أخواني أخواتي :

إليكم ببعض التفاصيل التي قد تساعدكم في نصحي وإرشادي :

عمري 26 عمرها 20 .

1- زواجنا صار له سنة .

2- أنا وهي الآن في غربة ( دولة أجنبية ) عشان الدراسة صار لنا من جينا 4 شهور.

3- أعتقد أنه لا توجد لغة تفاهم مشتركة فيما بيننا .

4- أنا عصبي وإذا خلتني أعصب من بعض تصرفاتها أقط كلمات قوية وأندم عليها وكذا مرة من بداية زواجنا صار هالشيء لكن من قبل رمضان الحمد لله حاولت أضبط نفسي .

5- أنا أحترمها ولا أظلمها ولا أقدم الأوامر عليها وإن بغيت شيء منها بكل أدب واحترام أطلب منها.. وقد سألتها صراحة هل ظلمتك ؟؟ تقول لا .

6- أنا اللي أقوم بشؤوني الخاصة .. من غسيل ملابس إلى كويها إلى طبخ ( أحياناً هي تطبخ بنسبة 50%)
إلى تغسيل الأواني ( أعسل الأواني بنسبة 70% ) .

7- إذا جينا نتفاهم وخصوصاً في الفترات الأخيرة تقول ما في فايدة من التفاهم لا نتفاهم أحسن وتمتنع عن الكلام ..

8 - هي الآن حامل في بداية الشهر الثاني .. وحملها والحمد لله مريح وطبيعي ولا في أي أعراض ولا فيه تعب ..

7- الثلاث الأيام الخيرة .. عندما وضعت موضوعاً في قسم عالم المتزوجين عن تصرفات زوجتي وبعد نصائح الأخوة والأخوات قررت أن أغير من طريقة تعاملي لها وصار تعاملي في هذه الثلاث الأيام كالتالي :
أنام من دون ما أقول لها ... أقوم أسوي لي أكل ولا أحسبها معاي ..كلامنا في اليوم لا يزيد هم 5 كلمات وللضرورة القصوى .. البارح راحت تنام في الصالة وخليتها ما قلت لها ضلي في الغرفة ...

وأجلس اليوم الصباح وأقوم أبدل وأروح الكلية وبعد 10 دقائق من خروجي من البيت إلا بهذه الرسالة المؤلمة ..

اخوي يمكن البعد اللي بينكم خلاها اتقول هذا الكلام ويمكن اتكون ملت من هذي العيشه وبعدين هي في فترة وحام وفي الوحام نفسية المراه تتغير كثير للاسوأ انت اصبر وحاول اتعدل معاملتك وياها وانشاءالله تتغير

اخوي اول شي لازم تفكر فيه الطفل وثانيا انها حامل واول مولود يعني النفسيه سيئه وانا قلت لك من الموضوع الاول اسأل نفسك واسالها ليه تسوي
يمكن فيها شي
اجلس معاها وعليك بالحوار الهادئ وبأذن الله توصلون لنتيجه طيبه
واصبر

عادي طنش الرساله ولا كان في شي بس يمكن عندكم فتور عاطفي وانتوا في غربه حاول تصلح العلاقه اللي بينكم وعلى قوله اختي البحرينيه يمكن نفسيتها تعبانه بس صدقني انها راح تندم على المسج .. يا رجال ترى النساء قلوبهم مثل العصفور الصغير بكلام رقيق وحركات تمثل الحب والله تلينها وتصير لك مثل الخاتم انت بس عطها حب .. وراح تشوف النتيجه تجاهلها لم تشوف منها هالكلام لكن صدقني هي ما تقصد اكيد قالته ونفسيتها تعبانه انتوا في غربه ومحد يحس بالغربه والنفسيه التعبانه الا اللي جربها يمكن تقول كذا علشا مشتاقه ترجع لاهلها وما لقت معاك شي يعوضها الحرمان .. دور النقص اللي بينكم وحل المشكله والمسج طنشه ولا تعيره اي اهتمام ومثل ما قلت لك عطها حب وحنان وخصوصا انها حامل يعني اكيد تعبانه حتى لو انت تشوف وضع الحمل مريح .. اسفه على الاطاله بس احس اني تفاعلت مع موضوعك :)

على عيني وعلى رأسي نصايحكم بس أنتو متخليلين هالكلمة :


أنا خلاص كرهتك ..

يعني غربه وحمل وزوج كل شي جديد عليها
والله ما ادافع عنها بس لازم تتناقشون ليش قالت كذا
وايش تبغى وياتقنعها او تقنعك

الاخلاق عادي بقولك شي يمكن ما تقصدها انا لم ازعل على زوجي اقوله اكرهك وساعات اعيدها وهو مادري شنو تاثيرها عليه بس اكيد عارف انها بلحظه غضب وبس نتصالح اقوله احبك يعني عادي مو شرط تدقق عليها

هذه الكلمة طبيعي تقولك لها بسبب سلبيتك في التعامل معها .

انت تقول في اليوم بيننا خمس كلمات فقط !! وتبغيها ما تكرهك !

يا اخي اذا كانت ساكتة حاول انك تكلمها .. تحتويها .. تفهمها .. تلاطفها .. تتحملها ..

انت الرجل ..افرض وجودك وكلامك وشخصيتك عليها ..

انتم عايشين في بلاد الغربة وما لها غيرك هناك .. ومع هذا انت شحيح الكلام معها حتى لو صدتك ..

اجلس مع زوجتك زوجه هادئة في مكان خارجي جميل وبث فيها روح الأمل والتفاؤل والكلمات الجميلة ..

وبعدها شوف النتيجة ..

أختي الكريمة :

ترا زوجتي دائماً تقول لي ما أحبك ( لا حظي أقول دائمأً وأنا أقصد ما أقول ) ... لكن أخذ كلامها هذا على أنه دلع بنات ... مع العلم إنها ما تنفي كلمتها بعدين ..


لكن هالمرة ترسل لي عن طريق مسج ,, وبهذه اللهجة القوية ؟؟

7- إذا جينا نتفاهم وخصوصاً في الفترات الأخيرة تقول ما في فايدة من التفاهم لا نتفاهم أحسن وتمتنع عن الكلام ..

من النوع اللي ما يتفاهم هي ..