المشاركة الأصلية كتبت بواسطة Miss Hawaii

إيييييه يا شوبارد

هو انباع وما اشترينا ؟:21:

فكرتيني بأمي الله يحفظها.. صرت ما أطالع فيها لمن نتجمع مع الأصدقاء تشوف الحامل وتطالع فيه ونظراتها حزن.. وتشوف المخطوبة طايره من فرحها وتطالع فيه.. هي ووحده ثانيه تطالع فيه لسان حالها متى راح تتزوج يعني مش بلؤوم لكن أحسها تبغى تفرح فيه قبل أمي.. أحزن عليهم لحزنهم علي.. طيب أنا راضية بقعدتي وصابرة وأنتظر ومتعايشة مع حالتي ليه النكد ؟!!

بس تعرفي يا شوبارد لو أمك ما كان يهمها متى تتزوجي وما بينت لكان زعلتي وقلتي أمي مو فارقة معاها أتزوج ولا لأ..أنا كنت أتخيل أمي ما تهمتم.. بس الظاهر على قولها تشوفني صغيرة لأني آخر وحده فلمن شافت اللي أصغر مني تزوجوا وحبلوا واللي تخطبوا فبدأت تنتبه :11:

الحل: شوفي قبل ما نقابل أي أحد أنبه أمي على أشياء هي متعودة تسويها تحرجني بدون قصد.. يعني ماما لو سمحت لا تقولي كذا أو لا تنفعلي لو شفتي فلانه تقلي طيب لأن الأمهات الله يهديهم أحيانا يقولوا ويسوا أشياء يحسبواها عادي.. أتكلم عن الأمهات اللي مثل أمي وأمك طيبات وعلى نياتهم واللي فقلبهم على لسانهم.. طبعا أمي من كثر ما كانت تفرصعلي بعيونها وأنا صغيرة :11: صرت أسوي نفس الشي نظرة وحده مني تفهم أو أرفعلها حاجب يعني :30: تقوم تغير الموضوع :17: خلي بينك وبين أمك كودز حركات تنفهم يعني لو طليتي فيها نظرة معينه تفهم :30: إن كلامها محرج لكِ.. والله أنا تعبت لين ما تفاهمنا أنا وأمي.. بس ما سويتلها حصار وأعاتبها كل كلمة وما أنسالها هي لأ أقلها ماما الله يخليكي لا عاد تسوي كذا ولا تقولي كذا وتنسى ونرجع لنفس الموال لين هاه أحسن من أول بمراحل.

وذاك اليوم بابا كمان جابلي القلق يصحى من النوم يجبلنا الهجاج.. ويصحيني على فجعة عصبت قلت له لا توترني اليوم كله أعصابي ترجف من الطريقة اللي صحاني فيها.. وصرت كل يوم أقله لا توترني :24: والله جد ما أتحمل وهو اللي يقول Miss Hawaii قلبها زي العصفورة لا أحد يفجعها وأنت تسوي كذا.. :29:


الناس ما تنتبه على أخطائها إلا إذا نبهتيها... وأمهاتنا لازم نزن عليهم :23: عشان يتطبعوا بالطبع الجديد.. الله يعينك من جد أنا عانيييييييت فأصبري وصابري ورابطي :d وحاولي مرارا وتكرارا ولا تيأسي.. شوبارد مو عيب أنك تقولي لأمك عن حقيقة أحاسيسك.. أنا كنت أكابر إلى وقت قريب.. بس صرت أقلها بالتلفون :27: من غرفتي وهي بغرفتها.. وأبكي تقلي إلا أنت ما أتحمل دموعك أي شي تبغيه مستعده أسويه.


الله يعينك يا شوبارد أنت كمان إفرديها حبتين ولا تمسكيلها على كل كلمة وحركة.. والله أنا ياما تفشلت من أمي.. زمان كنت أجننها وأعاتبها بس الآن كبرت شوي صرت أحزن عليها وأمشي كتيييير الدنيا ما تستاهل :)

أسأل الله تعالى أن يرزقك وجميع بنات المنتدى الزوج الصالح والذرية الطيبة المعافاة عاجلاً يارب.