|
اسفة .. شفت الموضوع اليوم الصباح وما أمداني أرد ..
بنت غامد.. تصدقي .. أتمنى تكون عندي الحكمة مع زوجي مثلك .. ماشاء الله .. زوجك والله أعلم يبغ يتدلع .. ويحسسك أنه طفل .. صح ؟؟ ما لمستي فيه الطفوله؟ .. من كلامك حسيت كدا يارب يارب يا بنت غامد ربي يفرجها عليكي وعلى زوجك .. وفكرتك صحيحة .. أبدا لا تقاطعي أمه وأبوه وأهله .. أبدا راح يسامحو ولدهم وأنتي لا .. أنا كمان أمي علمتني كدا .. يزعل زوجي من أهله .. لكن أنا لا .. أكلمهم وهو زعلان وهو راضي .. الله يكملك بعقلك .. وكل عام وأنتي بخير |
ابني مر بظروف لايعلم فيها الا الله جدا صعبه زوجك الحمدلله وضعه أفضل بمراحل كثيره عن محمد والله يمتعه بالصحه والعافيه ويخليه لك ومع ذلك تجاوزت الوضع واستطعت أكيف ابني على كل ظروفه ويتحداها ويتجاوزها ومايهتم لأي كلمه الا اللي في مصلحته وبس عشان يقدر يعيش ويواجه الوضع لازم زوجك مايتحسس أكثر من اللازم ويقاوم مهما كانت الظروف وأنا أتكلم معك من واقع تجربه شخصيه مع ابني.. الدعم مهم لرفع المعنويات وأنت ماتحتاجي لتوصيه اسم الله عليك قدها وقدود.. الله يفرحك ويفرحنا معك بسلامته.. دوبني راجعه من المستشفى وعندي من الغم اللي يكفي بلد أروق واستعيد توازني النفسي وأرجع لك ان شاء الله لاحقا.. في رعايه الله
|
غارق في الأحلام
أميرات اميرة التواضع شكرآ لكم والحمدلله نفسيته اليوم احسن بالنسبه لموضوع دلعه يا اميره فأنا لن اقول نعم او لا ولكن هو بالفعل يتدلع احيان بس من خلال كلام امه واخواته اكتشفت انهم هم سبب كرهه للأدويه والعلاجات مثلآ وهو طفل صغير عمر سبع سنوات ودوه لمشعوذ الله يسامحهم وكان يذبح حمام فوق راسه تخيلوا والدم يتركوه شهر بجسمه وشعره بدون غسيل علشان كذا كره الأدويه وسيرتها وعملوله طب شعبي وتعذب فيه كانوا يحرقوا فخذه وساقه وظهره وللآن معلمه بجسمه وفوق كل هذا يتركوه بعد الحرق يبكي الين ينام بدون وضع كريم او اي شي يسكن الألم هذا غير العمليات اللي عملها فأعتقد هذا سبب كافي لكره الأدويه والعلاجات كلها سابنا رمضان كريم وخليك قويه واحمدي ربك ان ولدك يفهم ويحس انتي نعم الأم فلا تيأسي والله يعينك ويشفي محمد ويخليه لكي ويخليك له ترى انا احتاج دعمك فلا تضعفي لأن اخاف انا اضعف بعد ولا يهونون الباقين بس دعمك له أثر علي لأنك تشاركيني نفس الموضوع باختلاف صلة القرابه والعمر ولكن مرضهم واحد وحتى زوجي ياسابنا تعرض في صغره لعمليات كبيره وصعبه انتي عارفه؟ جسمه كله فيه اسياخ زي يده ورجله وحوضه وظهره ورقبته وش بقي ياسابنا؟ علشان كذا انا ما الومه في كثير من الأحيان وربك كريم آخرتها بنموت ونترك الدنيا وان شاء الله لنا الجنه |
حبيبتي أنا قصدت لو هو شاف الحالات الأسوأ صدقيني بتهون كثير في خاطره أنا لما أشوف الحالات اللي اصعب من ابني أقول الحمدلله والشكر وأحس ابني بعد يتعاطف معهم ويحمد ربي.. هذه بحد ذاتها تخليه يقدر يتجاوز الألم النفسجسدي.. وربنا يقويك ويشفيه.. لي عوده..
|
بنت غامد ..
