|
رد: البخل دفعني لطلب الطلاق !
سبحان الله على إن زواجي مر توترات و قفزات كبيرة
لكني كنت دايم استشعر و انا مع زوجي عظم نعمة الزواج نعمة عظيمة عظيمة على اني مؤخراً معه كذلك كنت مقهورة جداً من بُخله لكن قبلها كنت عايشة معاه سنوات اشعر ب استقرار نفسي و روحي بحياتي ماحسيت فيه وقت ماكنت عند اهلي رغم اني عند اهلي كنت عايشة حياتي بالطول و العرض لكن سبحان الله كنت احس نفسي غير مستقرة عاطفيا او نفسيا و زوجي رغم انه كمان شخص غير عاطفي كثير لكن حتى مع قلة المشاعر اللي كنت احصل عليها لكنها كانت تريحني و تبسطني احساس الأسرة و وجود الكيان هذا كله كامل معك و انك انت اللي شيدته و تشوفه يكبر قدامك و الافراد يزيدون و انت ترعاهم و تهتم فيهم عرفت ان هذا الامر هو اقرب الامور لفطرتي و طبيعتي و لامسني جداً عشان كذا ظليت الى آخر نفس ب انفاسي اقول لو فيه امل بالإصلاح والله اتمناه من كل قلبي و أسأل الله انه ينولني اياه ان كان فيه خير لي و صلاح لنفسي و قلبي و ديني قد اشتغلت و قد درست وتعلمت و تطوعت و عشت ادوار كثيرة بحياتي سبحان الله من اقربها لنفسي و روحي تربية بناتي ، و العلم و التعلم لقيت نفسي في هالشيئين انا زوجي خطف قلبي لما تقدم لي لأنه لامس اعظم اهدافي بهالدنيا "تربية الأبناء" وقال نفس الكلام اللي اشعر فيه و حاطته هدف لي قال "ابنائي هم مشروع حياتي الاكبر و الاعظم و ما راح ينجح هالمشروع الا مع الأم اللي ب احاول احسن اختيارها" نفس افكاري بالضبط عشان كذا ابوي قال هذا الشخص يناسبك جداً لأن اللي قبله كانوا يقولونها صراحة : ابغى وحدة تدلعني ، ترقص لي ، تهتم فيني ماشي كل هالأشياء الحلوة و مهمة لكن وين رسالتك بالحياة و هدفك الأسمى من الزواج .. ؟ شعرت ان ماعندهم بصيرة + اضيف على هذا كله انا في آخر الاشهر اللي عشتها مع زوجي حاولت اصبر على بُخله بكل شي وحطيت لي حد ادنى قلت بس لو يكرمني و يدفع من ناحية دعم ذكاء بنتي الكبيرة "ب اصبر على بقية الامور كلها " لقيتني صار بيني و بينه اكثر من موقف منها مثلا رحنا تسجيلات اسلامية و اخذت لها كتيب اذكار عشان تتعلم منه ب ١٧ ريال تهاوش معاي و قال لي غالي و اكيد فيه مكان يبيعه ارخص و رفض يشتريه هنا حسيت انهارت كل آمالي و احلامي، و غيره اشياء مشابهه كثييير بآخر الاشهر كان هدفنا مشترك و مشروعنا واحد عرفت انه آخر حصوني مع هالشخص انهارت و تحطمت مو مستعد يدفع حتى مبالغ زهيدة على بنته ! وهو اللي الى هللحظة لو اي احد من طرفي واجهه : ليش بخلت على زوجتك بيقول نفس الاسطوانه المشروخة : اجمع عشان تعليم بناتي رغم انه واقعيا كان بالفترة الاخيرة يبخل ب أي شي بسيط ينميهم " و للأسف ماكان كذا سابقاً كان بخيل و ماسك صحيح و يخنق بس مو لهالمستوى من بعد ما اكتشفت كم راتبه زاااااااااد جداً " الله يدبرني من عنده سلمت لك أمري و لك في حكمتك مقصد ياخافي اللطف الذي ما في لحكمه رد |
رد: البخل دفعني لطلب الطلاق !
