|
رد: أفكر جديا بالانفصال
الله يعينك حبيبتي روح ،، وفعلا اللي يده في النار مو مثل اللي يده في المويه ،،
|
رد: أفكر جديا بالانفصال
سؤالي للرجال
معقوله ماتعلم الدرس ابد ولا مايبغى يتعلم غريب هالانسان تهقون انه مش ماخذ روح جد طيب كان بيخسرها والمحكمه والصك ماتادب من هذا كله وحس انها مش مجرد تهديدات مافهمت نفسيه زوجك روح |
رد: أفكر جديا بالانفصال
نعم والسحر منعكس عليج انتي ... انفصلي بدون طلاق و استمري عالرقية ل نفسج انتي ل تتخلصي من أفكار السلبية يا روح
|
رد: أفكر جديا بالانفصال
انا مثلك فكرت كثييرا في قرار طلاقي وطلبته وانفصلت والله بعد 6 شهور من الانفصال حسيت بغلطي وم اكذب لي 6سنوات كنت ادعي فيه بالحاح ان ربي يرده لي وتزوجت بعده وانفصلت ورحعت ادعي انه يرد لي لكن م كتبه ربي الله يعوظني خير شوفي ايش اكثر اجابياته او سلبياته اذا كانت الاةلى اكثر اصبري عليه
|
رد: أفكر جديا بالانفصال
مبتعثة
اهله مالهم دخل خلاص انا حاطة شرط ( تعجيزي ) بالنسبة له .. و ماقدر أعيش معاه .. لاني افتكر كل شي مجرد ما اشوفه و نفسيتي تنضغط كل شوية و ما اكون طبيعية اليوم بدأت تظهر الأعراض على ولدي الوسطاني و صار يلصق فيا بزيادة و يسال عن ابوه . . اذا قلت ايش الشرط .. هل فيه شي بديل عنه !؟ لانه عقلي عاجز عن التفكير هل فيه طريقة تخليني أتعايش بشكل طبيعي !؟ هو بيحاول ينفذ لي ألي ابغاه بس قلبي تقفل و ماقدر اشوف اي حسنة انا الشرط الي حطيته كبير و انا عارفة الشي هذا بداخلي بس مابغى اتنازل عنه و مليت |
رد: أفكر جديا بالانفصال
روح
انا من عضوات المنتدى القديمات وعاصرت كثير من مواضيعك.. 1/اذا متأكدة ماراح ترتبطين برجل اخر وقرار نهائي فلا تنفصلين..لان زوجك مهما كان مهما كان الا له ايجابيات على حياتك.. عارفة الحين كارهته ومو طايقته وتحسينه إضافة كريهة على حياتك وحمل ثقيل..بس فكري بشكل اعمق وابعد..وممكن تعطين نفسك فرصة لمدة شهر تفكرين بعمق..راح تمرين بأيام تكونين اكثر راحة واعمق رؤية.. من خلال سطورك حسيتك مضغوطة ومحبطة فشيء طبيعي تركزي على نقاط معينة بحسب حالتك المزاجية.. اتذكر مرة قريت موضوع هل تفكرين بالطلاق احيانا.. شدني السؤال وسألته صديقاتي كلهم قالوا لا الا انا نعم.. كان فبالي انه حياتي اسوأهم لكن بعد سنوات اكتشفت انه فيه الاسوء وبكثير..لكن اعتقد انه انا وانتي نميل للقرارات الحاسمة وحل المواضيع بسرعة لاني بحياتي العملية كذا وبصراحة هالطبع صحيح فادني بعض الاحيان بس برضو خسرت بسببه بعض الشغلات.. قصدي من كل الكلام اللي فوق ان قرارك هذا مو كله لأن حياتك سيئة بس لأنك تهربين من العجز والوقفة بنص الطريق.. 2/اكتبي بورقة ايجابيات وسلبيات الانفصال..بالنسبة لك ولاطفالك.. وخليها لفترة كل ماتذكرتي شيء سجليه..الكتابة كثير تفيد وترتب الافكار 3/زوجك رغم كل الهزات العنيفة اللي مرت بحياتكم مازال متمسك بك عاارفة بقولين بخاطرك اي تمسك.. بس روح تلفتي شوي وشوفي الرجال لو تشكيه لابوها عطاها طاف..زوجك رغم المحكمة والشغلات لكن حاول يصلح من نفسه واختار بقاء الزواج..ومازال يحاول يصلح من نفسه .. لكن برضو اقولك ولاني قريبة من شخصيتك ان زوجك يحس بالاحباط ولو مابين عليه..لانه شخص مجبر علشان يحافظ على زوجته وبيته وعياله ان يكون داخل اطار معين بينما هو ماتعود عليه..