ممكن أسألك سؤال .. صعب شوي .. تحمليني .. هل في أمل لو زوجك أستمر على العلاجات .. ولو أجرى كم عملية .. إنه يصير طبيعي ؟؟ أنا اللي فهمته إن زوجك ينقصه المشي .. ومشكلة التقوس في ظهره .. فقط هل يعاني من أعراض أخرى ؟؟ بنت غامد .. صراحة بعد ما قرأت كل موضوعاتك وردودك حسيت أن مشكلة زوجك النفسية أكبر بكثير من الجسدية .. يا الله اللي اتعرض له وهو صغير مو شوية . بعدين ليش السحر وما أعرف إيش والحمامة اللي يذبحوها ... أهله ثقافتهم ودينهم كيف ؟؟ يحق له يكره سيرة الأدوية .. بنت غامد ليش ما تعرضي زوجك على دكتور نفسي ... صدقيني يابنت غامد ترى صعب تحسني حالة زوجك النفسية لوحدك .. إنتي ماشاء الله عليكي أبدعتي لكن خذيها نصيحة مني زوجك يحتاج لطبيب نففففسي .. حتى ينسى ماضيه ... أنا أبغ أختصر عليكي المشوار .. كدا راح تتعبي مع نفسيتو المتدهورة .. زوجك مو مستقر نفسيا ما أدري إنتي في أي مدينة .. لو في الرياض ممكن أدلك على دكاترة مجربين وممتازين ... وممكن زوجك يحبهم عندهم أسلوب .. في التعامل مع كل الطبقات .. أتمنى تتقبلي فكرتي .. والله يكون في عونك |
هلا أميره
اهله مستواهم الديني والعلمي ممتاز بس جده الله يرحمه هو اللي كان يضغط عليهم بالذهاب للطب الشعبي وغيره وبعدما فقدوا الأمل بحثوا عن العلاج الطبي انا قد لمحت وصرحت له بالنسبه للطبيب النفسي بس كان يرفض رفض قاطع بالنسبه لمرضه هو فعلآ مايمشي بس هذي مالها حل ولا عمليه بل بمعجزه من رب العالمين بالنسبه لظهره عمل فيه عمليتين وتعدل ظهره بس تدهور شوي بسبب اهماله بالعلاج غير كذا ماعنده مشاكل صحيه إلا اخر مشكله وهي ضيق بالقصبه الهوائيه وسيتم تركيب انبوب لتوسيعها |
الله يشفيه
بصراحه انا اشوفه ماشاء الله عليه متماسك وصابر بس نفسيا تعبان شوي وانتي بعد لاقوة الا بالله امراه حكيمه واعيه وفاهمه استغلو رمضان بالصلاة والذكر والحفظ والمسابقات وصدقيني نفسية زوجك بتتغير للاحسن ان شاء الله |
يا حبيبتي يا بنت غامد
بجد إنت انسانة قوية و زوجة حقيقة و رائعة فعلا ما شاء الله عليكِ يا حبيبتي ما يمر به زوجك أزمة نفسية بسيطة و الحمد لله إنه يفضفض معكِ هناك رجال يصابون بمثل هذه الأزمة لكن لا ينطقون حرفا و تحتار زوجاتهم معهم كثيرا على الأقل إنتِ عارفة تفكيره طنشي أهله تماما انت غير ملزمة أبدا بالتواصل معهم و افعلي ما يرضيه , هو زوجك و انت ملزمة بأوامره و طلباته استغلي الشهر الكريم للتقرب منه اجلسوا اقرئوا قرآن مع بعض صلوا تراويح مع بعض اطلبي منه أن يكون الإمام و إنت صلي ورائه لا أعرف بمدى اعاقته ربنا يعافيه , لكن يحاول بقدر استطاعته هذا سيعطيه قوة أخبريه أنك تريدين صلاة الجماعةلكن لا تريدين الخروج من المنزل و عندها اطلبي مساعدته قوليله حبيبي خذ فيني ثواب و صلي معاي جماعة , أحسن ما أصلي لوحدي زوجك محتاج انه يشعر بالقوة و يشعر إنك محتاجة له لذا استغلي بعض المواقف الصغيرة لجعله يثق بنفسه انظري ماذا يستطيع أن يفعل و اطلبي مساعدته فيه فالرجل عموما يحب أن يشعر بإحتياج زوجته له ربنا يوفقك |
