|
وضع اغرب من الغريب واعجب من العجيب
سبحان الله فعلا الدنيا غريبه الي قايمه بزوجها من والى وحاطته على راسها من فوق ومدللته اخر دلال تلاقي زوجها يخونها ويهنها ويسافر ويتركها ولايسال حتى فيها ولافي عيالها واذا مره تعب كلف على نفسه بمسج وكل شوي ناط ابي اتزوج والي زوجها مريحها ومدللها نلاقيها العكس سافلته ولا كانها الحمد لله والشكر على كل حال حاول تصارحها وتتكلم معاها بحزم لاحظت انك لم كلمتها في كلمه مو قد المسؤليه انها حست فيك فمن الافضل انك تتكلم معاها وتتركها فتره تراجع حساباتها الله يكون في العون وربي وانا اقرى هالموضوع تذكرت حياتي الماضيه ومعانتي مع طليقي وزاد خوفي من المستقبل فعلا مافيه احد مرتااااااااااااااااااااااااااااااااااح اللهم انا نسالك رضاك والجنه صعب نحكم لانا مانعرف وجه نظرها ولكن اريح لك تصارحها |
أعانك الله
وعليك بالدعاء إلجاء الى الله وانا اقول يمكن تكون عندك اخطاء حاول اصلاحها اولاً وستنحل الامور |
اعطها اخر فرصه وهي انك تهددها انك رح تتزوج ثانيه اذا ما نعدل حالها
وكذا بتكون عملت الي عليك وبعدين ما تعدلت تزوج الثانيه والله يوفقك للخير يارب في رعايه الله |
اخوي سمعنا منك وما سمعنا منها شئ...
اخوي شئ لاحظته في كلامك عنها.. في شراء الملابس لاتشتري لها..يمكن هي تحب الاستقلال .. ملابسها اللي تكون لخارج البيت..مومهم انت تشوفها حلوه.. اهم شئ هي تكون مقتنعه فيها.. يمكن ذوقك غير جميل بالنسبة لها.. وكثير من الرجال ذوقهم مايعجب الحريم والبنات.. خلك من المصارحه.. انت بالسعودية.. ومعارف وين بس اكيد عندكم مراكز اصلاح ذات البين..روح لهم..موعيب.. خل زوجتك تلتقي وتتكلم معهم سواء حريم او رجال.. خل تتكلم بحريتها.. يعالم يمكن فيها شئ انت تجهله او هي مو عارفه تعبر عنه.. هم هناك اكيدراح يتكلون لين يعرفون ايش علتها... ما نقدر نستبق الاحداث.. لانه مرت علي كذا حاله ولازالة قائمة...يكون الزوجه ما تقدر تعبر.. او يكون الزوج اعلى من زوجته بالتعليم ومتغطرس عليها..وهي اقل منه..ما يحاول ينزل في تعامله على قدها... |
حرام عليكم على طول نصحتو الرجال يتزوج ثانيه (خوش نصيحه والله)
اخوي لمازوجتك عاتبتك ليش تروح السوق هذا معناته انها تغار عليك (يعني تحبك) بعدين ترا ذوق الرجال بالملابس النسائيه مو شي (ماحبت تجرحك وتقول موحلو بدليل لماسألوها عن سعره قالت400 برغم انك شاريه ب950 وبعدين هي مو ساحره عشان تعرف شنو في بالك _ ليش مالمحت لها انك تبيها ترا المرأه تحب ان زوجها يكون راغب فيها وهو البادي وصدقني زوجتك من النوع اللي يكتم بقلبه ومايبين مشاعره وتلقاها تتعذب من هالشي_ مافي حل الا المواجهه وراح ترتاح ان شاءالله |
اقتباس:
اختي الغاليه اتمنى تقري الموضوع كاملا قبل ماتردي علشان موضوع اختيار الملابس وعذرا لمداخلتي |
أستغرب من قل صفحات الموضوع رغم أهميته وغرابته !!
