السلام عليكم ورحمة الله وبركاته

اشكر كل من رد علي... انا صارلي كم يوم .. ادور على موضوعي هذا .. عشان اكون اول باول معاكم ...

المهم انا مثل ماقلت من قبل .. تلاقينا انا وبنات عم زوجي في السوق.. وحدة كانت متابعه مشاكلي مع زوجي من البدايه .. والثانية كانت تسمع من بعيد لبعيد سوالفنا .. لان بالاخير كلن منشغل بحياته واموره .. بس قالتلي انها قررت تدخل واتدور على حل.. يوم سمعت ان سالفتنا وصلت الطلاق.. واكتشفت ان انا وزوجي مافي اي اتصال بيننا.. وان كلنا نحكم على بعض من كلام الاخرين ..

الي سوته جزاها الله خير..
اتصلت فيني من يومين وكلمتني.. وقالتلي انها عقب ماتلاقت وياي في السوق.. اتصلت في زوجي..

وهذا تقريبا الي صار بينهم ..

هي: السلام عليكم
هو: وعليكم السلام ... ( وعلى فكرة هو كثير يحترمها هي بالذات .. يعتبرها غير عن الباقي وعندها اسلوب منطقي في الكلام .. )
هي: شو الاخبار؟؟
هو: الحمدلله
هي: قالت شو هالكلام الي انا اسمعه .. ليش تبي اتطلق زوجتك ؟ وكيف اتقول اذا تبون تتفاهمون روحو المحاكم... مو الرجل المتربي .. ولا ولد عمي الي يقول لحرمته روحو المحاكم..
هو: والله العظيم .. اني احبها وشاريها .. وولهان عليها ومشتاق لها موت .. واني ماقلت ابي اطلق.. ولا شي من هالكلام ..

المهم انا ماتذكر كل التفاصيل.. بس يمكن في بعض الامور.. انا ماقلتها من قبل..

قبل ولادتي .. بشهرين .. يعني كنت حامل بالشهر السابع.. ضاقت بي الدنيا وانا في بيت اهل زوجي.. نفس ماقلتلكم .. حياتي مو حياة .. ونفسيني تعبانه وكنت اعيش حرب نفسيه .. وكنت المح حق زوجي وابين له اني مو مرتاحة .. ولا هذي الحياة الي ابي اعيشها ولا اتمنى انعيشها ..
بس الظاهر هو مافهم ..

المهم .. وصلني كلام كثير.. ونصائح كثيرة .. ومنها اني اروح اشتكي لحد كبير في عائلته وكنت مترددة .. .. طفشت وطفرت .. وطلعت من بيت اهل زوجي.. وزوجي يدري اني طالعه .. على اساس اني رايحة ازور ابي.. وصدق رحت زرته في المدينه الي هو فيها .. لكن للاسف ماستقبلني يعني بصريح العبارة "طردني" وعقب تصرف ابي هذا عرفت ان ام زوجي ورا الخراب الي في حياتنا.. وابي اعترف بعدين ..

المهم هنا .. انا قررت اني اروح عند جد زوجي.. خصوصا انه قال لي من قبل .. قبل العرس.. اذا تبين شي.. ترا انا موجود واعتبري نفسك في بيتك وانا مثل جدك .. وقال حق ابي بنتك ان شاء الله ماراح اتحس بفرق.. من بيت اهلها الاصلي الى بيت اهلها الثاني..
المهم رحت لها .. وقلت له كذا وكذا .. وان ام زوجي مجننتني.. على اساس ان الكلام بيني وبينه .. وقال لي ام زوجك مجننتنا كلنا.. وقال لي ان هي مثل الابرة في بلعومه من خذاها ولده من 24 سنه وهو مو مرتاح .. حسيته فضفض لي..
وبعدين .. قلتله يا جدي.. انت قلت بتحطلنا ان شاء الله بيت لنا لوحدنا.. والبيت يبيله على الاقل سنتين .. ومع التاثيث.. سنتين ونص.. والمنطقة الي فيها بيتنا مو معمرة عدل.. يعني بيكون في كثير بنيان جنبنا وعمال.. يعني بكون لوحدي معهم لما يكون هو مو موجود .. ف شو رأيك نطلع من الحين في شقه انا وزوجي عشان ماتزيد المشاكل.. وعشان البقيه الباقيه من علاقتي باهل زوجي تبقى .. ويصير بيننا السلام ..