جينز
نوران شكرآ لكم وفعلآ انا معكم فهو الآن نفسيته نازله بسبب تصرف أهله وليس بسبب مرضه فأنا اعرفه متكيف مع مرضه وتعود عليه الحمدلله امس كلم امه وابوه وكلمنا اهلي وصدقوني هو معذور بكل اللي يسويه لأنه مر بظروف صعبه بحياته وراح اقلكم معلومه قد تصدمكم شوي جدته ام ابوه كانت ماتعترف فيه بل وكانت تأمر بربطه بسلسله بالمطبخ وقت الوجبات بحجة انه شقي واذا جلس معاهم ياكل راح يوصخ السفره!؟ ولكن امه بعدها ماسارت تسمحله يروح لجدته ابدآ هو للآن ماحكالي بس اخته حكتني وقالت انا كل همي انك تتحمليه وتعوضيه بدل اللي شافه بحياته والحمدلله هو اثبت لهم انه رجل ودرس وتعلم وتوظف وظيفه محترمه والكل يحسب حسابه ويحترمه حتى اصحابه كلهم اسوياء ويحبونه ولا يفارقونه يوم دايم يطلع معاهم او يزورونه بالبيت فأنا اتحمله لأن ماضيه تعيس والإنسان هو نتيجة ماضي وترسبات قد اشعر احيان بحاجته لطبيب نفسي ولكن اشعر بأن المجتمع هو من يحتاج طبيب نفسي |
لا تستهيني أبداً بماضيه
يجب له حل عقد الصغر عقد قوية وتحتاج لمتخصص لكي يحلها. لايريد الذهاب لطبيب نفسي ، اذهبي انتي لطبيب نفسي لايريدك تذهبي لطبيب نفسي تابعي الطبيب في النت . والله الموفق والله مايبلي إلا ويدبر بلى زوجك بالعقد والعمليات ومادري ايش ودبره بزواجه منكِ ودراسته وثقافته وحب الناس له. |
احضنيه حسسيسه النه شخص مهم عندك
حسسيه بحبك وانتبهي لايحس انك تشفقين عليه لان الرجل كرامته دايما عنده الاساس |
هلا بالغاليه،
اعتذر لوصولي متأخره، و لكني لم استطع المرور هكذا فأثرت الدعاء لكما: اللهمّ مالِكَ المُلك ‘تؤتِي المُلكَ من تشاء ، وتنزعُ المُلك مِمّن تشاء، وتُعِزّ من تشاء .. وتُذِلّ من تشاء ، بيدك الخير .. إنك على كلّ شئ قدير ، رحمان الدنيا والآخرة ، تُعطيهُما من تشاءُ .. وتَمنعُ مِنهُما مَن تشاءْ ، ارحم أختنا و زوجها رَحمة ً تُغنيهما بها عن رَحمةِ مَن سِواك ، اللّهم اهدِيهما فيمَن هَديْت و عافِي زوج أختنا فيمَن عافيْت ، و تَوَلَّهما فيمَن تَوَلَّيْت، و بارِك لَهما فيما أَعْطَيْت، و قِهم واصْرِف عَنهما شَرَّ ما قَضَيت ، سُبحانَك تَقضي ولا يُقضى عَليك ،انَّهُ لا يَذِّلُّ مَن والَيت وَلا يَعِزُّ من عادَيت تَبارَكْتَ ، رَبَّنا وَتَعالَيْت. بارك الله فيك يالغاليه ماقصرتي في زوجك إحتويه بحبك و حنانك له. تحياتي القلبيه |
حرم حمزه
الأم الحزينه جزاكم الله خير الله يقدرني واسعده واريحه والحمدلله احسه احسن وحتى شهيته تحسنت امس تسحر بشكل جيد شكرآ للجميع |
الله يبشرك بالخير..متى عمليته..