مايخيفني رفضه للشروط الماديه
طيب ماهي الامور الماديه الي هو موافق عليها كم النفقه الشهريه الي يشوفها مناسبه وكم الرضوه مده اليد والطرد امور مش هينه ويبلها فعلا يتادب عليها ان عزمتي الرده والواضح الشي الوحيد الي يعوره ويخليه يفكر الامور الماديه ولا الباقي عنده سهالات الله يكتب لك الخيره يارب نصيحه ابحثي عن وظيفه |
رد: البخل دفعني لطلب الطلاق !
اقتباس:
وافق على انه يشتري للبنات غرفة نوم + يغير ملابسه النفقة الشهرية اللي يشوفها مناسبة : الحقيقة ما سألته كم بيعطيني لو عطيته المجال ب يعطيني أصغر رقم شرطت عليه يعطيني الفين لي و الف لكل بنت الرضوة بعد شهرين من مشكلتنا تواصل معي عن طريق زوجة صاحبه و شرطت عليه بس يعطيني 10 الاف و ايفون و بعدها نتفاهم عالرجوع و رفض مع ان راتبه زي ماكتبت فوق 42 يعني اللي طلبته ولا شي لكن لاني أدرى الناس ب طبعه اعرف ان 10 بالنسبة له مثل مليون عند غيره و ماكنت بعد ابغى الموضوع يكبر و ابغى أسهل عليه شفته رفض و بعد ما وصلنا للمحاكم رفض يرفع النفقة قال مانتي ماشية على اعراف مجتمعكم قلت له خلاص ب امشي على اعرافنا دامك تبيها الرضوة 50 الف " وهذا كان راي اهلي من البداية " يعني ما يقارب راتب شهر يوم شافني رفعتها قال خلاص ب اعطيك 10 رفضت و قلت 50 تحولها علي و بعدين نتكلم و طرحت الرقم على محاميين هل هو يعتبر مبلغ فلكي؟ و كأني هدمت بيتي ؟ قالوا لا جداً عادي خاصة قياساً على راتبه و قياساً على اخطائه بعد انا رفعت المبلغ بعد لانه أذاني بعد الطردة سبني و سب اهلي و احتجز اوراقي الرسمية و انكر قدام الشيخ الطرد و كل شي و كتبته له ب رسالة هذا المبلغ رفعته لانك سويت كذا و كذا و لانك رابع مرة تطردني / فعلا اليوم لما صحيت في بالي فكرة الوظيفة لكن بعد ما اخلص المعهد و ارتب اوراقي و اعرف اصلا هل فيه رجوع او طلاق نهائي عشان اعرف اقدم وين لان اهلي في منطقة و زوجي في منطقة |
رد: البخل دفعني لطلب الطلاق !
اقتباس:
لا حول ولا قوة الا بالله معقول فى حد بالصفاء النفسى ده والطيبة والبرأة ده وخصوصاً فى هذا الزمن والله ثم والله ا ابنتى لن يضيعك الله تبارك وتعالى ابداً ابداً ابداً ان شاء الله هذا يقينى وحسن ظنى بالرحمن الرحيم الحنان المنان الحى القيوم الجبار مالك الملك فاطر السموات والارض بصراحة اشعر انك احق بزوج مثلك تستحقى رجل بكل معانى الكلمة اما هذا الرجل لا يستحقك ابداً هل يعقل ان الله يرزق رجل بمن هى مثلك ولا نذكيك على الله ويفرط فيك بكل هذه السهولة ومن آجل ايه من آجل نقود ليس لها اى قيمة ولا تساوى شىء امام جوا الاسرة والاطفال والزوجة الصالحة بسم الله ما شاء الله لا قوة الا بالله لا يوجد رجل متزن عاقل يفعل هذا ابداً انت ما شاء الله ملكة متوجة والله حسيبك مع الاسف انسان سىء ومثال سىء ولا حول ولا قوة الا بالله احزنى جدا كلامك لما قلتى له ترضى ان يكون الله ورسوله الفيصل بينى وبينك وقبل بهذا وبعدها يفعل بك كل ما فعل فى رجل عاقل يضرب زوجة ومتى بعد شهر من الزواج لا يوجد رجل بمعنى الكلمة يضرب زوجة اصلا ابناء