حابه أشارك في الموضوع زان شاء الله أقدر أفيدكم, أنا زوجه وربة بيت كملت دراستي في المحاسبه والبنوك بس ما اشتغلت, علشان جذيه حبيت أستفيد ع الأقل بدراستي في تنظيم ميزانية البيت.

أول شي دخلت زوجي في جمعيات تستمر 10 شهور وتتتوقف بس في الاجازه الصيفيه(فرصه عشان نسافر):)

ثاني شي أقسم مصروف البيت الكاش مثلا للغاز والماي والخضره والفواكه في مظاريف وكل مظروف معنون منعا للبس.

أدفع الفواتير من تلفونات لمعاش الخدامات من أول الشهر.

أهم شي أسير أتسوق من أول الشهر وآخذ كل مؤونة البيت اللي تكفي شهر علشان أقلل من طلعاتي للجمعيه خلال الشهر وأضطر اني آخذ اللي احتاجه واللي ما أحتاجه.
بهذي الطريقه أكون رتبة مصاريف الزوج.:22:

بالنسبه لمصروفي أنا مبتكره طريقه وايد عمليه وفادتني واااايد اللي هي طريقة الألبوم بمعنى لو الزوجه ولنفرض مصروفها 3000 درهم تقسم المبلغ على عدد أيام الشهر فيصير كل يوم عندها 100 درهم مصروف تخرد ال3000 ميات وتوزعهم في أوراق الألبوم وتكتب تاريخ اليوم واسمه. بهذي الطريقه تضمن الزوجه انها مرتبه امورها لين آخر الشهر وتقدر بس تسحب من الأيام اللي سبقت مب الأيام اليايه.جربوا الطريقه وادعولي

نصائح متفرقه:

لا تتسوقون وانتوا يوعانين لأن الدراسات أثبتت ان الانسان قوة الشراء تكون مرتفعه اذا حاس بالجوع.

اكتبي لسته بأغراض الجمعيه والتزمي فيها علشان ما تشترين الأخضر واليابس.

انتهزي فرصة التنزيلات وخذي لبس عيالج الشتوي والصيفي وهدايا المجاملات خصوصا من الماركات لأن بضاعتهم ما تخترب.

أتمنى أكون فدتكم بمعلوماتي المتواضعه.

ماشاء الله عليك ياخت دنيا الفرح
بأكد على موضوع الهدايا انا لاحظت كل ماجتني مناسبة اروح السوق وادور بسرعه هديه اقدمها واحيانا اضطر ادفع مبلغ غالي شوي بس عشان اروح اقدم الهديه في وقتها (هدية ولادة او زواج او عيد او اي مناسبه)
وبعدين اروح اغلفها في محل هدايا بنفس السوق ويكون برضوه غالي
لكن ما شاء الله عايلتنا كبيرة وكل شوي وحده والده والثانيه مخطوبة فقررت اني ارتب وضعي
اولا استغل فرصة التخفيض والعروض في محلات الهدايا او العطور واشتري كمية ,اذا لقيت محل فيه تخفيض واجد او لقيت احد بيسافر بلد رخيص اوصيه يجيب لي هدايا واخليها عندي
اروح محل تغليف هدايا سعره رخيص حتى لو كان بعيد واشتري منه علب وكروت وشرايط
واخليه المجموعه عندي حتى احيانا استغل فرصة نزول سعر الذهب واشتري جنيهات ذهب واغبيها عندي( احيانا نهدي جنيه ذهب) تخيلو جنيه الذهب وصل سعره 350 ريال من فتره وانا شاريه جنيه ب 500 ريال في مناسبة ولاده ! فلا تستهونون باي شي
والله رااااااااحه اي مناسبه تجي ماروح اركض بالسوق واختبص
اطلع اي هديه مناسبه واحطها بعلبه واربط الشريطه واكتب الكرت
ان شالله اكون افدتكم

ياريت أستفيد منكم