|
ايجابياته:
1-طيب 2-لا ياخذ من مالي شيء مهما حاولت فيه 3-يصلي 4-لايستفز غيرتي والله أعلم لاأظن انه حق علاقات 5-يحسسني بإني ماليه عينه وقلبه 6-مايقصر ببيته على قد حاله 7- اذا كان راضي يخلي سيرتي حلوه امام الكل واذا غضب العكس تناقض فيه عجيب سلبياته: 1-عقليته صغيره 2-عصبي لمن يزعل مايوزن أموره ممكن يخسرني 3-لايحفظ لي سر أبدآ 4-تعلقه بأهله مو بس حب لو كذا انا أشجعه لاكن لاء يحب يفضفض لهم بكل صغيره وكبيره 5-لو لقي عليه غلط يمشي الين يحدث مجلس ويتكلم فيه امام الكل بدون مايحسب حساب لنا لو تصالحنا كيف تكون النفوس وان المفروض تكون حدود مو اي شيء نقوله بإختصار مايخلي شيء بيننا 6-يحلف احيان كذب عشان يثبت لي صدقه 7-مادياته ضعيفه مع ان ذلك لايهمني بس للتوضيح 8-عنده مشكله بالخلفه 9-يوعد انه مايوديني بيت أهلي بزعل ويخلف بوعده ولمن أذكره يقول خلاص انتهى اللي بيننا انتي تبغين كذا 10-مايبغاني أكمل تعليمي بأي شكل من الأشكال يقول انا المفروض اواصل دراستي الجامعيه انتي يكفيك علم وثقافه 11-اخاف اسوي اي شيء وانفهم غلط ويوصلها بطريقته عشان كذا دائمآ مقل المتهمه أبرر كثييير 10--لايحتوي مشاكلنا برغم انه اساس مافي مشاكل كبيره لايحمد الله فعلآ لإنه هذي التجربه ال2 لي وله وان الله اعطاه بإنسانه مقدره كل ظروفه ماديآ ومعنويآ بل يحاول يكبر الاشياء الصغيره تعبت أفهمه اننا مو ناقصين تعب 12-عند حدوث اي مشكله لازم يشاور اي أحدحتى لو اصدقائه بالدوام اهم شيء يفضفض 13-يعبي قلب أهله عليه ويشحنهم ويقول انافهمتك كذا ولايتوب كل مره نفس الشيء يحاول وقت الغضب يخلي أهله بصفه بأي طريقه وكأننا والعياذبالله اعداء بالنسبه للأسئله: هل ممكن يتغير ؟ اقول ربما ولاكن هو متقلب فلا أضمنه ودايم يوعد ويخلف هل ممكن اعطيه فرصه ؟ احسها اهانه ليه باللي سواه فيني يساومني على فلوس برغم اني أدري انه يبغاني لإنه يرجع يتصل لاأنكر اني احببته وتمنيت ان ينتهي عمري معاه ولاكن دامها وصلت كذا لاء أشعر بأن الله يوجهني لطريق أنا ماادري عنه لإنه حتى فبعد بنتي ماراعى نفسيتي ويقول انا مو شغلي برغم اني ابعده كثيررآ عن وضعي السابق وفي الختام اتمنى اني لاأظلمه مثل ماتدرون المرأه في التجربه ال2 تكون أكثر تروي وخوف برغم اني والله الشاهد ماقصرت معاه |
من حيث الكم أجد أن سلبياته أكثر من إيجابياته...لكن هناك في سلبياته ما تستطيعين أنتِ معالجتها بالحكمة، والعقل، والصبر، والذكاء الأنثوي، وجذبك ناحيته.
زوجك فيه من صفات الأطفال، ومن صفات غير الناضجين لكن فيه صفات حسنة وأهمها الصلاة، وعفة نفسه ويده عن مالك. سؤال: ما هي حقيقة مشكلته بالإنجاب؟ هل هو عقيم؟ أم أن علاجه يطول؟ هل لديك رغبة في الإنجاب أم لا؟ هل مشكلته عائق أمام استمرار الحياة؟ -لو قررتِ العودة له فقومي بالاستخارة، واجعلي هذه الفرصة الأخيرة له، مع الرغبة في إصلاحه واستغلال ذكائك لتغييره، والدعاء له، واجعليه يقسم على المصحف بحفظ الأسرار الزوجية والحياتية بينكما، وأعطه فرصة أن يفضفض لكِ أنتِ، وخوّفيه بالله دوماً، واتركيه إن غضب واصمتي حتى يهدأ...عامليه كزوجة وأم في آن واحد. -لو قررتِ الانفصال فاستخيري، وأعيدوا حقه إن طلب ما دام أن وضعكم المادي جيد كما ذكرتِ. -الخلاصة: فكري مرة أخرى، واستخيري، ولا تكثري الاستشارة ممن حولك في البيت، أو من مجتمع آخر حتى لا تتشتتي. -همسة: أنتِ لا تريدين الطلاق، وتخشين من حمل هذا اللقب مرة أخرى. |
اخي في الله البليغ انت قلت في نهايه كلامك همسه ولاكنها كانت حقيقه تؤرقني دائمآ