تدري ؟؟! الحريم ماودهم يقولون لك: ترى الحل في التعدد !! |
اقتباس:
الله يهديك يا جنة !! بالله عليك هذا حل! ليش هي وش سوت علشان يعاقبها بهالعقاب؟! ترا الزواج مو سهل. انا ابغ افهم انتي وشلون قدرتي تقولين هذا الكلام ترضين احد ينصح زوجك يتزوج عليك؟! هي غارت عليه يومه دخل السوق هذا دليل انها تحبه. يمكن هذه طريقتها اذا جت تعبر عن مشاعرها وبعد هي شكرته و قالت ذوقك حلو بعد ما حضرت المناسبة يعني انا ما اشوف انها اخطأت هذاك الخطأ اللي يخليه يتزوج !... |
ابفول لكم شي لأجل تعرفون أنا ليش كتبت ولا مليت من الكتابه بكل بساطه لأن صدري مليان واخاف اني اشيل عليها وبعدها أحقد وفي الأخير أكيد بدور فرصه عشان أنتقم منها أو ما أصدق ألاقي شي وأحط حرتي فيها .
أنا أكتب هنا لأجل أفضفض والسبب الأهم انا لست من النوع اللي يشكي همومه على الناس مهما كانت قرابتهم أو قربهم لي وثقتي فيهم الله خلقني كذا ولكن بكل أمانه حسيت اني بديت اختنق وبدا صدري يضيق وحسيت اني دخلت دائرة الهم رغم اني بذلت كل شي مافيه شي يخطر على بالكم أو ما يخطر الا سويته ومنها : أشرطة الكاسيت اللي تتكلم عن الحياة الزوجيه وتربية الأبناء وحقوق الزوج وحل الخلافات الزوجيه . كتب ومنشورات من النت . النصح المباشر والمصارحه . الوضوح والشفافيه والمصداقيه . الاهتمام بالعائله وهي فرد من العائله . تلبية المتطلبات الاساسيه والكماليه . تقديم المساعده والوقوف بجانبهم في عدة أمور مادية وإجتماعيه . الهدايا . اذا قالت ماطبخت عندي لستة للمطاعم أقول لهم وش تبون من أي مطعم . زيارة اهلها متى ما أرادت رغم بعد المسافه نوعاً ما . المذاكرة للأولاد في أوقات الدراسة والامتحانات ولكي اكون صادق هذا الشي انتهى ولم يحدث في العام الدراسي الماضي لأني حسيت اني بديت اتعب من الحال المايل وزيادة حجم المسؤليه عن الحد الطبيعي المعقول أو قد يكون من عاشر القوم صار منهم . ونقطه مهمه نسيت اذكرها سموها مثل ماتبون شي عادي أو شي كبير وعلى قولتهم لأجل عين تكرم مدينه اذا طلبت زيارة اهلها كنت اقدم اجازه اسبوعين او ثلاثه على حسب مانبي نقعد وأروح معاهم وأستأجر شقه مفروشه قريب على بيت اهلها وتزور اهلها مثلاً المغرب وانا اروح للأصدقاء وأسهر بإستراحه واذا انتهت سهرتها عند اهلها اتصلت على 2 أو 3 واجيهم ونروح شقتنا نقوم الظهر اطلع اجيب لهم الغدا ونجلس للعصر نتقهوى واحيان كثيره نطلع المغرب نلف ونتمشى في حدائق أو سوق والا نروح مطعم ونطلع 10 أو 11 انزلها في بيت اهلها واطلع الاستراحه والتمشي كل يوم ورا يوم واحيان يومياً ... لحد ما اخلص اجازتي ومره عرفت ان اخوها بيسافر برا يتمشى طبعاً عرفت منها لأنها كانت متكدره ولا ودها اخوها يسافر لأن مافيه بالبيت رجال الا هو وامها حرمه كبيره بالسن وتعبانه وخواتها اللي عند امها وش بيسوون قلت متى بيسافر قالت بعد اسبوع قلت كم بيقعد قالت يقول اسبوعين وقلت له لا رح اسبوع وارجع اذا ودك حرمتك بتوديها اهلها ولا فيه مشكله عندها لكن امي من عندها ماغير البنات قلت عادي اصلا حنا بنروح لهم