الشوارع فقط من يفعلوا هذا فى بنات الناس اما ابناء الاسر المحترمة فلا يمكن ان يمد يدة او يسب او او او الحمد لله رب العالمين واين هو من وصية الى والدك حفظه الله عندما قال له زوجنى ابنتك ولن تندم سبحان ربى العظيم وصدق رسوله الكريم عندما اخبرنا عن صفات المنافق اذا حدث كذب واذا اؤتمن خان واذا خاصم فجر استمرى فى استخارة الله وانا هنا اقول لك بعد كل كلامك هذا لا ترجعى له الا اذا وافق على شروطك ولا تتنازلى عن اى منها ان قبل اذن توكلى على الله وارجع وانت على ارضية صلبة ان شاء الله ويكون هذا الانسان قد تعلم درس يجعله يفكر بدل المرة مليون قبل ان يتجاوز حدوده معك لانه واضح انه لا يلتزم بعهد ولا يخاف الله ولا يعلم شىء عن الدين الا الكلام وارجوا منك ان تنسى كلام المشاعر والعواطف وهذه الاشياء التى لديك ولا تصلح مع شاكله هذا الرجل انسى بيتك ومملكتك وووو فقط فكرى بعقلك حتى تنجحى بقدر الله تبارك وتعالى هذه المرة المرة الاولى كانت العاطفة والصورة المثالية من تتحكم فيك ومع الاسف كان هذا قدرك وقعتى فى انسان بعيد كل البعد عن كل ما ذكرتى انه يميز المصريين لانهم فعلا وبحمد الله هناك رجال مصريين كثر وبفضل الله مثل ما ذكرتى واحسن بفضل الله ولكن هذا قدر الله احمدى الله وثقى بالله ولا تتراجعى عن اى من شروطك سواء المادية او المعنوية ان قبل بها فنعم وان رفض يبقى هذا من بركة الاستخارة وتكون صفحة تقلبيها وتنظرى الى المستقبل اما بناتك فلن يضيعهم الله ماذا كنتى ستفعلى لو مات ابوهم واصبحوا ايتام كم من الايتام توالهم الله واصبحوا رجال ونساء يشار لهم بالبنان ويجب ان تعلمى انه هو من فرط فى هؤلاء الزهرات وليس انت فلا تتحملى انت بمفردك الذنب لهدم هذا البيت انت تحملتى من لا تتحمله من بنات بلده والله ثم والله لو حدث هذا فى زوجة مصرية مثله ومد يده عليها بعد شهر لمسكه اخواتها واهلها ضربوه ضرب يصيبه بعاهة مستديمة وهو يعلم هذا جيداً المهم اياك وجلد الذات انت فعلتى المستحيل وهو من فرط وتنازل ويستحق كل ما يأتيه انهى كلامى بدعائى لك ثبتك الله ثبتك الله ثبتك الله نصرك الله نصرك الله نصرك الله وفقك الله وفقك الله وفقك الله والله تعالى اعلى واعلم وصلى الله وسلم وبارك على الرسول الكريم وعلى آهله وصحبه وسلم |
رد: البخل دفعني لطلب الطلاق !
ابنتى الطيبة يسر الله آمرك الليلة ليلة جمعه لا تنسى الدعاء والتضرع الى الله فى الثلث الآخير من الليل ولا تنسى ابو مريم من دعوة طيبة غفر الله لى ولك واكثرى من الصلاة والسلام على الرسول الكريم صلوات الله عليه ولا تنسى قرأة سورة الكهف تقبل الله منا ومنك صالح الاعمال |
رد: البخل دفعني لطلب الطلاق !
ان شاء الله
ابشر الله يجزاك خير انا كنت في المكتبة قبل دقائق اشتري رواية بين القصرين اللي قلت لي عليها . |
رد: البخل دفعني لطلب الطلاق !
ربى يحفظك ويسعدك
يا ست البنات طيب اقرا الرواية وأعطيني انطباعك على سى السيد مثال سىء للرجل مع الأسف |
رد: البخل دفعني لطلب الطلاق !
ان شاء الله ابشر ..
|
رد: البخل دفعني لطلب الطلاق !
