المشاركة الأصلية كتبت بواسطة بنت الحكمي (المشاركة 2632912)

الأخت الغالية سيدة الموقف ياشيخة تشجعي وش ذا الخوف فيك كلها دفتين و يطلع البيبي وآء وآء وآااء وتشوفيه قدامك وتتبسمي وترتاحي ترى أناأول ماتزوجت وكان باقي ماخلفت عيال كان لي زوجة أخوي من أبوي كانت تقرب للوالدة الله يرحمها بنت عمها ولو جلسوا مع بعض وسولفوا تعالي وشوفي سوالفهم عن الحمل والولادة بالذات إنهم كانوا إذا حملوا يحملوا سوى مع بعض بفارق أسابيع بسيطة بينهم حتي إخواني الصغار متقاربه أعمارهم مع أعمار عيال أخوية الكبير وحتى بعض إخواني أ صغر عنهم لأن أبوي زوج أخوي وهو بعده شاب صغير المهم ياستي يجلسون يسولفون وأقرقونا بألآم الولادة
وزوجة أخوي جلست تعيد وتزيد وتحكي عن جميع ولاداتها و بعدين قلت لها غيري السالفه ترى ماصارت كل ماتجمعتوا أنتي وأمي سوالفكم كلها عن الولادة لو أنا مكانكم كان أدفه دفه وحده بس أخليه يطلع مثل الصارو خ ليش عاد أجلس كل شوية أ تعذب
وأعذب نفسي قالت لي طيب نشوف أنت الحين متزوجة ويارب تحملي ولو جيتي تولدي أنا بروح معاك أخاف إبنك يطلع منطلق مثل الصارو خ من بيمسكه أخاف الممرضات ينخرعون منه لو شافوه طالع بهاذي السرعه
إلا خليني معاك علشان أوقف قدامك أول مايطلع أنا أمسكه
علشان مايطيح وهو منطلق .
قلت لها ذاك الساع يصير خير إن شاء الله المهم أختك في الله طولت ماحملت بعد الزواج إلا بعد 8 سنوات وحملت وسقطت أول مرة ورجعت حملت مرة ثانية وأناساكنة بمنطقة ثانية غير منطقتنا إللي فيها أهلي و تعبت في حملي تعب مايعلمه إلا الله وحده وكنت بسقط لولا لطف الله ورحمته بحالي وحال زوجي وحملي جبته ببداية الشهر الثامن لأني كنت تعبانه وترقدت إسبوعين بالمستشفى وأعطوني طلق صناعي لمدة يومين مواصلة كل ثمان ساعات وشفت الموت قدام عيوني من شدة الطلق وعقبها ولدت بعد مشقه وتعب شديد وعرفت معنى الولادة وألمها و كان عندي جرثومة حمل وأنكشفوها في وقت متاخر وقالوا لي الأطباء إحتمال ولدك يطلع مشوه وطلع ولدي الحمدالله من فضل الله علينا بخير وسليم معافى بس كان حجمه صغير كيلو و600 جرام فقط بسبب عدم إكتمال الشهر 8 و9 وشالوه وحطوه بالعناية المركزة لمدة شهر كامل كنت أزوره ما أشوفه إلا من خلف الزجاج و عقبها وصل وزنه 2 كيلو ونص وأعطوني إياه بس لو تشوفينا أنا وأبوه وعاده كان باقي بقسم العناية المركزه كنا جالسين له على باب الغرفه وأمتحنا الممرضات على الكونتر بأسئلتنا كيف البيبي يرضع يتحرك
يفتح عيونه تغيرون له وش أعطيتوه طفشناهم لدرجة إن الممرضات طفشوا منا وأشتكوا علينا لمدير القسم .

وهاذي طال عمرك نبذة بسيطة عن أول حمل وولادة لأختك أم سلطان بأول طفل إللي هو سلطان إللي اليوم أصبح يدرس بالمتوسطه وهاذا كله بفضل الله عز وجل ومنه وكرمه علينا فسبحان الله عدد ماخلق في الكون وعدد مايكون وعدد الهمسات والسكون .