وانا الصراحه ماعندي فلوس عشان استأجر شقه وكنت مخطط انزلكم وارجع لكن دام زوجة اخوكي مو في البيت ممتاز حتى انا عندي اشغال ودي اقضيها وانا اكذب عليها الفلوس موجودة ولله الحمد بس عشان لا يصير بخاطرها ولأجل تحس ان جلستي عندهم مو عشانهم يعني عشاني وهي اصلاً فاهمه ان كلامي كذب بس لا تحس اني ممكن فيوم اقول سويت لك كذا واخوكي ترك امك وانا اللي كنت عندكم وفعلاً رحنا وجلسنا اسبوعين وهي تشوفني ما أروح الصبح ولا أقوم يعني مافيه شغل ومنامي بالمجلس وما انساها مكيف الله العالم فيه ماأقدر انام اتقلب بالساعات حر موووووووت وانام لما ادوخ غصب عني بعد طلعة الشمس واذا قمت اقوم الظهر على ازعاج الأطفال وأقوم أحس راسي كبر البيت من الصداع والتوتر والقلق لكن مابينت لها شي نهائياً وكل يومين ثلاثة أقول بنطلع نروح نتمشى تغيروا جو عن اللي انتوا فيه وكانت اجازتي ثلاثة اسابيع ووديت امها كم مره مستشفى بالليل بالنهار واغراض البيت جبت من إلى حتى الحلويات والعصيرات وجا اخوها بعد اسبوعين قلت خلاص نرجع لأني تعبت ماصدقت الاسبوعين يخلصوا المهم لما جا اخوها كان وقت المغرب جلست معاه وطلعنا الاستراحه طبعاً ماخلى شي ماسواه كل شي قاله لي المهم سهرنا بالاستراحه وارسلت لها رسالة ان انا الليله بنام برا ودقت علي ليش ووين قلت باخذ لي غرفه بفندق اريح لأني من جينا ما ارتحت ولا بالنوم قالت لا تعال قلت لا وين اجي وزوجة اخوكي جت البيت قالت ماهي عندك انت بالمجلس قلت انا هاج عن هالنومه هذي ابرتاح بنام قالت زين ماهي مشكله قلت المهم بكره اذا صحيت من النوم بمركم ونرجع تجهزي قالت اجازتك باقي فيها اسبوع وليش نروح قلت هي اجازه 3 اسابيع باقي اسبوع نريح في بيتنا قالت لا انا ماني رايحه بتروح لحالك بسلامتك قلت بكره جايكم وجيتهم العصر قلت جهزتوا قالوا العيال لا وشوي والا تجي مكياج وتسريحه وشياكه قالت اجلس مانبي نروح والا ناخذ لنا شقه قلت الاجازه لي ولكم وانا ودي نريح في بيتنا وخصوصاً عندي اشغال لازم اخلصها قبل الدوام قالت اجل بنقعد وتجي قلت لها دام هذي سوالفك اعرفي ان هذي اخر مره اخذ فيها اجازه وأقابل اهلك معك اخذ اجازه وانزلكم هنا واطلع مصر قالت انت تحجج ودك بالسفره ولا تدري وشلون قلت وش اللي يمنعني قالت مدري لكن اذا قصدك على اخوي ليتك مثله اذا سافر مايروح لا هنا ولا هنا قلت وش دراكي قالت اخوي وأعرفه ويقول حتى الناس اللي راحوا معه عاقلين أما أنت الله العالم فيك أنت وأخوياك ... قلت خير ان شاء الله هذا جزاي اسبوعين مقابلكم واخوكي يتسرمح بالقاهره وانا متولي البيت وعشان مين عشانك انتي ولا قدرتي لي الشي هذا ومشيت وفعلاً كانت اخر مره اخذ فيها اجازه عشان ابقى معاها اذا كانت عند اهلها والكلام هذا قبل 3 سنوات ولما جت الصيفيه الثانيه قالت قدمت اجازه قلت ليش قالت عشان بنروح اهلي قلت اوديكم الخميس وارجع الجمعه وتحاول لين داخت ومافيه فايده وفعلاً نزلتهم ورجعت وقعدت 3 اسابيع ولما رجعت قالت انا عندهم ولاني عندهم بالي مشغول عليك قلت خلاص مافيه شغل الهبال الأول . بقى