السلام عليكم و رحمة الله و بركاته
اليوم كان من خططي إني أرفع على زوجي دعوى نفقة و حضانة و اتفرغ لها صحيت جداً متأخر اليوم على غير عادتي صحيت متكدر خاطري .. بعد أحلام كثيرة متتالية متخربطة اشوفه فيها كعادتي شفت اني مسافرة معاه و خايفة يغدر فيني و فجأة اشوف نفسي ابكي لأنه جوعني ما رضى يشتري لي شي "احداث كلها مرت فيني زمان معاه اشوفها الحين بأحلامي" أنا ما اذكر قد ذقت الجوع معاه الا ب مصر سبحان الله كنا نمر عالمزارع و الخير و استشعر قول الله عز و جل "اجعلني على خزائن الارض اني حفيظ عليم" و اقول بخاطري خزائن الارض انا امشي عليها و انا جوعانة ! سافرنا اول مرة لشقتي هناك و ماعندي مطبخ و الشقة عظم و المنطقة اللي هم فيها مافيها هذيك المطاعم كنت حرفياً اموت جوع اقضيها من المخبز كعك محشي ب تمر او من البقالة وهو يطلع من الصباح لليل و يخليني لوحدي ادبر عمري مرت السفرة الأولى شهر كامل بحلوها و مرها و سترت عليه و لا علمت اهلي عن أي شي صار ضايقني وبالعكس وصّلت لهم فكرة حلوة و اني استمتعت و و بعدها عاهدت نفسي اعطيه فرصة اخيرة و اسافر معه وهو وعدني و اعتذر لي رحنا المرة الثانية و قبلها ب شهر سحبت من البنك من حسابي ٥٠٠ ريال بدون ما يدري خفت يجوعني وحطيتها بمحفظتي كاش طلبت منه قبلها يعطيني كاش اي مبلغ قبل نسافر ما رضى ابدا و كعادته كلمته المعتادة : اطلبي اي شي يجي لك و كنت خايفة يغدر فيني وفعلاً كملنا اسبوع حلوين كنا ننعزم عند اقاربه بعدين رجعنا لفقرة الجوع و السنة الثانية ما كمل المطبخ لسه ماعرف ليش يسوي فيني كذا ويبهذلني طلعت فلوسي بدون ما يدري و كلمت وحدة من صديقاتي تصرفهم لي جنيهات من البنك وفعلا كنت كل يوم اطلب لي من المطعم "فتحوا مطعم بمنطقتهم فخم و محترم على السنة الثانية من جيتي" كنت كل يوم اطلع بنفسي اجيب لقمتي احس ماوراي رجال اطلع انا و بنتي نمشي على رجولنا الين نوصل المطعم نطلب كثير اكل يقضينا لليل و يجي هو نهاية اليوم مرات كثيرة ياكل معانا المرة الثانية و البهذلة الثانية هذي ماسترت عليه فيها و علمت ابوي و انا ابكي قلت له انا اطلع ب حجابي و ستري و عبايتي ومعاي بنتي نجيب لقمتنا يوميا وهو يطلع من الصبح لليل مع امه ماشوفه الا نهاية اليوم يجيني دايخ ينام ابوي انجن انجن قال لي ماعاد تسافرين معاه ابدا السنة اللي بعدها جات كورونا و تقفلت المطارات و اللي بعدها فعلا سافر لوحده بس مو عشاني و لا عشان كلام ابوي عشان امه طلبت منه انه يجي بدوني تبهذلت مع هالانسان و هالعيلة لكن الغريب فيه افكار متضاربة لسه ب مخي فتحت صفحة ناجز ب ارفع عليه دعوى بعد الاستخارة والله ماقدرت مشاعري غلبتني |
رد: البخل دفعني لطلب الطلاق !