|
هلا سابنا
يوم السبت عمليته ان شاء الله وبيجلس يومين بالمستشفى ويطلع دعواتكم |
ربنا يسهل له عمليته و يشفيه و يوفقه و يحفظه من كل مكروه
ربنا يصبرك و يقويك استمري حبيبتي ما شاء الله عليكِ |
عموما طبيبتي ألمانيه جراحه عامه لديها والدها يتنفس بالأنبوب الحنجري اي سؤال تحبين تعرفينه اسأليني واسألها لك لاتشيلين هم وان شاء الله يقوم بالسلامه خليك جنبه وبعد العمليه البنج بيكون متعبه شوي ويمكن يهذي فلا تزعلي لو شتمك هذا من تأثير البنج وعلى فكره راح يسرد كل اللي بخاطره وبتعرفي وش اللي مضايقه .. واسألي الدكتور بيعطيه موروفين ولا لا..هذا مسكن يعطونه بالوريد يخفف الألم بس يخلي المريض يميل للنوم أكثر..
|
ربي يقوم زوجك بالسلامه .. طمنينا عن اخر اخبارك خيتوووو .. |
انا ما الومه على نفسيته .... احنا لو جرح بسيط شنو يصير فينا شلون عمليه...!
ماشاله عليج بنت اصيله و بنت حلال بس حاولي تنسينه و تلهينه و تغيري ه جو و تضحكينه مادري و الله الله يستر عليكم و يسهل عليه |
نوران
سابنا اميرات كاثرين شكرآ لكم وجزاكم الله خير بالنسبه ياسابنا للشق الحنجري فأنا علمني الطبيب كل شي وبنت عمي ولدها عامل شق حنجري وعلمتني كيف انظف الجرح وافرغ الأنبوب انا جاهزه للموضوع بشكل جيد بس عسى هو يتقيد بالخطه الموضوعه له انا كل مشكلتي معاه تهربه من الأدويه ولازم نتضارب قبل ما ياخذها هو وعدني يتقيد ويسمع كلام الدكتور بس اخاف يتراجع عن وعده الله يهديه ويخليه لي يارب |
بنت غامد
استفسار بس هل الشق الحنجري هو اللي عبارة عن أنبوب ويتنفس من الحنجرة يعني ؟؟ اذا كان هو .. طيب لمتى يجلس الشق هذا ؟؟ |
الأدويه لو كانت حبوب سوي له زي ماأسوي لمحمد حطيها له مع الزبادي وهو بيبلعها من دون مايحس.. والشراب الله يعينك لو ماشربه حطيه بكأس العصير وشربيه..هذا هو الحل ..أفضل من المعركه..