قال لي اوكي.. بس خلي زوجك يوافق..!!! وان شاء الله بس يعطينا الاشارة واحنا بنبدا بالاجراءات ..

المهم بعدها قلت حق زوجي.. انا مريت بيت جدك .. سلمت عليه .. وقلتله عن بعض الامور...

صرخ علي وعصب..

وقال طبعا رحتي اشتكيتي عن اهلي.. وعن امي بالذات ..

انا استغربت كيف توقع ان امه .. (هذا لان امه راعية مشاكل وهو يعرف ان امه مو زينه ..)

المهم قال لي بعدين .. بصراخ طبعا وانا مالومه .. كان المفروض اقوله اني بروح .. عند جده عشان اخليه على بينه .. بس منعوني ..

وقال: احمدي ربك انك قلتيلي لان والله لو عرفت بعدين انك رحتي عند جدي.. وانا اكيد بعرف لان كل الي شافوك هناك بيقولون لي.. كنت مادري شو بسوي..

المهم قلتله ماعليه حبيبي.. انا بقعد عند اهلي .. وجدك بيقول لك شو الي صار بيننا ..

قال لي لا انتي قولي..

(انا والله من كثر ماحبه معاه ... ماقدر اتكلم .. احبه بشكل غريب.. ويخليني ضعيفه)

قلتله ماقدر اتكلم ولا اقول..

المهم كلم جده وقاله .. وزوجي يدري اني ماقدر ارجع لبيت اهله بعد هالكلام ..

في هالفترة صارت كثير مشاكل..

وانقطعنا عن بعض..

لكن انا ماقدرت استحمل... وانا بقرارة نفسي ادري اني انا غلطانه بعد .. لكن الكل يقول لي لا انتي ماغلطتي.. واتصلت في زوجي.. وكلمته .. وقلتله ابي نلتقي في مكان او نقعد بالسيارة بهدوء من غير ما احد يدري من صوبي ومن صوبك .. يعني الاهل.. فطلعنا.. واشتكيت له وقلتله اني طلعت عشان كذا وكذا .. وكثير كلام طلع علي.. من امك .. وقال لي ليش ماقلتيلي ؟! قلتله ماتعطيني مجال.. قلتله قول والله انك ماتدري ان كل هالكلام يطلع علي قال لي والله مادري.. المهم كان بيوديني بيتهم .. وبكيت وهو تاثر وبكي معي.. وحضنني.. وقال والله اني مارتاح الا معاك .. وترجاني ارجع معاه .. بس ماقدرت لان محد يدري.. ولاني بجد ماقدر ارجع بيتهم .. ام زوجي اتسويلي بلاوي..

ونزلني بيت اهلي.. وقلتله الله يخليك تصرف معاي وساعدني.. وساعد نفسك .. وخلنا نطلع في بيت بروحنا.. وقال لي ان شاء الله ..

المهم قال لي خلاص بدبر وبدور حل...

وقال لي والله يا ام وداد اني قبل الزواج كنت نفسك .. وسالتهم كيف اتزوج وانا ماعندي سكن لنا.. قالوله ماعليك احنا بنتصرف.. وبعدين .. ماشفت شي ولا شي.. فحاولت اقنعك تعيشين عندنا.. وصار الي صار..

المهم نزلت من عنده واخر كلامه بنطلع في بيت بروحنا...

بس للاسف ماصار شي ولا تحرك ..

وبعدين ارسلت له مسج ..

وقلتله انصفني الله يخليك .. لا تحسسني ان كل الحب الي كان بيننا وهم ...
قال لي لا والله مو وهم .. بس انا احاتي انتي زوجتي وهم اهلي.. انا مضغوط ..

ومرت ثلاث ايام .. مايسال عني ولا يرد على اتصالاتي ولا على مسجاتي..

انا اول ماطلعت من بيت اهل زوجي .. وقعدت في بيت اهلي.. اتصلت في زوجي.. على اساس اقول له انا ابي اغراضي.. (وفبالي اغراضي لكم يوم بس) بس قال كل شي يخصك موجود برا...

انا انصدمت وفي قلبي قلت الي بيننا انتهى ..
وكلن فسر تصرفه هذا انه طلاق!!

ولما رحت انا وامي عشان اخذ اغراضي.. شفت كل اغراضي ملقاة في الملحق الي برا .. في اكياس زبالة وصخه .. وفيها ذباب ميت ... اتحطمت وانهنت .. واتضايقت ..

وفوق هذا كله .. انطردنا والي طردتنا خدامة بيتهم ..