صحيت اليوم و فيه فكرة مسيطرة علي
افتقدت حسه و كلامه خاصة بأيام اجازة نهاية الأسبوع لما يفضى علي الجو ، و يفضى علي بيت اهلي و كل واحد ينشغل ب عالمه القى نفسي لا دوام و لا شي تهزمني افكاري تهجم علي هجمة الأسد المفترس ،، و تآكلني حرفيا من داخل كنت افطر و احس نفسي مخنوقة افتقدت الشخص اللي كنت اصبح عليه افتقدت سواليفه و كلامه افتقدت احاديثنا المطولة مع بعض و اجوائي معه الخاصة في نهاية كل اسبوع خاصة يوم الجمعة اكثر يوم يجرحني من كل اسبوع اكثر يوم افتقد فيه بيتي و حياتي السابقة و يعورني "كتبت هالسطر و بكيت " كنت اصحى الصباح بدري اسوي له فطور محترم و اخبز له و أبخر البيت و اشغل التلفزيون على خطبة الجمعة من الحرم بعدين يجي من الصلاة يلقاني لابسة و بناتي نفس الشي استشعر انه عيد المسلمين الأسبوعي و احاول اخليه يوم حلو و مبهج قدر المستطاع حالياً اصحى متأخر ابغى اليوم يفوتني ابغاه يخلص قدر المستطاع كأني اهرب منه ، و المشكلة اني اهرب من عمري و وقتي و حياتي اللي تنسرق مني اصحى ماقدر اسوي فعاليات ولا شي اعرف يقيناً اننا وصلنا لنقطة اللاعودة لكني افتقده بشدة زوجي أسرني و سحرني ب شي واحد خلاني اصبر فيه على كل اللي سواه معاي و اعديه و اتحمله نضجه الفكري و سوالفه و احاديثه احنا كمجتمع شرقي نفتقد لغة الحوار الهادف الممتع في بيوتنا تربينا عالصراخ او الجدل او المقاطعة او او قليل نلقى اسر يتحاورون الام و الاب ب كل رقي" الله اعلم لكن هذي افكاري" يمكن لأني شفت نماذج كثيرة حولي كذا الزوج مهما يكون شهم كريم محترم الا انه صامت مع زوجته و يفضل اصدقائه عليها لكن انا زوجي كنت انا صديقته الوحيدة و انا كنت رغم كثرة صديقاتي اكتفيت فيه وما اشعر ب شوق او فقدان او حاجة ملحة للصداقة نمشي ب زحمة شوارع الرياض الساعة و الساعتين ماحس بالوقت من حلاوة سواليفه حتى انه تعب نفسيا لما سافر لوحده بدوني مصر آخر مرة انا ماعرف ليش و كيف صار كل هالحاجز بيننا صحيح انا كنت نافرة منه ك زوج بسبب اهماله لنفسه لكن كنت اعشقه ك صديق لروحي اشبع فيني الجانب الفكري وانا مثلما كتبت عن نفسي بنت مراكز ف انا بنت منتديات .. اعشق الحوارات الهادفة و التحليلات لكل شي يصير و النقاشات في الجامعة كنت دايم اشترك بالنوادي الادبية و الفكرية لما جا زوجي سوّا لي اجمل و اروع نادي فكري بحياتي لأنه نادي يشبهني افكارنا وحدة و منظورنا واحد لكل القضايا و الامور وكل الاشياء اللي تستهوينا و نتكلم عنها وحدة كنا مرات نسافر مسافة ٨ ساعات اختم معاه كتاب بالطريق اقراه فقرة فقرة و نتناقش فيه كنت احس اني مو قادرة امسك نفسي من السعادة صحيح ضيق علي في اشياء و بهذلني و استغلني و بخل علي لكن في الوقت كان معاي كرييييم كان وقته كله لي و افكاره و ما يخطي خطوة الا ب شوري كان انسان متردد جداً اي شي يفكر فيه لازم يتصل علي حتى في امور عمله لازم ياخذ رايي اصحى من النوم مرات افطر و اجلس اكلمه ساعات قبل يجي ماكأننا عايشين مع بعض افتقدت صديقي جداً صار عندي شك بكل البشر شككني بنفسي شككني بكل الرجال و الناس مفاهيمي كلها مشوشة و احس ب خوف فظيع يجتاحني اذا كنا احنا اقرب صديقين لبعض ليش وصل فينا الحال لهالمستوى !! و ليش يطلعني من بيتي في الليل و معاي بناته احس متلخبطة اكتب و انا ابكي سبحان الله ماعمري فكرت بنقطة الصداقة و انا معاه لكني كنت اقوله دايم انا معجبة فيك جدا جدا لما تتكلم او تفتح اي موضوع هو اللي قال لي بآخر شهر قبل مشكلتنا اكتشفت ان ماعندي احد بالدنيا اتكلم معه غيرك وانك صديقتي الوحيدة اللي اثق فيها الحين انا ماعندي اي مخلوق اي احد يأيد رجعتي او اني اعطي فرصة حتى المستشارين الاسريين يحذروني انا زوجي و اقولها صدقاً خاطب عقلي و غازل فكري بشكل ماعمري لمسته من احد لا من اقاربي و لا اعمامي ولا صديقاتي ولا اي شخص خضت معه نقاش فكري قبل |
| الساعة الآن 02:38 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©