وبنفس الوقت يشوف المردود ضعيف..انا عااارفة بتقولين انا امشي له واسلك له واعطيه جوه لكن يبان بالوجة بردود الافعال وبفلتات اللسان والانسان مهما كان ترا يفهم ويحس.. 4/بخاطري كلام ماادري كيف أوصله لك بس انتي متضايقة من سطحية زوجك..لكن صدقيني الموضوع محتاج تقبل..دراستك والناس المحيطين لك بالعمل يغذي هذا الشيء عندك..لكن صدقيني مو كل الأشخاص مثل مانتخيل..بعطيك مثال..قريبي أكاديمي مشهووور على المستوى العربي يتصدر المؤتمرات والمحافل لو اقول اسمه يمكن تعرفينه..انا شخصيا ادخل بيته واشوف كيف يتعامل مع اهل بيته وكيف مجالسه قمة السطحية واحيانا الانحطاط..وحتى احيانا يسولف عن المجموعات اللي معاه يتصدرون المؤتمرات نفس التفكير..وبرضو قريبي الثاني مدير دائرة حكومية وربي عليه دكتاتورية بإدارة بيته لدرجة يسمي زوجته اسم حيوان..اللي حابة أوصله لك ان اللي يتعايش مع الناس لابد يتقبل أطيافهم وألوانهم اعرف بتقولين هذا زوجك بس حبيبتي صدقيني مو اسوء الناس وحسب كلامك عنه لما كنتوا بالبعثة كان انسان يحمل خير واب رائع بس لانه انكشف قدامك صرتي تتخيليه تمثيل ولعب..بس لو نفكر بموضوعية ليش سنوات تمثيل ولعب ليش مايكون كاره شخصيته وتربيته وحاب يفتح مع زوجته صفحة جديدة يكون فيها زوج واب مثالي.. اللي اقصده من القرقة هذي انك محتاجة شوي تفكرين بأنصاف شوي وموضوعية وعدل.. انا عارفة انك حاولتي وضغطتي..لكن كانت توقعاتك أعلى بالنسبة لخط الزمن والمعطيات.. 5/بالنسبة للسحر مااستبعد لانها تخلي الشخص بعيد عن الله ويكثر المشاكل والخناقات ع الفاضي والمليان..برأيي تغيري البيت لو تقدرين..او اقري البقرة بماء زمزم اشربيها انتي وزوجك ورشي بزوايا البيت..صديقتي نفس حالتكم وفعلا قالوا سحر ومااقتنع زوجها يقول خرابيط المهم صار يشرب كاس ماء زمزم معه ملعقة عسل تقول لغرض ما..تقول سبحان الله صار يطلع منه اشياء غريبة هو خاف منها..انتي داومي عليه..ذكر الله والرقية عبادة لو بدون يقين.. ربي ينور بصيرتك ويفتحها عليك ويصلح ذات بينكم ويبعد عنكم كل شر |
رد: أفكر جديا بالانفصال
اقتباس:
. نبض الدان اختصرتي و شرحتي وضعي و نفسيتي كلها من خلال ردك و كل كلامك عنه .. فعلا مطابق له تماما و قلتي نفس الي هو قاله تقريبا عن نفسه و حللتي وضعه بالضبط و وضعي كذلك طيب انا دحين نايمة لوحدي و مرتاحة .. لمتى يجلس هو برة و انا بالبيت !؟ مع العلم انه ماعنده مكان ينام فيه .. و البيت هو بيدفع إيجاره كيف طيب اقدر أتعايش معاه !؟ اول سبب خلاني كذا .. و خلى المشاعر المجروحة تظهر لدي لما شفت الاخ الوحيد و الاخ مستر ريان .. ( و اعتذر منكم يا اخواني ) ما قدروا يسامحوا و لا ينسوا الي صار و نفسياتهم تعبت .. الوحيد تزوج من اخرى .. و ريان طلقها و اخدت عقوبتها لمدة خمس سنوات و ما قدروا ينسوا او يسامحوا .. و كذلك اغلب المواضيع و الردود الي تايد زواج الزوج المخدوع و تطليق زوجته الخائنة و حتى لو كانت تابت او الزواج عليها و انا معاهم في ارائهم .. بس معنى كذا .. مشاعري غصب عني و غير مبالغ فيها صرت اقول بداخلي .. طيب و ليش انا اتحمل و اضغط !؟ يعني عشاني انا الأنثى و زوجي الذكر .. عشان ما عندي فرصة مثل الرجل .. اتحمل يعني !؟ عشان الرجل مو مثل المراة !؟ يعني اتحمل غصب و أعيش معاه بالقوة و فوق هذا كله أدلعه و اهتم فيه !؟ يحبني .. او ما يحبني .. احبه او لا .. الحب صار ما يعني لي شي بعد افعاله قلت له تحبّني .. اثبت لي بالفعل ( و اعطيني رضوة مالية و قدرها كذا ) . . القصص الي سواها و قراتها بعيني .. هذه عندي خط احمر .. و ما قدرت أنسى .. . . صحيح عيوب زوجي هي نفسها ( الان ) و من قبل من كسل و عشقه للنوم و اتكاليته ووو الخ ( صحيح انه تحسن في أمور .. مثل ما صار ياخد ديون و محافظ على وظيفته و يصرف علينا يعني صار دحين .. ) . . لكن الفرق بين دحين و اول .. فيا انا .. زمان و لاني كنت اعرف نفسي ( أغار و ارفض فكرة شخص أعيش معاه يكون لو كلم غيري او يعرف غيري ) .. يعني حتى اصحاب الوظائف الي فيها اختلاط .. انا ما اتحمل ؛ كل إنسان و طبعه و انا كذا .. و كنت استتفه و استحقر الناس الي بس هما علاقات و لعب و خرابيط .. فعندي مبدأ اني ممكن اتحمل كل شي ما عدا الخيانة و التهاون في أمور الدين هذه خطوط حمراء .. الطلاق هو الحل الوحيد له و بدون اي نقاش .. انا كذا ( كنت و مازلت ) فكنت اقول ( يا شيخة تحملي و اصبري و حتى لو عاطل .. حتى لو عقله صغير .. حتى لو متعقد من بيت اهله و تربيتهم كفاية يحبك و انت الوحيدة بحياته و إنسان نظيف و هذه كفاية عندك ) . . لكن ( الان ) و بالرغم من انه طبائعه و صفاته هي نفسها .. دحين اشوف عيوبه الي هي نفسها ما زالت و ارفض اني اتحملها او أتقبلها اقول لنفسي ( ايش الي يجبرك على تحمله ؟ ليش تضيعي حياتك مع واحد مثله ؟ انت تستحقي حياة افضل .. ايش فايدة مشاعره و أحاسيسه بعد ما لطخها و وسخها .. و ما صارت تعني لي شي .. اي حركة او كلمة او اي شي منه .. اشوفها ثقيلة دم و بايخة .. ما احترمه بداخلي ابدا و اشوفه شخص يستحق الموت و الاختفاء من الدنيا أكرهه و ما أزعل لو بيوم جاء تعبان او مريض ) انا قدّامه العكس .. و ما اقصر معاه ابدا .. اترك كل شي و أرعاه و اراعيه و اراعي حقوقه .. حتى مرات يقول لي متى الاولاد يكبروا شوي .. عشان نحطهم عند اي احد و انا و انت نسافر لوحدنا زمان كان ممكن افرح و ابني احلام و خيالات و أتشجع و أتحمس و احلم معاه دحين .. اقول بداخلي ؛ أصلا حياتي معاك عشانهم هم فقط .. و سعادتي من سعادتهم هم فقط .. ليش اتركهم و اسافر معاك !؟ إنتا أصلا مين تكون عشان اترك أولادي و اروح معاك .. انا سعادتي ماهي معاك .. انا لما اشوفك نفسي ادفنك و انت حي .. انا أكرهك و ما أبغاك .. هذا الي أقوله بداخلي و تظهر على ملامح وجهي بشكل ابتسامة صفراء .. - هذا هو الفرق بين اول و دحين - المسالة شكلها نفسية .. . . حاليا .. عودت زوجي انه تقريبا يوميا يخرجهم و ياخدهم للبقالة بالسيارة و يرجعهم .. بطلب مني و امس الاولاد بداوا يفتقدوا ابوهم و بشكل واضح .. الاولاد امس بزيادة تعبوني و الوسطاني خاصة رجع تقريبا لتصرفاته القديمة من الالتصاق الزايد بيا .. و البكاء المستمر و بس يحضنني و يبوسني و يخاف اني اختفي و لو دخلت الحمام الله يعزك .. اسمع صوته يبكيييييي ( ماااااااااماااااااا ) و يجري في البيت يدور عني . . صار حوار بيني و بين زوجي عالساعة 1 بالواتس يسألني ايش المطلوب !؟ و قال النقاط هذه : - تنفيذ الشرط الي انا طلبته ؛ قال راح أنفذه لك مثل ما وعدت .. قالي ماعندي دحين و راتبي كله يروح عليكم و عالسيارة و ما يبقى منه شي ( صادق هو في هذه ) - طلاق مافي و لو تنطبق الارض عالسماء - الي فات و الماضي خلاص راح و انتهى .. . . قلت له .. جربت نفسي سنة و كم شهر معاك .. و لقيت حالي ماقدر خلاص كل مرة اشوفك .. افتكر كل شي بالتفاصيل و ماقدر أنسى .. و انه انشغاله بأصحابه و خروجه الكثير معاهم ما ساعدني على اني أنسى لا انت الي نفذت شرطي المطلوب منك و لا انت الي تعطي بيتك من وقتك و تدور اي فرصة عشان تقابل أصحابك و شيشة و معسل و ورق انام مع نفسي اكل مع نفسي اجلس مع نفسي اتكلم مع نفسي كل شي مع نفسي .. كان ممكن اتنازل عن الشرط .. لو شفت منك احتواء لكن كرامتي اتهدرت و انداست تحت رجول ( ...... ) و الي يردها لي ( تنفيذك للشرط ) انا ماقدر أعيش معاك .. و ابتعادي عنك الان .. حتى أحميك مني .. لاني ما اضمن نفسي اني ممكن أغلط او اجرحك بالكلام و لاني فعلا مضغوطة و تعبانة عشان كذا .. لما اكون بعيدة عنك .. اكون طبيعية جدا .. . . *. انصحوني برفق .. و دلوني !!!!!؟ .* ايش الحل !؟ زوجي ما يعرف يعطي حلول .. هو يسألني ايش الحل و المطلوب ؟ |
رد: أفكر جديا بالانفصال
الوحيد وريان مشكلتهم الخيانة .. انتي تقارنين نفسك بهم .. هل وصل زوجك للخيانة ؟
مش فاهمينك ياروح؟ ايش الشرط اللي مانفذه ؟ |
رد: أفكر جديا بالانفصال
اقتباس:
كثير ممن يسمونَ بالمشايخ من قبل هذا الشعب الطييييييييب، يسمع القصة والمشاكل وعلى طول يطلق صاروخ اسكود أسمه هذي عين وهذا سحر، ويعيش العائلة أو الأشخاص بهموم وضروف نفسيه واحساسيس سلبية بقية عمره. |
رد: أفكر جديا بالانفصال
طبعا فيه تناقض راح تقولوا
انه مع اصحابه و نفس الوقت يبغى نسافر انا و هو فقط . . زوجي يبغاني انا و هو - فقط - حتى لما يجي البيت او يكون في البيت .. يقول نيميهم .. او اي طريقة اصرفهم فيه .. يبغاني اكون معاه و اترك كل شي طيب انا ماني مقصرة معاه .. بس مو معناها أهمل الاولاد وارميهم عالشغالة يبغاني مثلا من الساعة 7 الصبح لحد العصر ( و لانه يعشق النوم ) يبغاني بس كذا اكون جنبه طيب مين يفطر الاولاد !؟ مين يغديهم !؟ مين يغير لهم !؟ لازم الطفل يشبع و يتنظف و بعدين اشغله باي شي و أعطيه سناكس يتسلى و ينشغل عني لكن طبيعي الطفل لما يصحى و ما يفطر بعد ساعة يبدأ يبكي و يدور عني زوجي كمان يجي ينام بالوقت الي كل الناس صاحية فيه و المشكلة لو جلست معاه فرضا و هو نايم لحدددددد ما يشبع نوم و يصحصح يفتكر اصحابه و يقول انا خارج تبغوا شي !؟ و انا وقتها انشغل مع أولادي و أربيهم و نظامنا كله يتلخبط حتى لو فرضا قلت اشغله معانا و قلت له نروح مطعم اعزمكم يقول اتركيهم في البيت انا و انت نخرج لوحدنا مرات اسمع كلامه بس بشرط اكون متطمنة انهم شبعانين و موفرة لهم جو مناسب ينشغلوا فيه مع بعضهم لحد ما ارجع و أوصي الشغالة ايش تعمل في حالة فرضا يبغوا كذا بس مرات لا .. خاصة لو اكون عارفة اني ما طبخت لاني جالسة مع زوجي يبغاني معاه و أطنش الاولاد طيب ما يصير كذا على طول و لما انشغل مع الاولاد تقوم تخرج و تتركني و تلفلف في الشوارع مع أصحابك لحد الليل !؟ او تروح دوامك و تغيب 14 ساعة و ترجع تنام .. لا تسال عن أحوالي و لا تسال عن يومي و لا تسال عن الاولاد فعلا انضغطت و حسّيت حالي آلة |
| الساعة الآن 01:00 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©