|
كان الله في عونك اختي بنت غامد .. ما تمرين به امر جدا صعب و يحتاج الي صبر و سعة صدر و طوووولة باااال .. لكن ما في شي يضيع عند رب العالمين .. جزاك عند رب العالمين .. |
اميره نعم هو
وبيجلس فتره مؤقته من سته اشهر لسنه لسنه ونص على حسب تقيدنا بالخطه الموضوعه له سابنا بالنسبه للشراب والبودره لأن عنده ادويه زي الدقيق لازم يشربها قبل النوم احطها بعصير ويشربها اما الحبوب ففكرتك حلوه وهو يحب الزبادي والدانيت بالشكولاته اجل بعبيهم ادويه خخخخخخخ بس البخاخات اشوا مايتعبني يتقبلها لأنها تريح تنفسه بخاخات الربو عرفتيها ياخذ نوعين مره قبل الفطور ومره قبل النوم امس حطيت قطرته بالتوت وطلب فيمتو وانا ضحكت قال وشفيك؟ قلت تذكرت شي وصدق بس على مين رحت المطبخ وحطيتها بكاسه ورجعت صبيت له فيمتو خخخخخخخخ كيدهن عظيم اميرات الله يسعدك ادعيلي ابشرك هو احسن و وعدني بيكون افضل واعقل من اول ولله الحمد انا حذرته بأني راح اوريه شغله لو تدلع علي قلت بنيمك بالحمام جلس يضحك قال تسوينها اعرفك |
الله يقومه بالسلامة بالعمليه
والف سلامة عليه وكل عام وانتم بخير |
زين أهم شئ الدانيت اللي بالشكولاته سبحان الله طلع يتفق مع محمد بهالنقطه..الله يستر منهم أخاف يحطون لنا منوم أنا وياك من كثر حرصنا عليهم عشان يرتاحون من الأدويه..
|
ندى
جزاك الله خير سابنا هههههههه شكلهم والله الله يشفيهم ويارب تشوفين محمد عريس اما زوجي بذبحه لو تزوج |
ماهقوتي أبو الشباب يسويها فيك ويعرس.. لو يلف الكون مايلقى بعقلك وحنيتك ماشاء الله عليك..تعوذي من ابليس..
وبالنسبه لولدي اخطبي له وحده مثلك وماعندي مانع لو يبي يتزوج اليوم قبل بكره.. |
أسأل الله الكريم بمنه ورحمته..أن يشفي زوجك...
ويوسع صدره ...ويملأه رضا ويقين... |
سابنا
الرجال وجهان لعمله وحده مريض وصاحي كلهم مثل بعض لا يغرك وبالنسبه لمحمد انا ماعندي مانع بس انا عجوز بالنسبه له الله يرزقه ببنت الحلال وعلى فكره ترى زوجي اعتقد عمل نفس عملية زوجك لأن كان عنده خلع وركي ولادي وعمل عمليه بمصر هذا الكلام تقريبآ بعام 1982 هذا على حسب ما اعرفه منه ومن أهله وكانت اول عمليه خضع لها ونجحت شيهانه جزاك الله خير |
سابنا
آسفه مو زوجك ابنك لخبطت سوري مخي حايس |
عام 82 م كان عمري سنه..المهم مصر مشهوره بالأطباء الممتازين خصوصا في القصر العيني الفرنسي..والقصر العيني المصري..
