش بس يحبون يجيبون الهم لغيرهم اللله لايوفقهم في حياتهم ان شاء اللله ولا يهنيهم ابدا امين ياربي

بس اليوم هدا ابوي شوي وقعدنا نكلمه ماتتصورون حالت اخواني شلون منهارين بس انا احس انه لو قعدنا معاه شوي بيلين وان شاء الله يجيب الخير لانه من امس مانمت عدل وانا قاعده ادعي انه هذا الشي مايصير صدقوني هذا الزواج مافيه خير لابوي لانه ابوي مهما دور عمرة والله والله ماراح يحصل وحدة مثل اموي استحملت معاه في كل الاوقات حته يوم طاح مريض وتعب وانهار محد وقف معاه غيرها هي مافي وحدة راح تفهم ابوي كثر اموي مهما قلنا لانه ابوي صعب انه وحدة تعرف شلون تتعامل معاه حته لوتزوج مليون في الميه بيطلقها لانه بيشوف الفرق الكبير الي بينها وبين اموي انا ماقول هذا الكلام لانها اموي هذا حته كلام عماتي قالوا له مهما دورت ماراح تحصل وحدة تعرفلك كثرها

بس ان شاء الله يجيب الخير