الأهم اللي بتعرفونه يمكن تقولون توني متزوج وعشان كذا الوضع الحاصل .... أنا متزوج من 15 سنه ... أما مايقال في الردود تزوج الثانية عشان تأدبها أنا ذكرت اني ما اتعامل بالمنطق هذا الزوجه الثانيه اذا كتبها الله لن تكون وسيلة تأديب بل زوجه مصونه لها احترامها واعاملها مثل ما اتعامل مع الأولى ولا تتحمل انعكاسات تصرفات زوجتي الأولى فبنات الناس ليسوا عصي يؤدب فيهم غيرهم ... انا بتزوج لأجل نفسي لأجل سعادتي وراحتي . واشكر لكم سعة صدوركم ... ام السوسه اشكر لكي تعقيبكي وأسأل الله سبحانه وتعالى بأسمائه الحسنى وبصفاته العلى وبكل اسم هو له علمه أحد من خلقه أو أستأثر به عنده في علم الغيب وبإسمه الذي اذا دعي به استجاب أن يرد أولادكي لكي ويقر عينكي بهم ويلم شملكي وشملهم وأن يكون حفيظاً لهم من كل سوء ويكفيهم شرور الإنس والجان وشرور أنفسهم وشر كل من به شر وأن يكون معيناً لكي على فراقهم وأن يجعل ما أصابكي تخفيف ذنوب .... انه سميع مجيب الدعاء ... |
قريت موضوعك وضحكت وبكيت بنفس الوقت ليش؟؟
لانه كان هذا طبعي اول ماتزوجت:( كان زوجي جدااااااااااااا رووووووووومنسييييييييي وان متربيه للامانه ببيت مايعرف الرومنسيه ولا الكلام الحلو كل الوقت صراخ بصراخ الله يغفر لهم ويرحمهم ويجمعنا بهم بجنات النعيم وزوجي العكسسسسس امه جدا رومنسييييييه ماشاء الله عليها فطبيعي كل واحد يتصرف على تربيته تخيل اول ماطلعت الجوالات اهدا لي زوجي جوال مع شريحته بمبلغ وقدره وانا ااااااااااااخ بس كيف رديت عليه من قوه المفاجاه تكلمت عليه كلام شييييييييييين خخخخخ شرر البليه مايضحك ومن بعدها حرم يهدي لي ومن بعد ماوقعت في حبال النت وبديت اقرا في الموقع هذا وكتابات الاستاذه ناعمه الهاشمي الله يجزاها خير تغيرررررررررت حياتي مليون في الميه وصرت اكثر رومنسيه واعرف كيف اتعامل معاه جرب الطريقه مع زوجتك وخليها تتثقف من النت خصوصا كتابات ناعمه ااااااااخ عليها ماشاء الله عليها والله يجزاها عنها احسن الجزاء وشي ثاني انت دائما كرر على زوجتك اللي قدمته لها مو تمنن طبعا لاااااا حتى بس تعرف انك تقدم لها لاجلها ولاجل سعادتها لانه بصراحه اكثر الحريم ماتحس ابداااا بقيمه اللي عندها وتحسه شي طبيعي وتتخيل ان كل الناس مثلها <<احس هالجمله غير مفهومه |
ياأخي الكريم (اما امساك بمعروف أو تسريح بإحسان)عيب عليك تتكلم عنها هي زوجتك وام عيالك مهما صار وصارز كلمها واقولها عن عيوبها وخلاص واذا ما تريدها استر عليها بسألك سؤال انته ترضى ان زوجتك تكتب عنك في احد المنتديات ؟
عشان سبب واحد انها جافة ومش رومانسية تعبت ومليت وما قدرت تستحمل أي منطق هذا؟قمت تشتكي اصبر .الصبر مفتاح الفرج وابغض الحلال عند الله الطلاق حاول وياها بس صارحهاوكلمها وهذي عادات سهلة ومكتسبة وتتقدر تتعلمها وخلها تدخل موقع مملكة بلقيس وتسجل فيه وما راح يستوي الا اللي يرضيك بس اصبر عليها وان شاء الله بيصلحها |
اخي انا مع ام جمانه صارحها ( وإلا فيه حد طايل) الله يوفق بينكم يارب صارحها
|
ليش ياأم عالية مايكون حل ؟!!