والله كل الكلام اللي قلته سويته اعطيته مصحف وحلفته وقلت له اشتكي مني ليه انا الوحيده بعد الله عندي دواك لو انا فيوم لاسمح الله كنت دائك يبكي ويقول خلاص و3 يوم يرجع عند أهله بدون ماأدري ولا ابغا اصلآ اعرف عن عيوب زوجي اخي في الله والله انا لاأبحث عن عثراته لإن أبن آدم مليان عيوب ولو ابغا المشاكل هو عنده ليموزين كان بإمكاني اسبب 100 مشكله بس اعطيته ثقه ولم أبحث عنها وانا ابغا أعيش ماظهر لي حاولت فيه الإصلاح ومالم يظهر وكلت الذي عينه لاتنام من عيوب فيه انت ماتدري آخر اسبوعين ليه فبيته ايش سوى كان يفتح الباب حق الشقه عالأخير ويطلع استمر اسبوع وانا فكل مره اقفل الباب وهويرجع يفتحه في آخر زعله جاب لي هدايا عطور وملى التسريحه في فتره الاسبوعين شالها كلها برغم اني أكره اللي يذل وهو مستمر بطبعه حتى العطر الي عند الحمام اكرمك الله أخذه مايتجاوز ال5 ريالات اي دناءة وصلنا لها انا ماانكر فيه صفات حلوه ولاكن يخرب كل شيء ويعصب ويستخدم يده ويقول هذا مو ضرب دائم استخير ولاأشرك أحد فأمري أبدآ لإني انا صاحبه قرار ولاكني مشوشره احتاج منك دعوه بظهر الغيب أرجوك ولكل من يقرأ معاناتي |
نسيت الإجابه عن سؤالك المعذره لاأحد قال انه عقيم ولاكن لديه مشكله عضويه ويمكن منها يخلف ويمكن لاء عاش مع زوجته قبلي 4 سنوات وماخلف منها وطلقها وانا 2 ولي معه سنه ونص واخوه الكبير متزوج من 11 سنه وماخلف
بالنسبه لي لو كان معيشني بسعاده ماهتميت للخلفه برغم انه ودي ولاكن الله كريم ولايكمل غير وجهه آخر شيء فكرت فيه انه لاعيشه مستقر ولاماده ولا اطفال فليش اصبر استغفر الله بس يارب لاتحاسبني ولاتعاقبني أخي هل انا مذنبه من الله لمن أصريت على الطلاق علمآ بإنه هو اللي خرجني من البيت وعلى طلبه هل ندمه كافي لإن أكون مذنبه وانا اللي أتحمل قراري هذا لوحدي يارب أهدي حيرتي صدقوني موقف صعب الله لايوري مسلم حاجه وخوف وتجربه سابقه استغفر الله وحسبي هو وحده وكفى |
الله يفرج همك اختي .. وييسر امرك ..
ويكتب لك ماهو خيرآ لك .. |
والله اذا بالك طويل على المحاكم وعندك شهود انه هو اللي طلعك من البيت وحتى لو ماعندك شهود تعرفين انه مايحلف انه هو اللي طلعك من البيت ... فارفعي فسخ نكاحي وستفسخين منه بلا مقابل باذن الله ...
اما من ناحسة الظلم فحسب ماذكرتي يظهر لي انك لم تظلميه ولك طلب الطلاق لعدة اسباب 1) طردك من المنزل وسوء المعامله .. 2) عدم الانجاب اذا تاكد انه منه ... الله يكون بعونك ويكتب لك الخير |
إن شاء الله لا يوجد ظلم من ناحيتك له.
لكن: -ما هو رأي والدك في الموضوع والوضع بشكل عام؟ -هل استخرتِ بشأن الانفصال؟بماذا أحسستِ بعد صلاة الاستخارة؟ -هل لديه قريب أو صديق ممكن أن يؤثر عليه؟ -هل جربتِ بأن يأتي لبيت والدك، ويتعهد أمام والدك وإخوانك بعدم التكرار، وإن فعلها فلا حياة بينكما؟ |
اقتباس:
بعد اتصال ابويه على ابوه امس جا اخوه الكبير وقال اخوي يبغا حقه كامل وابويه رفض قال من وجه الحق على الأقل يطلب النصف واعتقد حتى النصف المفروض مانعطيكم لإنكم انتو اللي خرجتوها مو هيه ولاكن انا ابغا اشتري باقي العشره والمعزه اللي بيننا وخذو 10 آلاف وخلوه يطلق قال بكلمه واشوف الساعه 3 الفجر امس ارسل لي (الله يسامحك) وألف شكر على اهتمام كل من أعطاني نصيحه جزاكم الله ألف خير وأبعد عنكم السوء حيث كان |
اقتباس:
هل المهر اللي بياخذه مني من حقه هل هو على حق لمن طلب فلوسه ارجوكم يهمني الإجابه على هالسؤال كثييييير |
اسأل الله العظيم رب العرش العظيم ان يربط على قلبك ويلطف بحالك ،، يا رب في تدبيرك ما يغني عن الحيل فدبر امتك الضعيفة بأحسن التدابير فانه لا حول ولا قوة لها الا بك .
غاليتي بالنسبة لصلاة الاستخارة أكثري منها دائماً واعلمي ان ما سيكتبه الله لك هو خيرة لك في الدنيا والآخرة سواء رجوعك لزوجك او الانفصال عنه |
| الساعة الآن 12:33 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©