ممكن تأخذين لي التفاصيل العمليه من زوجك والآثار الجانبيه ومده البقاء بالجبيره وكم كان عمره لما عملها..أكون شاكره لك بعنف.. |
اختي اول شي بقولك
برافو عليك لانك عرفتي تتصرفي بالموقف وضليتك صابرة قدامو لازم توقفي معه وحسسيه انو هوه كل حياتك وانتي بلاه ما بتعيشي واهتمي فيه وقوليلو اهلك بالنهاية حيعرفو قيمتك بس لا تخليه يكره اهله اختى الله يعينك موقفك صعب بس بدكتتحملي مشان زوجك والله بعينك ولا تنسي انو احنا بالشهر الفضيل اكثري من قرءاة القران اسأل الله العظيم رب العرش العظيم ان يشفي زوجك ويطمئن قلبك امين يا رب العالمين |
هلا سابنا
زوجي مواليد 1979 وعليك الحساب العمليه كانت عباره عن تثبيت مفصل الفخذ الأيمن لأنه مخلوع ولاديآ يعني عيب خلقي وجلس بالجبيره ست اشهر وبعدها عمل علاج طبيعي اللي استفاده انه صار يرتاح بالجلسه والحركه اكثر من قبل عملها بمستشفى اسمه هيليوبولس عند دكتور اسمه سيد وهبه او الحموي هو راح عند دكتورين بس ناسي مين عملها الأول او الثاني جلسوا بمصر عام كامل هو وابوه وامه وبعدها جده اعترض وبدأوا رحلة العلاجات الشعبيه الين وصل للمتوسط وبعدها خضع لعدة عمليات هنا وبالخارج وكانت الغرز عالخصر بالضبط وللآن واضحه بس ابنك اكيد غرزه بتكون تجميليه اللي زي الخط بس زوجي غرزه دبابيس امه تقول تعب ايامها لأن الجبس متعب كان من فوق الركب للصدر بس مفتوح من جانب الحفاظه لتغييرها فكان حران ومتضايق من الجبس حطيه بغرفه بارده شوي بعد العمليه الله يشفيه ولا تخافين عليه العمليه مو صعبه مره بالذات الآن الطب تقدم |
عاشقة عيونه
جزاك الله خير حبيبتي |
أختي الغالية .
ماشاء الله لاقوة الا بالله على هذا الصبر الرائع والمشاعر الحميلة التي غمرتي زوجك بها .. لست أدري هل أهنيء زوجك بك .. أم أهنئك على هذا الزوج الصبور المكافح ..؟؟ بارك الله فيك وسدد خطاك ويسر أمورك وشفى زوجك وأدام عليكما نعمة السعادة والاستقرار .. |
منتظره
اخجلني كلامك هنيني بزوجي فبرغم عناده إلا انه طيب جدآ وحنون اما انا فلست مثاليه انا كل ما في الأمر اني احبه قد اشفق عليه احيانآ ولكن حبي له شي أكيد وجزاك الله خير |
الله يعينك يا بنت غامد
أنا ‘رف إن الشق الحنجري هذا يسووه للمدخنين .. كانت جدتي مسويته .. ماأدري إذا هو نفسه ولا لأ .. بس كانت بصعوبة تتكلم .. وصوتها مو واضح ... ولما تتكلم لازم تضغط على الأنبوب عشان صوتها يصير واضح ... إن شاء الله يارب ما يطول فيه ... طيب ليش تنفسه تعبان هل زوجك مدخن ؟؟ |
هلا اميره
زوجي مدخن بس مو دايم شوي يعني يجلس شهور بدون دخان ويرجع شهر يدخن وهكذا بس هو راح يعمله لأن انحناء عموده الفقري ضاغط على الرئتين ومضيق القصبه الهوائيه رغم انه عدل ظهره بعمليتين بس مازالت مشكله تنفسه قائمه والطبيب اللي عمله عملية ظهره قال هذا اقصى درجه نقدر نعدل ظهرك بيه لأنه عمل عمليته قبل زواجنا بفتره بسيطه واللي يعملها وعمره فوق العشرين تصبح صعبه بسبب عدم ليونه العمود الفقري يعني يصبح غيرمرن وبالتالي لا يتعدل العمود بشكل كبير |
استسمحكم فالفتره القادمه قد لا استطيع ان اتواصل معكم
فأرجو المعذره من الجميع لأن زوجي يحتاجني في الفتره هذي انا لا اريد منكم سوى الدعاء له ان يقوم بالسلامه ويهدي باله وييسر أمره واترك للمشرفين الحريه لقفل موضوعي هذي الفتره او الفتره القادمه واوعدكم اني سأحاول الدخول في أقرب فرصه لو بضع دقائق وشكرآ للجميع اختكم بنت غامد |
| الساعة الآن 06:06 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©