|
ما فيه احد يحب الطبخ
بس الطبخ موصعب ابدا والله سهل جدا انا في بيت اهلي ما كنت اطبخ وبعد ما تزوجت حاولت اتعلم من نفسي بدون مساعدة احد واحيانا اتصل على امي واستشيرهااذا كانت الطبخه شعبيه وما كنت متوقعه اني ابصلح الجريش والمرقوق والقرصان والله انهم اسهل من تصليح الحلا والمعجنات بس يبيلها ممارسه شوفي برامج الطبخ بالتلفزيون تفيد كثير لانها عمليا قدامك وبالنسبه للسوق انا اذا صارت الروحه لشراء اشياء كثيره ويبيلها فضاوه راس رحت مع اخواتي علشان انقي براحتي اما اذا كانت الروحه لاشياء نواقص ومن محلات عالشارع مو داخل مجمع مثلا اروح مع زوجي لان الروحه تكون تمشيه وقضاء حاجه بنفس الوقت واحيانا بالمجمعات الكبيره يتركني انزل اتسوق لحالي واذا خلصت مرني وهذا احسن حل واحيانا الزوج يتنرفز اذا كان السوق مو للعوائل فقط وفيه شباب تلقينه يستعجل زوجته ويكون عصبي اتوقع هذا السبب |
أيضا معلش على اللقافة
سبحان الله نفس مشكلتي مع زوجتي دائما اتهاوش معاها على السوق ماداني شي اسمه سوق حرام مع انها قليلة الروحات للسوق ... لكن سبحان الله ماعطاني الله حب السوق لكني احب الاسواق المفيدة مثل معرض الكتاب احب اطلع معاها نستانس نتعشى برى مثل هالشي لكن سووووق اعوذ بالله اما الطبخ عادي عندي لكن لازم تطبخ ولا اشفايدها بالبيت بس فراش ...؟ وعفوا على المقاطعة بس حبيت ابين لك ان اغلب الازواج من هذا النوع ... يعني مشكلتك ماهي مشكلة اصلا :) |
انا بصراحة كنت نفس زوجك بالنسبه للسوق فى بداية زواجى بس مع الوقت تعودت وصار عندى عادى اوديها السوق واخذ راحتى واخليها تلفلف السوق ليمن تمل وصارت تعتمد على ذوقى بكل شى ومرات هى اللى تقولى خلاص تعبت
|
مشكورين على مشاركتكم
يعني السوق مسأله وقت وبيتعود زوجي عليه والطبخ .... أبشركم الخدامه كلها 15 يوم وجايه وخليها هي تستلم المطبخ وتفكني من قرفه .. وهو بسلامته بياكل الله يحيه مو ماكل الله يحفظه لأني بصراحه أكرهه الطبخ وما أطيقه ولا أعرف له سواء طبقته من كتب والا على تعليمات أمي... |
اقتباس:
:eek: :eek: :eek: :eek: هلا وغلا ياريم معقووووله ريم تقول الكلام هذا مستحيل لا عمري وش هذا شغاله تطبخ الزوجك حراام عليك اذا بتطبخ وتنظف له وش باقي لك الفراش بس لا قلبي صدقين ماينفع وبتستمرين بنظر زوجك ناقص وكل مايشوف طبخ احد من اقاربه او زوجاته ربعه صدقين بيغار منهم لو لان قالك عادي مع الايام بيمل لاياقلبي حاول وصدقين بتتعلمين حولي تطالعين الناس وهم يطبخون بتستفيدين ومره يخرب ومرتين بس بنهايه بينفع مافي احلا من طبخ الزوجه بيفرح زوجك فيك حاولي ياقلبي بتحصلين الطبخ سهل والذيذ وبتشتاقين انت الطبخ |
اقتباس:
والله لو امووووت من الجوع وآكل اضافيري ماأكلت ولاشربت من يد الخدامه ولا كاسة مويه :( وليه تزوجت ؟؟؟ |
أعتذر إن كنتُ كتبتُ في المكان الخطأ ... ولكني لم أستطع البقاء صامتاً أمام خطأ رهيب ... اقتباس:
اعذريني أختِ المباركة الفاضلة "ريم 2006 " أنتِ تسيرين في غير الاتجاه الصحيح تماماً ..... والله يوفقك |
أنا أشووووف كثير عصبوا لما قلت الشغاله تطبخ!!!
وش فيها بالاساس لما تطبخ الشغاله .. أغلب الحريم تطبخ الشغاله عنهم وكثير أعرفهم أولهم أمي وغيرها وغيرها واشوف رجالهم ياكلون وعادي وأمورهم ماشيه زي العسل واذا على قولتك الشغاله تنظف وترتب وش بقى لي غير ( الفراش ) وش فيها اذا ما بقى لي غير الفراش بصراحه بيبقى لي تربيه بنتي اللي في بطني و زوجي أدلعه بكل شي يبغاه الا (( الطبــــــخ )) لأن أستحاله اتعلمه تعبت وانا احاول ولا فيه فايده مليــــــــت وزهقت وطقت كبدي من كثر كتب هالطبخ ومن نصايح أمي عن شوؤن المطبخ وبما أن أبوي الله يحفظه ويخليه لي تبرع لي بتقديم الخادمه بناء على موافقه زوجي بالموضوع .. فالحمدلله الأمور بتتحسن من ناحيه شغل المطبخ ..... |
واللي يقول ليه تزوجت !!
أنت متزوج عشان تاكل ؟؟ طيب ما أنت تاكل في بيت أهلك وش لك بوجع الراس والزواج والمسؤليات اذا انت محصل الأكل في بيت أهلك ...!! صح والا لا .. الزواج مو كله أكـــل وطبخ ونفخ ... أعرف زوجات راح عمرها وأنقص ظهرها وهي تطبخ لزوجها لحد ما طلعت الكرش 6 أمتار قدام وبالنهايه يتزوج عليها بحجه أنها مو متفرغه له بس متفرغه للطبخ والنفخ وشغل المطبخ... وش أستفادت غير أنها اهملت نفسها على حساب تسد جوع زوجها وتملى بطنه من ما لذ وطاب وبالنهايه تزوج عليها !!!! |
بصراحه مارقريت اللي كاتبته لكن بخليه عندي وارجعله وقت اللزوم<<< وقت مايجي العريس المنتظر
|
| الساعة الآن 03:56 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©