ومثل ماقلت من قبل .. انا ماستحملت لان في قرارة نفسي ادري اني غلطانه بعد .. وقررت اني اطلع معاه بروحنا.. لما وعدني ان بنطلع في بيت لوحدنا..


ونفس ماقلت من قبل .. انه مايرد على مكالماتي ولا رسايلي .. ووحدة من هالرسائل كان فيها اهلي بيسافرون وانا مضطرة اسافر معهم .. رد علي عشان اعرف ردك

وقطع عني ثلاث ايام (اسفة كلامي مو مرتب.. )

وجا يوم السفر..

واذكر ارسلت له مسج .. وقلتله انا مضطرة اسافر.. ابي اغير جو ... وارجوك ابي ارد ونلقى الوضع بيننا تمام ..

وكل اهله .. وجده كبير العائلة يعتبر .. انا عطيتهم خبر وقلتلهم ان لازم اسافر عشان في ظروف في بلد امي .. واهلي لازم يسافرون ومايقدرون يخلوني لوحدي.. في البلد وخذيت الموافقه من الكل

وسافرت .. وزوجي لاحس ولا خبر.. عطيته رقمي هناك.. فبدأت ادز له رسائل ادعية ..
اتصل مرة يمكن .. او مرتين لكن ماقدرت ارد ..

ورجعت من السفر.. وانا نيتي باني ارجع زوجي لي...

وحلمت حلم مخيف عجل اتصالي به .. مادري شو تفسير هالحلم .. حلمت اني رايحة مناسبه كبيرة ماذكر شو هي بالضبط .. واني شفت زوجي وسلم علي وكلمني.. بابتسامة وهدوء.. وبعدين جت وحدة ونادت باسمه واعتذر مني وراح معها ولما سالت .. طلعت زوجته الثانية .. واذكر اني متحطمة..
وقمت من نومي مرعوبه ..

وارسلت مسج ..

صباح الخير... انت بخير؟؟ اتصل بك وخطك مشغول..

ورد علي...

قال صباح الورد .. الحين مو مشغول اتصلي فيني..

واتصلت .. الظاهر ماكان عنده رصيد ..

ورد علي وكان هادي.. اتكلمنا عن وضعنا شوي.. واستغرب من اتصالي.. وقال لي شو الي خلاك تتصلين قلتله حلمت حلم مخيف.. وهو فكر اني حلمت انه مات .. لكن ما قلته شو الحلم .. لاني سمعت الي يقول حلمه يصير!!

فقلت له ايه حلمت انك مت !!

المهم قمنا نطلع من ورا اهلي ويفترض انه ماقال لاهله ..

وفي احدى هالطلعات .. قال لي والله اني مادري ان اغراضك برة .. وبهالوصخ هذا .. وقال لي ماحب اتكلم ابي استر على الاغلاط .. الي يرتكبونها اهلي..
قلتله له وانت كيف رضيت .. ؟! اغراضي تطلع برا .. قال انا بالبدايه عصبت يوم شفت الخدم يشلون اغراضك .. بس بعدين يوم اتصلتي وقلتي بتاخذين اغراضك .. وكانك اتقولين مابيك .. قلت خلاص كيفها .. بس والله مادري عن وضع الاغراض وان هم بهالوسخ

وفي هالفترة امي كانت تكره زوجي .. واهله .. ومن حقها طبعا ..

وعزمنا انحل المشكلة لوحدنا من غير تدخل احد ..

وولادتي سهلت الامور..

وطلعت بنتي الحلوة الله يحفظها وجابت الخير معها .. زوجي كان يجي للمستشفى .. وامي تكرهه .. فقال لي زوجي اكلم امك الحين .. قلتله لا امي ماراح تفيد ولا تساعد لان في زوار وناس يجون ..

فاجلنا الموضوع .. لحد ماطلع من المستشفى بخير وسلامة ..

وزارنا زوجي.. وقلت لامي زوجي جاي .. ويبي يكلمك ..

المهم اعتذر لامي وباس راسها .. وامي طلبت منه طلبات مستحيله .. مايصير يوافق عليها .. بس وافق عليها عشان يمشي الامور... وتصفى القلوب.. ومن هالطلبات .. ان انا وام زوجي مانتلاقى ابدا ..

ومادري لو هالشي صح ولا غلط .. بس ام زوجي كانت السبب بفراق امي وابوي.. ومشاكل كثيرة كثيرة .. هي كانت سببها ..

المهم هو عطاها الامان ..