إذا ماكان التعدد هو الحل هنا أجل وين يكون ؟!! وطبعا أنا قلته له هو يعني عشانه مو لتأديب حرمته ،، والله عيشة تقصر العمر والله ماحد على هالعذاب ! 15 سنة ياكافي !! ووالله لو إن أختي من أمي وأبوي هذا حالها مع زوجها وتعب في إصلاحها لاأنصحه مثل مانصحت ولهااان .. ولو إني أنا كنت مكان زوجها وتزوج علي زوجي لاأنطم وأسكت وأحمد ربي إنه مخليني في عصمته إلى الآن .. كفانا تعامي عن الحقائق يابنات ،، علموني الرجال وش قصر فيه ؟! وعلموني حرمته وش قدمت له ؟!!!! نعم تزوج لكن عليك بالعدل ومهما تقدم لك الزوجة الثانية لايصدك هذا عن العدل وتذكر الوعيد المترتب على تركه، وتخير دائما من ذات الدين .. وفقك الله ويسر أمرك ... |
اقتباس:
اذا هو يبي يتزوج بكيفه من غير ما نقوله احنا على العموم حصل خير,.. |
جزاك الله الف خير على دعوات الطيبه
والله يستجيبها يارب بس دامك تشوف انك سويت كل شي تقدر عليه وحاولت وصرحت حاول تعطيها خبر انك ممكن تتزوج او ناوي يعني لاتفاجاها على طول خلها تكون عندها خلفيه (وجه نظري) واي شي تسويه لها ولاهلها خله خالص لوجه الله عزوجل لان الناس تنسى المعروف بس رب العالمين ماينسى وحاول انك لمى تتصرف اي تصرف يكون عن قناعه ورضى لنفسك اولا نصايحي اكيد انك عارفه لانك اكبر واعرف مني وحسب ماقلت مجال عملك مخليلك تختلط بالناس لاكن اهم شي في الحياه ان الانسان يعيشي راضي عن افعاله وتصرفاته ويكون ربي راضي عنه ووالديه والا الدنيا لابد انها تزعلنا مهمى حاولنا نعدلها لانها دنيا زائله اسال الله ان يكتب مافيه خير لكما انه على كل شي قدير |
قرأت موضوعك وقرأت الردود كلها ...
يبدو لي من كلامك ووصفك لحالتك ان هناك شيئ ما ينغص على زوجتك وحياتها معك نحن سمعنا منك انت فقط ولم نسمع منها هناك حلقه مفقوده بكلامك ... هناك شيئ مبهم لم استطع تحديد ماهيته ولكني متأكد انه شيئ مهم جدا جدا هذا الشيئ او هذه الحلقه المفقوده تحتفظ بها زوجتك لنفسها يجب ان تعلم ما الذي يجول بخاطرها ولماذا تعاملك هكذا ؟ تأكد ان الموضوع يحتاج مزيدا من المحاولات منك , قد لا تكون انت السبب , ربما يكون هذا الشيئ يتعلق باسلوب تربيتها او نمط شخصيتها , لان ما تفعله زوجتك على حسب وصفك لا تفعله الا امرأة كارهه لزوجها , او ربما انك محسود من قبل احد كان يتمناك زوجه لابنته او قريبته او حسد من امرأه تتمناك زوجا لها لا زلت اكرر هناك حلقه مفقوده مبهمه بحياتكما يجب ان تعرف ما هي وتضع يدك عليها لتتحسن حياتكما ,,, والله اعلم وفقني الله واياك |
أخي الكريم قلت في طيات كلامك:
- ضرب الاولاد فهي تنطلق عليهم بعلاق الملابس الحديد وتضرب بلا رحمة وهذا الشي شفته بعيني وكلمتها به اكثر من مره ولكن لم تتجاوب الا بعد ان قلت ان ضربتيهم ضربتك باللي تضربينهم فيه وأقسمت على ذلك قالت هم يغلطون قلت هم اطفال وهذا يكفي لايعرفون الصح من الخطأ وبحاجة توجيه لا تعذيب واذا كان المخطأ يضرب اجل الكبار المخطئون أولى بالضرب من الصغار وقلت للاولاد اذا ضربتكم في غيابي بمجرد وصولي للبيت ابلغوني ... وانتهى الموضوع وخف ضربها لهم وشرحت لها بأن طريقتها