واخر كلامهم ان بنطلع بشقه ..

وامي فرحت .. وصارت هي الي تستقبل زوجي .. فرحانة وسعيدة ..

بعدها صارت المشكله الي عرضتها في بداية موضوعي..

تحياتي اختي .....احببت ان اقول الله يكون معك و يجبر بخاطرك و يفرج همك .........

الحين رديت اقرا كلامي كله ملخبط .. بس والله مخي مشوش وتعبانة ..

ادري اني قلت مليون مرة من قبل في بعض من ردودي اني.. مستعدة للطلاق.. ونفسيتي مرتاحة بس من دريت ان زوجي مايبي يطلقني.. رديت احن له واشتاق..






امي تكره زوجي وماتطيقه .. وقالت الحمدلله بنفتك منه ..

بنت عمه كلمتني امس وقالتلي تعالي اليوم عندي وقولي لامك اي شي.. وزوجك بيجي بعد ..

والتقيت بزوجي امس.. وكلمني بادب..

وخلاص بيدبر شقه خلال هالكم يوم ... وهالمرة اكيد .. واليوم راح عشان يطلع لوداد جواز ..

وخلاص وافق اني ادرس.. في اي جامعه حتى لو الظروف حدتني ادش جامعه فيها اختلاط ..

وقال لي ابيك توعدني ان اذا طلعنا في شقه لوحدنا محد يتدخل.. انتي اتزورين اهلك .. ماراح اقطعك عنهم (للعلم بعد هو قبل يوم كنت في بيتهم قال لي يومين بس في الاسبوع اتشوفين فيهم اهلك واذا قلتله ممكن اروح الجامعه ازور اختي في الجامعه قالي بس هاليوم يعتبر احد الايام الي مسموح لك بها اتشوفين اهلك .. يعني ضمن اليومين)

وقالي لي خلاص اتشوفين اهلك باي وقت عادي.. وانا بعد ازور اهلي.. وقال لي وداد .. اتروحين للبيتين .. ماقال انتي تجين معاي لبيت اهلي.. ولا ان هو يروح بيت اهلي .. مادري هل هالشي عادي ولا؟؟

وامس كانت بنتنا معنا..

وقالتله بنت عمه .. اني انا ماكنت ابيه وفكرت بالانفصال..
انصدم وتحطم وحاول يمسك دموعه وبديت يده ترتجف..

وانا بداخلي اتحطمت .. لاني مهما قلت اني برتاح بدونه .. احب هالانسان والصراحة مادري ليش...

وسالني اكثر من مرة انتي اتحبيني.. كنت اسكت واقوله لا تسالني هالاساله رجاءا .. قالي ريحيني..

بس بعد مارديت .. وكنت متغطية بالكامل.. يعني لايسة عباتي.. وبنتي يوم يغت ارضعها دخلت لغرفه ثانية ...

مابغيته يشوف شي مني .. ولا هو طلب..

وبعدين بالاخير قال لي اذا تبين شي من عيوني.. وكلميني .. يوم تفضين ويوم ترتاحين .. لكن ماتصلت فيه .. بس ارسلت دعاء.. ورد علي قال احبك .. قلتله اشكثر؟ قال كثير بشكل لا يوصف..

وسالني انتي اشكثر اتحبيني.. ومارديت ..

واليوم بطوله امي تتكلم عنه وعن كرهها له .. وكره كل اهلي له حتى خالاتي وكل اخواني..

يشوفون الحل الوحيد هو الطلاق.. نفس ما انا كنت اشوفه ..

بس الحين انا اشوف ان الطلاق اخر الحلول..!!

بس يامن يقنع امي....

امي تكرهه .. وتتمنى اني مارتخي واقول ابي زوجي.. واحبه ..

والصراحة الصراحة .. ماقدر استغني عن زوجي احبه .. اكتشفت هالشي امس ... لاني من اشوفه يطير الكلام والعتب.. واسامحه في خاطري بس ماوضح هالشي...


الحين انا ادري اني بطلع مع زوجي في شقه بروحنا .. وادري انه بيوفي بوعوده .. لانه يمكن حس بقيمتي وافتقدني خصوصا يوم عرف اني فكرت بالانفصال وممكن يخسرني..

بس ماقدر ارجع له .. الا وامي راضيه عني... لان بصراحة امي احتوتني اكثر من مرة .. لما زعلت من زوجي.. وكم مرة ازعلها عشان زوجي.. بس للاسف زوجي يخيب ظني..

وماقدر هالمرة .. من عقب ماصريت على الطلاق ارجع بسهولة وامي مو راضيه عني..

شو الحل؟!!

اهل زوجي .. بطريقه غير مباشرة يحاولون يقنعون امي بان زوجي مافيه كل هالعيوب .. وطيب.. بس امي تنفجر..

لان زوجي بعناده .. بين لامي بانه يمشي بطوع امه .. وهو اعترف بغلطاته امس..

وانا اعترفت امس باني غلطانه .. في بعض الامور..

انا رحت ضحية لكلام الناس.. وتدخلات امه في البدايه بعدين تدخل امي.. وعناد زوجي...

وام زوجي وابوه مو مسوين حق زوجي اعتبار.. ابوه يقول للكل ان زوجي مايبيني وانه هو قال له هالكلام بس هو ماقال..

وامه اتقول بانه قرر يطلقني من زمان ..

بس هالكلام ماصار..

اشكركم كلكم والله على الرد ... احبكم في الله .. واحب هالمنتدى ..

لاني ماطلعت الي بخاطري لحد والله ...

قال لي امس اتمنى والله اتمنى .. ان وانتي ووداد .. انهج وانسافر لدوله بعيدة عشان محد يتدخل في حياتنا..

والصراحة انا بعد صرت اتمنى هالشي.. لان والله احلى ايام حياتي كانت في شهر العسل.. لان كنا انا وهو لوحدنا ما معانا احد .. وكنا مكتفيييييييين كنت اشوف الدنيا فيه وهو يشوف الدنيا فيني .. وماملينا من بعض.. كنت احس ان الكل حولي.. مع ان محد معاي الا هو .. كنت سعيدة جدا..
والحين انا على العكس...

يووووووووووووووووووووووه ياأم وداد

توني قريت مشكلتك وقريت جميع ردودك


وربي مادري وش أقولك؟؟

الله يفرج همك

وبالنسبة للوالدة الله يحفظها

اصبري إلين يجهز الشقة وحاولي شوي شوي تغيري نظرتها

مثل تبينين لها مشاعرك بكل صراحة وبدون ماتستحين وتقولين لها أنتي أمي وعلى عيني وراسي

ولو مارضيتي عن زوجي بتنازل عن كل شئ لعيونك يامي

وصدقيني بتتنازل إذا عرفت مشاعرك نحو زوجك مافي أحد أرحم منها فيك وصدقيني يمكن تبكي بعد

بس أهم شي خليييييييييييييييييك صريحة معها بمشاعرك وماتخجلين

ربي يوفقك ويفرج همك يارب

مشكورة يالالمعية على مرورك واهتمامك...

انا حصلتلي مشاكل كثيرة .. كنت اعبر فيها عن مشاعري تجاه زوجي عند امي... وكانت اتلين.. عشاني واتسامح ولا تفكر تزعل حتى ..

بس هالمرة خلال الفترة الي فاتت الي هي تقريبا شهرين .. وخصوصا من بعد ما سمعت ان زوجي مايبيني ويبي يبهدلني في المحاكم .. حسيت اني كرهته او تراوالي اني كرهته .. لكن ... لا من شفته فز قلبي وسويت نفسي ماهتميت .. قدامه

انا الي ابيه .. اني اذا رديت لزوجي .. امي ماتقول قص عليك بكلمتين ورحتي ركضتي له .. ابي اروح لها وارجع بكرامتي.. واهل زوجي قالوا بيساعدوني.. وياريت والله ياريت يجي اليوم الي امي اتقول لي فيه .. روحي يا ام وداد .. روحي عند زوجك تراه يستاهل كل خير.. روحي وانا بكون سعيدة لكم ...
ان شاء الله يجي هاليوم ..


ومتى ياربي.. ينتقل موضوعي .. لعالم المشاكل المحلولة ..
واكون انا سعيدة وراضيه .. بمصيري..

ادعولي.. واذا يا جماعة الخير.. ياهل المنتدى الطيبين عندكم .. ادعية تناسب وضعي واتفيد .. عشان ارفع يدي وادعي ربي.. بان الله ييسر لي امري.. مع زوجي الي صدق احبه ولا من غيره .. وانا راضيه بكل الاحوال

لااااااااااااااااااا يالغالية إذا هو جهز الشقة مراح تقول أمك ذا الكلام

بالعكس بتحس إنه الرجال تعدل

وهي بنفسها قالت إذا جهزت الشقة تعال

الله يسهل امورك يارب