بالضرب مرعبة قبل ان تضرب فهي تهجم هجوم تركض للغرفه وتسحب العلاق وتركض للطفل . بصراحة أكبر خطأ ماقلته لأولادك أنت بهذه الطريقة تقلل من قيمة زوجتك أمام أبنائك وفي نفس الوقت تشعرها بالمهانة والمذلة أنا أتصرف مثل تصرف زوجتك إذا فاض الكيل وكانت المشكلة قد تكررت رغم التحذير أهجم هجوم ظاري بعلاقة الملابس وبفضل الله وحده أصبح أولادي يعملون لي ألف حساب وزوجي حتى لو تضايق من تصرفي لايبين لي أمام أولادي ذلك بل إذا وجدني أضربهم بشدة يمسكني وهو يصرخ في أولاده هل تريدون أن تمرض أمكم؟؟ اسمعوا كلامها لإن لو صار لها شيء بنخسر أنا وياكم وبتجلسوا بدون أم وزوجي لو ضرب أولادي بقوة فأنا لاأتدخل وإذا رأيت الموضوع زاد عن حده فأنا أتدخل ليس لأبين لأولادي أني أحميهم من أبيهم بل أبين لهم أني خائفة على صحة والدهم وابعده عنهم وانا أقول خلاص لاتتعب أعصابك أخر مرة يسوونها وإذا عاقبت اولادي بحرمانهم من شيء وشعر زوجي ان عقابي ليس له داعي فهو لاينزل كلمتي الأرض بل يقول أمامهم : خلاص هذه المرة سامحيهم علشان خاطري وفي الغرفة يبين لي خطأ تصرفي وعقابي وبهذا نشعر اولادنا بإحترامنا لبعضنا ليحترمونا وأيضاً لينشأوا بنفسية واثقة ليست متذبذبة بين والدين مختلفين في الأسلوب وأيضاً نشعر نحن الإثنان بالراحة النفسية والإمتنان لبعضنا وأشعر بأنه أمتص غضبي بحنيته وبتقديري أمام ابنائنا أما تصرفك يااخي فهو يشعر الاولاد ان امهم شريرة وأنت الملاك الطيب وهذا مايضايق زوجتك هي امهم ولها حق تربيتهم ولكن اتفقوا على أساليب التربية سوياً ولايكسر أحد منكم كلمة الثاني ولايقلل من شأنه تعرفي يااخي من خلال كتابتك موضوع الضرب وموضوع أنها تشكي من شرائك لها ماتريد أنت شعرت بأنك تملك شخصية مسيطرة لا بمعنى الديكتاتورية بل لأنك شخص واثق من نفسك وتثق في قراراتك لذا تريد ان تفرضها على الكل وهذا مايجعل زوجتك تشعر بأنها مضطهدة لذا هي تحاول فرد عضلاتها عند أبسط موقف لتثبت لنفسها أنها ذات شخصية وليست أمعة لك صدقني ياأخي المشكلة بينكم في طريقة التعامل فأنتم تحتاجون سوياً لإعادة برمجة لحياتكم ولجلسة محاورة ولابأس أن تستعين بإستشاري نفسي فهذا سيقرب وجهة تناظركم كثيراً فأنت زوج ناضج عاقل والدليل ماكتبته من مواقف مشرفة مع زوجتك واهلها و ينقصك فقط معرفة الطريقةالصحيحة للتواصل مع نفسية زوجتك وهي زوجة طيبة تريد أن تفهم نفسيتك فأنت غامض بعض الشيء و أن تكون متساوية معك في كل شيء لا أن تشعر بانك أعلى منها وهذا مايجعلها تكون جامحة اقتباس:
ياأخي الفاضل : ليس عيباً أن يصارح زوج يعاني من مشكلة مشكلته في منتدى لايعرفه أحد ولايعرف أحد وفي المنتدى ولله الحمد أقلام واعية قد يجد عندها حل لمشكلته فهو لم يفشي ولم يعيب زوجته ولا حتى لأقرب قريب إحتراماً منه لقدسية الحياة الزوجية فنحن هنا مثلنا مثل الطبيب تصارحه بكل ماتعانيه ليجد لك علاج بإذن الله |
الله يعينك والله ما عندي تعليق
|
================================================== ===============
|
| الساعة الآن 12:27 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©